Kisinlikou Sang Rehn Governing Body
Dear Riaht Brother oh Sister kan:
“Kalahngan oh popohl en Samatail Koht oh atail Kaun Sises Krais en kin ieiang kumwail.” (1 Kor. 1:3) Kitail kin inenen kasikasik ahnsowo me soahng koaros me momour pahn kihong Siohwa kaping me E warohng! (Mel. 150:6) Ni atail awiawih oh kasikasik rahno, kitail en nantihong kalohki Rongamwahu en Wehin Koht oh katohnpadahk.
Siohwa kin ketin apwahpwalih doadoahk en kalohk me wiwiawi nan sampah ahnsouwet. (Mark 13:10) Pwehki kitail wehwehki me Siohwa kin ketin nsenohki doadoahk wet, kitail anahne kapakap ong Siohwa pwehn sewese kitail nan doadoahk wet, pwe kitail pohnese me aramas koaros kakete paiekihda koasoandi me pid duwen tomw. (Kaudiahl 14:6, 7, 14, 15) Mehlel, kitail kin lelohng irair akan nan atail mour me apwal, ahpw kitail kak kalahnganki me kitail “audaudkihda manaman en powe” pwehn kak pweida mwahu nan doadoahk en kalohk!—Luk 24:49.
E kin kansenamwahu en kousapahlih pahr en kalohk me ahpwtehn nek oh medemedewe iaduwen Siohwa kin kapaiada sapwellime ladu lelepek kan. Sapwellimen Koht aramas akan kin mwekidki kehl en ngehn sarawi oh met kin sewese irail en kahlemengih Sises ni arail kin kasalehda limpoak oh solahr kailongki aramas. Limpoak wet kin sansalda nan atail kapokon kan. Sang June lel December 2003, Sounkadehde kid kid kei sang sahpw epwiki samwa seiloak pwehn iang towehda Kapokon Laud (International) 32 me wiawi nan Aperika, Eisia, Australia, Iurop, North America, oh South America. Misineri kan, international servant kan, oh pil tohnBethel kan me doadoahk likin pein sapwarail kihda arail ekspiriens kan nan Kapokon Laud (International) oh pil Kapokon en District kan.
Siohwa kin ketin sewese sapwellime aramas akan ni E kin kamwekid aramas akan en wiahda Kingdom Hall kapw kan, mehlel nan sahpw akan me brother oh sister kan sohte itar pein neirail mwohni en wiahda arail Kingdom Hall. Pwehki anahn en mwengehn ngehn wie lalaudla wasa koaros nan sampah, pilahn en kalaudehla imwen Branch Ohpis kan wiawi nan sahpw tohto. Brochure me oaralap koasoia: Paieki Mour Sampah Kohkohlahte! wiawihdahr ni lokaia 299 met, oh printing en brochure wet (total printing) lella copy 139 million; oh pil printing en pwuhk me oaralap koasoia Loalokong Me Pahn Kahluwalahng Mour Soutuk lella copy 93 million copies nan lokaia 161; oh pil copy 200 million samwa en brochure Dahme Koht Kupwurki Kitail en Wia? wiawihdahr ni lokaia 267.
Se men kasamwo irail me 258,845 me inoukihong Koht arail mour oh papidaisla nan pahr en kalohk me ahpwtehn nek! Pwehki amwail utungada Wehin Koht kin kahrehda Sehdan kin uhwong kumwail, ahpw Siohwa kin ketin kapaiakumwailda oh pil pere kumwail ni amwail kin teng nan weiren tang en mour. (Ipru 12:1, 2; Kaudiahl 12:17) Ei, menlau tamataman me “Silepomw sohte kin ketin seimwokla.”—Mel. 121:3.
