Soangen Kapwopwoud Me Pwung Mwohn Koht Oh Aramas

“Kapwopwoud ehu ahpw wiawi nan kahnimw Kena . . . Sises oh sapwellime tohnpadahko ko pil lukohng ni kapwopwoudo.”—SOHN 2:1, 2.

1. Dahme ire me pid duwen Sises nan Kena kin kasalehda?

SISES, ineo, oh ekei sapwellime tohnpadahk ko kin wehwehki duwen kapwopwoud me wiawi ni pwung e kin inenen kaperen ohng sapwellimen Koht aramas akan. Krais pil kahrehda ehu kapwopwoud eh inen sikila ni eh wiahda keieu en manaman me kileldi nan Paipel, me kahrehda rahno eh inenen kaperen mehlel. (Sohn 2:1-11) Ele ke pil iangehr towehda kapwopwoud kan en irail Kristian kan me men papah Siohwa nin duwen aramas peren kei me kapwopwoudla. De mwein pein kowe de pil emen kompoakepahmw en ahneki soangen kapwopwoud me pweida mwahu. Dahme kak wiawi pwehn kak ahneki soangen kapwopwoud wet me pweida mwahu?

2. Soangen ire dah kan me kin dierek nan Paipel me pid duwen kapwopwoud?

² Kristian kan kin diarada me kaweid kan me kin dierek nan sapwellimen Koht Mahsen sarawi kan kin inenen kihda sawas laud ohng ohl emen oh lih emen me pilahn en pwopwoud. (2 Timoty 3:16, 17) Ehi mehlel, Paipel sohte kin kasalehda ni oaritik duwen iaduwen kapwopwoud ehu en Kristian en kin wiawi. Met wehwe pwehki tiahk oh palien kosonned en ehu ehu wasa oh mwehi kin wekpeseng. Karasepe ehu, ni mwein Israel en mahs, sohte kasarawi en kapwopwoud kin wiawi. Ni rahn en kapwopwoud, ohl pwopwoudo kin wahdo eh pwoud lih ni imwen eh pahpa. (Senesis 24:67; Aiseia 61:10; Madiu 1:24) Kahk wet me kin sansal ohng wehi pokon kin wia kasalepen me meh riemeno kapwopwoudla oh sohte wia kasarawi en kapwopwoud me duwehte dahme kin wiawi nan rahn pwukat.

3. Koasoandi dahieu nan Kena me Sises iang kihda eh sawas?

³ Mehn Israel kin pohnese me kahk wet kin wia kasalepen me kapwopwoud ehu wiawi. Mwuri irail kin iang towehda kamadipw, me duwehte me kileledi nan Sohn 2:1. Tohto kawehwe en Paipel teikan me kawehwehdi ire wet nin duwe met: “Kapwopwoud ehu ahpw wiawi nan kahnimw Kena.” Ahpw tepin kawehwe lokaia me doadoahk iei “kamadipw en kapwopwoud.”a (Madiu 22:2-10; 25:10; Luk 14:8) Ireo kasalehda me Sises iang lukohng oh pil iang sawas nan kamadipw ehu me pidada kapwopwoud ehu en mehn Suhs. Ahpw ire me kesempwal wasaht iei me koasoandi en kapwopwoud en mahs weksang koasoandi en kapwopwoud en nan ahnsouwet.

4. Soangen koasoandi en kapwopwoud dah kan me ekei Kristian kan kin pilada en wia, oh pwekida?

⁴ Nan sahpw tohto rahnpwukat, Kristian kan me kin men pwopwoud kin anahne lel soangen irair kei me pelien kosonned en arail wasa kin wiahda. Ni arail kin kapwaiada me, irail kakehr kapwopwoudla ni soangen irair soh lipilipil kan me pahrekiong kosonned en ahr wasa. E pil kak wia kisin kapwopwoud tikitik kis, me sounkopwung men, mayor men, de emen me wia weliepen sarawi ehu me wehio kin kamanahla, kin wia kasarawi en kapwopwoudo. Ekei kin pilada en wia soangen kapwopwoud wet oh ele lukehte ekei kisehrail akan de kompoakparail Kristian teikan en iang wia sounkadehde kei de en iang towehda irair kesempwal wet. (Seremaia 33:11; Sohn 3:29) Duwehte met, ekei Kristian kan ele mwein pahn pilada irail en dehr wia kamadipw en kapwopwoud me nohn laud me pahn kahrehda doadoahk laud oh me pweilaud. Irail mwein ele pahn pilada en wiahdahte kisin kamweng tikitik kis me ihte kompoakparail me keren kan me pahn lukodo. Sohte lipilipil soangen koasoandi dah me kitail pilada en wia, kitail anahne pohnese me ekei riatail Kristian mah kan mwein ele pahn ahneki soangen irair en madamadau kan me weksang atail.—Rom 14:3, 4.

