IREN ONOP 35
KOUL 121 Kitail Anahne Kaunda Pein Kitail
Dahme Kitail Kak Wia Pwehn Pelianda Ineng Sapwung kan
“Dehr mweidohng dihp en kakaunte paliwaramwail kan me kin mehla nin duwen nanmwarki men, pwe kumwail en dehr peikiong ineng kan en paliwar.”—ROM 6:12.
DAHME KITAIL PAHN SUKUHLKI
Pwehn sewese kitail en (1) pelianda pepehm en mworus oh (2) dehr dukula pahn kasongosong.
1. Dahme kitail koaros kin lelohng?
MIE pak me ke ahnekihda ineng laud en wia mehkot me Siohwa sohte ketin kupwurperenki? Ma ei, dehr nsensuwed. Paipel mahsanih: “Songosong me kin lelohng kumwail, ih me pil kin lelohng aramas koaros.” (1 Kor. 10:13) Met wehwehki me sohte lipilipil soangen ineng sapwung dah me ke ahneki, meteikan pil kin lelohng. Kaidehn kowe kelehpw kin lelohng met, oh pwehki sawas sang rehn Siohwa, ke kak powehdi.
2. Soangen kasongosong dah kan me ekei Kristian oh tohnsukuhl en Paipel kan kakete lelohng? (Pil kilang kilel kan.)
2 Paipel pil mahsanih: “Emenemen kin lelohng nan songosong sang ni pein eh ineng me kin kainangiong pein ih oh pitihedi.” (Seims 1:14) Dahme kin kasonge emen ele weksang dahme kin kasonge meteikan. Karasepe, ekei Kristian ele kin lelohng songosong en wia tiahk samin me pid wia nsenen pwopwoud nanpwungen ohl oh lih, a ekei nanpwungen ohl ohl oh lih lih. Irail kan me uhdihsang kilang kilel suwed kakete inangihada laud en pwurehng kilang. Me tohto me uhdihsang doadoahngki wini en kasahliel kan de kamamsakau pil kin lelohng soahngohte. Met akan iei ekei ineng sapwung me ekei Kristian oh tohnsukuhl en Paipel kan kin lelohng. Ekei pak, ele kitail koaros kin ahneki soangen pepehmohte me wahnpoaron Pohl ahneki. E ntingihedi: “Ni ahnsou me I mwahuki wia dahme pwung, dahme suwed me kin mi rehi.”—Rom 7:21.
Kasongosong kak pwarada ni soh kasikpe—ahnsou oh wasa sohte lipilipil (Menlau kilang parakrap 2)c
3. Dahme emen kakete medewe ma e kin pwurupwurehng pelian ineng sapwung ehu?
3 Ma ke kin pwurupwurehng pelian ineng sapwung ehu, ke kakete medewe me sohte omw kehl, mwomwen me ke solahr kak pelianda. Ke pil kakete medewe me sohte omw koapworopwor, mwomwen me Siohwa sohla pahn ketin kupwurperenkin uhk pwehki ke ahneki soangen ineng sapwungo. Ahpw ke kak kamehlele me soangen madamadau pwukat sohte mehlel! Pwehn kawehwehda dahme kahrehda, iren onop wet pahn sapengala peidek riau: (1) Ihs me men ken ahneki soangen madamadau pwukat? (2) Ia duwen omw kak powehdi ineng sapwung kan?
DAHME SEHDAN MEN KITAIL EN MEDEWE
4. (a) Dahme kahrehda Sehdan men kitail en kamehlele me kitail sohte kak pelianda ineng sapwung kan? (b) Dahme kahrehda kitail kak kamehlele me kitail kak pelianda ineng sapwung kan?
