Ia Duwen Mwomwohdiso Eh Alasang en Siohwa Madamadau ong me Wiahda Dihp

1. Dahme Siohwa ketin kupwurki ong aramas koaros?

SIOHWA ketin kapikkitailda en ahneki koahiek en wiahda pein atail pilipil kan. Kitail kin wiahda pilipil kan rahn koaros. Ekei pilipil kin kesempwal a ekei soh. Pilipil me keieu kesempwal me emen kak wiahda iei en inoukihong Siohwa eh mour oh wiahla kisehn sapwellime peneinei. Siohwa ketin kupwurki koaros en wia met. Dahme kahrehda? Pwehki e ketin poakohng aramas oh kupwurki dahme keieu mwahu ong irail. E ketin kupwurki irail en ahneki nanpwungmwahu reh oh mour kohkohlahte.—Deud. 30:​19, 20; Kal. 6:​7, 8.

2. Ia sapwellimen Siohwa pepehm ong irail kan me sohte koluhkihla dihp laud me irail wiahda? (1 Sohn 2:1)

² Ahpw, Siohwa sohte kin ketin idingkihong aramas en papah ih. E ketin mweidohng emenemen en pein pilada dahme e pahn wia. Ia duwen ma Kristian papidaisla men kauwehla sapwellimen Koht kosonned oh wiahda dihp laud? Ma e sohte koluhla, mwomwohdiso anahne kihsang ih nanpwungarail. (1 Kor. 5:13) Ahpw mehnda ma e sohla wia kisehn mwomwohdiso, Siohwa kin uhdahn ketin kupwurki me aramaso en koluhla oh pwurodo reh. Ni mehlel, ehu kahrepe kesempwal me e ketikihdahki pweinen pweipwei sapahlo iei pwe en kak ketin mahkohng irail kan me koluhkihla diparail kan. (Wadek 1 Sohn 2:1.) Siohwa uhdahn wia Koht limpoak men me kin ketin kangoange irail kan me wiahda dihp laud ren koluhla.—Sek. 1:3; Rom 2:4; Seims 4:8.

3. Dahme kitail pahn koasoiapene nan iren onop wet?

³ Siohwa ketin kupwurki kitail en ahneki soangen madamadauohte me e sapwellimanki ong dihp oh pil irail kan me wiahda dihp laud. Iren onop wet pahn koasoia ia duwen atail kak wia met. Ni omw wadek iren onop wet, menlau tehk (1) ia duwen mwomwohdisohn tepin Kristian ko nan Korint eh apwalihala dihp laud ehu me emen wiahda, (2) kaweid dahieu me wahnpoaron Pohl kihda ni ahnsou me me wiahda dihp laudo koluhla, oh (3) dahme koasoipen Paipel wet kasalehda duwen sapwellimen Siohwa madamadau ong Kristian kan me wiahda dihp laud ehu.

IA DUWEN TEPIN KRISTIAN KO AR APWALIHALA DIHP LAUD EHU

4. Dahme wiawi nan mwomwohdiso en Korint? (1 Korint 5:​1, 2)

⁴ Wadek 1 Korint 5:​1, 2. Erein kesiluh en eh seiloak nin duwen misineri men, Pohl rongada rohng suwed ehu duwen mwomwohdiso kapwo nan Korint. Brother men nan mwomwohdisou kin wia nsenen pwopwoud rehn en eh pahpao pwoudo. Soangen tiahk wet inenen kapwuriamwei oh “sohte pil kin dierek rehn mehn liki kan”! Ahpw mwomwohdisou medewe me e sohte sapwung me brother me wiewia tiahk wet en mihmihte nan mwomwohdiso. Mwein ekei nan mwomwohdisou medewe me irail kin kasalehda mahk kalahngan duwehte Siohwa kin ketin wia ong aramas soh unsek kan. Ahpw Siohwa sohte ketin kupwurki tiahk sapwung en wiawi nanpwungen sapwellime aramas akan. Pwehki en brothero tiahk sapwungo, ekei me sohte kin kaudokiong Siohwa uhdahn pwuriamweikihla oh ele nda soahng suwed kan duwen sapwellimen Siohwa aramas akan. Oh ma brothero mihmihte nan mwomwohdisou, Kristian teikan kakete tepida alasang ih. Eri, dahme Pohl kaweidki mwomwohdisou en wia?

