Sawas ong Irail kan me Mwomwohdiso Kihsang Nanpwungarail

1-2. (a) Ia sapwellimen Siohwa pepehm ong irail kan me kin wiahda dihp laud oh sohte koluhla? (b) Dahme Siohwa ketin kupwurki me dipan kan en wia?

SIOHWA sohte kin ketin kupwurki soangen wiewia koaros. E ketin kalahdeki dihp. (Mel. 5:​4-6) Siohwa ketin kupwurki kitail en peikiong sapwellime kehkehlik kan nan Paipel. Siohwa mwahngih me kitail soh unsek oh kitail sohte kak peikiong ih ni unsek. (Mel. 130:​3, 4) Ni ahnsowohte, e sohte ketin kupwurki ‘aramas dipan kan, me wekidala sapwellime kadek sapan ong ni kahrepen arail kin wia me suwed ni ngidingid.’ (Sud 4) Paipel mahsanih duwen “kasohralahn aramas suwed kan” nan sapwellimen Koht mahwen en Armakedon.—2 Pit. 3:7; Kaud. 16:16.

² Ahpw, Siohwa sohte ketin kupwurki emen en kasohrala. Nan Kahn Iroir wet, kitail sukuhlki me Paipel kasalehda ni sansal me e ketin “kupwurki aramas koaros en koluhla.” (2 Pit. 3:9) Duwehte Siohwa, elder kan kin kanengamah ni arail song en sewese me dipan men en koluhla oh pwurehng karanihala Siohwa. Ahpw ekei pak me dipano sohte kin koluhla. (Ais. 6:9) Mendahki elder kan kin pwurupwurehng song en sewese me irail kan me wiahda dihp, ekei irail kin pousehla wiewia me suwed. Dahme elder kan anahne wia nan soangen irairo?

‘KIHSANG ARAMAS SUWEDO’

3. (a) Dahme Paipel mahsanih me anahne wiawihong emen me sohte koluhkihla dipe? (b) Dahme kahrehda kitail kak nda me e pilada mwomwohdiso en kihsang ih nanpwungarail?

³ Ni emen me wiahda dihp laud eh sohte koluhla, elder kan anahne idawehn kaweid me mi nan 1 Korint 5:13: “Kihsang nanpwungamwail aramas suwedo.” Me wiahda dihpo ese me ma e sohte pahn koluhla, mwomwohdiso pahn kihsang ih nanpwungarail. Eri e mwomwen me e pilada met en wiawihong ih. E dolung dahme ea kamwarak. (Kal. 6:7) Dahme kahrehda kitail kak ndahki met? Pwehki me wiahda dihpo kahng wekila pil mwurin elder kan ar song en sewese ih pak tohto. (2 Nan. 17:​12-15) E kasalehdahr sang eh wiewia me e sohte men peikiong sapwellimen Siohwa kehkehlik kan.—Deud. 30:​19, 20.

4. Dahme kahrehda pakair ehu kin wiawi ni ahnsou me mwomwohdiso kihsang nanpwungarail emen me sohte koluhkihla dipe kan?

⁴ Ni emen eh sohte koluhla oh mwomwohdiso kihsang ih nanpwungarail, pakair ehu kin wiawi pwehn padahkihong mwomwohdiso me e solahr wia emen Sounkadehdehn Siohwa.b Kahrepen pakairo kaidehn en kanamenekihala aramaso. Ahpw e wiawi pwe riatail kan en kak peikiong kehkehlik en Paipel en “uhdihsang werekiong” aramaso oh ‘dehr pil iang ih mwenge.’ (1 Kor. 5:​9-11) Mie kahrepe mwahu kan me Siohwa ketikihda kehkehliko. Wahnpoaron Pohl ntingihdi: “Kisin ihs kis kin kampwosehda lopwon en pilawa ehu pwon.” (1 Kor. 5:6) Ma mwomwohdiso sohte kihsang nanpwungarail emen me sohte koluhkihla dipe ko, ekei kakete medewe me re sohte anahne peikiong sapwellimen Siohwa kehkehlik kan.—Lep. Pad. 13:20; 1 Kor. 15:33.

