Taman en Kapakapki Meteikan

1. Ia duwen atail ese me atail kapakap kan kin kesempwal ong Siohwa?

KAPAKAP iei kisakis kaselel ehu. Medewehla met: Siohwa ketikihong tohnleng kan pwukoa kan me ren wia. (Mel. 91:11) E pil ketikihong sapwellime Ohlo pwukoa kei me uhdahn kesempwal. (Mad. 28:18) Ahpw ia duwe, mie emen me e ketikihong en pwukoahki karonge atail kapakap kan? Soh, pwukoa wet iei me Siohwa ketin pilada en pein wia. Siohwa kin ketin karonge atail kapakap kan.—Mel. 65:2.

2. Ia duwen wahnpoaron Pohl eh wiahda mehn kahlemeng mwahu duwen kapakapki meteikan?

² Kitail kak patohwanohng Siohwa ni mehlel pein atail kapwunod kan, ahpw kitail anahne pil kapakapki meteikan. Wahnpoaron Pohl pil wia met. Karasepe, e ntingkilahng mwomwohdiso en Episos: “I kin pousehlahte koasoakoasoia duwen kumwail nan ei kapakap kan.” (Ep. 1:16) Pohl kin pil kapakapki meteikan. Karasepe, e ndaiong Timoty: “I kin kalahngankihong Koht, . . . I kin tamataman uhk nan ei kapakap ngidingid ni rahn oh nipwong.” (2 Tim. 1:3) Mie pein ahn Pohl kahpwal kan me e kin kapakapki. (2 Kor. 11:23; 12:​7, 8) Ahpw e pil wiahda ahnsou en kapakapki meteikan.

3. Dahme kahrehda kitail kak manokehla en kapakapki meteikan?

³ Ekei pak kitail kak manokehla en kapakapki meteikan. Dahme kahrehda? Sister men me adaneki Sabrinaa kihda ehu kahrepe. E koasoia: “Nan koasoandi wet, kitail kin uhdahn kedirepw. Kitail kak uhdahn kedirepwkihla atail kahpwal kan me kahrehda kitail kin kapakapkihte pein atail anahn kan.” Ia duwe, met kin wiawihong uhk ekei pak? Ma ei, iren onop wet kak seweseiuk. E pahn (1) kawehwehda dahme kahrehda e kesempwal en kapakapki meteikan oh (2) kihda iren sawas kan ong ia duwen omw kak wia met.

DAHME KAHREHDA KITAIL EN KAPAKAPKI METEIKAN?

4-5. Ia duwen atail kapakapki meteikan eh kak “manaman”? (Seims 5:16)

⁴ Kapakapki meteikan “kin manaman.” (Wadek Seims 5:16.) Ia duwe, atail kapakapki meteikan kak uhdahn wekidala arail irair kan? Ei, e kak. Sises, me mwahngih me wahnpoaron Piter pahn kereniong kahmahmkihla ih, mahsanih: “I kin kapakapkin uhk ni ngidingid pwe omw pwoson en dehr luwetala.” (Luk 22:32) Pohl pil ese me atail kapakap kak sewese wekidala ahn emen irair. Ni ahnsou me e selidi nan Rom mendahki sohte eh sapwung, e ntingkilahng Pailimwon: “I koapworopworki me sang ni amwail kapakap kan, I pahn pwurowei rehmwail.” (Pail. 22) Ih met me wiawi. Sohte pwand, Pohl saledeksang imweteng oh doulahte kalohk.

⁵ Ei mehlel, met sohte wehwehki me Siohwa anahne ahnsou koaros ketin kapwaiada dahme kitail kapakapki. E kin ketin tehk uwen laud en nsenoh me sapwellime ladu kan kin kasalehda, oh ekei pak, pilada en kapwaiada dahme irail peki. Atail ese met kak sewese kitail en kapakapkihong Siohwa ni mehlel duwen irair ehu oh likih me e pahn ketin apwalihala.—Mel. 37:5; 2 Kor. 1:11.