5. Dahme kahrehda Kristian tohto kin men padahk en wiawi ni ahr kapwopwoud, oh met kin wia kilelepen dah?

⁵ Pali laud en Kristian kan kin pilada padahk me poahsoankihda Paipel en wiawi ni ahr kapwopwoud.b Irail kin pohnese me Siohwa me wiahda koasoandi en kapwopwoud oh e kin ketikihda nan sapwellime Mahsen, soangen kaweid erpit kan me pid iaduwen ara pwopwoud kak pweida oh wahdo peren. (Senesis 2:22-24; Mark 10:6-9; Episos 5:22-33) Oh pali laud en pwopwoud kan kin men kompoakparail me Kristian akan oh ahr peneinei en towehda ahnsou kaperen wet. Ahpw, ia pahn duwen atail madamadau ohng anahn akan en palien kosonned, elen wiepen kapwopwoud kan, oh tiahk akan en atail wasa? Nan artikel wet, kitail pahn tehkpene iaduwen koasoandi pwukat kin wiawi nan wasa soh lipilipil kan. Ekei koasoandi kan me kin wiawi ele pahn inenen weksang dahme ke ese de me kin wiawi nan ahmw wasa. Mendahki met, ke pahn kak kilang me mie soangen mouren koasoandi kan de irair kan me kin kesempwal ohng sapwellimen Koht ladu kan.

Kapwopwoud me Wahu—Kapwopwoud me Pwung ohng Palien Kosonned

6, 7. Dahme kahrehda kitail en nsenohki iren kosonned kan me pid duwen kapwopwoud, oh iaduwen atail pahn kin kasalehda met?

⁶ Edetehn Siohwa me wiahda koasoandi en kapwopwoud, koperment en aramas kin ahneki manaman pohn koasoandi en irail akan me pahn kapwopwoud. Met konehng. Sises mahsanih: “Kihong Sihsar me uhdahn en Sihsar, a ong Koht me uhdahn sapwellimen Koht.” (Mark 12:17) Me pil duwehte met, wahnpoaron Pohl kaweidki: “Aramas koaros uhdahn pahn peikiong pwungen wehi kan; pwe Koht, iei ih me kin ketikihong wehi kan arail pwung, oh ih me pil ketikihongehr pwungen wehi kan nin sampah.”—Rom 13:1; Taitus 3:1.

⁷ Nan sahpw tohto Sihsar, de irail akan me wia kaun en wasa kan, kin kosonnehdi ihs me kak kapwopwoud. Kahrehda, ni ahnsou me Kristian riemen me kak pwopwoud pilada ira en kapwopwoud, ira anahne idawehn oh kapwaiada kosonned en ara wasa me pid duwen kapwopwoud. Met ele pahn pidada en alehda laisin en kapwopwoud, doadoahngki emen me palien kosonned en ahmw wasa mweidada en kak wia padahk, oh ele en ntingihdi de kilelehdi koasoandi koaros en kapwopwoudo. Ni ahnsou me Sihsar Akustus wiahda kosonned ehu me tohn eh wasao koaros en “ntingdi,” Mery oh Sosep peikiong oh seiloaklahng nan Pedleem pwe ira “en iang ntingdi.”—Luk 2:1-5.

8. Ia wen manaman en koasoandi en kapwopwoud ehu, oh soangen koasoandi en Sounkadehdehn Siohwa kan dah me kin kasalehda duwen wehwe wet?

⁸ Ni ahnsou me Kristian riemen kin kapwopwoudla ni ahl ehu me pwungiong palien kosonned oh tohn ahmw wasa kin pohnese met, eri patpene wet kin pwung oh manaman mwohn silangin Koht. Kahrehda, Sounkadehdehn Siohwa kan sohte kin pwurehng wia ahr kapwopwoud sounpar kei mwuri, de pil pwurehng kawiliakapwihala ara inou en kapwopwoud, duwehte dahme ekei pwopwoud kan kin wia ni arail kataman en kapwopwoud kerieisek limau de kelimeisek. (Madiu 5:37) (Ekei sarawi kan sohte kin pohnese kapwopwoud kan me kaidehn padre de sounpadahk me wia mendahkihte kapwopwoudo kin wiawi ni ahl me pahrekiong kosonned en arail wasa.) Nan sahpw tohto, koperment kin mweidada emen sounpapah en Sounkadehdehn Siohwa kan en kasarawihala kapwopwoudo. Ma iei, eri e pahn wia met oh iangahki padahk en kapwopwoudo ni Kingdom Hall. Met iei wasahn kaudok mehlel oh wasa me konehng padahk en koasoandi wet en wiawi, me Siohwa Koht ketin koasoanehdi.

