Kitail Kak Powehdi Luwet Akan En War

“Imwilahn nsenohki kapwaiada ineng en uduk iei mehla.”​—ROM 8:6, New World Translation.

1. Dahme ekei aramas kin medemedewe duwen paliwar en aramas akan, oh mehnia peidek e konehng kitail en koasoiapene?

“I KIN patohwan kapingahkin komwi omwi lemmwin kowahlap; wiepen nin limomwi kan me kapwuriamwei oh inenen mwahu mehlel.” (Melkahka 139:14) Sounmelkahka Depit koulki met ni ahnsou me e kin doudouloale duwen mehkot me Siohwa kapikada​—iei paliwar en aramas. Ahpw, ekei sounpadahk kan en pelien lamalam kan sohte kin kapingahki Kauno duwehte Depit, ahpw re kin wiahki me paliwar en aramas kin wia mehn kainengih oh dipwisou mehn kesehdiong aramas nan dihp. Ekei aramas kin kadaneki paliwar “likou puhp en kasalonge madamadau, poahsoanepen mehn kansenamwahu, mehn saliehdi ong aramas ong kauwehla pein irail, wasahn selidi ong nan rotorot, oh kampen aramas mour.” Ni mehlel, wahnpoaron Pohl mahsanih: “I ese me mwahu sohte mi loalei.” (Rom 7:18) Ahpw, met kin wehwehki me kitail kin selidi ong nan paliwar dipan ieu oh sohte kak pitsang wiahda dihp ahnsou koaros?

2. (a) Ia wehwehn “nsenohki kapwaiada ineng en uduk”? (b) Aramas akan me kin men kaperenda Koht kin lelohng soangen uhpene dahieu loalarail me kin pid nanpwungen “paliwar” oh “pali ngehn”?

² Ekei pak, paliwar en aramas nan Pwuhk Sarawi kin adaneki “uduk.” (1 Nanmwarki 21:27) Iren Pwuhk Sarawi pil kin doadoahngki lepin lokaia “uduk” pwehn wehwehki aramas me soh-unsek nin duwen arail wiaier kadaudok dipan kei en ohl sapeik, Adam. (Episos 2:3; Melkahka 51:5; Rom 5:12) Pwehki kitail sohsohki dihp sang rehn Adam met kin kahrehda ‘luwet en uduk’ kin mih nan paliwaratail. (Rom 6:19, NW) Pohl kihda kaweid wet: “Imwilahn nsenohki kapwaiada ineng en uduk iei mehla.” (Rom 8:6, NW) “Nsenohki kapwaiada ineng en uduk” kin wehwehki me emen pahn mweidong ineng en uduk en kaunda ih. (1 Sohn 2:16) Eri, ma kitail men kaperenda Koht, pahn mie uhpene me kin wiawi ahnsou koaros nanpwungen atail pali ngehn oh luwet en paliwaratail me kin ahnsou koaros kalkaluwetei kitailla pwehn wia “doadoahk kan en uduk.” (Kalesia 5:17-23; 1 Piter 2:11) Mwurin Pohl kawehwe duwen uhpene me kin wiawi reh, e mahsanih met: “Uhdahn aramas paisuwed men ngehi! Ihs me pahn kapitiehla sang nan paliwar wet me kin kahluwalahng ie mehla?” (Rom 7:24) Eri, Pohl kin wia emen me sohte kak pelian kasongosong kan? Pwuhk Sarawi sapengki soh!

Uhdahn Wehwehpen Kasongosong oh Dihp

3. Ia madamadau en aramas tohto me kin pid dihp oh kasongosong kan, ahpw kaweid dahieu Pwuhk Sarawi kin kihda me pahn sewese kitail en liksang madamadau pwukat?