5. Ni mwomwohdiso eh kihsang nanpwungarail brother de sister men, ia pahn atail pepehm ong ih, oh dahme kahrehda?

⁵ Ni mwomwohdiso eh kihsang nanpwungarail brother de sister men, ia pahn atail pepehm duwen aramaso? Mendahki kitail sohte pahn werekiong ih, kitail anahne tamataman me mie ahn aramaso koapworopwor. Oh e duwehte sihpw men me salongala. Ni ahnsou me sihpw men salongasang pelin sihpwo, e kak pwurala. Tamataman me aramaso inoukihong Siohwa eh mour. E kansensuwed me e sohte kolokol eh inou en loalopwoatohngete Siohwa oh met keper. (Esek. 18:31) Ahpw, erein eh miehte ahnsou oh Siohwa ketin kupwurki kasalehda mahk kalahngan, kitail en koapworopworki me aramaso pahn wekila. Eri ia duwen elder kan ar kak sewese me wiahda dihp laudo me mwomwohdiso kihsang nanpwungarail?

IA DUWEN ELDER KAN AR SEWESE EMEN ME MWOMWOHDISO KIHSANG NANPWUNGARAIL

6. Dahme elder kan pahn wia pwehn sewese emen me mwomwohdiso kihsang nanpwungarail?

⁶ Ia duwe, ni ahnsou me mwomwohdiso kihsang emen nanpwungarail, elder kan sohla kin song sewese en pwurodo rehn Siohwa? Uhdahn soh! Ni ahnsou me elder kan ndaiong aramaso, re pahn pil ndaiong ih dahme e anahne wia pwehn pwurodo. Ahpw elder kan pahn pil wia laudsang met. Dahme kin kalapw wiawi, iei re pahn padahkihong me wiahda dihp laudo me re pahn pwurehng tuhwong ih mwurin sounpwong kei pwehn kilang ma e wekidala eh madamadau. Ma aramaso pwungki en pwurehng tuhwong elder kan mwurin sounpwong kei, elder kan pahn kangoange en koluhla. Ma e pil sohte koluhla ahnsowo, elder kan pahn pwurehng song en tuhwong ih mwuhr oh kangoange en koluhla.

7. Ni mwomwohdiso eh kihsang emen nanpwungarail, ia duwen elder kan ar kin kahlemengih sapwellimen Siohwa limpoak? (Seremaia 3:12)

⁷ Elder kan kin kahlemengih Siohwa me kin ketin poakehla irail kan me mwomwohdiso kihsang nanpwungarail. Karasepe, mahso Siohwa sohte ketin awih sapwellime aramas akan nan Israel en koluhla mwohn eh ketin song en sewese irail. Ahpw, e ketin kadarala sapwellime soukohp ko rehrail, pil mwohn arail koluhla. Keriaun artikel nan Kahn Iroir wet kawehwehda ia duwen Siohwa eh ketin mahsanihong Oseia en mahkohng eh pwoudo oh kapwurehla mendahki e kin wiewiahte dihp laud. Ni ahl wet, Siohwa ketin padahkihong sapwellime aramas akan me e kin uhdahn ketin poakepoake irail. (Os. 3:1; Mal. 3:7) Elder kan kin kahlemengih Siohwa ni arail kin uhdahn men me wiahda dihp laudo en koluhla oh pwurodo nan mwomwohdiso, oh re sohte kin kahrehiong en apwal ong ih en wia met.—Wadek Seremaia 3:12.

8. Ia duwen sapwellimen Sises karasaras en pwutak salongalao eh sewese kitail en wehwehki mwahu sapwellimen Siohwa limpoak oh mahk kalahngan? (Luk 15:7)

⁸ Taman sapwellimen Sises karasaras duwen pwutak salongalao, me kitail koasoiapene nan keriaun iren onopo. Ni ahnsou me pahpao kilangada nah pwutako, e “tangalahte pwoalehdi oh metik.” (Luk 15:20) Tehk me pahpao sohte awih nah pwutako en peki mahk. Ahpw, pahpao tangala rehn nah pwutako pwehki e poakepoake ih. Elder kan kin nantihong en kasalehda soangen madamadauohte ong irail kan me salongalao. Irail men irail pwukat me kohkohsang Siohwa ren pwurodo reh. (Luk 15:​22-24, 32) Ni ahnsou me emen me wiahda dihp laud pwurodo, Siohwa, Sises, tohnleng kan, oh mwomwohdiso pwon kin uhdahn peren!—Wadek Luk 15:7.

