Koakon En Peidek

◼ E konehng en kihda atail sawas ong irail me kin sewese kitail ong mehn peidaid?

Ekei rehtail mihmi nan irair ehu me kitail anahne sawas sang rehn meteikan ong mehn peidaid pwehn kak iang towehda mihding kan oh pil iang kalohk. Brother oh sister tohto kin wia uwen arail kak koaros en tounmeteiki pein arail ahnsou oh wararail sidohsa oh pil doadoahngki pein neirail mwohni pwehn kak sewese meteikan ong mehn peidaid. Mendahki irail anahne kaunopada mwadang oh irail pil kin pwand en pwurala ni imwarail kan, irail kin perenki sawas.

Duwehte irair teikan me pid duwen atail doadoahk en kalohk, kitail anahne doadoahngki kaweid en Kalesia 6:5 nan irair wet: “Emen emen kitail koaros uhdahn pahn pein wa eh wisik.” Kahrehda, ma brother men de sister men kin sewese kitail ong mehn peidaid, e konehng en kasalehda atail kalahngan, kaidehn ihte sang atail lokaia kan, ahpw pil sang atail pahn kihda atail sawas kan ong pwainda gas oh apwalih wararail sidohsa.​—Madiu 7:​12; 1 Kor. 10:⁠24.

Mendahki brothero de sistero sohte pahn nda me e anahne sawas de kitail lemeleme me e sohte anahne sawas en mwohni, ahpw brothero de sistero pahn kalahnganki atail kihda atail sawas. E konehng en kihda atail sawas oh mweidohng brothero de sistero en ale de soh; pwe mehlel mwein ekei pak e sohte pahn ale ahpw mweidohng ih en pein wiahda ah pilipil me pid irair wet. Ahpw, e konehng en kihda atail sawas ong irail me sewese kitail mehn peidaid. Ma ni ahnsou me kitail iang brothero de sistero, ahpw, sohte sawas kitail kak kihong ih rahno, kitail en tamatamante met; pwe mwein ehu rahn me kitail pwurehng iang ih, kitail kak kalaudehla atail sawas me kitail pahn kihong ih.​—Luk 6:​38.

Brother oh sister kan me kin doadoahngki wararail sidohsa kan pwehn sewese riarail ong iang towehda mihding kan oh iang kalohk​—⁠met kin wia elen kasalehda limpoak. (Lepin Padahk 3:​27) Ahpw, e pil kin kasalehda limpoak ma irail me kin paiekihda sawas pwukat kin kasalehda arail kalahngan ni arail kin kihda arail sawas en mwohni.​—Kolose 3:​15.