6. Dahme kapakapki meteikan kak wiahiong kitail? (1 Piter 3:8)

⁶ Kapakapki meteikan kin sewese kitail en kalaudehla atail “poakeirailla.” (Wadek 1 Piter 3:8.) Poakehla emen kin wehwehki en tehk ahn emen eh lokolok oh men wia mehkot pwehn sewese. (Mark 1:​40, 41) Elder men me adaneki Michael koasoia: “Ni ei kin kapakapki ahn meteikan anahn, I kin wehwehkihla mwahu kahpwal kan me irail ahneki, oh kin kalaudehla ei poakohng irail. I kin pehm me I karanihirailla, mendahki re sehse.” Emen elder me adaneki Richard pil kihda ehu kamwahupen met. E koasoia: “Ni atail kin kapakapki emen, met kin kamwakid kitail en wia mehkot pwehn sewese.” E pil koasoia: “Ni atail kin kihda sawas me uhdahn katapan ong aramaso me kitail kapakapki, e kin mwomwen me kitail sewese sapengala atail kapakapo.”

7. Ia duwen atail kapakapki meteikan eh kak sewese kitail en ahneki madamadau pwung ong pein atail kahpwal kan? (Pilipai 2:​3, 4) (Pil kilang kilel kan.)

⁷ Kapakapki meteikan kin sewese kitail en ahneki madamadau pwung ong pein atail kahpwal kan. (Wadek Pilipai 2:​3, 4.) Pwehki kitail mi nan sampah ehu me mi pahn manaman en Tepilo, emenemen kitail kin ahneki kahpwal. (1 Sohn 5:19; Kaud. 12:12) Ni atail kin kaukaule kapakapki meteikan, kitail kin tamanda me ‘riatail kan koaros nan sampah pil kin lelohng soangen lokolok me kitail pil kin lelohng.’ (1 Pit. 5:9) Pioneer men me adaneki Katherine koasoia: “Kapakapki meteikan kin katamankihong ie me irail pil ahneki kahpwal. Ni ei kin tamanda met, I kin sohla nohn medemedewehte pein ei kahpwal kan.”

IRAIL ANAHNE ATAIL KAPAKAP

8. Ihs me kitail kak kapakapki?

⁸ Ihs me kitail kak kapakapki? Kitail kak kapakapki soangen aramas kei, duwehte irail kan me kin kohwahki soumwahu, me pwulopwul kan me iengarail tohnsukuhl kan kin kapailoke de kasonge irail en wia me suwed, de pil irail kan me kin wie lokolongki ar mahlahr. Riatail Kristian tohto kin lelohng uhwong laud, sohte lipilipil ma sang arail peneinei de sang koperment kan. (Mad. 10:​18, 36; Wiewia 12:5) Ekei riatail kan anahne tangasang imwarail kan pwehki tiahk lemei en arail wasao. Oh ekei pil kin lelohng kahpwal laud kan duwehte rerrer en sahpw de melimel ape. Ele kitail saikinte tuhwong riatail Kristian pwukat. Ahpw ni atail kin kapakapkin irail, kitail kasalehda me kitail kin peikiong sapwellimen Sises kehkehliko en “poakohng emenemen.”—Sohn 13:34.

9. Dahme kahrehda kitail anahne kapakapki irail kan me kin tiengla mwowe nan sapwellimen Siohwa pwihn oh pil arail pwoud?

