Mwasamwasahn Pwehn Dehr Lohdi Pahn Kasongosong

1-2. (a) Kehkehlik dah me Sises ketikihong sapwellime wahnpoaron ko? (b) Dahme kahrehda tohnpadahk ko tangasang Sises? (Pil kilang kilel kan.)

“MOHNGIONG me ngoang, ahpw paliwar me luwet.”a (Mad. 26:41b) Ni eh mahsanih met, Sises ketin kasalehda me e mwahngih me kitail sohte unsek oh pahn wiahda sapwung kan. Ahpw e pil mahsanih met pwehn wia kataman ehu ong kitail: Dehr medewe me kitail pahn ahnsou koaros kehlail pwehn wia dahme pwung. Awa kei mwohn Sises eh mahsanih mepwukat, sapwellime tohnpadahk ko nda me re sohte pahn kohkohsang ih. (Mad. 26:35) Irail men wia dahme pwung. Ahpw, irail sohte wehwehki me nan irair apwal ehu, e pahn mengei ong irail en luwetala oh sohte kak wia dahme pwung. Ihme kahrehda Sises ketin kehkehlingkihong irail: “Kumwail pousehlahte mwasamwasahn oh poadidiong kapakap pwe kumwail en dehr lohdiong nan songosong.”—Mad. 26:41a.

² E kansensuwed me tohnpadahk ko sohte mwasamwasahnte. Ni ahnsou me Sises ketin selidi, ia duwe, irail mihmihte reh de irail masepwehkada oh tang? Pwehki irail sohte mwasamwasahn, tohnpadahk ko wia dahme irail nda me re sohte pahn wia—irail kohkohsang Sises.—Mad. 26:56.

3. (a) Pwehn loalopwoatohngete Siohwa, dahme kahrehda kitail en dehr medewe me kitail pahn ahnsou koaros kehlail pwehn wia dahme pwung? (b) Dahme kitail pahn koasoiapene nan iren onop wet?

³ Kitail en dehr medewe me kitail pahn ahnsou koaros kehlail pwehn wia dahme pwung. Mehlel, kitail koasoanehdi en dehr wia mehkot me pahn kansensuwedihala Siohwa. Ahpw, kitail pil sohte unsek oh kak mengei en loiong kasongosong en wia me sapwung. (Rom 5:12; 7:​21-23) Ni atail sohte kasik, kitail kak mihla nan irair ehu me pahn kasonge kitail en wia me sapwung. Pwehn loalopwoatohngete Siohwa oh sapwellime Ohlo, kitail anahne idawehn ahn Sises kaweido en mwasamwasahn oh dehr lohdi pahn kasongosong en dihp. Iren onop wet kak sewese kitail wia met. Keieu, kitail pahn koasoiapene wasa kan me kitail keieu anahne mwasamwasahn. Mwuri, kitail pahn koasoiapene ia duwen atail kak pere kitail sang kasongosong. Oh kaimwisekala, kitail pahn koasoiapene ia duwen atail en mwasamwasahnte.

ESE DAHME KIN KEIEU KASONGEIUK

4-5. Dahme kahrehda kitail anahne kanahieng en dehr pil wia dihp tikitik kan?

⁴ Ekei dihp tikitiksang ekei, ahpw re kak kaluwetehla atail nanpwungmwahu rehn Siohwa. Oh re pil kak kahrehiong kitail en wiahda dihp laud teikan.

⁵ Kitail koaros kin lelohng kasongosong en wia dihp. Ahpw atail luwet kan wekpeseng, eri mie soahng kei me pahn keieu kasonge kitail pwehn wia mehkot sapwung. Karasepe, ele emen kin nannanti en dehr wiahda dihp laud, me duwehte tiahk samin me pid wia nsenen pwopwoud. Ele pil emen anahne pelianda kasongosong en wia mehkot me samin, me duwehte tiahk en mwadongki dipwisou en kaparapar de kilang kilel suwed. Oh pil emen ele anahne peiong eh kin keh lingeringer, pohnmwahso, de pweiek en wia dahme pwung pwehki e masak dahme meteikan medewe. Kitail kak wehwehki dahme kahrehda Seims koasoia me “emenemen kin lelohng nan songosong sang ni pein eh ineng.”—Seims 1:14.

