Kisinlikou Sang Governing Body
Nin duwen Sounkadehdehn Siohwa kan, kitail inenen pai! Kitail ahneki pwais kaselel en wehwehki duwen Siohwa, me Ih kelepw kin wia Koht mehlel oh ieias, Sounkapikadahn mehkoaros, oh kitail pil pai pwe kitail kin weuwa mware oh papah Ih. Sohte kapai me laud sang met!—Aiseia 43:12; Ipru 8:11.
Kitail ahneki koapworopwor en ale komourpatail oh pil pwukoah en kalohki Wehin Koht pwe aramas teikan kak pil kaudokiong Siohwa oh ahneki koapworopwor duwehte kitail. (Madiu 24:14; Rom 10:13, 14; 1 Dese. 5:8) Kitail pil ahneki peren pwe kitail kin miniminiong riatail tohnkaudok kan me kin limpoakpene oh sawaspene nanpwungen emenemen. Ia uwen kansenamwahu mehpwukat koaros!
E konehng me Pwuhk Sarawi kin luhke kitail: “Kumwail pereperen kaudokiong Kauno [“Siohwa,” New World Translation]. . . . Kumwail pedokihlong nan kelen Tehnpaso amwail koulen kaping; kumwail patohlong nan sapwellime mwoahl sarawi ni kapingkalahngan. Kauno [“Siohwa,” NW] me kalahngan; sapwellime limpoak kin poatopoatete oh e kin ketin dadaurete sapwellime loalopwoat kohkohlahte.” (Mel. 100:2-5) Papah Siohwa ki peren kin kasalehda me kitail ahneki nanpwung mwahu reh. Kitail kak ahneki nanpwung mwahu reh pwehki E kin ketin kupwurki aramas en ahneki nanpwung mwahu reh, oh kitail ahneki pwais kaselel pwehn kak wia met. Ni ahnsou me kitail ahneki nanpwung mwahu rehn Siohwa, kitail wehwehki me E kak sewese oh kakehle kitail ahnsou kan me kitail anahne sawas. Kitail pil wehwehki me E pahn ketikihong kitail kehl oh kaweid en pali ngehn me pahn sewese kitail en powehdi kasongosong kan me kitail kin lelohng nan imwin rahn en koasoandi suwed wet. Mendahki kitail kin lelohng soangsoangen kasongosong kan, kitail kak ahneki peren ni atail kin wia atail doadoahk en kalohk, oh kitail kak, rahn koaros, kalahngankihong Siohwa dahme sapwellime Mahsen kin katamankin kitail, mahsanih: ‘E kin ketin loalloale kitail.’—1 Pet. 5:7.
Erein pahr wet, Siohwa ketikihong kitail kapai tohto. Ni Kapokon en District me oaralap koasoia “Sounpadahk kan en Mahsen en Koht,” kitail perenki iang riatail brother oh sister kan koul oh tungoale mwengehn ngehn me dir sang sapwellimen Siohwa tehpel. Kitail kin perenki kohpene nan Pwuhk Study en Mwomwohdiso kan oh onopkihpene pwuhken Mour Kohkohlahte Nan Paradais Nin Sampah oh met kakehlailih atail pwoson. Siohwa kin ketin ‘kadirehla atail tungoale kep.’—Mel. 23:5, NW.
E kin wia mehkot kaperen en wehwehki me kitail, iangahki riatail brother oh sister kan ni pali ngehn, me tohtohki aramas rar rar kei, kin miniminpene ni atail kin papah Siohwa! E pil kin wia kangoang laud ahnsou me kitail kin wadek duwen kekeirada kapw kan nan doadoahk en kalohk! Kitail kin pil perenki me aramas rar rar kei iang towehda atail Katamanpen Kamatalahn Krais—oh wia met mendahki kahpwal akan me kin wiawi sampah. Ni atail kin kilang rahk me wiawi wasa koaros nan sampah, e sansal me “rahket me inenen laud.” (Luk 10:2) Nan pahr me ahpwtehn nek, aramas 5,555 me kin onopki Paipel papidaisla wihk koaros (average), oh kasalehda me re inoukihongehr Siohwa arail mour. Pwehki rahk me inenen laud nan ekei wasa oh e sohte nohn laud nan pil ekei wasa kan, kitail koaros kin perenki dahme Siohwa kin ketin wia. Kitail kin kilang mehn kadehde kan me E kin ketin kapaiada dahme sapwellime laud kan kin wia ni arail kin sawaspene wia doadoahk ong Ih.