9. (a) Me pid koasoandi en kapwopwoud kan me palien kosonned kosonnehdi, dahme Kristian akan me men pwopwoud ele pahn men kosonnehdi en wiawi? (b) Ni ahl dah me elder kan pil kin iang pidada koasoandi en kapwopwoud kan?

⁹ Nan ekei sahpw akan, palien kosonned kin anahne meh riemen me pahn pwopwoud en kapwopwoud nan ohpis en koperment, me duwehte imwen wehi de mwoalen kopwung, de mwohn emen me wehio pilada en pwukoahki kosonndi en kapwopwoud. Pali laud en ahnsou, Kristian kan kin pilada irail en kapwaiada kahk kan me kileledi nan palien kosonned en ahr wehi oh pil iangahkihte padahk en kapwopwoud nan Kingdom Hall ni rahnohte de pil rahn mwuri. (Irail sohte mwahuki wiahda mehkoaros me palien kosonned kosonnehdi irail en wia oh awiawih rahn tohto kei mwuri ah irail uhd wia padahk en kapwopwoudo me poasoanda sang Paipel, pwe irail anahne kapwopwoudla mwohn Koht oh aramas, iangahki mwomwohdiso en Kristian.) Ma meh riemen men wia koasoandi koaros en ara kapwopwoud ni Kingdom Hall ehu me iangahki koasoandi en palien kosonned oh padahk en kapwopwoud, ira anahne tuhkihong elder kan me kin pwukoahki palien Service Committee en Mwomwohdiso mwowe pwehn ale mweimwei. Sounapwalih pwukat anahne kilang me ma meh riemenet kin wia mehn kahlemeng mwahu nan mwomwohdiso oh pil tehkada mwahu kuloak me kapwopwoud pahn wiawi pwe en dehr kerempwa ahnsou en mihding kan oh pil koasoandi teikan me kin wiawi nan Kingdom Hall. (1 Korint 14:33, 40) Re pahn pil tehk koasoandi kan me meh riemen me pahn kapwopwoudo koasoanehdi en wiawi oh pahn kilang ma mie anahnepen wia pakair kan me pid koasoandi pwuko.

10. Ma palien kosonned kosonnehdi me kapwopwoud mwoalen kapwung anahne wiawi mahs mwowe, iaduwen met kin pidada koasoandi me pid duwen padahk en kapwopwoudo?

¹⁰ Elder me wia padahk en kapwopwoudo pahn kin nantihong wia padahko ni elen kadek, kangoang, oh wahu. Ma kapwopwoud en meh riemeno alehier kamanaman sang palien kosonned mwohn ara wia ara kapwopwoud nan Kingdom Hall, eldero anahne kasalehda ni sansal me ohng palien kosonned en Sihsar, ira wialahr ehu pwopwoud. Ma ira saikinte wia inou nanpwungara me pid duwen ara kapwopwoud ni ahnsou me ira wia ara kapwopwoud ni mwoalen kapwung, ira kak wia met ni ahnsou me padahk en ara kapwopwoud wiawi nan Kingdom Hall.c Ma ira wiahier ara inou ko ni ahnsou me ira kapwopwoud nan mwoalen kapwung ahpw ira men pil ehu wia inou pwukat mwohn Siohwa oh mwomwohdiso, ira pahn wia met ni ngoaren koasoi me kasalehda me ara inou wiawiher mwowe, pwehn kasalehda me Koht ketin “kapatapenehr” ira mwowe.—Madiu 19:6; 22:21.