6. Soahng dah kan me kitail anahne mehleliong?

⁶ Ke ese dahme kin keieu kasongeiuk? E keper en pohnsehsehla atail luwet kan de medewe me kitail uhdahn kehlail oh sohte kak wiahda dihp. (1 Sohn 1:8) Tamataman, Pohl koasoia me pil irail “me kin ale kaweid sang sapwellimen Koht manaman” kakete lelohng kasongosong ma irail sohte mwasamwasahn. (Kal. 6:1) Kitail anahne mehleliong pein kitail oh pohnese wasa kan me kitail kin luwet loale.—2 Kor. 13:5.

7. Dahme kitail anahne keieu pere kitail sang? Menlau kihda ehu karasaras.

⁷ Ni ahnsou me kitail esehda soahng kan me kin keieu kasonge kitail, dahme kitail anahne wia? Kakehlakahda atail en pelianda kasongosong ko! Karasepe, ni mwehin aramas akan nan Paipel, wasa me kin keieu luwet nan kahnimw ehu iei ni ewen kehl kan. Ihme kahrehda sounpei tohto anahne mi ni ewen kehl ko pwehn pere kahnimwo. Duwehte met, kitail anahne tehk kanahieng wasa kan me kitail ese me kitail kin keieu luwet pah.—1 Kor. 9:27.

IA DUWEN ATAIL KAK PERE KITAIL

8-9. Ia duwen mwahnakapwo nan Lepin Padahk irelaud 7 eh kak soikala wiahda dihp laud ehu? (Lepin Padahk 7:​8, 9, 13, 14, 21)

⁸ Ia duwen atail kak pere kitail? Medewehla dahme kitail kak sukuhlkihsang mwahnakapwo me Lepin Padahk irelaud 7 koasoia duwe. E wiahda tiahk samin me pid wia nsenen pwopwoud rehn lih suwed men. Iretikitik 22 padahkihong kitail me mwahnakapwo “mwadangete” iangada liho kohkohla. Ahpw nan iretikitik en mwowe ko kasalehda me e wiahda pilipil sapwung kei mwohn eh iang liho me kahrehda kedekedeo e wiahda dihp.

⁹ Dahme mwahnakapwo wia mwohn eh wiahda dihp laud ehu? Keieu, ni soutik, e “kohkohla pohn ahlo, limwahn wasa me lih emen kin kousoan ie.” Mwuri, e alulahng ni imwen liho. (Wadek Lepin Padahk 7:​8, 9.) Mwurin mwo, ni ahnsou me e kilangada liho, e sohte wetsang. Ahpw, e mweidohng liho en metik oh rongorong en liho eh koasoia me e wiahda meirong en kaminimin, mwein pwehki liho men en medewe me kaidehn ih aramas suwed men. (Wadek Lepin Padahk 7:​13, 14, 21.) Ma mwahnakapwo sohte wia soahng pwukat, e pahn pere ih sang kasongosong oh dihp.

10. Ia duwen emen rahnwet eh kak wiahda soangen sapwungohte me mwahnakapwo wia?

¹⁰ Karasaras en Paipel wet kasalehda dahme kak wiawihong sapwellimen Siohwa tohnkaudok men. E kakete wiahda dihp laud oh mwuhr medewe me soahng pwukat wiawi ni soh kasikpe. Ahpw ma e medewe dahme uhdahn wiawi, e pahn esehda me e wiadahr pilipil sapwung kan mwohn eh wiahda dihp laudo. Ele e pilada kompoakepah kan me sohte poakohng Siohwa. De mwein ekei mehn kamweit kan me e pilada, website kan me e kin kilang, de wasa kan me e kin kohla ie sohte mwahu ong Kristian men. Mwein e pil sohla kin kapakap, wadawad Paipel, iang towehda mihting kan, de kalohk. Duwehte mwahnakapwo nan Lepin Padahk, pwehki eh wiahda pilipil suwed tohto, ihme kahrehda e wiahda dihp laud.

11. Dahme kitail anahne wia pwe kitail en dehr wiahda dihp?

¹¹ Ia mehn kasukuhl ong kitail? Kitail en soikala dihp oh pil soahng kan me kin kahrehiong kitail en wiahda dihp. Ih met me Solomon kawehwehda mwurin eh koasoia dahme wiawihong mwahnakapwo oh lih suwedo. E kihda kaweido: “Dehr idawehnseli soangen lih menet.” (Lep. Pad. 7:25) E pil koasoia: “Kumwail keiweisang soangen lih menet! Dehr pil keilahng limwahn eh wenihmw!” (Lep. Pad. 5:​3, 8) Ei, kitail kin perehsang pein kitail dihp ni atail kin kadohwaneweisang kitail soahng kan me kin kahrehiong kitail nan dihp.b Met wehwehki me mehnda ma soahng ehu sohte sapwung ong Kristian kan, kitail sohte pahn wia ma kitail ese me e pahn kasonge kitail en wia mehkot sapwung.—Mad. 5:​29, 30.