³ Ong aramas tohto nan rahnpwukat, irail sohte kak kamehlele me mie dihp. Ekei aramas kin lemeleme me “dihp” kin wia lepin lokaia ehu me mehn mahs akan kin doadoahngki oh e kin wehwehki sapwung tikitik kan me aramas kin wiahda. Aramas pwukat sohte kin wehwehki me “kitail koaros uhdahn pahn pwarala rehn Krais, pwe en kadeingkitailda. Emen emen pahn ale pwaise nin duwen me konehng eh wiewia mwahu de suwed nin dokon eh mour nan paliwere nin sampah.” (2 Korint 5:10) Ekei aramas kin nda met: “I kak pelianda soahng koaros, ihte kasongosong soh!” Ekei aramas akan kin tikida nan soangen mour me nsenarail kin pweida ahnsou koaros: mehnda ma nsenarail pid mwenge, nsen en pwopwoud, kaperen kan, de mehn akadei kan. Re sohte kin ihte mwahuki soahng pwukat koaros, ahpw re men ahneki soahng pwukat koaros ni ahnsowohte! (Luk 15:12) Re sohte kin kilang mehkot likin kaperen pwukat, re sohte kak mendahkihla kaperen en ahnsouwet pwehn ahneki peren me pahn wiawi ni ahnsou kohkohdo iei “mour mehlel.” (1 Timoty 6:19) Ahpw, Pwuhk Sarawi kin padahkihong kitail en medemedewe mwahu duwen dahme keieu mwahu ong atail mour oh kilang mwohtail, pwehn sewese kitail en liksang soahng kan koaros me pahn kak kaluwetala kitail ni pali ngehn. Ehu lepin padahk me kohsang rehn Koht mahsanih: “Aramas me mie eh lamalam pahn kilang apwal eh kohkodohng, e pahn tangasang, ahpw aramas me sohte eh lamalam pahn wenewohng loale, oh mwuhr e ahpw pahn koluhkihla.”​—Lepin Padahk 27:12.

4. Kaweid dahieu me kileledi nan 1 Korint 10:12, 13 me Pohl kihda?

⁴ Ni ahnsou me Pohl ntingwong Kristian akan nan Korint​—kahnimw en Korint kin ndandkihla tiahk suwed akan—​e kihda kaweid me pahn sewese irail en pelian kasongosong kan oh sewese irail en wehwehki duwen kehl en ineng en wia dihp. E mahsanih: “Eri, mehmen me pepehm me e kesikesihnen teng, a en kanahieng pwe e de pwupwudi. Pwe songosong koaros me kin lelohng kumwail, ih me kin lelohng aramas koaros. Koht me uhdahn mehlel, oh e sohte pahn ketin mweidohng kumwail en ale songosong me kumwail sohte kak powehdi; ahpw ahnsoun songosong, e pahn ketikihong kumwail kehlail pwe kumwail en kak dadaur oh pitsang nan songosongo.” (1 Korint 10:12, 13) Kitail koaros​—pwulopwul oh mah, ohl oh lih—​kin lelohng kasongosong tohto nan wasahn sukuhl, wasahn doadoahk, oh pil wasa teikan. Eri, kitail en kasawihada mwahu mahsen en Pohl oh tehk duwen ia wehwehn mahsen pwukat ong kitail.

Dehr Wahkihla Pein Ahmw Kehl Laudsang Dahme Konehng

5. Dahme kahrehda e keper kitail en wahkihla pein atail kehl laudsang dahme konehng?

⁵ Pohl mahsanih: “Eri, mehmen me pepehm me e kesikesihnen teng, a en kanahieng pwe e de pwupwudi.” Ma kitail pahn wahkihla pein atail kehl me pid tiahk mwakelekel, met pahn wia mehkot keper ong kitail. Ma kitail wia met, e kin kasalehda me kitail sohte nohn wehwehki uwen kehl en ineng en wia dihp. Tamataman me Moses, Depit, Solomon, oh wahnpoaron Piter lohdiong nan dihp, a kitail sohte leme ong me kitail pil kak lohdi? (Nempe 20:2-13; 2 Samuel 11:1-27; 1 Nanmwarki 11:1-6; Madiu 26:69-75) Lepin Padahk 14:16 (NW) mahsanih: “Aramas me mie eh lamalam kin tehk ni keneinei pwe re en dohweisang wasa me kahpwal mie, ahpw me pweipwei kin lingeringerda oh kin wahkihla pein ah kehl laudsang dahme konehng.” Oh pil, Sises mahsanih: ‘Ngehn me peik, a paliwar me luwet.’ (Madiu 26:41) Aramas soh-unsek kan koaros kin ahneki ineng suwed akan, ihme kahrehda, kitail anahne rong kanahieng kaweid en Pohl oh pelian kasongosong kan, pwe kitail en dehr lohdiong nan dihp.​—Seremaia 17:9.

