Ke Kak Likihete Siohwa Erein Kahpwal kan

1-2. (a) Ia duwen atail irair eh duwehte ahn mehn Suhs ko me pwurala Serusalem? (b) Menlau kawehwehda ekei kahpwal kan me mehn Suhs ko lelohng. (Menlau kilang koakono “Ni Mwehin Akkai, Sekaraia, oh Esra.”)

KE KIN ekei pak pwunodki dahme pahn wiawi ni ahnsou kohkohdo? Mwein sohla omw doadoahk oh ke kin pwunodki ia duwen omw pahn apwalih omw peneinei. Ele ke kin pwunodki omw peneinei pwehki irair apwal en palien politik kan, mie kalokolok, de uhwong pwehki atail doadoahk en kalohk. Ke ahneki soangen kahpwal pwukat? Ma ei, ke pahn paiekihda omw kilang duwen Siohwa eh ketin sewese mehn Israel kan mahso ni ahnsou me re lelohng soangen kahpwal pwukat.

² Mehn Suhs kan me mi Papilon mahso anahne pwoson laud pwehn kohkohsang arail kepwe kan oh mour nsenamwahu nan Papilon oh seiloakla nan sahpw ehu me pali laud en irail sohte nohn ese. Ni arail lella wasao, sohte pwand irail tepida ahneki kahpwal en apwalih arail peneinei. Pil mie kahpwal kan nan Wehin Persia, oh mie uhwong kan sang kahnimw kan me kapilirailpene. Ekei irail apwalki en nsenohkihte arail pahn kauwada sapwellimen Siohwa tehnpas sarawio. Eri, mpen pahr 520 Mwohn Krais, Siohwa ketin kadarala soukohp riemen, Akkai oh Sekaraia, pwehn sewese aramas ako en pwurehng kaudokiong Siohwa ni ngoang. (Ak. 1:1; Sek. 1:1) Kitail pahn kilang me dahme soukohp ko kangoangehki aramas ako uhdahn imwila mwahu. Ahpw kereniong sounpar 50 mwuri, irail pil pwurehng anahne mehn kangoang. Eri soun copy koahieko Esra seiloak sang Papilon kohla Serusalem pwehn kangoange sapwellimen Siohwa aramas akan ren mwohneki mahs arail kaudokiong Siohwa.—Esra 7:​1, 6.

3. Peidek dah kan me kitail pahn koasoiapene? (Lepin Padahk 22:19)

³ Kokohp kan en Akkai oh Sekaraia sewese sapwellimen Koht aramas akan mahso pwehn doulahte likih Siohwa ni ahnsoun uhwong. Duwehte met, kokohp ko pil kak sewese kitail rahnwet en likih me Siohwa pahn ketin sewese kitail mendahki kahpwal kan. (Wadek Lepin Padahk 22:19.) Ni atail pahn koasoiapene mahsen en Koht me Akkai oh Sekaraia padahkihong aramas ako oh kilang mehn kahlemeng en Esra, kitail pahn sapengala peidek pwukat: Ia duwen mehn Suhs ko ar mwekidki kahpwal kan me re lelohng? Dahme kahrehda kitail anahne mwohnkihte kupwuren Koht ni ahnsou me kitail lelohng kahpwal kan? Oh ia duwen atail kak kakehlaka atail likih Siohwa ni ahnsou apwal kan?

KAHPWAL KAN KAHREHIONG MEHN SUHS KAN EN SOHLA NGOANG

4-5. Dahme kakete kahrehiong mehn Suhs ko en sohla ngoangki onohnsapahldahn tehnpas sarawio?