9. Dahme Siohwa kupwurki me dipan akan en wia?

⁹ Sang dahme kitail sukuhlkier, e sansal me Siohwa sohte ketin mweidohng irail kan me sohte men koluhkihla diparail kan en mihmihte nan mwomwohdiso. Ahpw, e kin ketin usehlahte song en sewese irail. E ketin kupwurki ren pwurodo. Oh ni arail kin koluhla, tehk ia sapwellimen Siohwa pepehm ong irail. Oseia 14:4 mahsanih: “I pahn kapwuredohng ie nei aramas akan. I pahn poakohng irail ni mohngiongi unsek, pwe I solahr kin engieng pahrail.” Pwehki re ese sapwellimen Siohwa pepehm, elder kan kin rapahki wekidekla kan me kasalehda me aramas emen tepida koluhla. Oh mahsen pwukat pahn kamehlelehiong emen me kohkohsang Siohwa me e ketin poakohng ih oh kupwurki en pwurodo.

10-11. Ia duwen elder kan ar pahn song en sewese irail kan me mwomwohdiso kihsang nanpwungarail mahso?

¹⁰ Ia duwen irail kan me mwomwohdiso kihsang nanpwungarail mahso, ele mwein sounpar tohto? Ele irail pwukat solahr kin wia soahng kan me kahrehiong irail en sohla wia kisehn mwomwohdiso. Nan ekei irair, irail pil kakete solahr taman kahrepen mwomwohdisou eh kihsang irail nanpwungarail. Sohte lipilipil ia uwen werei me aramaso kohkohsang mwomwohdiso, elder kan pahn song en diar irail oh mwemweitla rehrail. Erein arail mwemweitla, elder ko pahn pil wiliandi irail kapakap oh kangoange irail en pwurodo nan mwomwohdiso. Ei mehlel, ma aramas emen kohkohsang mwomwohdiso sounpar tohto, e pahn anahne pwurehng esehla Siohwa oh padahk mehlel en Paipel kan. Eri ma e nda me e men pwurodo nan mwomwohdiso, elder kan kakete koasoanehdi emen en onop Paipel reh, mehnda ma e saikinte pwurodo nan mwomwohdiso. Sohte lipilipil irair dah, elder kan me pahn koasoanehdi onop Paipelo.

¹¹ Elder kan kin song en kahlemengih sapwellimen Siohwa limpoak ong aramas akan. Eri re pahn rapahki irail koaros me kohkohsang Siohwa oh kangoange irail en pwurodo reh. Ni me dipan men eh kasalehda me e wekidala eh madamadau oh wiewia, e kak pwurodo nan mwomwohdiso.—2 Kor. 2:​6-8.

12. (a) Irair dah me elder kan anahne uhdahn kanaiehng? (b) Dahme kahrehda kitail en dehr medewe me ekei aramas sohte kak alehdi sapwellimen Siohwa mahk kalahngan? (Pil kilang nting tikitik.)

¹² Nan ekei irair, elder kan anahne uhdahn kanaiehng mwohn arail kapwurehdo emen. Karasepe, ma aramas emen dipikihda eh tiahk suwedih seri de kesehla oh uhwongada kaudok mehlel de ma e koasoakoasoane en mweisang eh pwoud, elder kan anahne tehk mwahu me e uhdahn koluhla. (Mal. 2:14; 2 Tim. 3:6) Re anahne pere riarail kan nan mwomwohdiso. Ahpw, kitail anahne ese me Siohwa pahn ketin kapwurehdo aramas sohte lipilipil me wiahda dihp me uhdahn koluhla oh uhdihsang eh wiewia suwed. Eri mendahki ma elder kan pahn men tehk kanaiehng me me wiahda suwed laud ong meteikan uhdahn koluhla, irail sohte pahn medewe me aramaso sohte kak alehdi sapwellimen Siohwa mahk kalahngan.c—1 Pit. 2:10.