6. Iahd oh iaduwen kitail anahne kaunopada ong kasongosong kan?

⁶ E kin wia elen loalokong ma kitail pahn kaunopada pein kitail mwohn kitail pahn lelohng kahpwal akan. Nanmwarki Asa wehwehki me ni ahnsou me mie popohl, met iei ahnsou mwahu en kaunopada. (2 Kronikel 14:2, 6, 7) E wehwehki me: ma e pahn awiawih oh kaunopada ahnsou me sapwellime imwintihti kan tepida mahweniong irail, e pahn pwand en kaunopada ahnsowo. Kitail en alasang Nanmwarki Asa ni ahl wet, oh tamataman me e pahn keieu mwahu, ni ahnsou meleilei, en wiahda atail pilipil kan ong dahme kitail pahn wia ahnsou me kasongosong kan pahn lelohng kitail. (Melkahka 63:6) Daniel oh kompoakepah kan me kin lemmwiki Koht wiahda arail pilipil en kolokolete arail lelepek ong sapwellimen Siohwa kosonned akan mwohn re lelohng kasongosong en kang mwenge me Nanmwarkio men kihong irail de soh. Ihme kahrehda, re sohte kin pweiek ni ahr kolokolete ahr lelepek oh liksang kang mwenge me samin kan. (Daniel 1:8) Mwohn kasongosong kan pahn pwarada rehtail, kitail anahne kakehlailih loalatail kan pwehn koasoanehdiong pein kitail me kitail pahn kolokolete atail tiahk mwakelekel. Met pahn kak sewese kitail en pelian kasongosong pwe kitail sohte pahn lohdiong nan dihp.

7. Dahme kahrehda e kin wia kangoang laud ong kitail en ese me aramas teikan kin powehdi kasongosong kan me kin lelohng irail?

⁷ Kitail kin alehdi mehn kamweit laud ni atail pahn wadek mahsen en Pohl: “Pwe songosong koaros me kin lelohng kumwail, ih me kin lelohng aramas koaros”! (1 Korint 10:13) Wahnpoaron Piter ntingihdi: “Eri, kumwail tengeteng ni amwail pwoson oh kehlail ong ih [Tepil], pwe kumwail ese me riamwail Kristian akan wasa koaros nin sampah kin iang kumwail mihla nan soangen lokolok me kumwail kin mihla loale.” (1 Piter 5:9) Ei, meteikan pil kin lelohng soangen kasongosong kan duwehte kitail oh irail kin powehdi kasongosong pwukat pwehki re kin ale sawas sang Koht, eri, kitail pil kak wia met. Kitail koaros nin duwen Kristian mehlel akan me kin momour nan sampah suwed wet, kitail anahne kaunopada atail madamadau kan me kitail pahn lelohng kasongosong kan. Iaduwen kitail pahn kak ese me kitail pahn kak powehdi atail luwet akan oh kitail sohte pahn lohdi pahn kasongosong kan oh wiahda dihp?

Kitail Kak Pelian Kasongosong kan!

8. Ia ehu ahl me kesempwal me kak sewese kitail pwe kitail en dehr lohdi pahn kasongosong kan?

⁸ Ehu ahl kesempwal en dehr “kin liduwih dihp” iei met: wia uwen me kitail kak en pelian kasongosong kan. (Rom 6:6) Lepin Padahk 4:14, 15 kin kangoange kitail: “Ke dehr kohla wasa aramas suwed kan kin kohla ie. Dehr idawehn karasepen aramas suwed kan. Dehr wia! Sohpeisang me suwed! Soikala oh wenewohng nan elomw.” Kitail kin kalapw ese mwowe ma ekei irair de wiewia kan pahn kahrehong kitail en lohdi pahn kasongosong kan oh lohdiong nan dihp. Ihme kahrehda, e sansal me Kristian akan anahne “sohpeisang” me wehwehki dehr patehng aramas akan oh liksang soahng kan oh wasa kan me pahn kainengihada loalatail kan ong ineng suwed kan.

9. Iaduwen Pwuhk Sarawi kin kawehwehda mwahu duwen tangasang kasongosong kan?

⁹ Pil ehu ahl kesempwal me pahn sewese kitail en pelian kasongosong kan iei en tangweisang irair akan me pahn kak wia kasongosong ong kitail. Pohl kihda kaweid wet: “Eri, kumwail tangasang tiahk en nenek.” (1 Korint 6:18, NW) E pil ntingihdi met: “Kumwail tangasang tiahk en pwongih dikedik en eni kan.” (1 Korint 10:14, NW) Wahnpoaron Pohl pil kihong Timoty kaweid en tangasang ineng suwed en noarok kepwe kan oh pil “ineng en mwahnakapw akan.”​—2 Timoty 2:22, NW; 1 Timoty 6:9-11, NW.