12. Dahme Sohp koasoanehdi en wia, oh ia duwen met eh sewese perehsang kasongosong? (Sohp 31:1)

¹² Pwehn soikala irair kan me kak kahrehiong kitail en wiahda dihp, kitail anahne koasoanehdi en kin kanahieng. Ih met me Sohp wia. E “wiadahr inou lapalap ehu” en dehr kangkakil emen lih ni ineng suwed.” (Wadek Sohp 31:1.) En wia dahme e koasoanehdi pahn sewese en dehr mihla nan keper en wia dipen kamwahl. Kitail pil kak koasoanehdi en soikala soahng ehu me kak kahrehiong kitail nan songosong.

13. Dahme kahrehda kitail anahne kanahieng dahme kitail kin medewe? (Pil kilang kilel kan.)

¹³ Kitail pil anahne pere atail madamadau. (Eks. 20:17) Ekei kin medewe me en medewehte omw ineng sapwung kan ahpw sohte kapwaiada, met sohte sapwung. Ahpw soangen madamadau wet sapwung. Emen me kin medemedewehte mehkot sapwung pahn kalaudehla eh men kapwaiada dahme e medemedewe. Ma e kin wia met, e pahn kahrehiong en apwalki soikala mehkot sapwung. Ei mehlel, ekei pak kitail pahn kin ahneki madamadau sapwung kan. Ma met wiawi, e kesempwal en mwadang soikala madamadau pwukat oh wiliankihdi me mwahu. Ni atail wia met, kitail kin pere kitail sang wiahda dihp laud pwehki kitail sohte kin mweidohng madamadau sapwung en wiahla ineng kehlail ehu.—Pil. 4:8; Kol. 3:2; Seims 1:​13-15.

14. Dahme pil kak sewese pere kitail sang kasongosong?

¹⁴ Dahme kitail pil kak wia pwehn pere pein kitail sang kasongosong? Kitail anahne uhdahn kamehlele me kitail pahn ahnsou koaros paiekihda atail peikiong sapwellimen Siohwa kosonned kan. Ekei pak e kak apwal ong kitail en ahneki madamadau oh pepehm ni ahl me Siohwa ketin kupwurperenki. Ahpw ni atail kin nanti laud en wia met, kitail uhdahn pahn peren.

15. Ia duwen atail kakairada ineng mwahu eh pahn sewese pere kitail sang kasongosong?

¹⁵ Kitail anahne kakairada ineng mwahu kan. Ma kitail esehla en “tatki me suwed, oh kesempwalki dahme mwahu,” kitail pahn kakehlakahla atail koasoanehdi en wia dahme pwung oh soikala irair kan me kin kahrehiong kitail en wiahda dihp. (Eimw. 5:15) Ni ahnsou me kitail kin ahneki ineng mwahu kan, kitail pahn kak soikala kasongosong kan ni ahnsou me kitail mi nan irair ehu me kitail sohte kasik de sohte kak kauhdi.

16. Ia duwen towehda mihting, kalohk, oh soahng teikan eh kak sewese kitail en mwasamwasahnte? (Pil kilang kilel kan.)

¹⁶ Ia duwen atail kak kakairada ineng mwahu kan? Kitail kak wia met sang ni atail kin soupisengki soahng kan me kin kakehlakahla atail nanpwungmwahu rehn Siohwa. Ni atail kin iang towehda mihting en Kristian kan de iang kalohk, kitail sohte pahn mengei en lelohng kasongosong en wia mehkot sapwung. Ahpw, kitail pahn kakairada atail ineng en kaperenda Siohwa. (Mad. 28:​19, 20; Ipru 10:​24, 25) Sang ni atail wadek oh onopki Mahsen en Koht oh doudouloale, kitail kin kakehlaka atail poakohng dahme mwahu oh atail kailongki dahme suwed. (Sos. 1:8; Mel. 1:​2, 3; 119:​97, 101) Tamataman, Sises ketin padahkihong sapwellime tohnpadahk ko: “Poadidiong kapakap pwe kumwail en dehr lohdiong nan songosong.” (Mad. 26:41) Ni atail kin kapakapohng Samatailo nanleng, kitail kin mweidohng en kakehle kitail oh atail koasoanehdi teng en kaperenda ih.—Seims 4:8.