5. Dahme Pohl padahkihong mwomwohdisou en wia, oh ia wehwehn eh kaweido? (1 Korint 5:13) (Pil kilang kilel.)

⁵ Wadek 1 Korint 5:13. Siohwa ketin kamwakid Pohl en ntingihada kisinlikou ehu ong mwomwohdisou oh kawehwehda me mwomwohdisou anahne kihsang nanpwungarail me sohte koluhlao. Ia pahn ahn Kristian lelepek ko ar wiewia ong me wiahda dihp laudo? Pohl padahkihong irail en ‘uhdihsang arail werekiong.’ Ia wehwehn met? Pohl kawehwehda me kehkehlik wet pil pidada en “dehr pil iang soangen aramas menet mwenge.” (1 Kor. 5:11) Ni atail kin iang emen mwenge, met kak elehieng kitail en kalaudehla atail werekiong ih. Eri, e sansal me Pohl kaweidki mwomwohdisou en dehr werekiong ohlo. Met pahn pere mwomwohdisou sang ahn ohlo wiewia suwed kan. (1 Kor. 5:​5-7) Pil ehu, met kakete sewese ohlo en wehwehkihda uwen laud en dihp me e wiahdao, oh ele e pahn suwedkihda oh men koluhla.

6. Ia duwen mwomwohdisou eh mwekidki nein Pohl kisinlikowo, oh dahme ohlo wia pwehki met?

⁶ Mwurin Pohl eh kadarala nah kisinlikowo rehn Kristian kan nan Korint, e tepida medewe dahme mwomwohdisou pahn wia. Kedekedeo, Taitus wadohng ih rohng mwahu me uhdahn kaperenda ih. Mwomwohdisou idawehn en Pohl kaweid ko oh kihsang nan mwomwohdisou ohl me wiahda dihp laudo. (2 Kor. 7:​6, 7) Patehng met, sounpwong kei mwurinte Pohl kadarala keieun nah kisinlikowo, ohlo koluhla! E wekidalahr eh wiewia oh madamadau oh tepida idawehn sapwellimen Siohwa koasoandi pwung kan. (2 Kor. 7:​8-11) Dahme Pohl uhd padahkihong mwomwohdisou en wia?

IA PAHN AHN MWOMWOHDISOU WIEWIA ONG OHL ME KOLUHLAO

7. Dahme ohlo wia mwurin mwomwohdisou eh kihsang ih nanpwungarail? (2 Korint 2:​5-8)

⁷ Wadek 2 Korint 2:​5-8. Pohl koasoia me “peneu wet me pali laud en kumwail kihongehr itarohng soangen aramas menet.” Met wehwehki me mwurin ohlo eh sohla wia kisehn mwomwohdiso, e wehwehkihda me e anahne koluhla. Oh pwehki e koluhlahr, mwomwohdisou sohte anahne doulahte panapanawih.—Ipru 12:11.

8. Dahme Pohl uhd padahkihong mwomwohdisou en wia?

⁸ Eri, pwehki ohlo koluhlahr, Pohl kaweidki elder ko ren mweidohng ohlo en pwurodo nan mwomwohdisou. E pil ndaiong irail en “mahkohng ih ni kadek oh kansenamwahwihala,” oh ‘kamehlelehiong ih arail limpoak.’ Pohl men mwomwohdisou en kasalehiong ohlo sang ni arail koasoi oh wiewia me re uhdahn mahkohngehr oh pil poakohng ih. Eri, ohlo kak kamehlele me irail uhdahn perenkihda eh pwurodo.