⁹ Kitail pil kak kapakapki irail kan me kin tiengla mwowe nan sapwellimen Siohwa pwihn. Irail pwukat iei Governing Body oh ar sounsawas kan, Branch Committee kan, sounapwalih kan nan ohpis en Sounkadehde kan, sounapwalih en circuit kan, elder kan oh sounsawas kan nan mwomwohdiso. Me tohto irail, mie pein ar kahpwal, ahpw ni ahnsowohte, irail kin doadoahk laud pwehn sewese kitail. (2 Kor. 12:15) Karasepe, emen sounapwalih en circuit me adaneki Mark koasoia: “Ehu me I kin keieu apwalki iei en mi dohsang ei pahpa nohno me mahlahr. Ira koaros kohwahki soumwahu. Mendahki riei serepeino oh eh pwoudo kin apwalih mwahu ira, I kin uhdahn nsensuwedki ei sohte kak mi mwo pwehn sewese ira.” Ele kitail sohte ese soangen kapwunod dah kan me brother pwukat ahneki, ahpw kitail en dehr manokehla en kapakapkin irail. (1 Des. 5:​12, 13) Kitail pil kak kapakapki arail pwoud kan pwehki ni loalopwoat, sister pwukat kin sewese irail en pousehlahte wia arail pwukoa nan mwomwohdiso.

10-11. Siohwa ketin kupwurki atail kapakap kan mehnda ma kitail sohte ndahla ihs aramaso? Menlau kawehwehda.

¹⁰ Nin duwen me kitail koasoiapenehr, kitail kin kalapw kapakapki riatail Kristian kan. Karasepe, ele kitail kin peki rehn Siohwa en ketin sewese irail me selidi kan de kansenamwahwihala irail kan me nsensuwedkihla mehlahn emen me re poakohng, ahpw kitail sohte kin medewe ihs me uhdahn lelohng met. Emen elder me adaneki Donald koasoia, “Mie riatail tohto me kin ahneki kahpwal kan me kahrehda ekei pak kitail kin kapakapkin irail koaros.”

¹¹ Ia duwe, Siohwa ketin kupwurki soangen kapakap pwukat? Ei uhdahn! Met pwehki kitail sohte ese dahme riatail Kristian kan koaros uhdahn anahne. Eri, e pwung en wia soangen kapakap pwukat ni atail kin kapakapki riatail kan. (Sohn 17:20; Ep. 6:18) Kapakap pwukat kin kadehdehda me kitail kin ‘poakohng riatail kan koaros.’—1 Pit. 2:17.

NI ATAIL KIN KAPAKAPKI EMENEMEN

12. Ia duwen atail kin tetehk mwahu eh kak sewese kitail en kapakapki emenemen?

¹² En kin tetehk mwahu. Likin atail kin kapakapki riatail kan, kitail en pil kapakapki emenemen oh nda ederail. Mie emen nan omw mwomwohdiso me ahneki soumwahu laud? Mie me pwulopwul men nan omw mwomwohdiso me ele kin nsensuwedki ienge tohnsukuhl kan kin kasonge en wia me suwed? De mie pahpa de nohno men me kin kelehpwki apwalihada nah serio “ni kaiahn oh kaweid en Siohwa”? (Ep. 6:4) Sang ni omw kin tetehk mwahu, ke pahn kalaudehla omw poakohng oh wehwehki irail oh met pahn kamwakid uhk en men kapakapkin irail.b—Rom 12:15.

13. Ia duwen atail kak kapakapki irail kan me kitail saikinte tuhwong?

¹³ Kapakapki meteikan ni omw nda ederail. Kitail kak wia met mehnda ma kitail saikinte tuhwong irail. Karasepe, medewehla riatail kan me selidi nan sahpw kan me duwehte Crimea, Eritrea, Russia, oh Singapore. Nan jw.org, ke kak diar eden irail kan me mi nan imweteng.c Sounapwalih en circuit men me adaneki Brian koasoia: “Ni ei kin ntingihedi eden riatail men me wia sensel oh ndahla edeo, e kin mengeiong ie en tamataman ih nan ei kapakap kan.”

14-15. Ia duwen atail kak kapakapki dahme riatail kan uhdahn anahne?

¹⁴ Kapakapki dahme irail uhdahn anahne. Michael, me kitail koasoiapene mwoweo, koasoia: “Ni ei kin wadek nan jw.org duwen brother kan me selidi, I kin song en medewehla ia pahn ei pepehm ma I mi nan arail irairo. I ese me I pahn pwunodki ei pwoudo, oh I pahn men tehk mwahu me e alehdi dahme e anahne. Eri met kin sewese ie en ese dahme I kak nda ni ei kapakapki brother pwopwoud kan me selidi.”—Ipru 13:​3, ntp.