Koukouda en Kingdom Hall kapw kan kin wia pil ehu kahrepe en ahneki peren laud! Kitail kin perenki kilang brother oh sister kan me kin mihmi nan sahpw kan me apwal ni arail kin wia uwen me re kak en utungada doadoahk wet. Kingdom Hall epwiki epwiki kei wiawihdahr pwehki koasoandi en “Kingdom Hall Construction Group” kan me kin kihda kaiahn ong doadoahk wet. Brother kan me kin iang pwihn wet kin kohla sang ehu mwomwohdiso lel ni ehu mwomwohdiso nan pein arail wehi pwehn apwalih doadoahk en kauwada Kingdom Hall kapw kan. Pwehki Kingdom Hall kid kid kei pil anahn, re kin peki atail sawas en kadarala tohndoadoahk kan me kak sawaski arail ahnsou, mwohni oh kehl (volunteers) nan arail wasa pwehn iang wia doadoahk kesempwal wet. Ma ke mihmi nan wasa ieu me kin anahne sawas en kauwada Kingdom Hall kapw kan, ke kak kihda ahmw sawas? Nna, medewehla pepehm en brother oh sister kan oh ia uwen arail kin kalahnganki pein arail Kingdom Hall me re kak tuhpene loale oh kaudokiong Siohwa! Oh re pil kin kalahnganki sawas en mwohni sang riatail brother oh sister kan wasa koaros nan sampah me kin kihda arail sawas pwehn wiahda Kingdom Hall kapw pwukat!
Kitail pil kin perenki rong nuhs duwen kana kan me kin wiawi ni palien kosonned. Ahpw, nan wasa tohto, mie aramas lapalap ko me men kauwehla kaudok me kin kohwong Siohwa. Ahpw, ni ahnsou me kitail kin apwalih kahpwal pwukat, kitail koaros kak likih me Siohwa pahn ketin sewese kitail mendahki uwen tohto en irail me kin pelianda Ih oh pil mendahki sapwellime ladu kan kin mwomwen luwet. (2 Kron. 14:11) Se men kapinga kumwail koaros, brother oh sister kan, en nantihong kehlail nan padahk mehlel.
Ken nantihong kakehlailih ahmw pwoson oh likih Siohwa pwe Ih me kak kihong uhk kaweid me keieu mwahu nin duwen ke kapwaiada ahmw pwukoah kan en Kristian ni peren. (Lepin Padahk 3:5, 6) Sohte kahrepe kitail en nsensuwedla, sohte lipilipil dahme irail me pelianda Siohwa pahn wia. Tamataman mehn kangoang me Elisa kihong nah ladu: “Ke dehr masak, pwe iangata kan tohtohsang irail.” (2 Nan. 6:15-17) Rahnwet, sapwellimen Siohwa karis en nanleng pahn perehla kaudok mehlel duwehte E wia nan mwehin Elisa. Kitail kak ahneki eimah ni atail pahn medemedewe ahnsou kohkohdo. Siohwa mwahngih dahme E pahn wia ni ahnsou kohkohdo. Wehi kan en sampah sohte kak peiong Siohwa. E ketikihong sapwellime Ohl manaman unsek pwehn kakaun sapwellime Wehi. “Meid pai irail koaros me kin wiahki Kauno sileparail.”—Mel. 2:1-6, 12.
Menlau tamataman me se kin medemedewe duwen kumwail, brother oh sister kan koaros. Se kin kapakapki me emenemen kumwail pahn “tengeteng nan amwail pwoson, ni peik unsek ong kupwuren Koht.”—Kol. 4:12.
Riamwail brother kan,
Governing Body en Sounkadehdehn Siohwa kan