Se Sukuhlsang Aht Sounkaweid Lapalapo Erein Aht Mour

MEHN KAHLEMENG EN EI PAHPA NOHNO

Mwurin pahr 1960, ei pahpa nohno kohkohsang Italy oh kohla Kindersley nan Saskatchewan, Canada. Sohte pwand mwurin mwo, re sukuhlki padahk mehlel oh met wiahla mehkot keieu kesempwal nan at mour. I tamataman me ni ei tikitiko, I kin iang ei peneinei kalohk rahn ehu pwon. Eri ekei pak, I kin kamwanki me I wia “sawaspen pioneer” ni ei sounpar waluh!

Ei pahpa nohno semwehmwe; ahpw, re wiahda mehn kahlemeng mwahu en wiahda tounmetei kan ong Siohwa. Karasepe, nan pahr 1963, ira netikihla ara kepwe tohto pwe sen kak iang towehda kapokon nan Pasadena, California, U.S.A. Nan pahr 1972, se keseula nan British Columbia, Canada, mpen mwail 620 pwehn sewese doadoahk en kalohk ni lokaiahn Italy. Ei pahpao kin doadoahk nin duwen sounkamwakel men. E kin soikala pwukoa kan me pahn kihong ih mwohni laud pwe en kak medewehte eh papah Siohwa.

I kalahnganki mehn kahlemeng me ei pahpa nohno wiahiong ie oh riei meh silimeno. Ara mehn kahlemeng wia tepin mehn kasukuhl ong ie nan sapwellimen Siohwa doadoahk. Ira padahkihong ie mehkot me I anahne tamataman erein ei mour, me iei: Ma I mwohneki mahs Wehio, Siohwa pahn ketin apwalih ie.—Mad. 6:33.

TEPIN DOADOAHNGKI PALI LAUD EN EI AHNSOU ONG PAPAH SIOHWA

Nan pahr 1980, I pwoudikihda Debbie, sister masamwahu men, me kin ngoangki eh papah Siohwa. Se men tepida doadoahngki pali laud en ahnsou ong papah Siohwa, eri Debbie tepida pioneer sounpwong siluh mwurin at kapwopwoudo. Mwurin sounpar ehu me se pwopwoudla, se keseula nan kisin mwomwohdiso ehu me mie anahn, oh I iangih pioneer.

Mwurin ahnsou kis, se mworusala oh men keseusang wasao. Ahpw keieu, se koasoiong Sounapwalih en Circuito. Ni limpoak oh mehlel, e ndaiong kiht: “Kumwa me wiahiong amwa irair en en apwalla. Kumwa kin medemedewehte kahpwal kan me kumwa ahneki. Ahpw, ma kumwa kin medewe soahng mwahu kan, kumwa pahn diarada.” Ih kaweid wet me se anahne. (Mel. 141:5) Se mwadangete doadoahngki oh mwuhr esehda me mie irair mwahu tohto. Ekei nan mwomwohdiso kin men kalaudehla ar papah Siohwa, iangahki me pwulopwul kan oh ekei me ar pwoud sohte iang padahk mehlel. Met wia mehn kasukuhl kesempwal ong kiht. Se sukuhlki en kin kilengwohng soahng mwahu kan oh likih me Siohwa pahn sewesei kiht dadaur nan irair kan me mwomwen apwal. (Maika 7:7) Se pwurehng ahneki peren oh at irairo mwahula.

Sounpadahk ko nan tepin pioneer sukuhl me se iang kin papah nan ekei sahpw. Re kin kasalehda kilel kan oh koasoia duwen kahpwal oh kapai kan me re lelohng erein ar papah nan sahpw teikan. Met kahrehiong kiht sen men papah nin duwen misineri kei. Eri se wiahki at mehn akadei en wiahla misineri.

Pwehn lel at mehn akadeio, nan pahr 1980, se keseula nan Quebec me kin lokaiahki lokaiahn France, me dohki mwail 2,485 sang British Columbia. Wasao, se anahne sukuhlki tiahk oh lokaia kapw. Pil ehu kahpwal iei me nait mwohni kalapw sohte itar. Ehu pako, ihte me se anahne kang iei luhwen pedehde me soumwet men mweidohng kiht sen kihsang nan eh mwahto. Debbie kin kukihda pedehde ko ni soangsoangen wiepe oh e iou! Mendahki at kahpwal kan, se kin wia uwen at kak pwehn dadaur ni peren. Laudsang met, se kilang me Siohwa kin ketin apwahpwalih kiht.—Mel. 64:10.

