Karanihala Riatail Kristian kan Kin Mwahu ong Kitail!

1-2. Dahme kin kesempwal ong Siohwa, oh dahme e ketin kupwurki kitail en wia?

MWOMWEN atail wiewia ong aramas akan kin uhdahn kesempwal ong Siohwa. Sises ketin padahngki me kitail en kin poakohng mehn mpatail kan duwen atail kin poakohng pein kitail. (Mad. 22:​37-39) Met iangahki en kin kadekohng pil irail kan me sohte kin papah Siohwa. Ni atail wia met, kitail kin kahlemengih Siohwa Koht, me kin ketin “dakerki sapwellime ketipin pohn me suwed oh me mwahu kan oh kin ketin kamwerehdi keteu pohn me pwung oh pil me sapwung kan.”—Mad. 5:45.

² Mendahki Siohwa kin ketin poakohng aramas koaros, e kin keieu ketin poakohng irail kan me kin wiewia me pwung. (Sohn 14:21) E ketin kupwurki kitail en kahlemengih ih. E ketin kangoange kitail en kin “uhdahn limpoakpene.” (1 Pit. 4:8; Rom 12:10) Soangen limpoak wet kin duwehte atail poakohng kisehtail men de kompoakepatail keren men.

3. Dahme kitail anahne tamataman duwen limpoak?

³ Duwehte atail kin apwalih tuhke ehu nan atail mwetuwel pwe en kekeirda, kitail pil anahne apwalih mwahu atail poakohng meteikan pwe en kekeirda. Wahnpoaron Pohl kaweidki Kristian kan: “Kumwail dadaurete amwail limpoak en pirien.” (Ipru 13:1) Siohwa ketin kupwurki kitail en pousehlahte kakairada atail limpoak ong meteikan. Iren onop wet pahn koasoia dahme kahrehda kitail anahne kalaudehla atail karanihala riatail Kristian kan oh ia duwen atail kak pousehlahte wia met.

DAHME KAHREHDA KITAIL EN KALAUDEHLA ATAIL KARANIHALA EMENEMEN

4. Nin duwen me Melkahka 133:1 mahsanih, ia duwen atail kak kesempwalkihte atail kin miniminiong riatail kan? (Pil kilang kilel kan.)

⁴ Wadek Melkahka 133:1. Kitail pwungki sounmelkahkao me ntingihedi me en kompoakepahnki irail kan me kin poakohng Siohwa kin “lingan,” oh “kansenamwahu.” Ahpw duwehte emen me kakete pohnsehsehla tuhke kaselel ehu me e kin kilang rahn koaros, kitail pil kakete pohnsehsehla uwen lingan en minimin me kitail ahneki rehn riatail kan. Kitail kin kalapw kilang riatail kan, mwein pak tohto nan wihk ehu. Ia duwen atail kak kesempwalkihte irail? Atail poakohng riatail kan pahn kekeirda ma kitail kin wiahda ahnsou en medemedewe uwen kesempwal en emenemen ong mwomwohdiso oh pil ong kitail.

5. Dahme ekei kakete medewe ni arail kin kilang limpoak me kitail ahnekipene?

⁵ Ekei me ehdin iang towehda mihting kin uhdahn mwekidki limpoak me kitail ahneki nanpwungatail. Pwehki atail limpoak, irail kakete medewe me irail diaradahr padahk mehlel. Sises mahsanih: “Pwe koaros pahn esehki me kumwail nei tohnpadahk kan—ma kumwail kin limpoakpene nanpwungamwail.” (Sohn 13:35) Medewehla dahme wiawihong Chaithra, me kin iang sukuhl laud oh kin onohnop Paipel rehn Sounkadehdehn Siohwa kan. E alehdi luhk en iang towehda atail kapokon ehu. Mwurin eh iang towehda keieun rahno, e ndaiong eh sounpadahk en Paipelo: “Ahi pahpa oh nohnou sohte kin pwoaleie. Ahpw ni omw kapokono, aramas pwoaleiehdi pak 52 ni rahn tehieu! I pehm me Siohwa ketin doadoahngki sapwellime aramas akan pwehn kasalehiong ie me e ketin poakohng ie. I men wiahla arail peneinei.” Chaithra pousehlahte kekeirda oh papidaisla nan pahr 2024. Ei, ni me kapw kan ar kilang atail wiewia mwahu kan, iangahki atail kin limpoakpene, met kin kalapw kamwakid irail en tepida papah Siohwa.—Mad. 5:16.

