Kalaudehla Ahnsou Mwahu en Kapinga Siohwa

1. Koasoandi kapw dahieu me pahn sewese kitail en “kapingkalahngan ni ngihl laud ong KAUN-O”?

¹ Tepisang sounpwong en March, mie koasoandi kapw ehu tepidahr. Met kihong sounkalohk kan ahnsou mwahu en wia sawaspen pioneer me kin wiahda awa 30 nan March oh April oh pil sounpwong me sounapwalih me kin seiloak kin mwemweit. Ma mwemweit en sounapwalih me kin seiloak pahn kin wiawi nanpwungen sounpwong riau, sounkalohk kan me men wiahda awa 30 kak pilada mehnia sounpwong me re men wia sawaspen pioneer. Sawaspen pioneer koaros kak iang pioneer oh pioneer tohrohr kan towehda mihtingo pwon. Met wehwehki me ma kitail sohte kak wiahda awa 50, kitail pil kak iang wia atail “kapingkalahngan ni ngihl laud ong KAUN-O” ni atail kak wia sawaspen pioneer me kin wiahda awa 30 pak pahieu nan pahr ehu.—Mel. 109:30; 119:171.

2. Dahme irail me iang sawaspen pioneer erein mwemweit en sounapwalih me kin seiloak pahn perenki?

² Ni Ahnsoun Mwemweit en Sounapwalih me Kin Seiloak: Ahnsouwet me tohto pahn kak iang wia sawaspen pioneer ni mwemweit en sounapwalih me kin seiloak oh perenki kangoang me kohsang atail kin iang ih nan doadoahk en kalohk. (Rom 1:11, 12) Sawaspen pioneer kan me kin doadoahk en mwohni kak peki rehn sounapwalih me kin seiloak ma e kak iang irail kalohk Rahn Kaunop de Rahn Sarawi. Me tohto pahn kakete koasoanehdi ren kommoal sang doadoahk rahn ehu pwe ren iang ih kalohk. Patehng met, e pahn wia kangoang laud ong sawaspen pioneer kan ren iang pioneer kan towehda mihting en pioneer.

3. Dahme kahrehda mwohn oh mwurin ahnsoun Kataman wia ahnsou mwahu en iang wia sawaspen pioneer?

³ Erein Sounpwong en March oh April: Irail kan me isaneki koasoandi ong sawaspen pioneer sounpwong ehu mwohn oh mwurin ahnsoun Kataman me kin wiahda awa 30 kakehr kalaudehla pak riau arail “meirong en kaping.” (Ipru 13:15) Sounpwong en March oh April wia ahnsou mwahu en kalaudehla atail doadoahk en sawaspen pioneer. Nan ahnsowo ehuehu pahr, kitail kin iang wia doadoahk kaperen en luke meteikan ren iang towehda Katamano. Patehng met, pwehki me tohto kin kalaudehla arail ahnsoun kalohk, mwohn de mwurin ahnsoun Kataman, kitail kak iang sounkalohk tohto kalohk. Mwurin Katamano, kitail pwurala rehn irail kan me perenki rong me iang towehda oh kangoange irail en iang towehda padahk tohrohr me kin wiawi mwurin Kataman. Omw mohngiong pahn kamwakid uhk en isaneki ahnsou mwahu tohrohr pwukat ken iang wia sawaspen pioneer?—Luk 6:45.