Ia Duwen Omw Kak Kamwahwihala Omw Kapakap

1-2. (a) Dahme kak kauhkitaildihsang en padahkihong Siohwa uhdahn atail pepehm? (b) Ia duwen atail ese me ni kadek Siohwa kin ketin karonge atail kapakap kan?

KE KIN pehm me ke kin kalapw pwurupwurehng nda soahng ehute nan omw kapakap oh sohte kin padahkihong Siohwa uhdahn omw pepehm? Ma ei, kaidehn kowe kelehpw. Pwehki kitail koaros kin uhdahn kedirepw, ekei pak kitail kin wia kapakap mwotomwot oh manokehla wia kapakap reirei. De mwein kitail kin apwalki padahkihong Siohwa uhdahn atail pepehm pwehki kitail pehm me kitail sohte warohng koasoiong ih.

² Paipel kamehlelehiong kitail me dahme kin kesempwal ong Siohwa iei atail kin mehlel oh aktikitik ni atail kapakap ong ih, a kaidehn atail kin doadoahngki lokaia audapan kan. E kin ketin karonge “kapakap en me tikitik kan.” (Mel. 10:17) Ni kadek, e kin ketin karonge soahng koaros me kitail nda pwehki e uhdahn kin ketin nsenohkin kitail.—Mel. 139:​1-3.

3. Peidek dah kan me kitail pahn koasoiapene nan iren onop wet?

³ Kitail kakete idek: Dahme kahrehda kitail kak kapakap ong Siohwa ni saledek? Ia duwen atail kak kapakap ni ahl ehu me pahn kakerenihkitailla rehn Siohwa? Dahme kitail kak sukuhlkihsang ahn sapwellimen Siohwa ladu kan kapakap nan Paipel oh ia duwen kapakap pwukat ar kak sewese kitail kamwahwihala atail kapakap? Oh dahme kitail kak wia ma kitail sehse ia duwen atail pahn kawehwehda mwahu atail pepehm ong Siohwa? Kitail pahn koasoiapene pasapengpen peidek pwukat.

KAPAKAP ONG SIOHWA NI SALEDEK

4. Dahme kak sewese kitail en kapakap ong Siohwa ni saledek? (Melkahka 119:145)

⁴ Ni atail wehwehkihla me Siohwa iei kompoakepatail loalopwoat men me kupwurki dahme keieu mwahu ong kitail, kitail pahn kapakap ong ih ni saledek oh padahkihong atail madamadau oh pepehm. Sounnting en Melkahka 119 song en ahneki soangen nanpwungmwahu wet rehn Siohwa. E pil kin ahneki kahpwal kan. Mie ekei me song en karaunlikamwih. (Mel. 119:​23, 69, 78) Ekei pak e pil kin mworuskihla eh sapwung kan. (Mel. 119:5) Mendahki met, e sohte perki padahkihong Siohwa eh pepehm.—Wadek Melkahka 119:145.

5. Dahme kahrehda kitail en dehr mweidohng mehkot en kauhkitaildihsang kapakap? Menlau kihda ehu karasaras.

⁵ Siohwa pil ketin kupwurki irail kan me wiahda dihp laud en kapakap ong ih. (Ais. 55:​6, 7) Eri kitail en dehr mweidohng mehkot en kauhkitaildihsang kapakap. Pwehn karasahda, pailet en sompihr men ese me e kak koasoiong irail me kin kaweid tangatang en sompihr kan ma e anahne sawas. Ia duwe, e pahn pweiek en koasoiong irail pwehki en namenengki eh wiahda sapwung de e salongala? Uhdahn soh! Duwehte met, mehnda ma ekei pak kitail sehse dahme kitail anahne wia de kitail wiahda dihp, kitail kak kapakap ong Siohwa ni saledek.—Mel. 119:​25, 176.

IA DUWEN ATAIL KAK KAPAKAP NI AHL EHU ME PAHN KAKERENIHKITAILLA REHN SIOHWA

6-7. Dahme kak sewese kitail en padahkihong Siohwa uhdahn atail pepehm? Menlau kihda ehu karasaras. (Pil kilang nting tikitik me mi pah.)

⁶ Ni atail padahkihong Siohwa ia uhdahn atail madamadau oh pepehm, kitail pahn karanihala ih. Eri, dahme kak sewese kitail en kapakap ni ahl wet?