⁴ Ni mehn Suhs ko ar lella Serusalem, mie doadoahk tohto me re anahne wia. Irail mwadangete pwurehng kauwada sapwellimen Siohwa pei sarawio oh wiahda poahsoan en tehnpas sarawio. (Esra 3:​1-3, 10) Ahpw sohte pwand, irail sohla ngoang. Dahme kahrehda? Likin doadoahk en onohnsapahlih tehnpas sarawio, irail pil anahne kauwada imwarail, koadoahkihada mwetuwel, oh kamwenge arail peneinei. (Esra 2:​68, 70) Patehng met, irail lelohng uhwong sang arail imwintihti kan me songosong en kauhdi arail pahn pwurehng kauwada tehnpaso.—Esra 4:​1-5.

⁵ Irail pil iang apwalkihda kahpwal en mwohni oh irair suwed en palien politik en wasao. Sapwarailo ahnsowo wialahr kisehn Wehin Persia. Mwurin Nanmwarki en Persia Sairus mehla pahr 530 Mwohn Krais, nanmwarkio mwurin ih, Cambyses, men kalowehdi Isip. Nindoken eh seiseiloakla Isip, nah sounpei ko ele kihsang mehn Israel ko kanarail mwenge, pihl, oh imwarail kan, oh kalaudehla ahn mehn Israel ko kahpwal kan. Ni ahnsou me nanmwarkio mwurin Cambyses, Darius I, tepida kaunda, pil miehte kahpwal tohto. Soangen irair pwukat kahrehiong mehn Suhs tohto en pwunodki ia duwen arail pahn apwalih arail peneinei. Pwehki kahpwal ko koaros me re lelohng, ekei irail medewe me ahnsowo sohte wia ahnsou mwahu en onohnsapahlihada sapwellimen Siohwa tehnpas sarawio.—Ak. 1:2.

6. Nin duwen me Sekaraia 4:​6, 7 mahsanih, kahpwal dah teikan me mehn Suhs ko lelohng, oh dahme Sekaraia kamehlelehiong irail?

⁶ Wadek Sekaraia 4:​6, 7. Likin kahpwal en mwohni oh irair apwal en palien politik ko, mehn Suhs ko pil anahne dadaur pahn kalokolok. Nan pahr 522 Mwohn Krais, arail imwintihti kan kahrehiong koperment en Persia en kauhdi arail doadoahk ni tehnpas sarawio. Ahpw Sekaraia kamehlelehiong mehn Suhs ko me Siohwa pahn ketin doadoahngki sapwellime manaman me uhdahn kehlail pwehn sewese irail mendahki kahpwal kan. Nan pahr 520 Mwohn Krais, Nanmwarki Darius mweidada irail en pousehlahte wia doadoahko oh pil kihong irail mwohni pwehn wia met. E pil ruwese kepina en wasa ko ren sewese irail.—Esra 6:​1, 6-10.

7. Ia duwen Siohwa eh ketin kapaiahda mehn Suhs ko me pwurala Serusalem ni ahnsou me re kin mwohnkihte wia kupwure?

⁷ Siohwa ketin doadoahngki Akkai oh Sekaraia pwehn inoukihong sapwellime aramas akan me e pahn ketin sewese irail ma re kin mwohnkihte doadoahk en onohnsapahlo. (Ak. 1:​8, 13, 14; Sek. 1:​3, 16) Pwehki kangoang sang soukohp ko, mehn Suhs ko pwurehng tepida koadoahki tehnpas sarawio nan pahr 520 Mwohn Krais, oh kereniong sounpar limau mwurin mwo, irail kanekehla. Pwehki irail nsenohkihte kupwuren Koht mendahki kahpwal tohto, Siohwa ketin sewesehkin irail dahme re anahne pwehn momour oh pil en karanihete ih. Pwehki met, irail kin kaudokiong Siohwa ni peren.—Esra 6:​14-16, 22.

MEDEWEHTE OMW KIN WIA KUPWUREN KOHT

8. Ia duwen mahsen en Akkai 2:4 eh kak sewese kitail en medewehte en wia kupwuren Koht? (Pil kilang nting tikitik kan me mi pah.)

