Irail Wia Mehn Kahlemeng Mwahu en Lelepek
1 Ehu elen doadoahk en kalohk kaukaule tepida nan pahr 1937—doadoahk en Special Pioneer. Ohl oh lih koahiek kan, me ahneki koahiek nan doadoahk en kalohk, alehdahr pwukoah en kalohk nan wasa sohte lipilipil kan me pilipilda ong irail en kalohk ie. Ahnsou wet, sounpahr tohto dauliher, irail Special Pioneer kan pil kin doudoulahte oh wia mehn kahlemeng mwahu en lelepek me konehng kitail en idawehn.—Ipru 6:12.
2 Irail Tiengla Mwowe: Nin tepio, irail Special Pioneer kan kin doadoahngki phonograph kan ohng tohnihmw akan oh met kin sewese doadoahk en kalohk en pweida mwahu. Irail pil kin kihong aramas me re kin pwurala rehrail kan en rong recording kan pwe irail en kak koasoakoasoiapene iren Paipel kan. Met pil kin wiawi nan kahnimw laud kan me mwomwohdiso kan mihmier ie sounpahr tohto. Mwuri, irail Special Pioneer kan uhd pekederla nan wasa kan me anahn laud mie ohng sounkalohk kan en Wehio. Irail kin pwurehng pwurala rehn irail akan me kin perenki rong Mahsen en Wehio oh wia onop en Paipel rehrail. Pwehki arail ngoang, mwomwohdiso epwiki kei pil kakaudahr. Arail doadoahk en kalohki Rongamwahu kin wia mehkot laud ehu me sewese kekeirada en sapwellimen Siohwa pwihn sansal me kitail kin kilang rahnwet. (Aiseia 60:22) Special Pioneer kan kin pil wiewiahte pwukoah kesempwal rahnwet ni arail kin sewese laud doadoahk en kalohki Rongamwahu “wasa koaros nin sampah.”—Kolose 1:23.
3 E Konehng Kitail en Kahlemengih Mehn Kahlemeng Mwahu en Special Pioneer kan: Ekei Special Pioneer kan kin wia doadoahk en kalohk kaukaule erein sounpahr tohto ie. Erein sounpahr tohto pwukat, irail ohl oh lih lelepek pwukat kin kakairada arail pwoson sang ni arail kin powehdi soangsoangen irair en apwal wekpeseng kan. (1 Piter 1:6, 7) Irail kin tounmeteikihla arail irair en nsenamwahu nan pein arail wasa pwe irail en kak papah nan wasa kan me anahn laud mie. Ekei irail mahlahr oh pil luwetalahr, oh ekei kin lelohng nan soangen irair en apwal teikan. (2 Korint 4:16, 17) Ahpw, irail kin “nannantihte mendahki arail mahlahr.” (Melkahka 92:14) Irail kin likih Siohwa oh kin ale sapwellime kapai kan.—Melkahka 34:8; Lepin Padahk 10:22.
4 Kitail konehng kasalehda atail kaping ni ahl limpoak ong irail Special Pioneer kan. Ma ke iang wia kisehn mwomwohdiso kan me kin paiekihda sawas en irail Special Pioneer kan, isaneki ahnsou mwahu wet oh patehng irail pwe ke en kak paiekihda arail koahiek kan. Kasalehiong irail ahmw kalahnganki arail doadoahk en kalohki Rongamwahu en Wehio. Oh pil, ale mehn kangoang sang arail kin tengediong doadoahk kesempwal wet. Irail kan me kin kahlemengih arail pwoson kak pil ale sapwellimen Siohwa kupwuramwahu oh kapai kan pwehki “Siohwa kin ketin kupwuramwahwih irail akan me kin loalopwoat ong ih.”—Lepin Padahk 12:22.