Dahme Kahrehda Sises Mwarenki Sapwellimen Kohto?

Paipel sapengki

Paipel kin kalapw kamwarehki Sises “Sapwellimen Kohto.” (Sohn 1:49) Lepin lokaia ko “Sapwellimen Kohto” kasalehda me Koht iei Sounkepikipik, de poahsoan en mour koaros, iangahki Sises. (Melkahka 36:9; Kaudiahl 4:11) Paipel sohte kin padahngki me Koht ketin wiahla semen seri men ni mwohmwohte me aramas akan kin wiahda seri.

Paipel pil kahdaneki tohnleng kan “nein koht ko.” (Senesis 6:2) Oh Paipel kasalehda me tepin aramaso Adam wia “sapwellimen Koht pwutak.” (Luk 3:38) Ahpw, pwehki Sises iei tepin sapwellimen Koht kepikipik oh ihete me Koht pein ketin kapikada, Paipel kasalehda me Sises iei sapwellimen Koht Ohl me keieu kesempwal.

• Sises kin ketiket nanleng mwohn eh ketin ipwidi nin sampah?

• Dahme Sises kin ketin wia mwohn eh ketidihdo nin sampah?

Sises kin ketiket nanleng mwohn eh ketin ipwidi nin sampah?

Ei. Sises ketin wia ngehn emen nanleng mwohn eh ipwidi nin duwen aramas emen nin sampah. Pein Sises mahsanih: “I kohdihdo sang nanleng.”—Sohn 6:38; 8:23.

Koht ketin kapikada Sises mwohn eh ketin kapikada soahng teikan koaros. Paipel mahsaniheki duwen Sises:

• “Ih me . . . mesenih en kepikipik kan koaros.”—Kolose 1:15.

• Ih me “tepin sapwellimen Koht kepikipik.”—Kaudiahl 3:14.

Sises ketin kapwaiada kokohpo duwen emen me “tepido sang kawao.”—Maika 5:2; Madiu 2:4-6.

Dahme Sises kin ketin wia mwohn eh ketidihdo nin sampah?

E sapwellimanki dehu lapalap ehu nanleng. Dehu wet me Sises mahmahsanih duwe ni eh loulouki: “Semei, komw ketin kalinganahkiniehda . . . lingan me I patohwan ahneki ni ei patopato rehmwi mwohn sampah eh miehla.”—Sohn 17:5.

E ketin sewese Semeo kapikada soahng teikan koaros. Sises ketin iang Koht doadoahk nin duwen “sounsawas emen.” (Lepin Padahk 8:30) Paipel mahsaniheki duwen Sises: “Pwehki ih soahng teikan koaros me mi nanleng oh nin sampah kapikipikda.”—Kolose 1:16.

Koht ketin doadoahngki Sises pwehn kapikada soahng teikan koaros. Kepikipik pwukat iangahki ngehn de tohnleng teikan koaros oh pil audepen lahng oh sampah pwon. (Kaudiahl 5:11) Koht oh Sises ara kin ketin doadoahkpene kin duwehte emen me kin koasoanehdi mwomwen kokoudahn ihmw (architect) oh sounkou ihmw men (contractor) ara kin doadoahkpene. Architecto kin wiahda pilahn en ihmwo a sounkou ihmwo kin uhd wiahda ihmwo.

Ih me Mahseno. Ni Paipel eh kin koasoia duwen sapwellimen Sises mour mwohn eh ketin wiahla aramas, e kahdaneki Sises “Mahseno.” (Sohn 1:1) Eri e sansal me Koht ketin doadoahngki sapwellime Ohlo pwehn padahkihong tohnleng teikan duwen ire kan oh kaweid kan.

E mwomwen me Sises pil ketin wia sapwellimen Koht Sounkair ong aramas akan nin sampah. Ele Koht ketin doadoahngki Sises nin duwen Mahseno ni eh ketikihong Adam oh Ihp kaweid kan nan mwetuwel en Ihden. (Senesis 2:16, 17) Mwein Sises me ketin wia tohnleng me kahre mehn Israel ko mahso nan sapwtehno oh mwein kapitieo me mehn Israel ko anahne peikiong.—Eksodus 23:20-23.a