⁸ Pwehki kahn kamakam kowahlapo kerendohr, e uhdahn kesempwal en taman me kitail anahne peikiong kehkehliko en iang kalohk. (Mark 13:10) Ahpw, ele e apwal en kin medewehte atail doadoahk en kalohk ma kitail kin lelohng kahpwal en mwohni de uhwong nan kalohk. Dahme kak sewese kitail en mwohnkihte mahs doadoahk en Wehio? Kitail anahne likihete me “Siohwa kaunen karis en sounpei”b kin ketin ieiang kitail. E pahn ketin sewese kitail ma kitail doulahte mwohneki mahs kupwure laudsang pein nsenatail. Eri, sohte mehkot me kitail en perki.—Wadek Akkai 2:4.

9-10. Ia duwen pwopwoud ehu ara kilang mehlelpen mahsen en Sises ko me kileldi nan Madiu 6:33?

⁹ Medewehla mehn kahlemeng en Oleg oh Irina,c pwopwoud ehu me wia pioneer kei. Mwurin ara keseula pwehn sewese mwomwohdiso ehu nan ehu wasa, sohla ara doadoahk pwehki susuwedlahn kahpwal en mwohni nan sahpwo. Mendahki ira sohte kak diar doadoahk erein sounpar ehu, ira kin kalapw pehm sapwellimen Siohwa limpoak oh sawas, oh riara Kristian kan pil kin sewese ira. Ia duwen ara kak dadaurete erein kahpwal ko? Oleg, me nin tapio mworusala, koasoia, “En soupisengki doadoahk en kalohk sewesei kiht en medemedewe dahme keieu kesempwal nan at mour.” Nindoken ara kin doulahte rapahki ara doadoahk, ira pil kin soupisengki ara doadoahk en kalohk.

¹⁰ Ehu rahno ni ara pwurala imwarao sang ara kalohk, ira esehda me kompoakepahra keren men seiloangki mwail 100 pwehn wadohng ira ehdin mwenge riau. Oleg koasoia: “Rahno, se pil pwurehng kilang ia uwen Siohwa eh kin ketin apwalih kiht, oh duwen mwomwohdiso ar kin nsenohkin kiht. Se uhdahn kamehlele me Siohwa sohte kin ketin meliehla sapwellime ladu kan, mehnda ma re medewe me arail irairo sohte pahn mwahula.”—Mad. 6:33.

11. Dahme kitail kak kasik ma kitail kin medewehte en wia kupwuren Koht?

¹¹ Siohwa ketin kupwurki kitail en kin medewehte aramas akan ar pahn komourala ni atail doulahte katohnpadahk. Nin duwen me parakrap 7 kasalehda, Akkai kangoange sapwellimen Siohwa aramas akan en tepida koadoahke tehnpas sarawio. Ma re wia met, Siohwa ketin inoukihda en ‘kupwuramwahwih irail.’ (Ak. 2:​18, 19) Kitail pil kak kamehlele me Siohwa pahn ketin kapaiahda atail nannanti ma kitail kin mwohnkihte doadoahko me e ketikihong kitail en wia.

IA DUWEN ATAIL EN KALAUDEHLA ATAIL LIKIH SIOHWA

12. Dahme kahrehda Esra oh irail me iangih seiloakla Serusalem anahne pwoson laud?

¹² Nan pahr 468 Mwohn Krais, Esra iang keriaun pwihn en mehn Suhs kan seiloak sang Papilon kohla Serusalem. Pwehn wia seiloak wet, Esra oh me iangih ko anahne ahneki pwoson laud. Irail pahn seiloak nanial keper kan oh weuwa kiden kohl oh silper kan me aramas toukihda ong tehnpaso. Met pahn mengeiong sounpirap kan en pirapa irail. (Esra 7:​12-16; 8:31) Patehng met, re mwadang esehda me Serusalem pil keper. Aramas malaulau kin kousoan wasao, oh kehl kan oh ewen kehl kan anahne pwurehng wiawihda. Dahme kitail kak sukuhlkihsang Esra duwen en kalaudehla atail likih Siohwa?

