Kisinlikou Ehu Sang Pwihn me Kin Apwalih Mwomwohdiso nan Sampah Pwon
Ong Riat Sounkadehdehn Siohwa kan:
Ia uwen kaperen en ntingwohng kumwail riat kan! Se ahneki ahn wahnpoaron Sohn pepehm me koasoia me e “poakepoake mehlel” ienge Kristian akan oh perenki pwe re kin “momourki me mehlelo.” (2 Sohn 1, 4) Ia uwen kapai ehu atail kin ese padahk mehlel! Padahk mehlel kin kasaledek kitail sang Papilon Lapalap oh eh padahk kan oh tiahk kan me kin kamwamwahlihala Koht. Atail kin peikiong padahk en Paipel kan kin sewese kitail en kin kakairada limpoak, kadek oh mahk. Padahk mehlel pil kin kahrehiong kitail en kenikenla rehn Koht oh ahneki koapworopwor en mour soutuk.
Kitail pil kin kalahnganki sapwellimen Siohwa manaman me kin kaweidih kitail oh kakehlailih kitail rahn koaros! Se kamehlele me kumwail paiekihda en kasawih ia duwen Siohwa kin ketin doadoahngki sapwellime manaman pwehn kaweidih oh kakehlailih kitail ni amwail iang towehda Kapokon me oaralap mahsanih “Sapwellimen Koht Manaman Kin Kahluwai Kitail.” Pwehki sampah wet kin susuwedla, e kesempwal kitail en likih doadoahkepen sapwellimen Siohwa manaman pwehn kaweidih kitail ni ahnsou kesempwal kan me kohkohdo.
Se kamehlele me kumwail ale kangoang laud ni amwail kin wadek Pwuhken Pahr oh pwuhk teikan duwen riatail kan me kin dadaurete ni pwoson nan arail apwal kan. Oh e pil kin kapwuriamwei en medewe me tohto irail pwukat ahpwtehn papidaisla de saikinte papidaisla ni ahnsou me kahpwal laud kan pwarada. Ia uwen kitail kin poakepoake irail pwehki arail loalopwoat ong Siohwa oh sapwellime pwung! Arail mehn kahlemeng mwahu kin kakehlailih kitail en tengediong atail lelepek ong Wehio mendahki kahpwal kan pahn pwarada.—1 Des. 1:6-8.
Se wehwehki me kumwail kin anahne powehdi kahpwal tohto me pid mwohni oh kahpwal teikan pwehn kolokol amwail peneinei en limpoakpene. Ong ekei kumwail, e kin apwal en kaukaule iang kalohk oh towehda mihting kan. Ihme kahrehda mwurin at koasoiapene oh kapakapki sapwellimen Siohwa sawas, se wiahdahr ekei wekidekla kan en mihting kan en mwomwohdiso me tepida sang January 1, 2009. Se kamehlele me koasoandi wet pahn sewese kumwail en koasoanehdi ahnsou mwahu ong pein amwail onop oh onop en peneinei.
Ni kapokon kan nan pahr wet, e inenen kaperen en kilang me aramas tohto papidaislahr oh pil iangahki me pwulopwul kan. Se men kapingahki kumwail pahpa oh nohno kan amwail kin sewese noumwail seri kan en kesempwalki padahk mehlel oh inoukihong Siohwa arail mour ni ahnsou me re pwulopwulte. Arail papidaislahr mendahki re kin lelohng kahpwal tohto nan sukuhl kin kasalehda kaiahn mwahu me re kin alehdi sang rehn arail pahpa oh nohno kan.—Mel. 128:1-6.
Se pil men kapingahki tohtohlahn onop en Paipel kan, oh misineri kan oh pioneer tohrohr kan kin doadoahk laud en wia met. Se kalahnganki dahme riat kan koaros en sampah pwon kin wia pwehn iang nda “Kohdo!” ong aramas mohngiong mehlel kan oh luke irail kan me men mimpildahr en “ale pilen komour nin duwen kisakis ehu.” (Kaud. 22:17) Se perenki kasamwohdo ong nan mwomwohdisohn sampah pwon irail meh 289,678 me kasalehda arail inou ki papidais nan pahr wet!
E kesempwal kitail en katakatamankin pein kitail dahme wahnpoaron Sohn ntingihdi: “Sampah wet oh mehkoaros nin sampah me aramas kin inengieng kin sosohrala; ahpw me kin kapwaiada kupwur en Koht pahn momour kohkohlahte.” (1 Sohn 2:17) Kitail anahne tamataman me koasoandi en sampah wet pahn kereniong ‘sohrala’! E kesempwal kitail en mwohneki kapwaiada kupwuren Koht nan atail mour oh “mwasamwasahn.” (Mad. 24:42) Ma kitail pahn wia met, kitail sohte pahn koluhkihla oh kitail pahn paiekihda sapwellimen Siohwa limpoak kadek.—Ais. 63:7.
Se men kumwail en ese me se kin medemedewe oh kapakapkin kumwail oh se kin inenen poakepoake kumwail. Se kapakapki me Siohwa en kin ketin kapaiada kumwail.
Riamwail kan,
Pwihn me kin apwalih mwomwohdisohn Sounkadehdehn Siohwa kan nan sampah pwon