Ehu rahno, Pedel en Canada call kiht ni at sohte kasik. Re luke kiht sen kohla papah wasao. Se ahpwtehn audehda nait doaropwehn iang Sukuhl en Kilead, eri mendahki se perenki at alehdi luhko, se pil mworusala. Ahpw se pwungki en kohla wasao. Ni at lella mwo, se idek rehn brother Kenneth Little, emen Branch Committee ko, “Dahme se pahn wia ma se alehdi luhk en iang Kilead?” E sapengki, “Kitail pahn apwalihala irair en mwuhr ma kumwa alehdi luhk.”

Wihk ehu mwuhr, ngehi oh Debbie alehdi luhk en iang Kilead. Eri se anahne wiahda pilipil ehu. Brother Little ndaiong kiht: “Sohte lipilipil dahme kumwa pilada, ekei pak kumwa kakete kasik me kumwa pilada meteio. Siohwa kak ketin kapaia pilipil ko, ahpw ehu pilipil ko sohte pahn mwahusang ehu.” Se pwungki en kohla Kilead, oh erein sounpar ko, se kilang me dahme brother Little koasoia mehlel. Se kin kalapw doadoahngki dahme e koasoiao ong meteikan me anahne pilada pwukoa kan.

MOUREN MISINERI

Se perenki at iang tohnsukuhl 24 nan sukuhl en Kilead nempe 83 me wiawi nan Brooklyn, New York, April 1987. Brother Ulysses Glass oh Jack Redford me wia at sounpadahk. Sounpwong limau mwuri, se kesepwil nan September 6, 1987. Se alehdi pwukoa en papah nan Haiti, iangahki John oh Marie Goode.

Erein pahr 1962, saikinte misineri pekederla Haiti ni ahnsou misineri me kin mi wasao anahne kohkohsang sahpwo. Wihk siluh mwurin at kesepwilo, se tepida papah nan Haiti iangahki kisin mwomwohdiso ehu me mie sounkalohk 35 nan wasa ehu me doh ni nahna kan. Se pwulopwulte oh anahne sukuhlki soahng tohto, oh se kin kelekelehpw nan imwen misinerio. Aramas akan wasao uhdahn semwehmwe oh pali laud sohte kak wadawad. Erein at mihmi mwo, aramas akan uhdahn lemei pwehki kahpwal kan en palien politik, uhwong en palien koperment kan, oh melimel laud kan.

Se sukuhlki soahng tohto sang riat kan me kehlail oh peren nan Haiti. Me tohto ahneki kahpwal laud, ahpw irail poakohng Siohwa oh doadoahk en kalohk. Sister mah men sohte kak wadawad, ahpw e wadlikihala iren Paipel kereniong 150. Kahpwal nan wasao kahrehiong sen men kalaudehla at lohki rongamwahu en Wehio, me pahn kamwahwihala ahn aramas akan kahpwal. Se uhdahn perenkihda ni at kilang ekei irail me se tepin onop Paipel rehrail ar wiahla pioneer, pioneer tohrohr, oh elder kan.

Erein at mihmi Haiti, I tuhwong Trevor, mwahnakapw men me wia misineri en Mormon, oh se ahneki ahnsou mwahu en kin koasoia Paipel ekei pak. Sounpar kei mwuhr ni ei sohte kasik, I alehdi kisinlikou sang reh. E koasoia: “I pahn papidaisla ni Kapokon en Circuit me pahn wiawi! I men pwurowei Haiti oh papah nin duwen pioneer tohrohr nan wasaote me I wia misineri en Mormon.” Oh ih met me e wia erein sounpar tohto, iangahki eh pwoud.