6. Ia duwen atail karanihala riatail kan eh pere kitail?

⁶ Atail karanihala riatail Kristian kan kak pere kitail. Pohl kangoangehki ienge Kristian kan: “Pousehlahte kangoange emenemen ehuehu rahn . . . pwe mohngiong en emen en dehr kekeluwakala sang ni manaman widingan en dihp.” (Ipru 3:13) Ma kitail uhdahn mworusala oh apwalki pousehlahte wia me pwung, Siohwa kak ketin kamwakid iengatail Kristian men me tehkada duwen met en kihda sawas me kitail anahne. (Mel. 73:​2, 17, 23) Soangen sawas wet kin uhdahn mwahu ong kitail.

7. Ia duwen limpoak oh miniminpene ara dokpene? (Kolose 3:​13, 14)

⁷ Kitail wia kisehn pwihn ehu me kin doadoahk laud pwehn kasalehda limpoak nanpwungatail, eri kitail kin ahneki kapai tohto. (1 Sohn 4:11) Karasepe, limpoak kin kamwakid kitail en “pousehlahte kanengamahiong emenemen,” oh met kin sewese atail miniminpene. (Wadek Kolose 3:​13, 14; Ep. 4:​2-6) Eri, ni atail mihting kan, kitail kin ahneki peren nanpwungatail laudsang pwihn teikan nin sampah.

WAUNEKI EMENEMEN

8. Ia duwen Siohwa eh ketin sewese kitail en miniminiong riatail Kristian kan?

⁸ Minimin me kitail ahneki rehn riatail Kristian kan nan sampah pwon kin wia mehkot kapwuriamwei. Siohwa ketin kahrehiong met en kak wiawi mendahki kitail sohte unsek. (1 Kor. 12:25) Paipel mahsanih me ‘Koht ketin padahkihong kitail en poakohng emenemen.’ (1 Des. 4:9) Met wehwehki me Siohwa ketin padahkihong kitail sang nan Paipel dahme kitail uhdahn anahne pwehn kak karanihala emenemen. Kitail kak ale padahk sang Koht sang ni atail kin kasawih kanaiehng sapwellime padahk kan oh doadoahngki. (Ipru 4:12; Seims 1:25) Oh ih met me Sounkadehdehn Siohwa kan kin nantihong en wia.

9. Dahme kitail sukuhlkihsang Rom 12:​9-13 duwen en kasalehda wahu ong emenemen?

⁹ Ia duwen Mahsen en Koht eh kasukuhliong kitail duwen en karanihala emenemen? Medewehla dahme Pohl ndahki met, me kileldi nan Rom 12:​9-13. (Wadek.) Tehk me e koasoia en ‘tiengla mwowe ni atail kin kasalehda wahu ong emenemen.’ Ia wehwehn met? Kitail en tiengla mwowe ni atail kin kasalehda “limpoakpene” ni soangsoangen ahl akan, duwehte en mahkpene, kadekpene, oh kasamwo emenemen. (Ep. 4:32) Ke sohte anahne awih riomw kan en karanihiukala. Ke kak “tiengla mwowe” oh wia met. Oh ke pahn kehn soangen peren ohte me Sises ketin inoukihda ni eh mahsanih: “Kihwei kin kaperen sang ale.”—Wiewia 20:35.