10. Ia mehn kahlemeng riau me kin wekpeseng me kin kasansalehda duwen kesempwalpen tangasang kasongosong kan?

¹⁰ Medemedewe duwen dahme wiawihong Nanmwarki Depit en wehin Israel. Sang wasahn iroir en pohn Tehnpeseo, e kilang lih masamwahu men wie duhdu, oh ineng suwed ahpw kohda reh. E pahn mwahu ma e kohkohlahsang wasao oh tangasang kasongosongo. Ahpw, e men ese ihs liho​—Padsipa—​oh met imwila suwed. (2 Samuel 11:1–12:23) Ahpw, ni pali teio, dahme Sosep wia ni ahnsou me en eh soumas eh pwoud lih suwed men kin ngidingidki kangoange ih en wendi reh? Pwuhk Sarawi mahsanih: “Liho ahpw kin pekipeki reh rahn koaros, ahpw Sosep sohte dukiong wendi reh.” Edetehn Kosonned en Moses saikinte wiawihda, Sosep sapengki liho: “Eri a, ia duwen ei pahn wiahda soangen sapwung laud wet, oh dipikihda mwohn Koht?” Ehu rahn, liho ahpw koledi ih, ndahng, “Nna, wendi mahs rehi!” Sosep mihmihte rehn liho oh song en kawehwehong liho ia kahrepe e sohte kak wendi reh? Soh. E “uhdahte tangasang, tangieila liki.” Sosep sohte mweidong kasongosong wet en powehdi ih. E tangasang!​—Senesis 39:7-16.

11. Dahme kitail kak wia ma kitail kin kalapw lelong kasongosong kan?

¹¹ Ekei ahnsou, tangasang mehkot kin wehwehki me emen masepwehk, ahpw ma kitail pahn tangasang wasao me kasongosong kan lelohng kitail de tangasang aramaso me kin kasonge kitail, met kin wia elen loalokong. Karasepe ieu, mwein kitail kin kalapw lelohng kasongosong ehu nan atail wasahn doadoahk. Mendahki kitail sohte kak kesehla atail doadoahk oh uhd rapahki pil ehu doadoahk, mie ahl teikan me kitail pahn kak tangasang kasongosong kan. Kitail anahne tangasang soahng koaros me kitail ese me sapwung, oh kitail en nantihong wiahte dahme pwung. (Eimwos 5:15) Ong ekei, tangasang kasongosong kan kin wehwehki me re pahn liksang kilang kilel kilisou kan nan computer (Internet) oh pil liksang wasa kan me mehn kamweit kan me sohte konehng kin wiawi. Tangasang kasongosong pil kin wehwehki me emen me naineki makisihn me kin kainengihada ih en wia dahme sapwung en kesehla makisihno de ma emen kin werek suwed, tangasang kasongosong kin wehwehki me e pahn rapahki kompoakepah mwahu kan​—aramas akan me kin poakohng Koht oh pahn kak sewese ih. (Lepin Padahk 13:20) E kin wia elen loalokong ma kitail pahn nantihong tangasang soahng kan koaros me kin kak kahrehong kitail en lohdiong nan dihp.​—Rom 12:9.

Iaduwen Kapakap Kak Sewese Kitail

12. Dahme kitail kin peki rehn Koht ni ahnsou kitail kin wia kapakap wet: “Komw dehr ketin mweidohng kiht se en kin lelohng nan songosong laud”?

¹² Pohl kihda kangoang wet: “Koht me uhdahn mehlel, oh e sohte pahn ketin mweidohng kumwail en ale songosong me kumwail sohte kak powehdi; ahpw ahnsoun songosong, e pahn ketikihong kumwail kehlail pwe kumwail en kak dadaur oh pitsang nan songosongo.” (1 Korint 10:13) Ehu ahl me Siohwa kin ketin sewese kitail iei sang ni e kin sapeng atail pekipek kan en dadaur pahn kasongosong kan. Sises Krais padahkiong kitail kapakap wet: “Komw dehr ketin mweidohng kiht se en kin lelohng nan songosong laud, a komw ketin nekid kiht sang ni me suwed en Sehdan.” (Madiu 6:13) Ni ahnsou me Siohwa pahn karonge soangen kapakap pwukat me kin kohsang mongiongatail kan, E sohte pahn likidmeliekitailla ni ahnsou me kitail lelohng kasongosong kan; ahpw e pahn kapitkitailsang Sehdan oh eh widing kan. (Episos 6:11, footnote) Kitail anahne peki sawas sang rehn Koht en ketin sewese kitail en pohnese duwen kasongosong kan oh pil peki sapwellime kehl pwehn powehdi kasongosong pwukat. Ma kitail kin, ni ngidingid, peki sawas rehn Koht en sewese kitail en dehr lohdiong nan dihp ni ahnsou me kitail kin lelohng kasongosong kan, Koht pahn sewese kitail oh Sehdan, “Me Suwedo,” sohte pahn kak poweikitaildi.