11. Nan ekei wasa, iaduwen ohl emen oh lih emen kin kapwopwoudla, oh iaduwen met pidada padahk en kapwopwoudo?

¹¹ Nan ekei wasa, palien kosonned sohte kin anahne ira me pahn kapwopwoud en wia kasarawi en kapwopwoud, pil sohte anahne wia mwohn emen me palien koperment kamanahla en kak wia kapwopwoud. Kapwopwoudo kin wiawiher ni ahnsou me ira pahn kihlongehr neira doaropwehn kapwopwoud me ira sainialahr ohng aramas me kin kamanahla doaropwehn kapwopwoud. Ni ahnsowo, neira doaropwe en kapwopwoud kin kamanamanlahr. Eri aramas kin kilangwohng rahn me kileledi ni neira doaropwe nin duwen rahn me ira wialahr ohl pwopwoud oh lih pwopwoud. Eri nin duwen me kitail koasoiahier mwowe, meh riemen me wia soangen kapwopwoud wet ele pahn men padahk en kapwopwoud en wiawi nan Kingdom Hall mwurinte met. Brother mah ni pali ngehn me pilipildahr en wia padahk en ara kapwopwoud pahn pakairkiong pokon me iang towehda kapwopwoudo me ira wialahr pwopwoud ehu sang ni ara kapidelongehr neira doaropwehn kapwopwoud. Inou nanpwungen ohl oh lih me pahn kapwopwoudo pahn wiawi nin duwen me kileldi nan parakrap 10 oh footnote. Irail akan me iang towehda kapwopwoudo pahn iang meh riemeno pereperenki dahme wiawi oh pil paiekihda iren kaweid me kohda sang Mahsen en Koht.—Melkahkahn Melkahka kan en Solomon 3:11.

Kapwopwoud kan me Pahrekiong Tiahk oh Palien Kosonned

12. Dahkot kapwopwoud en tiahk, oh kangoang dah me kohwohng irail akan me kin wia soangen kapwopwoud wet?

¹² Nan ekei wasa, ohl oh lih kin wia kapwopwoud en tiahk. Met sohte wehwehkiong meh riemen en mihmihpenete, oh e pil sohte wehwehki me meh riemen me ohng wehi pokon, ira wiahlahr ehu pwopwoud mendahkihte ohng palien kosonned ira sohte wia ehu pwopwoud.d Kitail koaskoasoia kapwopwoud ehu me wiawi nin duwen tiahk en ara keinek de wasa. Met pidada ohl emen en kihda wen pweipwei ehu mwohn eh pahn pwoudikihda lih emen, oh ni ahl me ara pwopwoud pwungiong palien kosonned oh kosonndi en Paipel. Ohng palien koperment, kapwopwoud wet wiawi ni ahl me pwung, pahrek ong palien kosonned, oh manaman. Mwuri, palien kosonned kakehr kilelehdi me ira kapwopwoudlahr oh ira kakehr ale neira kisinlikou en kamanaman. Kileldi wet kak wia perepe ehu ohng pwopwoudo de ohng lih pwopwoudo ma ohlo mehla mwuhr oh e pil wia perepe ehu ohng neira seri. Mwomwohdiso pahn kangoange irail akan me wia soangen kapwopwoud wet en kin mwadang wiahda neirail kisinlikou en kapwopwoud. E kesempwal en ese me ohng palien Kosonned en Moses, e wia anahn ehu kapwopwoud kan oh ipwidi en seri kan en kin kileldi.—Madiu 1:1-16.

13. Mwurin kapwopwoud en tiahk kin wiawi, ni ahl dah me padahk en kapwopwoudo konehng en wiawi?

¹³ Ohl oh lih me ni pwung wiahier kapwopwoud en tiahk kin wiahlahr ohl pwopwoud oh lih pwopwoud ni ahnsou me kapwopwoudo kin wiawi. Nin duwen me kitail kasalehdahier powe, Kristian akan me kin wia soangen kapwopwoud wet ele pahn men padahk en kapwopwoud oh ara inou en wiawi nan Kingdom Hall. Ma met me wiawi, eri me wia padahko anahne pakairkiong irail me pwaredo ni kapwopwoudo me ira wiahier pwopwoud ehu nin duwen me pahrekiong kosonned en Sihsar. Padahk ehute me pahn wiawi. Kapwopwoud ehute, ni ahl wet kapwopwoud en tiahk, oh padahk en Paipel ehute. En wiahla soangen koasoandi riau wet nan erein ahnsou mwotomwot kis de rahn ehute, kin wahdo wahu ohng kapwopwoud en Kristian me kin wiawi nan arail wasa.