Iren pahr en 2004 me koasoia: “Mwasamwasahn . . . Onohnop ahnsou koaros,” oh met wia kaweid me konehng atail ahnsou. (Madiu 24:42, 44) Nan Mahsen en Koht en kin kasalehda me Kristian akan kin wia mehn keiru kei nan koasoandi suwed wet me pahn kerenieng sohrala. (1 Piter 2:11; 4:7) Kahrehda, kitail anahne wia uwen atail kak en medemedewe duwen soahng ngenin kan, pwe met pahn sewese kitail en kihsang atail mour soahng soh katepe kan, oh pil kasawihada kanahieng pein atail mohngiong kan. “Drakon kalaimwun” men kadallehla kitail, oh pitih kitail pwehn iangala ih oh nah kan nan koasoandi suwed wet.—Kaudiahl 12:9.
Mehkot me kesempwal en ahneki madamadau en karuwaru iei wadek Paipel rahn koaros. Ma kitail wia met, e pahn sewese kitail en ‘atail kadehde en kin mihmihte ni EI ma ei’ me pid duwen atail inoukihong Siohwa atail mour oh pil wadek Paipel rahn koaros pahn pil sewese kitail en “tengetengte lel ni imwi nan koapworopwor me kitail ahneki sang nin tapio.” (Seims 5:12; Ipru 3:14) Wadek Paipel rahn koaros kak sewese kitail en tamantaman me sampah inenen dohsang sapwellimen Koht koasoandi kan me sohte wekila sang nin tapio. (Mal. 3:6; 2 Tim. 3:1, 13) Loalokong sang nan Paipel kak sewese kitail en liksang “soi likamw me aramas kin pein wiahda oh pil men pitih meteikan” oh dahme kitail kin sukuhliki nan Paipel pil pahn sewese kitail en lelepek ong Siohwa.—2 Pit. 1:16; 3:11.
Kumwail pahpa oh nohno kan, ni amwail kekeirada noumwail seri kan ni kaiahn oh madamadau en Siohwa, kumwail kin sewese irail en koasoanehdi arail mehn akadei ngenin kan oh “mwasamwasahn” ni pali ngehn? (Episos 6:4) Kumwail kin kaiahne irail en kilangwong arail mour en ahnsou kohkohdo duwehte Sises, me wia aramas me keieu loalokong nan sampah, kilangwong sapwellime mour en ahnsou kohkohdo? Ma Sises mwahuki, e kak wia daiksang, sounwiahda dipwisou kapw, de toahkte men me keieu lapalap oh ndand nan sampah, ahpw e pilada en doadoahngki sapwellime mour ong papah Siohwa. Kitail koaros anahne medemedewe laud duwen mehn kahlemeng mwahu me Sises wiahda oh sewese neitail seri kan en kihda arail mehn akadei en pali ngehn en keieu nan arail mour.
Ladu lelepek oh loalokong, me Governing Body wie kiseh, kin inenen kalahnganki sawas me “pokon kalaimwun” kin kihda ni arail kin sewese me keidi kan kapwaiada arail pwukoah en ‘lohki Rongamwahu en Wehin Koht wasa koaros nan sampah, pwe kadehde en mie ong aramas koaros.’ (Kaudiahl 7:9; Madiu 24:14, 45) Kumwail en tamatamante me Siohwa “sohte kin meliehla amwail wiewia kan oh amwail limpoak ong ih ni sawas me kumwail kasalehdahr oh pil kasalehiong riamwail Kristian kan.” (Ipru 6:10) Ni amwail kin wadek duwen eksiriens kan oh nannanti kan me kileledi nan Pwuhken Pahr en 2004 (2004 Yearbook of Jehovah’s Witnesses), kumwail en tamataman me emenemen kitail kin iang wia doadoahk kesempwal wet (doadoahk en kalohk) me wiawi wasa koaros nan sampah.
Kitail en ahneki madamadau en eimah oh peren ni atail ‘kilikilangwohngete keting me pahn kohdo,’ oh kitail en dehr mweidohng aramas emen de ngehn suwed emen en kihsang kitail. (Ipru 11:26; Kolose 2:18) Ei, kitail en likih Siohwa, oh likih me e pahn sewese aramas koaros me limpoak ong Ih en alehdi mour me uhdahn mehlel.—Sohn 6:48-54.
Kumwail en ese me se inenen perenki ieiang kumwail nan doadoahk en kapinga Siohwa.
Riomwail brother kan,
Governing Body en Sounkadehdehn Siohwa kan