10. Ia duwen atail kak pwerisekiong “kasalehda wahu ong emenemen”? (Pil kilang kilel.)

¹⁰ E mwahu en ese me mwurinte Pohl eh padahkihong kitail en tiengla mwowe oh kasalehda wahu ong emenemen, e kangoange kitail en “pwerisek, dehr pohnkahke.” Aramas pwerisek kin kasalehda ngoang oh doadoahk laud. Ni aramaso eh alehdi pwukoa ehu, e kin nantihong doadoahk laud pwehn kapwaiada. Lepin Padahk 3:​27, 28 mahsanih: “Ahnsou koaros me ke kak, sewese irail kan me kin anahne sawas.” Eri, ni atail kin kilang emen me anahne sawas, kitail kin wia dahme kitail kak wia pwehn sewese. Kitail sohte kin awihla ehu ahnsou pwehn wia met, de pil medewe me emen tohrohr nek apwalihala kahpwalo.—1 Sohn 3:​17, 18.

11. Dahme kak sewese kitail en karanihala emenemen?

¹¹ Pil ehu ahl me kitail kak kasalehda atail wauneki meteikan iei sang ni atail kin mwadang mahkohng irail ni arail kansensuwedihkitailla. Episos 4:26 mahsanih: “Dehr wie lingeringer lao ketipino kihrla.” Dahme kahrehda kitail en dehr wia met? Pwehki nan iretikitik 27 mahsanih me atail wia met pahn “kihong Tepil eh ahnsou mwahu.” Nan sapwellime Mahsen, Siohwa ketin pwurupwurehng mahsanihong kitail en mahkpene nanpwungatail. Kolose 3:13 kangoange kitail en “pousehlahte . . . mahkpene douluhl.” En mahkohng ahn meteikan sapwung kan iei ehu ahl keieu mwahu en karanihala irail. Ni atail wia met, kitail kin sewese ‘kolokol ehupene me kitail alehsang sapwellimen Koht manaman.’ (Ep. 4:3) E sansal me ni atail kin mahkohng meteikan, kitail kin sewese kalaudehla minimin oh popohl en sapwellimen Siohwa aramas akan.

12. Ia duwen Siohwa eh ketin sewese kitail en kin mahkpene?

¹² Ei mehlel, kitail kakete apwalki mahkohng irail kan me kamedekeikitailla. Ahpw pwehki sawas sang sapwellimen Koht manaman, kitail kak mahkohng irail. Mwurin Paipel eh padahkihong kitail en kin “limpoakpene” oh “pwerisek,” e pil mahsanih: “Sapwellimen Koht manaman en kahrehiong kumwail en ngoangda.” (Rom 12:11) Eri, sapwellimen Koht manaman kin kahrehiong kitail en ngoangki wia dahme pwung, me iangahki en limpoakpene oh mahkpene douluhl. Ihme kahrehda kitail kin uhdahn peki rehn Siohwa en ketin sewese kitail.—Luk 11:13.

“SAMINIMIN EN DEHR KIN MI NANPWUNGAMWAIL”

13. Dahme kakete kahrehda saminimin nanpwungatail?

¹³ Nan mwomwohdiso, mie “soangen aramas koaros” sang soangsoangen tiahk oh wasa. (1 Tim. 2:​3, 4) Pwehki met, atail pilipil kan kakete weksang ahn meteikan me pid mehn kamweit, dahme kitail en likawih de kapwatki, de soangen wiepen wini dah me kitail en ale. Ma kitail sohte kanahieng, soahng pwukat kakete katohrekitailpeseng. (Rom 14:4; 1 Kor. 1:10) Pwehki Koht ketin padahkihong kitail en poakohng emenemen, kitail anahne kanahieng en dehr kin ngihtehtehki me atail pilipil kan mwahusang ahn meteikan.—Pil. 2:3.