14. Dahme Kristian men kak wia ma kapwopwoud en kosonned oh pil kapwopwoud en tiahk kak wiawi nan eh wasa?

¹⁴ Nan ekei sahpw akan me kapwopwoud en tiahk kin wiawi, kapwopwoud en palien kosonned pil kin wiawi. Kapwopwoud en palien kosonned kin wiawi mwohn emen me palien koperment pilada en wia kapwopwoud, oh nan soangen kapwopwoud wet, meh riemeno kak wiahla ara inou en kapwopwoud oh iangahki kileldi en adara nin duwen pwopwoud ehu. Ekei ohl oh lih Kristian kan kin pwungki wia soangen kapwopwoud en palien kosonned sang wia kapwopwoud en tiahk. Sohte anahnepen kapatapene oh wia soangen kapwopwoud riau wet ahnsou kis, en pilada oh wiahte ehu koasoandi en kapwopwoud pwukat itar oh pwungiong palien kosonned. Dahme parakrap 9 oh 10 kasalehda me pid duwen padahk en kapwopwoud pil doadoahk nan soangen irair wet. Ih me keieu kesempwal iei me ira en kapwopwoudla ni ahl ehu me pwung oh wahu mwohn Koht oh aramas.—Luk 20:25; 1 Piter 2:13, 14.

Kolokol Wahu en Kapwopwoud

15, 16. Iaduwen wahu eh wia irair kesempwal ehu ni ahnsou en kapwopwoud?

¹⁵ Ni ahnsou me kahpwal pwarada nan en nanmwarki en Persia eh pwopwoud, sounpapah men me adaneki Memukan kihda kaweid mwahu—‘lih koaros pahn waunekihla ar pwoud kan.’ (Ester 1:20) Nan pwopwoud en Kristian kan, e sohte anahne nanmwarki kan en koasoanehdi soangen koasoandi wet; lih pwopwoud kan kin men wauneki ahr pwoud kan. Pil duwehte, ohl pwopwoud Kristian kan kin wauneki oh kin kapinga ahr pwoud kan. (Lepin Padahk 31:11, 30; 1 Piter 3:7) Kitail sohte anahne awih lao mwurin sounpar tohto kei a kitail nek kasalehda wahu nan atail pwopwoud. Kitail anahne kasalehda wahu tepisang rahn me kitail kapwopwoudla.

¹⁶ Ohlo oh liho—ohl pwopwoudo oh lih pwopwoudo— kaidehn ihte ira me anahne kasalehda wahu ni rahn en kapwopwoud. Ma Kristian elder men pahn wia padahk en kapwopwoud, padahko anahne pil wiawi ni wahu. Padahko anahne wiawi ohng meh riemen me kapwopwoudo. Pwehn kasalehda wahu ohng ira, me padahko sohte pahn wia padahk kemenkouruhr de ni mwomwen soai. E sohte pahn koasoiahda soahng kan me pid ira me pahn kanamenekihala ira iangahki irail akan me rongorong padahk. Ni pali teio, e anahne wia padahk ni kadek oh wia kangoang, oh wia padahk me pid Sounkapikadahn pwopwoud oh Sapwellime kaweid mwahu kan. Ehi, ahn eldero padahk me kin wiawi ni wahu pahn wahdo kaping oh wahu ohng Siohwa Koht.

17. Dahme kahrehda mie iren palien kosonned kan me pid kapwopwoud kan en Kristian?

¹⁷ Ke mwein ele kilang me artikel wet kin kasalehda duwen oaritik tohto me pid duwen kapwopwoud me pwungiong palien kosonned. Ekei irair de koasoandi kan ele sohte kin dokedoke nan ahmw wasa. Ahpw kitail koaros anahne pohnese duwen kesempwalpen en Sounkadehdehn Siohwa kan koasoandi en kapwopwoud en kin kasalehda wauneki kosonned en atail wasa, anahn akan en Sihsar. (Luk 20:25) Pohl kangoange kitail: “Eri, kumwail kihong irail amwail daksis kan; kumwail pwainohng irail amwail daksis en moahng oh daksis en amwail dipwisou kan; oh kumwail wauneki irail koaros.” (Rom 13:7) Ehi, tepisang ni rahn en kapwopwoud, e konehng Kristian kan en kasalehda wahu ohng sapwellimen Koht kosonndi kan ohng kitail nan ahnsou pwukat.

18. Ia ehu koasoandi me pid duwen kapwopwoud me kitail anahne tehkada, oh iawasa kitail kak diar sawas kan de ire kan me pid duwen koasoandi wet?