4 Sehdan men kitail en kamehlele me kitail sohte kak pelianda ineng sapwung kan. Sises mwahngih duwen met ni eh ketin padahkihong sapwellime tohnpadahk ko en kapakapki: “Komw dehr ketin mweidohng kiht sen lohdiong nan songosong, ahpw komw ketin doareikitasang me suwedo.” (Mad. 6:13) Sehdan peidengki ma aramas pahn men peikiong Siohwa ni arail lelohng songosong. (Sohp 2:4, 5) Dahme kahrehda Sehdan ahneki soangen madamadau wet? Sehdan me tepin kainangiong pein ih eh ineng kan, oh sohte men lelepekte ong Siohwa. E sansal me e kamehlele me kitail pil duwehte ih, me kitail pahn mwadangete sapeikiong Siohwa ni atail lelohng songosong. Sehdan pil medewe me sapwellimen Koht Ohl unseko kak lohdi pahn songosong! (Mad. 4:8, 9) Ahpw medewehla: Mehlel sohte atail kehl en pelianda ineng sapwung kan? Uhdahn mie! Kitail pwungki dahme wahnpoaron Pohl ntingihedi: “I kakohng mehkoaros pwehki I ahneki kehl sang rehn me ketikihong ie manaman.”—Pil. 4:13.
5. Ia duwen atail ese me Siohwa ketin likih me kitail kak powehdi ineng sapwung?
5 Weksang Sehdan, Siohwa ketin likih me kitail kak powehdi ineng sapwung kan. Ia duwen atail ese met? Pwehki Siohwa ketin kohpada me pokon kalaimwun ehu me kin lelepek ong ih pahn pitsang kahn kamakam kowahlap. Nna medewehla ia wehwehn met. Siohwa, me sohte kin ketin likamw, mahsanih me aramas tohtohie—kaidehn me malaulaute—pahn pedolong nan Paradais “likawih likou pwetepwet reirei,” me wehwehki irail mwakelekeldahr mwohn silangin Siohwa. (Kaud. 7:9, 13, 14) Eri e sansal me Siohwa ketin mwahngih me kitail kak pelianda ineng sapwung kan.
6-7. Dahme Sehdan pil men kitail en kamehlele?
6 Sehdan men kitail en medewe me sohte atail kehl oh koapworopwor pwehn pelian ineng sapwung kan, mwomwen me Siohwa sohte ketin kupwurperenki kitail pwehki kitail ahneki ineng sapwung kan. Dahme kahrehda Sehdan men kitail en medewe met? Sehdan iei me Siohwa sohte ketin kupwurperenki, e sohte pahn kak mour kohkohlahte, oh pahn kasohrala douluhl. (Sen. 3:15; Kaud. 20:10) Sehdan uhdahn peirinki me kitail ahneki koapworopwor en mour kohkohlahte. Eri e kin nantihong laud en kahrehiong kitail en medewe me kitail duwehte ih me sohte ahneki koapworopwor ong ahnsou kohkohdo. Ahpw kitail sohte douluhl duwehte ih! Ni mehlel, Paipel kamehlelehiong kitail me Siohwa ketin kupwurki sewese kitail pwe kitail en kak mour kohkohlahte. E “sohte kin ketin kupwurki emen en kasohrala ahpw e ketin kupwurki aramas koaros en koluhla.”—2 Pit. 3:9.
7 Ma kitail kamehlele me kitail sohte kak de sohte atail koapworopwor en pelianda ineng sapwung kan, kitail kin medemedewehte dahme Sehdan men kitail en medewe. Atail pohnese met kak sewese kitail en kakehlakahla atail en tengedihongete pelianda ih.—1 Pit. 5:8, 9.
DAHME KITAIL KAKETE MEDEWE PWEHKI KITAIL SOH UNSEK
8. Patehng wiewia sapwung kan, dahme dihp pil kin pidada? (Melkahka 51:5) (Pil kilang “Wehwehn Lepin Lokaia kan.”)
8 Likin Sehdan, mie mehkot me pil kin kahrehiong kitail en medewe me sohte atail kehl de koapworopwor en pelianda ineng sapwung kan. Dahieu mwo? Iei dihp me kitail koaros sohsohki sang tepin atail pahpa nohno.a—Sohp 14:4; wadek Melkahka 51:5.
9-10. (a) Ia ahn Adam oh Ihp pepehm mwurin ara wiahla aramas soh unsek kei? (Pil kilang kilel.) (b) Ia atail pepehm pwehki kitail sohsohki dihp?
9 Medewehla ahn Adam oh Ihp pepehm mwurin ara sohla unsek. Mwurin ara sapeikiong Siohwa, ira rukula oh song en perehla paliwarara ko. Me pid met, Insight on the Scriptures koasoia: “Eri dihp kahrehiong ira en suwedkihda, pwunodkihda, oh namenengkihda dahme ira wiahdao.” Adam oh Ihp solahr pahn pwurehng ahneki nanpwungmwahu keren rehn Siohwa. Sohte lipilipil dahme ira kin wia, ira pahn ahnsou koaros suwedki, pwunodki, oh namenengki ara solahr unsek.
