Dahme Kahrehda Kitail Anahne Peki Kaweid?

1. Ia duwen atail kak wiahda pilipil mwahu kan me pahn pweida? (Lepin Padahk 13:10; 15:22)

KITAIL koaros kin men wiahda pilipil mwahu kan. Oh kitail koaros kin men atail koasoandi kan en pweida. Mahsen en Koht padahkihong kitail ia duwen atail kak lel mehn akadei pwukat.—Wadek Lepin Padahk 13:10; 15:22.

2. Dahme Siohwa ketin inoukihong kitail?

² Ei mehlel, Samatailo Siohwa iei me keieu mwahu me kitail kak alehsang erpit oh kaweid. E ketin inoukihda en sewese kitail ni eh mahsanih: “I pahn kaweid uhk oh panawihiuk.” (Mel. 32:8) Siohwa ketin inoukihda en ketikihda kaweid me kitail uhdahn anahne oh sewese kitail en doadoahngki.

3. Dahme kitail pahn koasoiapene nan iren onop wet?

³ Nan iren onop wet, kitail pahn doadoahngki Mahsen en Koht pwehn sewese sapengala peidek pahieu: (1) Irair dah kan me I uhdahn anahne ma I men paiekihda kaweid mwahu? (2) Ihs me kak kihong ie kaweid mwahu? (3) Ia duwen ei kak kasalehda me I uhdahn anahne kaweid mwahu? (4) Dahme kahrehda ien dehr peki meteikan en wiahiong ie ei pilipil?

IRAIR DAH KAN ME I ANAHNE?

4. Pwehn paiekihda kaweid mwahu, irair dah kan me kitail anahne?

⁴ Kitail anahne aktikitik oh mpahi pwehn paiekihda kaweid mwahu. Kitail anahne pohnese me ele kitail sohte ahneki koahiek de loalokong pwehn pein wiahda pilipil mwahu. Ma kitail sohte kin aktikitik oh mpahi, Siohwa sohte pahn ketin sewese kitail. Oh ni atail wadek sapwellime Mahsen, kitail sohte pahn kilang anahnepen en doadoahngki kaweid kan me e ketikihong kitail. (Maika 6:8; 1 Pit. 5:5) Ahpw ma kitail kin aktikitik oh mpahi, kitail pahn men rong oh doadoahngki kaweid me kohsang Paipel.

5. Soahng mwahu dah kan me Nanmwarki Depit wia me kakete kahrehiong en aklapalapala?

⁵ Medewehla dahme kitail kak sukuhlkihsang mehn kahlemeng en Nanmwarki Depit. Mendahki e wiahda soahng mwahu tohto, e sohte aklapalapala. Sounpar tohto mwohn eh wiahla nanmwarki, aramas akan kin ese me e wia sounkoul koahiek men. E pil anahne kohla koul ong nanmwarkio. (1 Sam. 16:​18, 19) Mwurin Siohwa eh ketin idihada Depit en wia nanmwarki mwurin Sohl, Siohwa ketikihong sapwellime manaman pwehn kakehlailih. (1 Sam. 16:​11-13) Aramas akan kapingahki eh kemehla arail imwintihti kan, iangahki kodono Kolaiad. (1 Sam. 17:​37, 50; 18:7) Ohl aklapalap men me wiahda soahng mwahu pwukat kakete medewe me e sohte anahne rong kaweid sang meteikan. Ahpw Depit sohte wia met.

6. Ia duwen atail ese me Depit kin men rong kaweid? (Pil kilang kilel ni Kahn Iroir wet.)

⁶ Mwurin eh wiahla nanmwarki, Depit pilada kompoakepah kan me kak kihong ih kaweid. (1 Kron. 27:​32-34) Ni mehlel, pil mwohn eh wiahla nanmwarki, Depit kin ahnsou koaros men rong ni meteikan ar kihong ih kaweid. E kin ale kaweid sang ohl akan oh pil sang lih emen me adaneki Apikail. Liho pwoudiki Napal me kin aklapalap, sohte kin kalahnganki mehkot, oh sohte kin wauneki meteikan. Ahpw Depit aktikitik oh doadoahngki ahn Apikail kaweid mwahwo, oh imwilahn met, e sohte wiahda sapwung laud ehu.—1 Sam. 25:​2, 3, 21-25, 32-34.

7. Mehn kasukuhl dah kan me kitail kak sukuhlkihsang ahn Depit mehn kahlemeng? (Eklesiasdes 4:13) (Pil kilang kilel kan.)

⁷ Kitail kak sukuhlki ekei mehn kasukuhl sang Depit. Karasepe, ele kitail ahneki soangen koahiek ehu de ahneki manaman pohn meteikan. Ahpw, kitail en dehr medewe me kitail ese soahng koaros oh sohte anahne kaweid. Oh duwehte Depit, kitail en men rong kaweid mwahu, sohte lipilipil ihs me kihong kitail. (Wadek Eklesiasdes 4:13.) Ma kitail wia met, ele kitail sohte pahn wiahda sapwung laud me kak kahrehda kahpwal ong kitail oh meteikan.