9. Dahme kahrehda e kakete apwal ong ekei en mahkohng ohl me koluhlahro?

⁹ Ele e apwal ong ekei en kadek ong ohlo ni eh pwurodo nan mwomwohdiso. Dahme kahrehda kitail kak ndahki met? Ele ekei lingeringerkihte eh kahrehda kahpwal ong mwomwohdisou. Oh mwein ekei pil nsensuwedkihte eh kamedekihirailla. Irail kan nan mwomwohdisou kin uhdahn doadoahk laud en peikiong sapwellimen Siohwa kehkehlik kan. Eri ekei ele medewe me e sohte pahrek en mweidohng emen me wiahda soangen dihp laudo en pwurodo nan mwomwohdiso. (Pil kilang Luk 15:​28-30.) Ahpw dahme kahrehda e kesempwal ong mwomwohdisou en kasalehda limpoak mehlel ong riarailo me pwurodo?

10-11. Dahme kakete wiawi ma elder ko sohte mahkohng ohl me koluhlao?

¹⁰ Medewehla dahme kakete wiawi ma elder ko sohte mweidohng ohl me uhdahn koluhlao en pwurodo nan mwomwohdiso de ma mwurin eh pwurodo, mwomwohdisou sohte kasalehiong me irail poakohng ih. En ohlo “nsensuwed laud” kakete powehdi ih. E kakete medewe me e solahr kak pwurehng papah Siohwa. E pil kakete uhdihsang eh nannanti en kamwahwihala eh nanpwungmwahu rehn Koht.

¹¹ Suwedsang met, ma Kristian ko nan mwomwohdisou sohte mahkohng ohl me koluhlao, met kak kauwehla pein arail nanpwungmwahu rehn Siohwa. Dahme kahrehda? Pwehki irail sohte pahn kahlemengih Siohwa ni eh kin ketin mahkohng me dipan kan me koluhlahr. Ahpw irail pahn alasang Sehdan me kin lemei oh sohte kasalehda mahk kalahngan. Irail pahn mweidohng Tepilo en doadoahngki irail pwehn kauhdi ohlo sang papah Siohwa.—2 Kor. 2:​10, 11; Ep. 4:27.

12. Ia duwen mwomwohdisou eh kak kahlemengih Siohwa?

¹² Eri, ia duwen mwomwohdisou nan Korint eh kak kahlemengih Siohwa, ah kaidehn Sehdan? Sang ni arail mahkohng me koluhlahro duwehte me Siohwa ketin wia. Tehk dahme ekei sounnting en Paipel koasoiahki duwen Siohwa. Depit koasoia me Siohwa kin ketin “kupwur mwahu oh diren mahk.” (Mel. 86:5) Maika ntingihedi: “Maing KAUN, sohte emen koht me duwehte komwi; komwi kin ketin mahkikihong dipen sapwellimomwi aramas akan.” (Maika 7:18) Oh Aiseia koasoia: “Aramas suwed kan en sohpeisang ar mour suwed, oh wekidala ar lamalam. Re en sohpeiong KAUN-O, atail Koht; pwe ih me kupwurkalahngan oh kin mwadang mahkikihong kitail dipatail kan.”—Ais. 55:7.

13. Dahme kahrehda e pwung en mweidohng ohl me koluhlahro en pwurodo nan mwomwohdiso? (Menlau kilang koakono “Iahd me Ohlo nan Korint Pwurodo nan Mwomwohdiso?”)

¹³ Pwehn kahlemengih Siohwa, mwomwohdisou nan Korint anahne kasamwo ohl me koluhlahro oh kamehlelehiong me irail poakohng ih. Sang arail idawehn ahn Pohl kaweido en kasamwo ohl me koluhlahro, mwomwohdisou kasalehda arail “kin peik ni mehkoaros.” (2 Kor. 2:9) Mehlel, mendahki mwomwohdisou kihsang ohlo nanpwungarail erein sounpwong keite, e koluhla. Eri sohte anahnepen elder ko en awih mwohn arail mweidohng en pwurodo nan mwomwohdisou.