10 Ei mehlel, atail irairo weksang ahn Adam oh Ihp. Pweinen pweipwei sapahlo—me sohte kadoadoahk ong tepin pwopwoudo—kak kamwakelekitailsang dihp oh kihong kitail nsenmwakelekel. (1 Kor. 6:11) Ahpw, kitail sohsohkihte dihp oh soh unsek. Ihme kahrehda, e sohte kapwuriamwei me kitail pil kin suwedkihda, pwunodkihda, oh namenengkihda atail sapwung kan. Ni mehlel, Paipel mahsanih me dihp kin kakaun aramas. Oh e pil kin kaunda “irail ko me sohte wiahda dihp duwehte me Adam wiahda.” (Rom 5:14) Ahpw kitail sohte anahne medewe me pwehki kitail ipwidi dipan, kitail sohte douluhl pahn kak wia me pwung de sohte atail koapworopwor ong ahnsou kohkohdo. Kitail kak soikala madamadau sapwung pwukat. Ia duwen?
Dihp kahrehiong Adam oh Ihp en suwedkihda, pwunodkihda, oh namenengkihda dahme ira wiahdao (Menlau kilang parakrap 9)
11. Dahme kitail pahn wia ma kitail medewe me kitail sohte kak pelianda ineng sapwung kan, oh dahme kahrehda? (Rom 6:12)
11 Pwehki kitail sohte unsek, ekei pak kitail kak medewe me kitail sohte kak pelianda ineng sapwung kan. E kin mwomwen me mie ngihl ehu nan atail madamadau me kin ndinda me kitail sohte douluhl kak pelian ineng sapwung kan. Ahpw kitail en dehr rong. Dahme kahrehda? Pwehki Paipel padahngki me kitail sohte anahne mweidohng dihp en “kakaunte” paliwaratail “nin duwen nanmwarki men.” (Wadek Rom 6:12.) Met wehwehki me kitail kak pilada en dehr kapwaiada ineng sapwung kan. (Kal. 5:16) Siohwa ketin likih me kitail kak pelianda kasongosong kan, pwe ma soh, e sohte pahn ketin kupwurki kitail en wia met. (Deud. 30:11-14; Rom 6:6; 1 Des. 4:3) Eri, kitail uhdahn kak pelianda ineng sapwung kan.
12. Dahme kitail pahn wia ma kitail medewe me sohte atail koapworopwor, oh dahme kahrehda?
12 Duwehte met, ni atail medewe me sohte atail koapworopwor—me Siohwa sohte ketin kupwurperenkin kitail pwehki atail ineng sapwung kan—kitail kak wiahki met atail irair en dihp me wie “koasoakoasoi,” oh kitail en dehr rong. Dahme kahrehda? Pwehki Paipel padahngki me Siohwa ketin mwahngih me kitail ipwidi dipan. (Mel. 103:13, 14) E ketin “mwahngih mehkoaros” duwen kitail, pil duwen dihp me kitail sohsohki eh kin kamwakid emenemen kitail. (1 Sohn 3:19, 20) Ma kitail pelianda atail ineng en wia me sapwung oh sohte kapwaiada, Siohwa pahn ketin wiahkin kitail aramas mwakelekel kei. Dahme kahrehda kitail kak kamehlelehki met?
13-14. En ahneki ineng sapwung kan kin wehwehki me Siohwa solahr ketin kupwurperenki kitail? Menlau kawehwehda.
13 Paipel kasalehda me mie wekpeseng laud nanpwungen en ahneki ineng sapwung oh en kapwaiada ineng sapwung. Kitail sohte kak ahnsou koaros kauhkitaildihsang en ahneki ineng sapwung, ahpw kitail kak kauhkitaildihsang en kapwaiada inengo. Karasepe, ekei Kristian nan Korint ni mwehin tepin Kristian ko kin wia tiahk en ohl mwahuki ohl oh lih mwahuki lih mwoweo. Pohl ntingihedi: “Ih duwen ekei kumwail mahso.” Ia duwe, met wehwehki me irail sohla douluhl pahn pwurehng ahnekihda soangen inengo? Mwein soh, pwehki e kin uhdahn apwal en uhdihsang ahneki soangen inengo. Ahpw Siohwa ketin kupwurperenki Kristian kan me kin kaunda pein irail oh soikala kapwaiada arail ineng sapwung kan. Mwohn silangi, irail “mwakelekeldahr.” (1 Kor. 6:9-11) Met pil kak wiawihong uhk.