13. Dahme kitail anahne wia ma kitail kin kalapw lelohng kasongosong kan?

¹³ Kitail anahne poadidi ong kapakap ahnsou koaros, ahpw keieu, ni ahnsou me kitail kin kalapw lelohng kasongosong kan. Ekei kasongosong kan kin kahrehong kitail pwunod laud, oh met kin katamankin kitail duwen ia uwen luwet kitail. (Melkahka 51:5) Karasepe ieu, dahme kitail kak wia ma kitail kin kalapw medemedewe duwen wiewia suwed kan me kitail kin wia mahs? Dahme kitail kak wia ma kitail men pwurehng wiahda dihp? Kitail dehr ekihla soangen pepehm pwukat, ahpw kapakap ong Siohwa duwen pepehm pwukat oh ineng suwed pwukat​—pak tohto ma anahne. (Melkahka 55:22) Ki sapwellime Mahsen oh ngehn sarawi, e kak sewese kitail en kamwakelehda atail madamadau kan sang madamadau suwed kan oh ineng suwed kan.​—Melkahka 19:8, 9.

14. Dahme kahrehda kapakap kin kesempwal ong sewese kitail en powehdi kasongosong?

¹⁴ Pwehki Sises mahsanih me sapwellime wahnpoaron akan wie memeir nan mwetuwel en Ketsemeni, e kangoange irail: “Kumwail pepehd oh kapakap pwe kumwail dehr lohdiong nan songosong. Pwe ngehn me peik, a paliwar me luwet.” (Madiu 26:41) Ehu ahl en powehdi kasongosong kan iei sang ni atail pahn kin pehmtikiong soangsoangen mwomwen kasongosong kan me pahn leledo oh pil tehk kanahieng mwomwen dihp kan me kitail sohte kak kasawihada mwahu. E pil kesempwal kitail en mwadang kapakapki duwen kasongosong pwukat me kitail kin lelohng pwe met pahn sewese kitail en kaunopada ni pali ngehn pwehn powehdi kasongosong pwukat. Pwehki kasongosong kan kin lelohng kitail ni ahnsou me kitail keieu luwet, kitail sohte kak pein powehdi kasongosong pwukat. E inenen kesempwal en kapakap pwehki kehl me Koht ketikihong kitail pahn kak sewese kitail en pelianda Sehdan. (Pilipai 4:6, 7) Kitail mwein pil anahne sawas en pali ngehn oh kapakap kan sang rehn “ohl mah kan en mwomwohdiso.”​—Seims 5:13-18, NW.

Nantihong Pelian Kasongosong Kan

15. Dahme kitail anahne wia pwehn pelian kasongosong kan?

¹⁵ Likin atail pahn nantihong tangasang kasongosong ehu, kitail pahn kak wia uwen me atail kak koaros en pelian kasongosongo lao e daulih kitail de irair en ahnsou wekidekla. Ni ahnsou me Sehdan kasonge Sises, Sises kin pelian Tepil lao lel e kohkohlahsang reh. (Madiu 4:1-11) Tohnpadahk Seims ntingihdi met: “Pelianda Tepil, e ahpw pahn tangasang kumwail.” (Seims 4:7) Pwehn pelianda Tepil, kitail anahne kakehlailih atail madamadau kan sang ni atail doadoahngki kaweid sang Mahsen en Koht oh koasoanehdi nan atail madamadau kan me kitail pahn kolokolete sapwellime kosonned akan. Kitail pil kak wadlikihla oh doudouloale iren Pwuhk Sarawi kesempwal kan me kin pid duwen atail luwet akan. E pil pahn mwahu en rapahki emen Kristian mah ni pali ngehn​—ele mwein emen elder—​en ehukihong ih atail pwunod akan oh eker ih ni ahnsou me kitail inangi en wia me suwed.​—Lepin Padahk 22:17.