13. Ia duwen Esra eh kalaudehla eh likih Siohwa? (Pil kilang nting tikitik kan me mi pah.)

¹³ Esra kilangehr ia duwen Siohwa eh ketin sewese sapwellime aramas akan ni ahnsou apwal. Sounpar kei mwowe, nan pahr 484 Mwohn Krais, Esra ele mi Papilon ni ahnsou me Nanmwarki Ahasuerus ruwese me mehn Suhs koaros nan Wehin Persia pahn kamakamala. (Est. 3:​7, 13-15) Mouren Esra oh mehn Suhs koaros mihla nan keper! Ni arail rongada met, re uhdahn nsensuwedla me kahrehda re sohla mwenge oh kin mwahmwahiei ni ar peki sapwellimen Siohwa sawas. (Est. 4:3) Medewehla ia ahn Esra oh ienge mehn Suhs ko pepehm ni ahnsou me irail kan me pilahn en kemehla mehn Suhs ko uhd kamakamala a kaidehn mehn Suhs ko! (Est. 9:​1, 2) Dahme wiawi ahnsowo ele kaunopada Esra ong ahnsou apwal kan mwuhr oh kalaudehla eh likih me Siohwa pahn ketin pere sapwellime aramas akan.d

14. Dahme sister men sukuhlki ni eh kilang Siohwa eh ketin apwalih ih ni ahnsou apwal?

¹⁴ Ni atail kilang Siohwa eh kin ketin apwalih kitail ni ahnsou apwal kan, atail likih ih kin kehlailla. Medewehla mehn kahlemeng en Anastasia, me kin mi Palimese en Iurop. E sohla doadoahk pwehki e men kolokolete eh soupoupali. E koasoia: “Ahnsowo ehdin nan ei mour me sohla nei mwohni.” Ih eri pil koasoia: “I kapakap ong Siohwa oh kilang uwen eh ketin apwalih ie mwahu. Ma I pwurehng sohla ei doadoahk, I sohte pahn perki mehkot. Ma Semeio nanleng ketin apwalih ie rahnwet, e pahn pil ketin apwalih ie lakapw.”

15. Dahme sewese Esra en likihete Siohwa? (Esra 7:​27, 28)

¹⁵ Esra kilang ia duwen Siohwa eh ketin sewese ih. Ni Esra eh medewehla duwen ahnsou kan me Siohwa ketin sewese ih, met sewese en likihete Ih. Tehk mahsen pwukat, “Koht ketin kakehleiehda.” (Wadek Esra 7:​27, 28.) Nan pwuhken Esra, e doadoahngki soangen lokaia kan me duwehte met pak weneu.—Esra 7:​6, 9; 8:​18, 22, 31.

16. Soangen irair dah kan me kitail ele kak kilang me Siohwa kin uhdahn ketin sewese kitail? (Pil kilang kilel.)

¹⁶ Siohwa kak ketin sewese kitail ni atail lelohng irair apwal ehu. Karasepe, ni atail kin peki rehn atail kaunen doadoahko ma kitail kak kommoal pwehn iang towehda mihting tohrohr ehu, de ni atail peki en wekidala atail awahn doadoahk pwe kitail en kak iang towehda atail mihting kan koaros, kitail kin kak kilang duwen Siohwa eh kin ketin sewese kitail. Imwilahn met kakete mwahusang dahme kitail kasik. Oh atail likih Siohwa pahn kehlailla.

17. Ia duwen Esra eh kasalehda aktikitik ni ahnsou apwal kan? (Menlau kilang kilel ni kilin Kahn Iroir wet.)

¹⁷ Esra kapakapki sapwellimen Siohwa sawas. Ni ahnsou me e kin pwunodkihda soahng kan me e anahne wia, ni aktikitik Esra kin kapakap ong Siohwa. (Esra 8:​21-23; 9:​3-5) Pwehki Esra likih Siohwa, meteikan pil men sewese oh kahlemengih eh pwoson. (Esra 10:​1-4) Ni atail kin pwunodki ia duwen atail en apwalihala atail anahn kan, de pwunodki keper de lelohng atail peneinei, kitail anahne kapakap ong Siohwa ni likilik.

