Peidek kan Sang Sounwadawad kan
Sounnting en Lepin Padahk 30:18, 19 koasoia me ‘ohl emen oh lih emen ara kin limpoakpene’ kin ‘uhdahn rir ong ih en wehwehki.’ Ia wehwehn eh koasoio?
Aramas tohto kin medewe ia wehwehn iretikitik pwukat, pil irail kan me samanih Paipel. Iretikitik ko pwon mahsanih: “Mie soahng pahieu me uhdahn rir ong ie I en wehwehki: ikel men me pipihrseli pahnlahng, sineik men me limwilimwahdek pohn takai ehu, sohp pwoat me kak seiseiloakseli nan madau, oh ohl emen oh lih emen ni ara kin limpoakpene.”—Lep. Pad. 30:18, 19.
Mahso, kitail kin medewe me lepin lokaia ko “ohl emen oh lih emen ni ara kin limpoakpene” kin koasoakoasoia mehkot suwed. Dahme kahrehda? Iretikitik teikan nan irelaudo koasoia duwen soahng suwed kan me “sohte kin itarki dahme mie rehrail.” (Lep. Pad. 30:15, 16) Oh iretikitik 20 koasoia duwen “lih pwopwoud men me kin kamwahlih eh pwoud” me nda me dene e sohte wiahda mehkot sapwung. Eri, kitail medewe me duwehte ikel men me pipihrseli pahnlahng, sineik men pohn takai ehu, de sohp en mahs pwoat me seiloakseli nan madau, ohl emen kak wiahda mehkot ahpw sohte emen me ese. Pwehki kahrepe wet, kitail medewe me lepin lokaia ko “ohl emen oh lih emen ni ara kin limpoakpene” kin dokedoke mehkot suwed, de e koasoakoasoia duwen mwahnakapw widing men me pitihedi peinakapw men en wia nsenen pwopwoud reh.
Ahpw mie kahrepen kitail en kamehlele me iretikitik pwukat kin koasoakoasoia mehkot mwahu. Sounnting en Paipelo kin koasoakoasoiahte soahng kan me inenen kapwuriamwei ong ih.
Doaropwehn mahs kan en lokaiahn Ipru pil kasalehda me wehwehn iretikitik wet sohte suwed. Ehu dikseneri me kin kawehwehda duwen Palien Paipel ni Lokaiahn Ipru koasoia me lepin lokaia ko nan Lepin Padahk 30:18 me kawehwehdi ong “uhdahn rir ong ie I en wehwehki” kin “koasoakoasoia mehkot me uhdahn kapwuriamwei, de pil mwomwen sohte kak wiawi.”
Professor Crawford H. Toy sang Harvard University nan Wehin Amerika pil koasoia me iren Paipel wet sohte koasoakoasoia mehkot suwed. Ohlo koasoia: “Sounnting en Paipelo kin songosong en kawehwehda uwen kapwuriamwei en soahng pwuko.”
Eri, e mwomwen me kitail kak kamehlele me lepin lokaia ko nan Lepin Padahk 30:18, 19 kin koasoakoasoia soahng kan me inenen kapwuriamwei, pil siksang dahme kitail wehwehki. Duwehte sounnting en Paipelo, kitail kin pwuriamweikihla ni ikel men eh kak pipihrseli pahnlahng, sineik men eh kak limwahdek pohn takai ehu, sohp pwoat eh kak seiloakseli nan madau mendahki e toutou, oh mwahnakapw men oh peinakapw men ara kak mwahukihda emenemen oh ahneki peren.