14 Sohte lipilipil soangen ineng sapwung dah me ke kin pelipelian, ke kak powehdi. Mehnda ma ke sohte kak kihsang douluhl, ke kak kaunda pein uhk oh soikala “kapwaiada pein [omw] madamadau suwed.” (Ep. 2:3) Ia duwen omw kak wia met oh powehdi ineng sapwung kan?
DAHME KE ANAHNE WIA
15. Pwehn powehdi ineng sapwung kan, dahme kahrehda kitail en pohnese ni mehlel atail luwet kan?
15 Pwehn powehdi ineng sapwung kan, ke anahne pohnese ni mehlel omw luwet kan. Kanaiehng pwe ken dehr pitihekin uhk “lamalam likamw.” (Seims 1:22) Karasepe, emen me apwalki uhdihsang nim sakau kakete medewehda me kahpwal wet sohte uhdahn suwed pwehki mie ekei me kin nim laudsang ih. De emen me apwalki uhdihsang kilang kilel suwed kakete kapwukoahki emen oh nda, ‘Ma ei pwoudo kin kalapw kasalehdo eh poakohng ie, I sohte pahn ahneki ineng en kilang kilel suwed.’ Ma ke tepida ahneki soangen madamadau pwukat, met pahn kamengeiong uhk en dukula pahn kasongosong. Eri dehr kihda kahrepen omw wiewia sapwung kan. Kowe me pein pwukoahki omw wiewia kan.—Kal. 6:7.
16. Ia duwen omw kak kakehlaka omw koasoanehdi teng en wia dahme pwung?
16 Patehng omw pohnese ni mehlel omw luwet kan, ke pil anahne kakehlaka omw koasoanehdi teng en dehr dukula pahrail. (1 Kor. 9:26, 27; 1 Des. 4:4; 1 Pit. 1:15, 16) Medewe mwahu dahme kin keieu kasongeiuk oh iahd me kin wiawi. Ele mie soangen kasongosong ehu de soangen ahnsou ehu me ke kin lelohng songosong. Karasepe, ke kin apwalki pelianda kasongosong ehu ni ahnsou me ke kin pwang, de ni lukepen pwong? Kaunopada pein uhk oh koasoanehdi dahme ke pahn wia ahnsou me kasongosongo pwarada. Ahnsou me keieu mwahu en wia met iei mwohn kasongosongo eh wiawi.—Lep. Pad. 22:3.
17. Dahme kitail kak sukuhlkihsang ahn Sosep mehn kahlemeng? (Senesis 39:7-9) (Pil kilang kilel kan.)
17 Medewehla dahme Sosep wia ahnsou me en Podipar pwoudo song en kasonge ih. E mwadangete ndaiong soh. (Wadek Senesis 39:7-9.) Dahme kitail kak sukuhlkihsang met? Sosep koasoanedier en wia dahme pwung mwohn en Podipar pwoudo song en kasonge ih. Duwehte met, ke kak kakehlakahla omw koasoanehdi teng en wia dahme pwung mwohn kasongosong ehu pwarada. Ni ahl wet, ni omw lelohng kasongosongo, e pahn mengei ong uhk en idawehn dahme ke piladahr en wia.