IUROP—MWURI APERIKA

Se pekederla en papah nan wasa ehu nan Iurop wasa me doadoahk en kalohk kedekedeo sohla keinapwidi. Nan pahr 1992, se lella Ljubljana, Slovenia, karanih wasa me ei pahpa nohno tikida mwohn ara keseula Italy. Ni ahnsowo, mahwen wiewiawihte wasa ehu nan Yugoslavia. Ohpis en Sounkadehdehn Siohwa kan nan Vienna, Austria, iangahki Zagreb, Croatia, oh Belgrade, Serbia, kin apwahpwalih doadoahk en kalohk wasao. Met ehuehu wasa ko pahn mie pein arail Pedel.

Eri, se anahne sukuhlki pil ehu lokaia oh tiahk. Aramas ko kin nda, “Jezik je težek,” me wehwehki “Lokaiao uhdahn apwal.” Met mehlel! Se kalahnganki riat Kristian kan me kin ni loalopwoat pwungki wiahda wekidekla kan me sapwellimen Siohwa pwihn wiahda, oh se kilang ia duwen Siohwa eh ketin kapaia irail. Oh se pil kilang ia duwen Siohwa eh kin ahnsou koaros ni limpoak ketin kapwungala soahng kan oh ni ahnsou me konehng. Se sukuhlki mehn kasukuhl tohto erein at mi Slovenia oh mehn kasukuhl ko sewese sen dadaur kahpwal kan me se lelohng wasao.

Ahpw wekidekla tohto wiawi. Nan pahr 2000, se keseula Côte d’Ivoire ni Palikapi en Aperika. Eri nan November 2002, se tangala Sierra Leone pwehki mahwen. Mahwen me wiawihki sounpar 11 wasao imwisekla. E apwal en mwadangete kohkohsang Côte d’Ivoire. Ahpw, mehn kasukuhl kan me se sukuhlki sewesei kiht sen kolokolete at peren.

Se kin medemedewehte aramas akan me men esehla padahk mehlel wasao oh riatail Kristian kan me dadaur pahn mahwen erein sounpar tohto. Ekei sohte arail kepwe, ahpw re kin men toukihda dahme re ahneki. Emen sister kihong Debbie likou kei. Ni tapio, Debbie sohte men ale, eri sistero koasoia: “Erein mahweno, Kristian kan nan ekei sahpw sewesei kiht. Eri met at ahnsou en sawas.” Se wiahda at mehn akadei en alasang ar mehn kahlemeng.

Kedekedeo, se pwurala Côte d’Ivoire, ahpw kahpwal en politik wasao kahrehda tiahk lemei pwurehng wiawi. Eri nan November 2004, se kohkohsang wasao dake helicopter oh emenemen wa ehu kopwou. Se pweidi wasa me sounpei en France kan kin mi ie, oh rahno mwuri se pihrla Switzerland. Ni at lella ni ohpis en Sounkadehdehn kan ni lukepen pwong, Branch Committee oh sounpadahk en Sukuhl en Brother kan ong Pwukoa Tohrohr kan iangahki ara pwoud kasamwo kiht ni kadek. Re pwoaleikihtdi, kaunopada kanat mwenge, oh diren sokoled en Swiss. Met kahrehiong sen pehm ar uhdahn poakohng kiht.

Se keseula Ghana ahnsou kis oh mwuri pwurala Côte d’Ivoire mwurin mahweno eh meleileidi. Ahn Kristian kan kadek sewesei kiht sen dadaur pahn kapwunod kan me se ahneki ni at kin keseu oh pwukoa kan me se alehdi ong ahnsou kis. Ngehi oh Debbie pwungkipene me mendahki soangen limpoak wet kin wiawihte nan sapwellimen Siohwa pwihn, se sohte pahn manokehla met. Ni mehlel, se wehwehkihda me pil ni ahnsou apwal ko wiahla mehkot kesempwal ong dahme se sukusukuhlki.