¹⁵ Ma kitail song en medewehla dahme kin wiawihong riatail kan ehuehu rahn nan imweteng, met kak sewese kitail en medewehda soahng teikan me kitail kak kapakapki. Karasepe, kitail kak kapakapki me sounsilasil kan en imwetengo pahn kadek ong irail oh me ahneki manaman kan pahn mweidohng irail en wia arail kaudok ni saledek. (1 Tim. 2:​1, 2) Kitail kak kapakapki me mehn kahlemeng en brother lelepek men nan imweteng pahn kangoange eh mwomwohdisou, de irail kan me kaidehn Sounkadehde pahn kilang tiahk mwahu en riatail ko oh men rong dahme kitail kin kalohki. (1 Pit. 2:12) Kitail pil kak wia soahngohte ni atail kapakapki riatail kan me kin dadaur pahn kahpwal teikan. Sang ni atail kin tetehk mwahu, kapakapki meteikan ni atail nda ederail, oh kapakapki dahme irail uhdahn anahne, kitail kak kasalehda me kitail kin “direkihla limpoak ong emenemen.”—1 Des. 3:12.

EN KIN TOUPAHREK NI ATAIL KAPAKAP

16. Ia duwen atail kak kasalehda toupahrek ni atail kapakap? (Madiu 6:8)

¹⁶ Nin duwen me kitail koasoiapene, atail kapakapki emen kakete wekidala eh irairo. Ahpw, kitail anahne toupahrek. Kitail anahne tamataman me ni atail kin kapakap, kitail sohte kin padapadahkihong Siohwa mehkot me e sohte ketin mwahngih. Siohwa pil sohte ketin anahne atail kaweid ong ia duwen eh pahn apwalihala irair ehu. Siohwa ketin mwahngih dahme sapwellime ladu kan anahne, pil mwohn ar ese de mwohn atail ese. (Wadek Madiu 6:8.) Eri, ia kahrepen kitail en kapakapki meteikan? Likin kahrepe kan me kitail koasoiapenehr nan iren onop wet, kapakapki meteikan kin kasalehda uwen atail nsenohkin irail. Limpoak kin kamwakid kitail en kapakapki emenemen. Oh Siohwa kin ketin kupwurperenkihda ni eh mahsanih sapwellime ladu kan ar alasang sapwellime limpoak.

17-18. Ia duwen atail kak karasahda atail kin kapakapki riatail kan?

¹⁷ Mehnda ma atail kapakap kan ele sohte wekidala irair en riatail kan, e kin kasalehda me kitail poakohng irail oh Siohwa kin ketin tetehk duwen met. Kitail kak karasahda met ni ahl wet: Medewehla peneinei ehu me naineki kisin pwutak men oh serepein men. Pwutako wonohnki eh soumwahu. Eri serepeino peki rehn eh pahpao: “Menlau sewese rieio. E uhdahn soumwahu!” Pahpao eseier duwen irairo; e poakohng nah pwutako oh apwahpwalih mwahu. Ahpw pahpao uhdahn perenki eh kilang nah serepeino uhdahn nsenohki rie pwutako oh pekipeki ih en sewese.

¹⁸ Duwehte met, Siohwa kin ketin kangoange kitail en nsenohki oh kapakapki emenemen. Ni atail wia met, kitail kin kasalehda me kitail sohte kin nsenohkihte pein kitail ahpw kitail kin uhdahn poakohng riatail kan, oh me Siohwa kin ketin tetehk duwen met. (2 Des. 1:3; Ipru 6:10) Pil ehu, nin duwen me kitail koasoiapene, ekei pak atail kapakap kak sewese wekidala ahn emen irair. Eri, kitail en wia uwen atail kak en kapakapki emenemen.