Koakon en Peidek
◼ Ia duwen atail kak sewese pioneer kan?
Nin sampah pwon, erein pahr en kalohk en 2009, kereniong irail meh 800,000 kin papah nin duwen pioneer oh pioneer tohrohr kan. Irail pwukat me doadoahngki pali laud en arail ahnsou pwehn papah Siohwa, kin ni karasaras kihla tepin wahn arail ahnsou, kehl, oh dipwisou kan pwehn kalohkiseli rongamwahu en Wehio. (Lep. Pad. 3:9) Ia uwen Siohwa eh ketin kupwurki mehlel arail doadoahk laud! Ni ahl dah kan me kitail kak idawehn sapwellimen Siohwa madamadau oh kalaudehla arail peren oh dadaur nan doadoahk en pioneer?
Atail kin pilada mwahu dahme kitail pahn nda kak kangoange irail en pousehla papah nin duwen pioneer kan. (Lep. Pad. 15:23) Kitail kak wekidekla atail koasoandi en ehuehu wihk pwehn iang irail kalohk? Ma kitail iang irail kalohk, kitail kak koasoanehdi en doadoahngki waratail sidohsa a kaidehn wararail. Oh ma kitail iang wararail sidohsa, mwein kitail kak kihda atail sawas pwehn sewese arail anahn kan. (1 Kor. 13:5; Pil. 2:4) Kitail pil kin kasalehda atail kadek ni atail kin luke irail pioneer kan en iang kitail mwenge ekei pak nan imwatail.—1 Pit. 4:8, 9.
Paipel kin inoukihda me Siohwa pahn ketin apwalih anahn akan en irail kan me kin rapahki mahs Wehio. (Mel. 37:25; Mad. 6:33) Ehu ahl me e kin ketin wia met, iei sang riatail Kristian limpoak kan. (1 Sohn 3:16-18) Ei, mehlel me pioneer kan sohte kin kasik me meteikan me pahn apwalih arail anahn en mwohni kan. Oh irail ele sohte kin padahkihong meteikan en ese me mie arail anahn. Ahpw, kitail kak sewese pioneer lelepek kan oh kaitarala arail anahn kan ni ahl me konehng ni atail pahn kin tetehk oh kasawih arail irair.—2 Kor. 8:14, 15.
Ni mwehin tepin Kristian akan, Pihpe, emen sounkalohk ngoang nan mwomwohdisohn Senkria, seiloaklahng Rom. Pohl kangoange Kristian akan nan Rom: “I men kapehsekin kumwail riatail lih Kristian Pihpe, me wia sounpapah men nan mwomwohdisohn Senkria, pwe kumwail en kasamwo ih rehn Kauno ni ahl ehu me konehng irail me sarawi kan, . . . sewese ih ni soahng koaros me e anahne sang rehmwail, pwe pein ih pil kadehde me e sewese me tohto, ei, pil pein ngehi.” (Rom 16:1, 2, NW) Kitail pil ahneki ahnsou mwahu en utung ni limpoak irail akan nan atail mwomwohdiso me kin kalohki rongamwahwo oh sohte kin uhdihsang ar papah nin duwen pioneer de pioneer tohrohr kan.—Wiewia 5:42.