IHS ME KAK KIHONG IE KAWEID MWAHU?

8. Dahme kahrehda Sonadan kak kihong Depit kaweid mwahu?

⁸ Medewehla pil ehu mehn kasukuhl me kitail kak sukuhlkihsang ahn Depit mehn kahlemeng. E rong kaweid sang irail kan me ahneki nanpwungmwahu rehn Siohwa oh pil wehwehki mwahu irair me e sohsohpai. Karasepe, Depit rong kaweid sang Sonadan nein Sohl pwutak ni eh men ese ma e kak kamwahwihala eh nanpwungmwahu rehn Nanmwarki Sohl. Dahme kahrehda Sonadan kak kihong ih kaweid mwahu? Pwehki Sonadan ahneki nanpwungmwahu rehn Siohwa oh pil uhdahn ese duwen Sohl. (1 Sam. 20:​9-13) Dahme met kak padahkihong kitail?

9. Ihs me kitail anahne peki reh kaweid? Menlau kawehwehda. (Lepin Padahk 13:20)

⁹ Ni atail anahne kaweid, e mwahu kitail en koasoiong emen me ahneki nanpwungmwahu rehn Siohwa oh pil wehwehki mwahu duwen irairo me kitail anahne sawas ong.a (Lepin Padahk 13:20.) Karasepe, ia duwen ma brother pwulopwul men men rapahkihda eh pwoud? Ihs me kak kihong ih kaweid mwahu? Kompoakepah kiripw men kak sawas ma e kihda sawas sang nan Paipel. Ahpw brother pwulopwulo kakete alehdi kaweid mwahu oh oaritik ma e koasoiong pwopwoud ehu me uhdahn ese ih oh papahkier Siohwa ahnsou werei oh kin ahneki mouren pwopwoud nsenamwahu.

10. Dahme kitail pahn koasoiapene met?

¹⁰ Kitail koasoiapenehr irair riau me kitail en ahneki oh pil ihs me kak kihong kitail kaweid mwahu. Met kitail pahn koasoiapene dahme kahrehda kitail en kasalehda me kitail uhdahn men ale kaweid oh ma kitail en peki meteikan en wiahiong kitail atail pilipil.

IA DUWEN EI KAK KASALEHDA ME I UHDAHN MEN ALE KAWEID?

11-12. (a) Dahme kitail en dehr wia? (b) Dahme Nanmwarki Reopoham wia ni eh anahne wiahda pilipil kesempwal ehu?

¹¹ Ekei pak, e kak mwomwen me aramas emen raparapahki kaweid, ahpw ni mehlel, e mente meteikan en pwungki pilipil me e wiahdao. Soangen aramaso sohte uhdahn men ale kaweid. E anahne sukuhlkihsang dahme wiawihong Nanmwarki Reopoham.

¹² Reopoham wiahla nanmwarkien Israel mwurin eh pahpao Solomon mehla. Ni ahnsou me Reopoham wiahla nanmwarki, aramas ako ahneki soahng tohto, ahpw re medewe me Solomon nohn kahrehiong irail en doadoahk laud. Aramas ko kohla rehn Reopoham oh peki en ekis kamengeila arail doadoahk. Reopoham ndaiong irail en mweidohng ih ahnsou pwehn wiahda eh pilipil. Keieu, e peki kaweid sang ohl mah kan me kin sewese Solomon. Dahme e wiao mwahu. (1 Nan. 12:​2-7) Ahpw, e soikala kaweid me ohl mah ko kihong ih. Dahme e wiahki met? Mwein e piladahr dahme e pahn wia oh koapworopworki me ohl mah ko pahn pwungki. Eri ni eh peki kaweid sang ienge ko oh irail pwungki, e mwahuki dahme irail nda. (1 Nan. 12:​8-14) Reopoham padahkihong aramas ko dahme kompoakepah ko nda. Imwilahn met, wehio tohrohrpeseng, oh Reopoham kin kalapw lelohng kahpwal.—1 Nan. 12:​16-19.

13. Ia duwen atail kak kasalehda me kitail uhdahn men ale kaweid?

¹³ Dahme kitail kak sukuhlkihsang ahn Reopoham mehn kahlemeng? Ni atail kin peki kaweid, kitail anahne kasalehda me kitail uhdahn men ale kaweid. Ia duwen atail kak ese met? Kitail kak pein idek rehtail, ‘I kin peki kaweid oh mwuri mwadangete soikala pwehki kaidehn ihme I men rong?’ Medewehla karasepe ehu.

