Meh Riemen me Iangala Kisehn Governing Body
NAN OCTOBER 5, 2024, pakair tohrohr ehu wiawi nan atail mihting en pahr: Brother Jody Jedele oh Jacob Rumph idihdida en wiahla kisehn Governing Body en Sounkadehdehn Siohwa kan. Brother pwukat kin lelepek papah Siohwa erein sounpar tohto.
Jody Jedele oh eh pwoudo, Damaris
Brother Jedele ipwidi nan Missouri, Wehin Amerika, oh tikida nan padahk mehlel. Eh peneinei kin mi wasa ehu me Sounkadehde kan malaulau. Pwehki met, e tuhwong brother oh sister tohto me kohsang soangsoangen wasa kan me kin kohla pwehn sewese doadoahk en kalohk wasao. Arail limpoak oh miniminpene uhdahn kangoange ih. E papidaisla ni ahnsou me e sounpar 10 samwa, nan October 15, 1983. E perenki kalohk, eri mwurin high school, e tepida pioneer nan September 1989.
Ni ahnsou me Brother Jedele pwulopwul, eh pahpa nohno kin wahda ih oh rie serepeino mwemweitla Pedel. Arail mwemweit ko kamwakid seri ko en wiahda mehn akadei en papah nan Pedel oh ira koaros lel mehn akadei ko. Brother Jedele kohla nan Pedel en Wallkill September 1990. E tepte doadoahk nan palien Cleaning Department oh mwuri Medical Services.
Erein ahnsowo, mie mwomwohdiso kei me kin lokaiahki lokaiahn Spain oh kin kekeirda mwahu oh anahne brother kan. Eri Brother Jedele iangala ehu mwomwohdiso ko oh tepida sukuhlki lokaiahn Spain. Sohte pwand mwurin mwo, e tuhwong Damaris, sister men me kin pioneer nan mwomwohdiso ehu me kin iang circuit ohte. Kedekedeo, ira pwopwoudla oh Damaris iangih mi nan Pedel.
Nan pahr 2005, ira kohkohsang Pedel pwehn apwalih ara pahpa nohno. Erein ahnsowo, ira kin pioneer. Brother Jedele iang sounpadahk nan Sukuhl en Pioneer, oh kin iang Pwihn me Kin Ehuiong Imwen Wini kan, oh Pwihn me Kin Apwalih Kokoudahn Wasahn Kaudok kan.
Nan pahr 2013, Brother oh Sister Jedele alehdi luhk en pwurala Pedel pwehn iang kauwada Warwick. Sangete ahnsowo, ira pil kin papah nan Patterson oh Wallkill. Brother Jedele kin iang doadoahk nan palien Local Design/Construction Department oh Hospital Information Services. Nan March 2023, e idihdida nin duwen sounsawas men ong Service Committee. Ni eh medewehla pwukoa kan koaros me e iang ahneki, e koasoia: “Ni omw alehdi pwukoa kapw kan, ekei pak ke kak salohda. Ahpw ih ahnsowo me ke anahne taman en likih Siohwa pwehki ih me kin ketin kahrehiong kitail en kak wia pwukoa sohte lipilipil me e ketikihong kitail.”
Jacob Rumph oh eh pwoudo, Inga
Brother Rumph ipwidi nan California, Wehin Amerika. Ni ahnsou me e tikitik, eh nohnou sohla iang kalohk oh mihting ahpw kin nsenohki padahkihong ih padahk mehlel kan. Oh pil sounpar koaros e kin mwemweitla rehn eh nohno kahlapo, sounkadehde lelepek men. Eh nohno kahlapo sewese en men kalaudehla eh esehla Paipel, oh ni ahnsou me e sounpar 13, e peki emen en onop Paipel reh. E papidaisla nan September 27, 1992. E kaperen me eh nohnou pwurehng tepida iang kalohk oh mihting, oh eh pahpao oh rie ko papidaisla.
Ahnsou me e pwulopwul, Brother Rumph kilang uwen pioneer ko ar kin peren. Eri ni eh kanekehla high school, e tepida pioneer nan September 1995. Nan pahr 2000, e keseula Ecuador pwehn papah wasa me mie anahn laud ong sounkalohk kan. Wasao e tuhwong Inga, pioneer men sang Canada, oh kedekedeo ira pwopwoudla. Mwurin ara pwopwoudla, ira iang pwihn en sounkalohk ehu me malaulau nan kisin kahnimw ehu nan Ecuador. Rahnwet, irail wiahla mwomwohdiso ehu me mie sounkalohk tohto.
Mwuhr, Brother oh Sister Rumph idihdida nin duwen pioneer tohrohr kei oh mwurin mwo ira wia doadoahk en sounapwalih en circuit. Nan pahr 2011, ira alehdi luhk en iang Sukuhl en Kilead nempe 132. Mwurin ara kesepwil, ira papah nan sahpw limau oh perenki soangsoangen pwukoa kan, duwehte papah nan Pedel, misineri, oh sounapwalih en circuit. Brother Rumph pil alehdi pwais kaselel en wia kasukuhl ong Sukuhl ong Sounkalohki Wehio kan.
Pwehki soumwahu lusulus en COVID-19, Brother oh Sister Rumph pwurala Wehin Amerika. Ira ale luhk en papah nan Pedel en Wallkill, wasa me Brother Rumph ale kasukuhl nan palien Service Department. Kedekedeo, ira pekederla ohpis en Sounkadehdehn Siohwa kan nan Ecuador, wasa me Brother Rumph iang papah nan palien Branch Committee. Nan pahr 2023, ira pekederla Warwick. Nan January 2024, Brother Rumph idihdida pwehn papah nin duwen sounsawas men ong palien Service Committee. Ni eh medewehla wasa kan me e papah, e koasoia: “Aramas me kin iang uhk doadoahk me kin kahrehiong omw pwukoau en kesempwal, ah kaidehn wasa me ke kin papah.”
Kitail kin kalahnganki doadoahk laud en brother pwukat oh “kesempwalki soangen aramas akan me duwehte” ira.—Pil. 2:29.