Kalaudehla Ahmw Peren Ong Kalohk
1 Ke kin ahneki peren me kin kohsang ahmw kalohki Rongamwahu? Ma kitail sohte kanahieng, sampah suwed wet me kin kapilkitailpene pahn kahrehong kitail en namenengki atail kalohk, oh met pahn kihsang atail peren. Oh pil, ma kitail kin kalohk nan wasa kan me aramas sohte kin perenki rong, met pil kak kihsang atail peren. Dahme ke kak wia pwehn kalaudehla ahmw perenki kalohk?
2 Ken Ahneki Lamalam en Pweida Mwahu: E pahn wia sawas laud ma kitail ahneki lamalam me kitail pahn pweida mwahu nan kalohk. Ehu ahl en wia met: ma kitail pahn medemedewe laud duwen pwais kaselel me kitail ahneki nin duwen aramas me kin wia “tohndoadoahk kei me kin iang Koht ketin wiewia sapwellime doadoahk.” (1 Kor. 3:9) Sises pil kin iang kitail ni atail kin nantihong wia doadoahk en kalohk. (Madiu 28:20) Oh pil, e pil kin sewese kitail ni e kin kadarala tohnleng kan pwehn sewese kitail. (Madiu 13:41, 49) Kital kak kamehlele me Siohwa kin kaweidkin kitail oh atail nannanti kan. (Kaudiahl 14:6, 7) Eri, mehnda ma ekei aramas sohte kin mwekidki doadoahk en kalohk me kitail wia, irail me mihmi nanleng me kin mwekidki doadoahk ni arail kin ahneki peren laud!
3 Kaunopada Mwahu: Ma kitail pahn kaunopada mwahu, e pahn sewese kitail en perenki kalohk. Kaunopada ong kalohk sohte anahne wia mehkot me pahn doadoahk laud. Ke kak doadoahngkihte minit kei en tehk makisihn kapw kan de pwuhk kan de brochure kan me kitail pahn kihla nan sounpwongo pwehn rapahki ire kesempwal ehu me ke kak koasoia nan kalohk. Pilada padahk ieu me mihmi pahnangin oaralap me koasoia “Dahme Kitail Kak Koasoia Duwen Makisihn kan” me kin mihmi nan Atail Doadoahk Ong Wehio. Tehk insert en Atail Doadoahk Ong Wehio en January 2002 me oaralap koasoia, “Ekei Padahk kan Ke Kak Doadoahngki Nan Kalohk,” de tehk nan pwuhken Reasoning pwehn rapahki tepin koasoi me mwahu. Ma ke sohte kak sapeng koasoi ehu de uhwong ehu me tohnihmw akan kin kalap doadoahngki, eri, kaunopada pasapeng ehu me pahn kasalehda me ke wehwehki arail koasoi oh uhd koasoi ong irail duwen oaralap me re pahn perenki rong. Pwuhken Reasoning kak wia sawas laud en wia met. Ma ke doadoahngki soangen sawas pwukat, e pahn kihong kitail kehl pwehn kak perenki kalohk.
4 Poadidiong Kapakap: Kapakap kin wia mehkot kesempwal pwehn ahneki peren me pahn werei. Pwehki kitail wia sapwellimen Siohwa doadoahk, kitail anahne pekihda sawas en sapwellime ngehn sarawi ahnsou koaros, oh ehu wahn ngehn sarawi iei peren. (Kal. 5:22) Siohwa pahn ketikihong kitail kehl pwehn nantihong kalohk. (Pilipai 4:13) Kapakapki atail kalohk kak sewese kitail en ahneki soangen madamadau me pwung oh konehng ahnsou me kitail lelohng irair kan me kansensuwed. (Wiewia 13:52; 1 Pit. 4:13, 14) Ma kitail kin masapwehkada, kapakap pahn sewese kitail en nantihong wia dahme pwung ni eimah oh peren.—Wiewia 4:31.
5 Kalohk Ong Aramas akan Wasa Koaros me Re Mihmi Ie: Mehlel, atail kalohk pahn kaperen ahnsou me kitail kin diar aramas akan oh kalohk ong irail. Ke kak koasoanehdi ahmw ahnsoun kalohk ihmw lel ihmw pwehn weksang ahnsoun kalohk me ke ahnla, mwein ke kak koasoanehdi pwehn kalohk ihmw lel ihmw mwurin souwas de ni soutik, oh met pahn kak kahrehong uhk en pweida mwahu nan kalohk. Ke kin tuhwong aramas akan ahnsou me ke kin alialu nanial, kohla netinet, de alu nan wasahn mwetuwel. Dahme ke soh kaunopada padahk mwotomwot pwehn kalohk ong aramas me ke kin tuhwong me mwomwen kadek? De mwein ke kin doadoahk en mwohni de kohla sukuhl, oh ke kin koasoi ong aramas teikan rahn koaros. Mwein mie ahnsou kan me ke kak kalohk ong meteikan ni ahmw pahn koasoia oaralap en Paipel ehu me meteikan kin perenki rong. Ke kak diar iren sawas mwahu kan nan Atail Doadoahk Ong Wehio en January 2002 ni pali 3 (insert). Ma ke pahn nantihong rapahki sawas pwukat oh nantihong kalohk ong aramas sohte lipilipil me ke pahn diar irail, ahmw peren nan kalohk pahn uhdahn laudla.
6 Pwehki irair en peren kin sewese kitail en dadaur, e inenen kesempwal en kolokol peren me ke ahneki! Ni ahmw pahn wia met, ke pahn paiekihda kating laud ahnsou me doadoahk wet me sohte pahn pwurehng wiawi pahn imwisekla. Oh pil, atail ahneki koapworopwor wet pahn kak kalaudehla atail peren nan kalohk.—Madiu 25:21.