¹⁸ Nan kapwopwoud tohto en Kristian kan, kin mie kamadipw kan—kamadipw en kapwopwoud de kamweng. Taman me Sises pilada en iang towehda ehu soangen kamadipw wet. Ma soangen kamadipw wet kin wiawi, iaduwen kaweid en Paipel kin kihda sawas ohng kitail pwe kamadipwo en kak kasalehda wahu ohng Siohwa oh adamwahu ohng meh riemen me kapwopwoudo iangahki mwomwohdiso en Kristian? Artikel en mwuhr pahn pid ire wet.

[Nting tikitik me mi pahs]

Ke Tamataman?

• Dahme kahrehda kitail anahne nsenohki irair akan en palien kosonned oh pali ngehn me pid duwen kapwopwoud kan?

• Ma Kristian riemen pilada ira en kapwopwoud ni mwoalen kapwung, dahme ira ele pahn pilada en wia mwurin mwo?

• Dahme kahrehda padahk en kapwpwoud kan kin wiawi nan Kingdom Hall?

[Kawehwehpen kilel kan nan ehu ehu pali 24]

Ni kapwopwoud en mehn Israel en mahs, ohl pwopwoudo kin wahdo lih pwopwoudo ni pein imweo de imwen semeo

[Kawehwehpen kilel kan nan ehu ehu pali 25]

Mwurin kapwopwoud en tiahk, Kristian kan ele pahn men padahk en kapwopwoud en wiawi nan Kingdom Hall

Kasalehda Pwoson Ki Elen Ahmw Mour

“Ma pwosonte me mie, ahpw sohte iangahki wiewia, eri, met wehwehki me pwosono pwoson mehla ehu.”—SEIMS 2:17.

1. Dahme kahrehda Kristian kan en mahs kin tehk mwahu duwen ahr pwoson oh ahr doadoahk kan?

NIN duwen pwihn ehu, Kristian kan en mahs kin kasalehda ahr pwoson ki elen ahr mour. Tohnpadahk Seims kin kangoangehki Kristian akan koaros: “Kumwail kapwaiada mahsen en Koht, pwe ma kumwail pahn rongorongete, kumwail pahn pitih pein kumwail.” E pil kapatahiong: “Pwe nin duwen paliwar ehu me sohte ngeni eh uhdahn melahr, ih pil duwen pwoson, ma sohte wiewia iang, pwoson mehla ehu.” (Seims 1:22; 2:26) Mpen sounpar 35 mwurin eh ntingihdi met, Kristian tohto kei kin pousehla oh kasalehda ahr pwoson ki doadoahk konehng kan. Ahpw e kansensuwed pwe ekei sohte kin wia met. Sises kin kapinga mwomwohdiso en Smirna; ahpw ohng pali laud en irail akan me iang mwomwohdiso en Sardis, e mahsanih: “I ese omw wiewia kan; I ese me ke iang wadohng aramas mour; eri soh, pwe ke melahr!”—Kaudiahl 2:8-11; 3:1.

2. Dahme Kristian kan anahne pein idek rehrail me pid duwen ahr pwoson?

² Pid duwehte, Sises kin kangoange irail akan me mih nan Sardis—oh irail akan me mwuhr pahn wadek sapwellime mahsen kan—en kasalehda arail limpoak ohng padahk mehlel en Kristian oh en pepehd ni pali ngehn. (Kaudiahl 3:2, 3) Emen emen kitail kak pein idek reh: ‘Iaduwen ahi wiewia kan? Iaduwen, ahi wiewia kan koaros kin kasalehda ni sansal me I kin wia wen ahi kak koaros pwehn kasalehda duwen ahi pwoson sang ni ahi wiewia kan, pil nan irair akan me sohte pid doadoahk en kalohk de mihding en mwomwohdiso?’ (Luk 16:10) Kitail kak tehk duwen soangen irair tohto kan me kitail kak kasalehda duwen met, ahpw kitail pahn tehkpenehte duwen ehu irair, irair en patpene kan, iangahki soahng me kin wiawi mwurin kapwopwoud en Kristian kan.

Soangen Patpene kan me Tikitik

3. Ia kaweid en Paipel me pid duwen patpene kan me kin wiawi?

³ Pali laud en kitail kin perenki luhklang ni soangen patpene kaperen kan en Kristian kan. Siohwa wia “Koht peren men [NW]” me kin kupwurki sapwellime ladu kan en kin peren. (1 Timoty 1:11) E mahseniong Solomon en kapatahiong met nan Paipel: “Eri, I dehdehkiher me aramas emen uhdahn pahn kapakaparan pein ih, pwehki ihte kansenamwahu en eh mour iei en mwengemwenge oh niminim oh kapakaparan pein ih. E pahn kak en wiewia met nindoken eh pahn wie doadoahk nan eh mour.” (Eklesiasdes 3:1, 4, 13; 8:15) Soangen pereperen wet kak wiawi ni ahnsou me peneinei ehu kin kohpene pwehn mwengepene de pil ni kisin patpene tikitik kan me tohn kaudok mehlel kan kin ehukihpene.—Sohp 1:4, 5, 18; Luk 10:38-42; 14:12-14.