16. Iaduwen kitail kak kolokolete atail tiahk mwakelekel?

¹⁶ Pwuhk Sarawi kin kangoange kitail en wiahla aramas kapw. (Episos 4:24) Met kin wehwehki me kitail kin mweidong Siohwa en kaweidih kitail oh kawekihla atail mour. Pohl nting ong ienge tohndoadoahk Timoty oh mahsanih: “Nantihong audaudkihda pwung, pwoson, limpoak, kanengamahiong apwal, kadek, oh omw mouren Kristian en mwahu. Tangowei uwen omw kak nan weirentang en pwoson, oh kalowehdiong uhk mour soutuk, pwe iei mour wet me Koht ketin malipeiukohng ni omw wiadahr kadehde mwahu en pwoson mwohn sounkadehde tohto.” (1 Timoty 6:11, 12) Kitail kak “nantihong audaudkihda pwung” ni atail kin nantihong onop Mahsen en Koht pwehn sukuhliki duwen sapwellime irair akan oh kapwaiada sapwellime kosonned akan. E pil kesempwal kitail en soupisengki doadoahk kan en Kristian, duwehte doadoahk en kalohki Rongamwahu oh iang towehda mihding kan koaros. Ma kitail pil pahn karanih Koht oh isaneki sapwellime sawas en pali ngehn, mehpwukat pahn kak sewese kitail en kekeirada ni pali ngehn oh kolokolete atail tiahk mwakelekel.​—Seims 4:8.

17. Iaduwen kitail ese me Koht sohte pahn likidmeliekitailla ni ahnsou me kitail lelohng kasongosong kan?

¹⁷ Pohl kin kamehlelehong kitail me Koht sohte pahn mweidong kitail en ale songosong me kitail sohte kak powehdi. Siohwa pahn ‘ketikihong kitail kehlail pwe kitail en kak dadaur oh pitsang nan songosongo.’ (1 Korint 10:13) Ni mehlel, ma kitail pahn likih Koht, E sohte pahn mweidong kitail en lelohng songosong me nohn laud ong kitail oh atail kehl en pali ngehn pahn sohte itar en powehdi kasongosongo. E kin kupwurki kitail en pweida ni atail kin nantihong pelian kasongosong kan oh wia dahme pwung mwohn silangi. Eri, kitail kak likih sapwellime inou: “I sohte pahn mweisang uhk; I sohte pahn keseiukala.”​—Ipru 13:5.

18. Dahme kahrehda kitail kak kamehlele me kitail pahn kak powehdi atail luwet akan en war?

¹⁸ Pohl uhdahn kin wehwehki dahme pahn wiawi ni eh kin nantihong pelian kasongosong kan en luwet en war. E sohte kin ahneki madamadau me ih emen aramas me sohte pahn kak powehdi eh ineng suwed akan. Ihme kahrehda, e mahsanih: “Ihme I sohte kin tang, pweiengki; oh ihme I kin pei, rasehng sounpaker men me sohte kin pakepakere mwahl nan wehwe. I kin kaloke paliwereiet oh irehdi pein ngehi, pwe I perki I dehr lekdekla mwurin ei kapahrengkihongehr meteikan rongamwahwo.” (1 Korint 9:26, 27) Kitail pil kak pweida ni atail kin pei ong atail luwet akan. Ni atail pahn ale sawas sang Pwuhk Sarawi, oh sawaspen Pwuhk Sarawi kan, oh mihding kan en Kristian akan, oh iengatail Kristian me mah ni pali ngehn, Samatail limpoak me kin ketiket nanleng kin ahnsou koaros ketikihong kitail mehn kataman kan me kin sewese kitail en mourki mour pwung. Ki sapwellime sawas, kitail kak powehdi atail luwet akan en war!

Ke Tamanda?

• Ia wehwehn ‘nsenohki kapwaiada ineng en uduk’?

• Dahme kitail kak wia pwehn sewese kitail en dehr lohdi pahn kasongosong kan?

• Dahme kitail kak wia pwehn sewese kitail en dadaurete pahn kasongosong kan?

• Iaduwen kapakap kan pahn kak sewese kitail ni atail kin lelohng kasongosong kan?

• Iaduwen kitail ese me kitail kak powehdi atail luwet akan en war?

[Kilel nan pali 8]

Pwuhk Sarawi sohte kin padahkiong kitail me kitail kin wia aramas kei me sohla atail koapworopwor en powehdi atail ineng suwed akan

[Kilel nan pali 10]

Tangweisang kasongosong iei ehu ahl me wia poahsoanpen wiepen powehdi dihp