⁷ Medewe sapwellimen Siohwa irair kaselel kan.a Ni atail kin katamankihong pein kitail irair kaselel kan me Siohwa ketin sapwellimanki, e pahn mengei en kawehwehiong ia uhdahn atail madamadau oh pepehm. (Mel. 145:​8, 9, 18) Medewehla mehn kahlemeng en Kristine, sister men me eh pahpao kin lemei. Pwehki met, e apwalki kamehlele me Siohwa ketin wia Sahm limpoak men oh e kak koasoiong ih. E pil medewe me ih aramas suwed men, oh me Siohwa sohla ketin poakohng pwehki eh sapwung kan. Dahme sewese? E koasoia: “I kin doudouloale laud sapwellimen Siohwa loalopwoat, oh met kamehlelehiong ie me Siohwa ketin poakohng ie. Met I ese me e pahn ketin ahnsou koaros sewese ie. Mehnda ma I wiahda sapwung kan, e pahn ketin poakohngiehte oh sewese ie. Ni ei medewehla uwen Siohwa eh ketin limpoak, e mengeila ien padahkihong soahng kan me I kin perenki oh nsensuwedki.”

8-9. Ia ekei kamwahupen en medemedewe ekei soahng kan me ke men nda nan omw kapakap? Menlau kihda ehu karasaras.

⁸ Medewe dahme ke pahn nda. Mwohn omw kapakap, ke kak idek rehmw ekei peidek kan. Karasepe: ‘Soangen kahpwal dah kan me I ahneki ahnsou wet? Mie emen me I anahne mahkohng? Mie wekidekla ehu nan ei mour me I anahne Siohwa en ketin sewesehkin ie?’ (2 Nan. 19:​15-19) Kitail pil kak taman kapakap me Sises ketin padahkihong kitail sang ni atail medewe dahme kitail kak nda ni atail kapakapki mwaren Siohwa, sapwellime Wehi, oh kupwure.—Mad. 6:​9, 10.

⁹ Ni ahnsou me sister men me adaneki Aliska esehda me eh pwoudo ahneki kanser en mwahliel, e apwal ong ih en kapakap. E koasoia: “I uhdahn pwunodkihda oh apwalki medewehda dahme I pahn koasoia nan ei kapakap.” Dahme sewese? E koasoia: “Mwohn ei pahn kapakap, I kin medewe dahme I kak padahkihong Siohwa pwe ien dehr koasoiahte pein ngehi oh en ei pwoudo soumwahu. Ni ei wia met, I kin ahneki meleilei oh kak kapakapkihong Siohwa soahng tohto.”

10. Dahme kahrehda kitail en song wia kapakap reirei? (Pil kilang kilel kan.)

¹⁰ Dehr pitipit en kapakap. Mehlel me kapakap mwotomwot pil kak kakerenihkitailla rehn Siohwa, ahpw ni atail wia kapakap reirei, kitail pahn kak padahkihong Siohwa soahng tohto duwen atail pepehm.b Ahn Aliska pwoudo, Elijah, koasoia: “I kin song en kapakap pak tohto erein rahn ehu, ahpw I pil pehm me ei karanihala Siohwa kin laudla ni ei wia kapakap reirei. Siohwa kin ketin kanengamah lao I kanekehla ei kapakap, eri I kak wia kapakap me reirei.” Pilada ahnsou oh wasa me sohte me pahn kerempwaiuk oh ke kak kapakap, pil ni ngihl laud, kapakap reirei, oh song en kaukaule wia met.

MEDEWE KAPAKAP KAN ME KILELDI NAN PAIPEL

11. Ia duwen atail kin paiekihda atail medemedewe ahn sapwellimen Siohwa ladu kan kapakap nan Paipel? (Pil kilang kakono “Omw Pepehm Duwehte Arail?”)

¹¹ E pil kak sawas ni omw medewe kapakap oh koul en kaping kan me sapwellimen Siohwa ladu kan nan Paipel kin wiahiong ih. Ni omw medewe ia duwen arail kin kasalehda uhdahn arail madamadau oh pepehm, met kak seweseiuk en kapakap ni ahlohte. Arail kapakap kak seweseiuk ken esehla soangen lokaia kan me ke kak doadoahngki nan omw kapakap. Oh ke kak diarada ekei arail kapakap ko me kin kasalehda soahng kante me ke kin pehm oh pil men peki.

12. Peidek dah kan me kitail kak pein idek rehtail ni atail wadek kapakap ehu nan Paipel?

¹² Ni omw wadek kapakap ehu nan Paipel, pein idek rehmw: ‘Ihs me wia kapakap wet, oh soangen irair dah me e mi loale? I kak wehwehki arail pepehm nan kapakapo? Dahme I kak sukuhlkihsang kapakapo?’ Ke pil kak wia roporop pwehn sapengala peidek pwukat, oh e uhdahn pahn katapan. Kitail pahn tehkpene kapakap pahieu.