4. Dahme aramas me pahn koasoanehdi patpene ehu anahne nsenohki?

⁴ Ma kowe me pahn koasoanehdi de pwukoahki soangen patpene wet, ke anahne medemedewe duwen koasoandi kan me ke pahn wia, mehnda ma ke pahn lukehte irail me malaulau kei nan pwoson ohng kamweng ehu de en mwemweit oh koasoakoasoipene. (Rom 12:13) Ke pahn ele men tehk pwehn “wiahda mehkoaros nin duwen me konehng oh koasoandi pwung” oh kin wiawi ni kaweid en “erpit me kin sang powe.” (1 Korint 14:40; Seims 3:17) Wahnpoaron Pohl ntingihdi: “Mehkoaros me kumwail kin wia, sohte lipilipil, de mehkot me kumwail kin tungoale de nim, kumwail wia ong ni kalinganpen Koht. Nan amwail mour kumwail dehr wia mehkot me kak wiahla kahrepen dihp.” (1 Korint 10:31, 32) Ia ekei soangen irair akan me kitail anahne tehk kanaiehng? Ni ahmw pahn medemedewe mwowe soangen irair pwukat, e pahn sewese pwe ahmw oh en irail ako me ke lukehdo amwail wiewia kan en kin kasalehda amwail pwoson.—Rom 12:2.

Ia Pahn Mwomwen Patpeneo?

5. Dahme kahrehda aramas me wia koasoandi en patpene ehu anahne medemedewe kanaiehng ma iei e pahn mie sakau en wai oh keseng ni patpeneo?

⁵ Tohto irail kan me kin koasoanehdi patpene kan kin anahne medemedewe ma irail en kihda sakau en wai de soh. E sohte anahne en sakau me wia mehn kaperenpen patpeneo. Tamataman me Sises kihda mwenge ohng irail me kohdo reh ko—e kadirehla pilawa oh mwahmw. Ireo sohte koasoia me e kihda wain, mendahkihte ah kak wia met. (Madiu 14:14-21) Ma ke pilada ke en kihda sakau ni patpene me ke koasoanehdi, eri e mwahu ke en toupahrek ni wen sakau me ke kihda, oh ke anahne en tehkada mwahu pwe en mie soahng teikan likin sakau ohng irail me sohte men nim sakau. (1 Timoty 3:2, 3, 8; 5:23; 1 Piter 4:3) Dehr wia pwe irail akan me sohte men nim sakau en pehm me irail anahne iang nim mehkot me pahn kahrehiong irail en “duwehte mehmen me sineik kehpenehr.” (Lepin Padahk 23:29-32) Iaduwen keseng oh koul kan? Ma pahn mie koul oh keseng me pahn wiawi, e pahn konehng ke en tehkada mwahu soangen mwomwen lokaia oh kumwukumw en koul kan me pahn kohda. (Kolose 3:8; Seims 1:21) Kristian tohto kin kilang me e kin inenen mwahu ma irail kin kesengki de koulkipene Koul en Wehio. (Episos 5:19, 20) Oh e pahn mwahu ke en tehk wen laud en ngilen koul pwe en dehr kerempwa en irail me lukodo kan arail koaskoasoipene oh pil iangahki onepek en mehn mpomw kan.—Madiu 7:12.

6. Iaduwen ih me kin koasoanehdi patpene ehu kak kasalehda me ah pwoson wia pwoson memour ni koaskoasoipene oh mwekid teikan en patpeneo?

⁶ Ni patpene ehu, ele Kristian kan pahn men koasoia soangsoangen ire kan, wadek ekei mehn wadawad kan ni ngihl laud, de pil ehukihpene soangen ekspiriens kan. Ma ekei koasoi kan sohte kin pahrekiong irair akan en Kristian, eri me apwalih de pwukoahki patpeneo anahne ni elen loalokong oh kamantik kapwungala ireo. E anahne en tetehk mwahu pwe aramas emen en dehr kelehpw koasoakoasoi oh kahrehda meteikan sohte kak iang koasoi. Ma e tehk me iei met me wiawi, aramaso anahne ni elen loalokong oh kamantik kihda ekei ire kan de luke me pwulopwul kan en iang koasoi. Met pahn kahrehda irail koaros me pwulopwul oh mah en perenki soangen patpene pwukat. Ma ke kin wia met, eri ni elen loalokong oh kamantik, ke pahn kasalehda ahmw ‘kadekohng aramas koaros’ me iang towehda patpeneo. (Pilipai 4:5) Irail pahn pehm me ahmw pwoson wia pwoson memour ehu, me kin kamwakid elen ahmw mour koaros.