18. Dahme kak sewese kitail en kalaudehla atail likih Siohwa?

¹⁸ Ma ni aktikitik kitail kin rapahki sapwellimen Siohwa sawas oh pil ale sawas sang riatail Kristian kan, atail likih Koht pahn laudla. Erika, me naineki seri silimen, kin ahnsou koaros likih me Siohwa pahn ketin sewese ih, pil ni ahnsou me kahpwal lelohng ih. Erein ahnsoukiste, nah seri me e saikinte kaipwihdi oh eh pwoudo mehla. E koasoia dahme wiawihong ih: “Ke sohte kak ese ia duwen Siohwa pahn ketin seweseiuk. Sawas kak pwarada ni ahl kapwuriamwei kan. I esehda me Siohwa kin ketin doadoahngki kompoakepahi kan pwehn sapengala ei kapakap tohto sang ni arail lokaia oh wiewia kan. Ma I kin ndaiong kompoakepahi kan dahme wiewiawi nan ei mour, e kak mengei ong irail en sewese ie.”

LIKIHETE SIOHWA LAO LEL NI IMWI

19-20. Dahme kitail sukuhlkihsang mehn Suhs ko me sohte kak pwurala Serusalem?

¹⁹ Kitail pil kak sukuhlki mehn kasukuhl kesempwal sang mehn Suhs ko me sohte kak pwurala Serusalem. Ekei irail sohte kak pwurala pwehki irail mahlahr, soumwahu, de irair en arail peneineio kahrehda irail sohte kak. Ahpw re perenki kihong me pwurala ko soahng tohto me anahn ong onohnsapahldahn tehnpas sarawio. (Esra 1:​5, 6) E mwomwen me mpen sounpar 19 mwurin keieun pwihn ar lella Serusalem, irail kan me mihmihte Papilon kin kadakadaralahte sawas en mwohni Serusalem.—Sek. 6:10.

²⁰ Mehnda ma kitail sohte kak wia uwen me kitail men wia ong Siohwa, kitail kak kamehlele me e kin ketin kalahnganki atail nannanti koaros en kaperenda ih. Ia duwen atail ese met? Ni mwehin Sekaraiao, Siohwa ketin mahsanihong sapwellime soukohpo en wiahda nihn ehu sang kohl oh silper me pekedersang irail kan me mihmihte Papilon. (Sek. 6:11) “Nihno” pahn wia “mehn ketemen ehu” ong irail pwehki arail sawas laud kan. (Sek. 6:14) Kitail kak kamehlele me Siohwa sohte pahn ketin manokehla atail nannanti en papah ih erein ahnsou apwal kan.—Ipru 6:10.

21. Dahme pahn sewese kitail en likih Siohwa sohte lipilipil dahme pahn wiawi ni ahnsou kohkohdo?

²¹ Kitail pahn pousehlahte lelohng kahpwal kan ni imwin rahn pwukat, oh e kakete pil suwedla ni ahnsou kohkohdo. (2 Tim. 3:​1, 13) Ahpw, kitail sohte anahne pwunod laud. Tamataman sapwellimen Siohwa mahsen ong sapwellime aramas akan ni mwehin Akkai: “I kin ieiang kumwail . . . Kumwail dehr masak.” (Ak. 2:​4, 5) Kitail pil kak kamehlele me Siohwa pahn ketin ieiang kitail erein atail wia uwen atail kak pwehn wia kupwure. Sang ni atail doadoahngki mehn kasukuhl kan me kitail sukuhlki sang soukohp Akkai oh Sekaraia oh mehn kahlemeng en Esra, kitail pahn likihete Siohwa sohte lipilipil soangen kahpwal dah kan me kitail kakete lelohng ni ahnsou kohkohdo.