KOHLA MIDDLES EAST

Nan pahr 2006, kisinlikou ehu sang poasen kaun kan padahkihong kiht me mie at pwukoa kapw ehu nan Middle East. Met wehwehki me se pahn pwurehng kilang soahng kapw kan, kahpwal kan, lokaia kan, oh tiahk kan. Mie soahng tohto me se anahne sukuhlki wasao me diren kahpwal tohto pwehki politik oh palien lamalam kan. Se perenki soangsoangen lokaia kan nan mwomwohdiso oh kilang me se kak miniminpene ni at idawehn kaweid kan sang sapwellimen Siohwa pwihn. Se uhdahn kalahnganki Kristian kan pwehki pali laud en irail kin ni eimah dadaur pahn uhwong sang arail peneinei, iangarail tohnsukuhl, iangarail tohn doadoahk, oh mehn mparail kan.

Nan pahr 2012, se iang towehda kapokon nan Tel Aviv, Israel. Kapokon wet iei tepin ahnsou me sapwellimen Siohwa aramas akan pokonpene oh me tohto iang towehda sangete erein Pendekos pahr 33. Se sohte pahn manokehla ahnsowo!

Erein sounpar ko, se pekederla nan sahpw ehu me atail doadoahk en kalohk keinapwidi. Se wahda ekei neitail sawasepen Paipel kan, iang kalohk, oh iang towehda kapokon tikitik kan. Wasa koaros mie sounpei kan me kin kol kesik oh sinsile kehl kan, ahpw se pehm me se sohte anahne perki mehkot ni at kanahieng ieiang ekei sounkalohk kan.

PWURALA APERIKA

Nan pahr 2013, se alehdi pwukoa ehu me uhdahn weksang at pwukoa teiko—en papah ni ohpis en Sounkadehdehn Siohwa kan nan Kinshasa, Congo, sahpw laud ehu me uhdahn kaselel ahpw mie semwehmwe laud oh mahwen tohto. Nin tapio se nda, “Se ese Aperika, oh se onopadahr.” Miehte soahng tohto me se anahne sukuhlki, ahpw mehlel ni at anahne seiloakla wasa kan me sohte ahl oh piris. Se diarada soahng tohto me sen medemedewehte, me duwehte Kristian kan me kin pousehlahte ahneki peren mendahki kahpwal kan, arail limpoak ong doadoahk en kalohk, oh arail nannanti en kin iang towehda mihting oh kapokon kan. Se pein kilang me doadoahk en Wehio pweida oh aramas tohto sukusukuhlki padahk mehlel ihte pwehki sapwellimen Siohwa sawas oh kapai. Sounpar kan me se doadoahngki pali laud en ahnsou ong papah nan Congo padahkihong kiht mehn kasukuhl kesempwal kan oh kihong kiht kompoakepaht kan me duwehla at peneinei.

Ni imwin pahr 2017, se alehdi pil ehu pwukoa—South Africa. Wasao iei ohpis me keieu laud me se papah, oh pil at pwukoa kan nan Pedel kapw ong kiht. Pil mie soahng tohto me se anahne sukuhlki ahpw se doadoahngki dahme se sukuhlki nan at pwukoa teiko. Se poakohng Kristian tohto ko me kin ni loalopwoat dadaur erein sounpar tohto. Oh e kaselel en kilang me peneinei nan Pedel kin miniminpene mendahki re kohsang soangsoangen wasa oh tiahk. E sansal me Siohwa kin kapaiahki sapwellime aramas akan popohl ni ar kin pwuhriong nan mour kapwo oh doadoahngki kaweid kan en Paipel.

Erein sounpar ko, ngehi oh Debbie alehdi pwukoa kaperen kan, esehla soangsoangen tiahk, oh sukuhlki lokaia kapw kan. E sohte kin ahnsou koaros mengei, ahpw se kin pehm sapwellimen Siohwa limpoak loalopwoat sang sapwellime pwihn oh Kristian kan. (Mel. 144:2) Se likih me at doadoahngki pali laud en at ahnsou ong papah Siohwa kahrehiong kiht sen wia sapwellimen Siohwa ladu koahiek kei.

I uhdahn kalahnganki dahme ei pahpa nohno padahkihong ie; sawas sang ei pwoudo, Debbie; oh mehn kahlemeng kaselel en riat Kristian kan nan sampah pwon. Ni ngehi oh ei pwoudo at medewehla duwen ahnsou kohkohdo, se koasoanehdi teng en pousehlahte sukuhlki mehn kasukuhl kan me atail Sounkaweid Lapalapo kin ketikihda.