KASALEHDA SAPWELLIMEN SIOHWA PWUNG PAHREK OH MAHK KALAHNGAN

14-15. Dahme kitail sukuhlkihsang dahme wiawi nan Korint? (2 Piter 3:9) (Pil kilang kilel.)

¹⁴ Koasoipen mwomwen mwomwohdiso en Korint mahso eh apwalihala dihp laud ehu ntingdi nan Paipel “pwe en padahkih kitail.” (Rom 15:4) Kitail sukuhlki sang koasoi pwoatet me Siohwa sohte kin ketin mweidohng irail kan me wiahda dihp laud oh sohte koluhla ren mihmihte nan mwomwohdiso. Ele ekei kin medewe me pwehki Siohwa kin ketin kasalehda mahk kalahngan, e pahn ketin mweidohng emen me sohte koluhla en mihmihte nan mwomwohdiso, ahpw kaidehn ih mwomwen Siohwa eh kin ketin kasalehda mahk kalahngan. Mendahki Siohwa kin ketin kasalehda mahk kalahngan, e sohte kin ketin kupwurki soangen wiewia koaros. Sapwellime koasoandi ong dahme pwung oh dahme sapwung sohte kin wekila. (Sud 4) Ma Siohwa ketin mweidohng me sohte koluhla kan en mihmihte nan mwomwohdiso, met kaidehn kasalepen mahk kalahngan, pwehki koaros nan mwomwohdiso kakete mihla nan keper.—Lep. Pad. 13:20; 1 Kor. 15:33.

¹⁵ Ahpw kitail sukuhlki me Siohwa sohte ketin kupwurki mehmen en kasohrala. E ketin kupwurki doarehla aramas akan ni ahnsou me kak. E ketin kasalehda mahk kalahngan ong aramas akan me wekidala elen arail madamadau oh wiewia oh men kamwahwihala arail nanpwungmwahu reh. (Esek. 33:11; wadek 2 Piter 3:9.) Eri, ni ohlo nan Korint eh koluhla oh wekidala eh wiewia kan, Siohwa ketin doadoahngki Pohl en kawehwehiong mwomwohdisou me irail en mahkohng ohlo oh kasamwo ih nan mwomwohdisou.

16. Ia omw pepehm duwen Siohwa mwurin omw sukuhlki duwen dahme wiawi nan Korint?

¹⁶ Atail kousapahlih duwen dahme wiawi nan Korint sewese kitail en kilang sapwellimen Siohwa limpoak, pwung, oh pwung pahrek. (Mel. 33:5) Ia duwe, met sou kin kamwakid kitail en kalaudehla atail kapinga Koht? Kitail kin uhdahn kalahnganki sapwellime mahk kalahngan pwehki kitail koaros dipan oh anahne sapwellime mahk. Kitail pil kalahngankihong Siohwa eh ketikihda pweinen pweipwei sapahlo pwe en kak ketin mahkohng dipatail kan. Ia uwen kansenamwahu en ese me Siohwa uhdahn kin ketin poakohng sapwellime aramas akan oh kupwurki dahme keieu mwahu ong irail!

17. Dahme kitail pahn koasoiapene nan iren onop kan en mwuhr?

¹⁷ Rahnwet, ma emen wiahda dihp laud ehu, ia duwen elder kan nan mwomwohdiso ar kak kahlemengih sapwellimen Siohwa limpoak oh sewese aramaso en koluhla? Dahme mwomwohdiso anahne wia ni elder kan ar pilada en kihsang de kapwurehdo aramaso nan mwomwohdiso? Peidek pwukat pahn pasapengla nan iren onop kan en mwuhr.