POUSEHLAHTE MWASAMWASAHN

17. Luwet dah me Piter apwalki powehdi?

¹⁷ Ele kitail kak powehdi douluhl ekei atail luwet kan. Ahpw ele mie atail luwet teikan me kitail kin anahne pelipeliante erein ahnsou reirei. Medewehla mehn kahlemeng en wahnpoaron Piter. Pwehki eh masak aramas, e kahmahmkihla Sises pak siluh. (Mad. 26:​69-75) Mwuhr, e mwomwen me Piter powehdi eh luweto, pwehki ni eimah e kalohki duwen Sises mwohn Sanedrin ko. (Wiewia 5:​27-29) Ahpw sounpar kei mwuhr, pwehki eh “masak irail ko me kin utung sirkumsais,” e uhdihsang iang Kristian kan me kaidehn mehn Suhs mwenge. (Kal. 2:​11, 12) Eh masak aramas pil pwurehng wiawi. Mwein e sohte douluhl powehdi.

18. Dahme ekei atail luwet kakete wia?

¹⁸ Duwehte Piter, ele ekei pak kitail kin pelian irair ehu oh medewe me kitail powehdier. Karasepe, emen brother koasoia: “I uhdihsang kilang kilel suwed erein sounpar eisek oh I kamehlele me I powehdier. Ahpw, ei luweto duwehte mahn keper men me kin rukula oh awiawih ahnsou me keieu mwahu en pwarada.” E mwahu me brothero sohte uhdihsang pelian eh luweto. E esehda me e anahne wia mehkot ehuehu rahn pwehn pelian eh luweto oh me e pahn anahne wiewia met erein eh mour nan koasoandi suwed wet. Pwehki sawas sang eh pwoudo oh elder kan nan mwomwohdiso, met kalaudehla eh kanahieng en kadohwanewei sang ih kilel suwed.

19. Dahme kitail kak wia ma kitail ahneki luwet ehu me kitail saikinte powehdi?

¹⁹ Dahme kitail kak wia pwe luwet ehu me kitail saikinte powehdi en dehr kahrehiong kitail en wiahda mehkot sapwung? Kitail anahne wia dahme Sises ketin padahkihong kitail en wia: “Pousehlahte mwasamwasahn,” me iei en pere kitail sang kasongosong kan. Pil ahnsou kan me ke pehm me ke kehlail, pousehlahte soikala irair kan me kak kahrehda kasongosong. (1 Kor. 10:12) Pousehlahte wia soahng kan me seweseiuk ken pelianda luweto. Lepin Padahk 28:​14, (NW) mahsanih: “Meid peren aramas me kin tetehk eh wiewia kan ahnsou koaros.”—2 Pit. 3:14.

KAMWAHUPEN MWASAMWASAHNTE

20-21. (a) Kapai dah kan me kitail pahn ahneki ni atail pousehlahte pere kitail sang kasongosong? (b) Ma kitail nanti laud en pelianda kasongosong, dahme Siohwa pahn ketin wiahiong kitail? (2 Korint 4:7)

²⁰ Kitail kak kamehlele me en pousehlahte pere kitail sang kasongosong kin ahnsou koaros mwahu ong kitail. Ni atail kin mour ni ahl me Siohwa ketin kupwurki, kitail pahn ahneki peren laudsang atail “perenki dihp ahnsou mwotomwot.” (Ipru 11:25; Mel. 19:8) Met pwehki kitail wiawihda en mour pahrekiong kupwure. (Sen. 1:27) Ni atail ahneki mour me kin kaperenda Siohwa, kitail pahn ahneki nsenmwakelekel oh pahn kak ehu rahn mour kohkohlahte.—1 Tim. 6:12; 2 Tim. 1:3; Sud 20, 21.

²¹ Ei mehlel, “paliwar me luwet.” Ahpw met sohte wehwehki me kitail sohte kak wiahiong mehkot atail luwet kan. Siohwa ketin kupwurki ketikihong kitail kehl me kitail anahne. (Wadek 2 Korint 4:7.) Ahpw tehk me ih kehlo met me Koht ketikihda me “laudsang dahme aramas ahneki.” Ahpw keieu, kitail anahne wia uwen atail kak koaros pwehn pelianda kasongosong. Ma kitail wia met, kitail kak kamehlele me Siohwa pahn ketikihong kitail kehl laud ni ahnsou me kitail anahne. (1 Kor. 10:13) Ei, sang ni sapwellimen Siohwa sawas, kitail kak pousehlahte pere kitail sang kasongosong.