13. Ia ehu mehn kasukuhl duwen kapakap me kitail kak sukuhlkihsang Ana? (1 Samuel 1:​10, 11) (Pil kilang kilel ni Kahn Iroir wet.)

¹³ Wadek 1 Samuel 1:​10, 11. Ni Ana eh wia kapakapo, e ahneki kahpwal laud riau. E depwen, oh ahn eh pwoudo pwoud teio kin mwahuki kansensuwedih. (1 Sam. 1:​4-7) Ma ke pil ahneki kahpwal ehu me kalapw wiawi, dahme ke kak sukuhlkihsang ahn Ana kapakapo? E wia kapakap reirei ong Siohwa oh padahkihong eh kapwunod koaros oh mwurin mwo e nsenamwahula. (1 Sam. 1:​12, 18) Kitail pil kak nsenamwahula ni atail ‘mweidohng Siohwa atail kahpwal akan’ oh kawehwehiong ih atail pepehm ong kahpwal ko.—Mel. 55:22.

14. (a) Dahme kitail pil kak sukuhlkihsang ahn Ana mehn kahlemeng? (b) Ia duwen atail kak kamwahwihala atail kapakap sang ni atail doudouloale kapakap kan nan Paipel? (Kilang nting tikitik me mi pah.)

¹⁴ Sounpar kei mwurin nah pwutako Samuel ipwidi, Ana wahla rehn Samworo Lapalapo Ilai. (1 Sam. 1:​24-28) Ni eh kapakap ong Siohwa, e padahkihong me e kalahnganki eh kin ketin pere oh apwalih sapwellime ladu loalopwoat kan.c (1 Sam. 2:​1, 8, 9) Ele e ahnekihte kahpwal, ahpw e kin medemedewehte duwen Siohwa eh kin ketin kapaiahda. Ia mehn kasukuhlo? Kitail pahn kak dadaur pahn kahpwal kan ma kitail kin medemedewe duwen Siohwa eh kin ketin sewese kitail lel rahnwet.

15. Dahme kitail kak sukuhlkihsang ahn soukohp Seremaia kapakapo? (Seremaia 12:1)

¹⁵ Wadek Seremaia 12:1. Ni Seremaia eh kilang ekei aramas ar mwomwen ahneki mour nsenamwahu mendahki irail kin wia soahng kan me uhdahn suwed, e mworuskihla. E pil kalapw mworuskihla ekei mehn Israel kan ar kin kapailoke. (Ser. 20:​7, 8) Kitail pil kak wehwehki eh pepehm pwehki aramas akan kin kapailoke kitail, de kitail kin kilang ar kin wia soahng kan me uhdahn suwed oh mwomwen sohte ahneki kahpwal kan. Seremaia patohwanohng Siohwa me e kin nsensuwedkihla soahng pwukat, ahpw e sohte koasoia me Siohwa ketin kopwung sapahrek. Oh eh likih sapwellimen Siohwa pwung pahrek laudla ni eh kilang Siohwa eh ketin kapwungala sapwellime aramas akan. (Ser. 32:19) Kitail pil kak padahkihong Siohwa uwen atail kin nsensuwedkihla aramas akan ar wiahiong kitail kopwung sapahrek. Ni ahnsowohte, kitail kin kasalehda atail likih me Siohwa pahn ketin kapwungala soahng pwukat ni ahnsou me konehng.

16. Dahme kitail kak sukuhlkihsang ahn mehn Lipaio eh kapakap? (Melkahka 42:​1-4) (Pil kilang kilel kan.)

¹⁶ Wadek Melkahka 42:​1-4. Mehn Lipai men me sohte kak iangih ienge mehn Israel kan kaudok ni tehnpas sarawio me ntingihdi koul wet. Melkahka wet kasalehda eh pepehm. Ele kitail kak wehwehki eh pepehm ma kitail soumwahu oh sohte kak kohkohsang imwatail de selidi pwehki atail pwoson. Ekei pak kitail kin nsenamwahu oh ekei pak kitail kin nsensuwed. Ahpw sohte lipilipil ia atail pepehm, kitail kak kapakapkihong Siohwa. Met pahn sewese kitail en uhdahn wehwehki atail pepehm oh katamankihong kitail dahme keieu kesempwal. Karasepe, mehn Lipaio esehda me e pahn ahneki ahnsou mwahu en pwurehng kapinga Siohwa. (Mel. 42:5) E pil kin doudouloale ia duwen Siohwa eh kin ketin apwalih. (Mel. 42:8) Kapakap ong Siohwa ni mehlel kak sewese kitail en wehwehki mwahu atail pepehm, pwurehng ahneki meleilei, oh ahneki kehl en dadaur.

