Wekideklahn Uwen Tohtohn Awa Me Pioneer kan Anahne Wiahda
1 Kitail koaros kin kalahnganki me mie irail regular pioneer kan oh auxiliary pioneer kan nan mwomwohdiso. Pil wasa kan me wasahn kalohk kin tikitik oh kalohk kin kalap wiawi ie nan wasa pwukat, pioneer kan kin kihda mehn kalimeng mwahu arail kin idipek nan arail kalohki Wehio. Re kin kangoangehki sounkalohk koaros en soupisengki rapahki irail ko me “warohng.”—Wiewia 13:48.
2 Society tehkadahr duwen apwal akan me kin lelohng pioneer kan, keieu me pid rapahkihda doadoahk en mwohni en lepin ahnsou me pahn mweidohng irail en apwalih pein arail anahn kan pwe ren kak mihmihte nan doadoahk en kalohk kaukaule. Irair en wehi ahnsouwet nan sahpw tohto kin pil kahrehda e apwal ong mehteikan en iang doadoahk en pioneer, mendahki ma met ih ineng en mohngiongarail. Erein nan sounpwong keren kan, mehpwukat oh ire teikan anahne en kohwong pehtekpe.
3 Ihme kahrehda, pwehki met, Society kamalaulauwila awa me regular pioneer kan oh auxiliary pioneer kan anahne wiahda nan sounpwong ehu. Tepida nan pahr en 1999, regular pioneer kan pahn anahne wiahda awa 70 nan sounpwong ehu, de awa 840 nan sounpar ehu. Auxiliary pioneer kan pahn anahne wiahda awa 50 nan sounpwong ehu. Awa me special pioneer kan oh misineri kan anahne wiahda pahn duduwehte, sohte wekila, pwehki Society kin sewese irail apwalihong irail arail anahn en war kan. Ihme kahrehda, re kak medemedewehte arail doadoahk en kalohk oh katohnpadahk.
4 Se koapworopworki me wekideklahn uwen awa pwukat pahn sewese pioneer tohto en kolokolte doadoahk kaselel wet. E pahn pil langahda ahl ong sounkalohk tohto en iangala doadoahk en regular pioneer oh auxiliary pioneer. Ia uwen met kin wia kapai ehu ong koaros nan mwomwohdiso!