Kaunopada Omw Mohngiong

Ni atail kin onopki Paipel, kitail men soahng kan me kitail sukuhlki duwen Siohwa en sair mohngiongitail. Esra wiahda mehn kahlemeng mwahu ni eh kin ‘kaunopada eh mohngiong pwe en sukuhlki Kosonned en Siohwa.’ (Esra 7:​10, NW) Ia duwen atail kak kaunopada mohngiongitail?

Kapakap. Kapakap mwohn omw pahn tepida onop. Peki rehn Siohwa en ketin seweseiuk wehwehki oh kapwaiada dahme ke sukuhlki.—Mel. 119:​18, 34.

Kasalehda aktikitik. Koht kin ketin karirihala padahk mehlel sang me aklapalap kan me kin medewe re sohte anahne sapwellime sawas pwehn wehwehki Paipel. (Luk 10:21) Kitail en dehr kin wia roporop pwehn kasalehiongete meteikan uwen laud en dahme kitail ese. Oh ni atail kin esehda duwen soahng kan me kitail anahne wekidala, kitail kin aktikitik oh wekidala soahng pwukat.

Rong ngilen atail koul en sarawi kan. Ngilen koul kak kamwakid atail pepehm oh madamadau. Eri, en rong ngilen koul ehu ni atail tepida onop, met kak sewese kitail en kaunopada mohngiongitail.