17. (a) Dahme kitail kak sukuhlkihsang ahn soukohp Sona kapakapo? (Sona 2:​1, 2) (b) Ia duwen ekei lokaia kan sang Melkahka kan ar kak sewese kitail ni atail lelohng kahpwal kan? (Kilang nting tikitik me mi pah.)

¹⁷ Wadek Sona 2:​1, 2. Soukohp Sona wia kapakap wet nan kapehden mwahmw laud men. Mendahki e sapeikiong Siohwa, Sona kamehlele me Koht pahn ketin karonge eh kapakap. Nan eh kapakapo, Sona doadoahngki lepin lokaia tohto me mi nan Melkahka.d Ele e uhdahn ese Melkahka pwukat. Ni eh medemedewe Melkahka ko, met sewese ih en uhdahn kamehlele me Siohwa pahn ketin sewese. Duwehte met, ma kitail wadlikihala ekei iren Paipel kan, ele kitail pahn tamanda oh e pahn kansenamwahwihkitailla ni atail kapakap ong Siohwa ni ahnsou apwal kan.

POUSEHLAHTE KARANIHALA SIOHWA NI KAPAKAP

18-19. Ma ekei pak kitail kin apwalki kasalehda atail pepehm, ia duwen Rom 8:​26, 27 eh kak kansenamwahwihkitailla? Menlau kihda ehu karasaras.

¹⁸ Wadek Rom 8:​26, 27. Ekei pak kitail kin uhdahn pwunod kahrehda kitail sehse ia duwen atail pahn kawehwehiong Siohwa atail pepehm. Ahpw mie sawas. Ni ahnsou ko, sapwellimen Koht manaman kin “peki” rehn Koht en ketin sewese kitail. Ia duwen? Siohwa ketin doadoahngki sapwellime manaman pwehn kamwakid sounnting en Paipel kan en ntingihdi kapakap tohto. Ni atail sohte kak kawehwehda atail madamadau, Siohwa kak ketin wiahki atail pekipek kan duwehte ekei lokaia ko nan kapakap ko, oh e kak ketin sapengala.

¹⁹ En ese met sewese sister men nan Russia me adaneki Yelena. E selikihdi eh kapakap oh wadek Paipel. Yelena uhdahn pwunod laud me kahrehda e apwalki kapakap. E koasoia: “Ngehi eri taman me ni ei uhdahn pwunod oh sehse dahme I pahn kapakapki, Siohwa pahn ketin wiahki ei pekipek kan duwehte ahn sapwellime ladu kan kapakap mahso. Met kin uhdahn kansenamwahwihiehla erein ahnsou kan me uhdahn apwal.”

20. Dahme kak kamengeila omw kapakap ni omw kin pwunod?

²⁰ Ni atail kin pwunod, ele kitail kin tepida kapakap ahpw pil tepida medewe soahng teikan. Pwehn kaunopada atail madamadau kitail kak rong ngilen wadawad en Paipel en Melkahka. Kitail pil kak song ntingihedi atail pepehm, duwehte me Nanmwarki Depit wia. (Mel. 18; 34; 142; nting kan me mi pohn irelaudo.) Ei mehlel, sohte kosonned ehu ong duwen atail pahn kaunopada ong kapakap. (Mel. 141:2) Wia dahme keieu mwahu ong uhk.

21. Dahme kahrehda kitail kak kapakap sang nan mohngiongitail unsek?

²¹ E uhdahn kansenamwahu en ese me Siohwa ketin mwahngih atail pepehm pil mwohn atail nda mehkot. (Mel. 139:4) Ahpw, e ketin kupwurki karonge atail padahkihong atail pepehm oh uwen atail likih. Eri dehr pweiek en kapakap ong Semomwo nanleng. Sukuhlki kapakap kan me kileldi nan sapwellime Mahsen. Kapakap ong ih sang nan mohngiongomw unsek. Padahkihong ih dahme kin kahrehiong uhk peren oh nsensuwed. Nin duwen kompoakepahmw mehlel men, Siohwa pahn ketin ahnsou koaros karongeiuk!