Mwadang soikala kasongosong, duwehte me Sosep wia! (Menlau kilang parakrap 17)
“POUSEHLAHTE KASAWIH”
18. Ia duwen omw kak powehdi ineng sapwung kan? (2 Korint 13:5)
18 Pwehn powehdi ineng sapwung kan, ke pil anahne “pousehlahte kasawih” pein uhk, me wehwehki en kasakasawih pein uhk pwehn kilang ma ke mwahute. (Wadek 2 Korint 13:5.) Kaukaule kousapahlih omw madamadau oh wiewia kan oh wiahda wekidekla kan me anahn. Karasepe, pil ni omw powehdier kasongosong ehu, ke kak pein idek rehmw: ‘Ia uwen werei me I nda soh?’ Ma ke esehda me ke kin pwand en nda soh, dehr nsensuwed. Ahpw, medewehda dahme ke kak wia pwehn kamwahwihala omw pahn pelianda kasongosong kan mwuhr. Pein idek rehmw soangen peidek kan me duwehte: ‘Ni ei ahnekihda ineng sapwung ehu, I kak mwadangete kihsang? Ia duwe, soahng kan me I kin kilang, wadek, de rong kin kahrehda en apwal ong ie en pelianda kasongosong? I kin mwadangete sohpeisang kilel suwed kan? I wehwehki dahme kahrehda sapwellimen Siohwa koasoandi kan kin ahnsou koaros mwahu ong ie mehnda ma I anahne nantihong laud pwehn kaunda pein ngehi?’—Mel. 101:3.
19. Ia duwen pilipil saloalokong tikitik kan ar kak kahrehiong uhk en apwalki pelianda ineng sapwung kan?
19 Ni omw kin kasawih pein uhk, tehk mwahu en dehr kihda kahrepen omw wiewia sapwung kan. Paipel mahsanih: “Ihs me kak wehwehki audepen mohngiong en aramas? Sohte mehkot me duwehte me diren piht; sohte kamwahupe ieu kak dierekda.” (Ser. 17:9) Sises mahsanih me mohngiongitail kin kihda “lamalam suwed” kan. (Mad. 15:19) Karasepe, emen me uhdihsang kilang kilel suwed, ele mwurin ahnsou ehu, kakete medewe me e “sohte keper” en kilang kilel kan me kin kahrehda ineng suwed pwehki kilel ko sohte kasalehda aramas kilisou. De emen kakete medewe, ‘E sohte sapwung en medewehte me I wiewia me suwed ma I sohte uhdahn wia.’ Ma emen kin medewe soahng wet, e mwomwen me e kin “koasoakoasoane en kaitarala ineng suwed kan.” (Rom 13:14) Ia duwen omw kak soikala wia met? Kanaiehng ken dehr wiahda pilipil saloalokong tikitik kan me pahn imwikihla pilipil saloalokong laud kan, me duwehte omw dukula pahn wiewia sapwung.b Pil soikala soangen madamadau de “lamalam suwed” koaros me kak kahrehiong uhk en kihda kahrepen omw wiewia sapwung.
20. Dahme pahn wiawihong ineng sapwung kan ni ahnsou kohkohdo, oh soangen sawas dah me kitail ahneki met?
20 Nin duwen me kitail sukuhlkier, Siohwa kin ketikihong kitail kehl pwehn pelianda kasongosong kan. Oh pwehki pweinen pweipwei sapahlo, kitail kak ale mahkpen dipatail kan oh ahneki koapworopwor en mour kohkohlahte nan sampah kapwo. Kitail pahn uhdahn peren ni ahnsowo me kitail kak papah Siohwa oh sohte anahne pelian ineng sapwung kan. Ahpw lao lel ahnsowo, kitail kak kamehlele me kitail ahneki kehl oh koapworopwor pwehn pelianda ineng sapwung kan. Pwehki Siohwa pahn ketin kapaiahda atail nannanti, kitail kak powehdi!
KOUL 122 Kehlail oh Tengedi!
a WEHWEHN LEPIN LOKAIA: Nan Paipel, lepin lokaiao “dihp” kin kalapw dokedoke wiewia ehu, duwehte pirap, kamwahl, de kamaramas. (Eks. 20:13-15; 1 Kor. 6:18) Ahpw nan ekei iren Paipel, “dihp” kin dokedoke irair ehu me kitail sohsohki ni atail ipwidi, mehnda ma kitail saikinte wiahda dihp.
b Tehk me mwahnakapwo nan Lepin Padahk 7:7-23 wiahda pilipil saloalokong tikitik kei mwohn eh wiahda pilipil saloalokong laudo oh dukula pahn tiahk samin me pid wia nsenen pwopwoud.
c WEHWEHN KILEL: Palimeing: Ni eh mwomwohd ni wasahn koahpi ehu, brother pwulopwul men kilang ohl riemen kasalehpene ara limpoak. Palimaun: Sister men kilangada aramas riemen sumwsumwoak.