Kalohk Wasa Kan Me Aramas Mie
1 Pwehki wahnpoaron Pohl wehwehki dahme Ngehn Sarawi kin wia ni doadoahk en kalohk, ihme kahrehda e mahsanih: “Koht me kin ketin kakairada tuhkeo.” E pil mahsanih: “Kiht tohndoadoahk kei me kin iang Koht ketin wiewia sapwellime doadoahk.” (1 Kor. 3:5-9) Pwais wet inenen kaselel. Iaduwen kitail pahn kasalehda ong wehi pokon me kitail kalanganki atail pwais nin duwen tohndoadoahk kei me kin iang Koht? Ni atail kin kalohk ong koaros me kitail kin tuhwong ihmw-lel-ihmw oh wasa sohte lipilipil.
2 Kehkehlik kohwong kitail en “katohnpadahkih aramas akan.” (Madiu 28:19) Ma kitail kin tuhwong aramas malaulau nan kalohk, kitail pahn mwadang pwangada oh pehm me atail doadoahk tikitik. Ni pali teio, kitail pahn keieu perenki atail kalohk ma kitail tuhwong tohto aramas oh koasoiong irail. Met kin apwal, pwe kitail anahne rapahki ahl kan pwehn tuhwong aramas tohto sohte lipilipil iawasa irail kin mihmi ie.
3 Karasepe Kan: Kitail kak kalohk ong aramas nan sidohwa kan, wasahn mwemweit kan, wasahn kommoal kan, oh wasa kan me aramas kin awih mehn peidaid. Ni ahnsou me ke iang taxi de bus kan, ke onopadahngehr en kalohk ong aramas me ke pahn tuhwong? Sounkadehde riemen iang bus me dirkihla aramas kohlahng wasahn tuhpenen kalohk oh ira koasoiong emen duwen kilel en paradais nan pwuhken Knowledge, oh koasoia duwen sapwellimen Koht inou kan ong ahnsou kohkohdo. Duwehte me ira koapwoaroapwoarki, mwahnakapw men rongorong ara koasoiong mehteikan oh pwuriamweikihla dahme e rong. Mwohn e dohdi sang bus, e ale pwuhk ehu oh idek rehra ma mie me kak pwurehng tuhwong ih ni imweo.
4 Sounkalohk kan kin diarada me irail perenki kalohk wasa sohte lipilipil. Ehu rahn, mwurin souwas, emen sister kohla ni ehu shopping center (wasao me sidohwa tohto mihte wasakis) oh e tuhwong aramas me ahpwtehn kanekehla arail net nan sidohwa kan oh aramas pwukat sohte kin karuwaru. E kihla pwuhk kan koaros oh makasihn kan nan ah kopwou. Emen ohl me awih nan were sidohsa inenen perenki ale makasihn sang sistero. Mahs e kin iang mihding, oh e pwurehng perenki rong padahk mehlel ahnsou me e koasoiong sistero.
5 Kitail ahneki pwais kaselel en kapinga mwaren Siohwa. Ni atail kin kasalehda atail ngoangki doadoahk en kalohk, kitail kasalehda me kitail sohte kin mwamwahliki sapwellimen Koht kupwur kadek kalahngan. Pwehki “ahnsou wet iei ahnsou mwahu” en sewese mehteikan, kitail en kohla wasa koaros me aramas mihmi ie oh kalohk ong irail duwen sapwellimen Siohwa “rahnen kamourla.”—2 Kor. 6:1, 2.