DAHME MWOMWOHDISO KAK WIA

13. Ia wekpeseng en atail wiewia ong emen me ale peneu laud sang elder kan oh emen me mwomwohdiso kihsang nanpwungarail?

¹³ Nin duwen me kitail koasoiapene nan iren onop en mwoweo, ekei pak pakair ehu kin wiawi me emen ale peneu laud. Nan soangen irairo, kitail kak pousehlahte werekiong pwehki e wekidalahr eh madamadau sapwung oh wiewia. (1 Tim. 5:20) E wiahte kisehn mwomwohdiso oh anahne kangoang sang rie Kristian kan pwehn pousehlahte wia dahme pwung. (Ipru 10:​24, 25) Ahpw, irair wet uhdahn weksang ni mwomwohdiso eh kihsang emen nanpwungarail. Kitail en ‘uhdihsang atail werekiong’ de “dehr pil iang soangen aramas menet mwenge.”—1 Kor. 5:11.

14. Pilipil dah me Kristian men kak wia ni emen me mwomwohdiso kihsang nanpwungarail eh iang towehda mihting? (Pil kilang kilel.)

¹⁴ Ia duwe, kaweid me mi nan 1 Korint 5:11 wehwehki me kitail sohte kak luke emen me mwomwohdiso kihsang nanpwungarail ong mihting, de rahnmwahwih ma e iang towehda mihting? Soh. Ei mehlel, kitail sohte pahn werekiong ih. Ahpw ma ih kisehtail de kompoakepatail keren men mwohn mwomwohdiso kihsang ih nanpwungarail, kitail kak doadoahngki kadeikpen loalatail me kaiahnda sang Paipel pwehn pilada ma kitail pahn luke ih en iang towehda mihting de soh. Ia duwen ma e iang towehda? Mahso, kitail sohte pahn kin rahnmwahwih soangen aramaso. Nan irair wet, emenemen pil anahne doadoahngki dahme e sukuhlkihsang Paipel pwehn pilada dahme e pahn wia. Ekei ele sohte pahn suwedki ma re rahnmwahwih de kasamwo aramaso ong mihting. Ahpw, kitail sohte pahn koasoakoasoiong ih werei de patehng ih wia soahng teikan.

15. Soangen dihp dah me 2 Sohn 9-11 koasoakoasoia? (Pil kilang kakono “Dihp me Sohn oh Pohl Koasoakoasoia Duwepenehte?”)

¹⁵ Ekei kakete medewe, ‘Kaidehn Paipel mahsanih me Kristian men me rahnmwahwih soangen aramaso kin utung eh wiewia suwed kan?’ (Wadek 2 Sohn 9-11.) Ahpw, ire wet kasalehda me aramas menet wia emen me kesehla oh uhwongada kaudok mehlel de emen me song en kahrehiong meteikan en wia dahme Paipel mahsanih me sapwung. (Kaud. 2:20) Eri ma aramaso kin padahngki padahk me uhwongada kaudok mehlel de kangoange meteikan en wia soahng suwed teikan, elder kan sohte pahn koasoanehdi en mwemweitla reh. Ahpw, aramaso kak koluhla. Lao met wiawi, kitail sohte pahn rahnmwahwih de luke en iang towehda mihting en mwomwohdiso.

KAHLEMENGIH SAPWELLIMEN SIOHWA LIMPOAK OH MAHK KALAHNGAN

16-17. (a) Dahme Siohwa ketin kupwurki me dipan akan en wia? (Esekiel 18:32) (b) Ia duwen elder kan ar kin iang Siohwa doadoahk ni arail song en sewese emen me wiahda dihp laud?

¹⁶ Dahme kitail sukuhlkier nan iren onop limau pwukat? Siohwa sohte ketin kupwurki emen en kasohrala! (Wadek Esekiel 18:32.) E kupwurki me dipan akan en pwurehng ale sapwellime kupwuramwahu. (2 Kor. 5:20) Ihme kahrehda Siohwa kin ketin ahnsou koaros kangoange sapwellime ladu kan me kohkohsang ren koluhla oh pwurodo reh. Elder kan nan mwomwohdiso kin iang Siohwa doadoahk pwehn sewese irail kan me wiahda dihp laud en koluhla.—Rom 2:4; 1 Kor. 3:9.

¹⁷ Mie peren laud nanleng ni ahnsou me dipan men kin koluhla! Pein Samatailo nanleng, Siohwa ketin pehm soangen peren wet ahnsou koaros me emen sapwellime sihpw salongala pwurodo nan mwomwohdiso. Atail limpoak ong Siohwa kin pousehlahte kekeirda ni atail kin doudouloale sapwellime limpoak, mahk, oh kadek kalahngan.—Luk 1:78.