14. Ni atail alehdi kaweid, dahme kitail en tamataman? Menlau kihda ehu karasaras. (Pil kilang kilel.)

¹⁴ Medewehla ma emen men kihong brother men doadoahk pweimwahu ehu. Mwohn eh ale doadoahko, e peki kaweid sang elder men. Eldero koasoia me doadoahko pahn kahrehiong ih en dohsang eh peneineio erein ahnsou werei. Eldero katamankihong brothero kaweid en Paipel me eh pwukoa me keieu kesempwal iei en sewesehki eh peneinei kaweid kan sang Mahsen en Koht. (Ep. 6:4; 1 Tim. 5:8) Ahpw brothero sohte pwungki ahn eldero kaweid, eri e tepida peki kaweid rehn meteikan nan mwomwohdiso lao emen ndaiong dahme e men rong. Ia duwe, brothero uhdahn raparapahki kaweid de e piladahr dahme e pahn wia oh ihte me e men wia emen en iangih pwungki? Kitail anahne tamataman me atail mohngiong kak pitihkitaildi. (Ser. 17:9) Ekei pak, kaweid me kitail keieu anahne iei kaweid me kitail sohte men rong.

I ANAHNE PEKI METEIKAN EN WIAHIONG IE EI PILIPIL?

15. Dahme kitail en dehr wia, oh dahme kahrehda?

¹⁵ Siohwa ketin kasik kitail en pein wiahda atail pilipil. (Kal. 6:​4, 5) Duwehte me kitail koasoiapenehr, aramas loalokong men pahn rapahki kaweid sang Mahsen en Koht oh sang irail kan me kin papah Siohwa ni lelepek ahnsou werei. Ahpw kitail en dehr peki meteikan en wiahiong kitail atail pilipil. Ekei kakete wia met sang ni ar idek rehn emen me re kin likih, “Dahme ke pahn wia ma ke ahneki kahpwal me duwehte met?” Ekei kakete alasang ahn emen pilipil ni ar sohte pein medewe mwahu irairo.

16. Dahme wiawi nan mwomwohdisohn Korint me pid uduk me meironglahr ong dikedik kan, oh ihs me pwukoahki en pilada ma e pahn kang soangen uduko? (1 Korint 8:7; 10:​25, 26)

¹⁶ Medewehla pilipil me Kristian kan nan mwomwohdisohn Korint anahne wiahda duwen en tungoale uduk me ele meirongalahr ong dikedik kan. Pohl ndaiong Kristian ko: “Kitail ese me dikedik ehu sohte katepe nin sampah oh Koht mehtehmen mie.” (1 Kor. 8:4) Pwehki dahme Pohl koasoia, ekei nan mwomwohdisou pilada me re kak kang uduk me re pwainda nan wasahn netiki uduk mehnda ma ele e meironglahr ong dikedik kan. Ekei pilada me irail sohte kak kang soangen uduko oh kolokol nsenmwakelekel. (Wadek 1 Korint 8:7; 10:​25, 26.) Met pein arail pilipil. Pohl sohte kaweidki mehn Korint ko en wiahiong meteikan ar pilipil de alasang dahme meteikan kin wia. E koasoia: “Koht pahn ketin kadeikada emenemen kitail nin duwen atail wiewia kan.”—Rom 14:​10-12.

17. Dahme kakete wiawi ma kitail alasang dahme meteikan wia? Menlau kihda ehu karasaras. (Pil kilang kilel kan.)

¹⁷ Ia duwen soahng wet eh kak wiawi rahnwet? Medewehla duwen pilipil me pid soahng tikitik kan me kohsang nan nta. Emenemen Kristian anahne pein pilada ma e pahn ale de soikala soahng pwukat.b Ele e apwal en wehwehki soangen ire pwukat, ahpw kitail anahne pein wiahda atail pilipil ong met. (Rom 14:4) Ma kitail alasang pilipil me meteikan wiahda, kitail sohte pahn loalokongla. Kitail pahn loalokongla ihte ma kitail wiahda pein atail pilipil kan me poahsoankihda Paipel. (Ipru 5:14) Eri iahd me kitail en peki kaweid sang Kristian koahiek men? Mwurin atail wia pein atail roporop oh anahnehte sawas en wehwehki ia duwen kaweid en Paipel ehu eh pidada atail irairo.

DOULAHTE RAPAHKI KAWEID

18. Dahme Siohwa ketikihong kitail?

¹⁸ Siohwa ketin kasalehda eh uhdahn ketin likih kitail sang ni eh mweidohng kitail en pein wiahda atail pilipil kan. E ketikihong kitail sapwellime Mahsen, Paipel. Oh e ketikihong kitail kompoakepatail loalokong kan me kak sewese kitail en wehwehki ia duwen atail kak doadoahngki kaweid en Paipel kan. Ni ahl pwukat, Siohwa kin ketin nsenohkin kitail duwehte Sahm limpoak men. (Lep. Pad. 3:​21-23) Ia duwen atail kak kasalehiong ih atail kalahnganki sapwellime sawas?

19. Ia duwen atail kak pousehlahte kaperenda Siohwa?

¹⁹ Medewehla ire mehlel wet: Pahpa nohno kan kin perenki kilang neirail seri kan ar kin keirda oh wiahla sapwellimen Siohwa ladu loalokong kei me kin sewese meteikan. Duwehte met, Siohwa kin ketin kupwurperenkihda ni eh mahsanih atail kin doulahte wiahla Kristian koahiek kei, peki kaweid sang meteikan, oh wiahda pilipil kan me kin kawauwih.