14. Dahme kitail en kin ahnsou koaros nantihong en wia, oh dahme kahrehda?

¹⁴ Kitail pil kak kauhdi saminimin en dehr wiawi nan mwomwohdiso sang ni atail kin nantihong en kansenamwahwih oh kakehlaka meteikan ahnsou koaros. (1 Des. 5:11) Me keren, me tohto me sohla kin iang kalohk oh mihting de mwomwohdiso kihsang nanpwungarail pwurodo. Ni limpoak, kitail en kasamwo irail! (2 Kor. 2:8) Tehk dahme wiawihong emen sister me pwurodo nan Wasahn Kaudok mwurin eh sohla kin iang kalohk oh mihting erein sounpar eisek. E koasoia, “Koaros sirei oh kohdo itik peie.” (Wiewia 3:19) Ia duwen kadek en riatail ko eh kamwakid ih? E koasoia, “E kahrehiong ien pehm me Siohwa ketin sewesewese ien pwurehng ahneki peren.” Ma kitail kin song en kangoange meteikan, Krais kak ketin doadoahngki kitail en kansenamwahwih irail kan “me pwangadahr oh toutoulahr.”—Mad. 11:​28, 29.

15. Dahme kitail pil kak wia pwehn sewese miniminpene nan mwomwohdiso? (Pil kilang kilel.)

¹⁵ Pil ehu ahl me kitail kak kahrehda miniminpene nan mwomwohdiso iei sang ni dahme kitail kin nda. Sohp 12:11 mahsanih: “Nin duwen lowemwen eh kin perenki song nemen kisin mwenge, salengomw pil perenki rongorong ngilen mahsen kan.” Duwehte sounkuk koahiek men me pahn kin ahnsou koaros song mwenge me e kukiada ma e iou mwohn eh kihong meteikan en kang, kitail en kin medewe mwahu dahme kitail pahn koasoia mwohn atail ndahla. (Mel. 141:3) Atail mehn akadei iei en kin tehk mwahu me dahme kitail pahn koasoia pahn kin kakehlaka, kansenamwahwih, oh “mwahu ong me kin rongorong kan.”—Ep. 4:29.

16. Ihs me keieu anahne song en kin kangoange meteikan sang ni arail koasoi?

¹⁶ Ohl pwopwoud kan oh pahpa nohno kan iei me keieu anahne kanahieng pwe irail en koasoi ni ahl ehu me pahn kakehlaka meteikan. (Kol. 3:​19, 21; Taitus 2:4) Elder kan pil anahne kangoange oh kansenamwahwih sapwellimen Siohwa pelin sihpw. (Ais. 32:​1, 2; Kal. 6:1) Paipel katamankihong kitail: “Meid kaperen diar mahsen pwung ni ahnsou me konehng!”—Lep. Pad. 15:23.

LIMPOAKPENE “NI WIEWIA OH NI MEHLEL”

17. Ia duwen atail kak tehk mwahu me atail poakohng riatail kan kin uhdahn mehlel?

¹⁷ Wahnpoaron Sohn kangoange kitail en kin “limpoakpene kaidehn ni lepin lokaia de ni awatail, ahpw ni wiewia oh ni mehlel.” (1 Sohn 3:18) Kitail men atail poakohng riatail Kristian kan en kin uhdahn mehlel. Ia duwen atail kak wia met? Uwen laud en atail kin patehng irail, ih uwen laud en atail pahn karanihala oh poakohngala irail. Eri, wiahda ahnsou en kin patehng irail—ni mihting kan oh nan kalohk. Wiahda ahnsou en kin mwemweitla rehrail. Ni atail kin wia met, kitail kin kasalehda me ‘Koht ketin padahkihong kitail en poakohng emenemen.’ (1 Des. 4:9) Oh kitail pahn kin doulahte kilang “ia uwen lingan, ia uwen kansenamwahu en sapwellimen Koht aramas akan ar kin miniminpene!”—Mel. 133:1.