Kapwopwoud oh Kamadipw en Kapwopwoud kan

7. Dahme kahrehda e kin wia doadoahk laud ehu en wia pilahn me pid koasoandi kan en kapwopwoud kan?

⁷ Ehu ahnsou me kin wia ahnsou kaperen ehu ohng Kristian kan iei ahnsou en kapwopwoud. Sapwellimen Koht ladu kan en mahs, iangahki Sises oh nah tohnpadahk ko, kin nsenki en iang towehda koasoandi kaperen pwukat, iangahki soangen kamadipw kan me kin wiawi nan soangen ahnsou pwukat. (Senesis 29:21, 22; Sohn 2:1, 2) Ahpw me keren, mie soangen irair kan me wiawi me kin kasalehda me irail akan me kin wia pilahn me pid koasoandi kan en kapwopwoud kan kin anahne doadoahk laud ma irail men koasoandi kan en kin soandi mwahu oh kin kasalehda irair en Kristian me kin toupahrek. Ahpw, mepwukat kin wia ahnsou mwahu ohng Kristian kan en kasalehda arail pwoson.

8, 9. Iaduwen mwekid kan me kin wiawi ni kapwopwoud tohto kin kasalehda dahme kitail kin wadek nan 1 Sohn 2:16, 17?

⁸ Aramas tohto me sohte kin ese oh sohte katapanki mouren sapwellimen Koht kosonned akan kin kilangwohng ahnsoun kapwopwoud me e wia ahnsou ehu en wia soangen mwekid kan me nohn daulihla, de ahnsou ehu me soangen mwekid kan me kin nohn daulihla kin mweimweida en wiawi. Nan ehu makasihn en Iurop, emen lih pwopwoud me ahpwtehn kapwopwoudla koasoiahda duwen ah kapwopwoud oh nda me e duwehte kapar en soupeidi ehu, pil mie pwihn en keseng ehu me pil kesekeseng nan kapar en kapwopwoudo. E koasoia met me pid duwen kamadipw en kapwopwoudo: Mwenge kan me kohda ni kapwopwoudo inenen iou oh keseng kan me wiawi inenen kaselel; koasoandi en kapwopwoudo inenen kaselel. Me pahrekiong dahme I mwahuki en wiawi, I wia lih nanmwarki men rahno.

⁹ Mendahki tiahk en ehu ehu wasa kin wekpeseng, mwekid pwuko kin kasalehda dahme wahnpoaron Sohn ntingihdi: “Pwe mepwukat koaros kisehn sampah: dipen ineng en uduk, oh mehkan me aramas kin kilang oh ahnehda, oh mehkoaros me mi nin sampah me aramas kin pohnmwahsohkihda—mepwukat koaros sohte kohsang rehn Sahm, re kohsang nin sampah.” Ke kak medewehiong me mah ni pali ngehn riemen me ira pahn men wia kapwopwoud en “soupeidi” ehu oh wia kamadipw me inenen laud oh kaselel pahrekiong kamadipw me kin wiawi nan soai kan? Ni pali teio, ira pahn medewe ire me koasoia duwen “me kin kapwaiada kupwur en Koht pahn momour kohkohlahte.”—1 Sohn 2:16, 17.

10. (a) Pwe kapwopwoud ehu en kak wiawi ni elen toupahrek, dahme kahrehda pilahn anahne wiawi? (b) Ni ahl dah me koasoandi kan anahne wiawi me pid duwen irail me lukodo kan?

¹⁰ Irail Kristian kan me men pwopwoud en dehr kasik koasoandi kan en wiawi ni irair ehu me nohn daulihala oh irail pil anahne toupahrek, oh Paipel kak sewese irail. Mendahki rahn en kapwopwoud wia ahnsou kesempwal ehu, irail ese me e wia tepidahn ahnsou ohng Kristian riemeno ira en mour nin duwen pwopwoud ehu oh ira ahneki koapwoaroapwoar en mour kohkohlahte. Ira sohte anahne wia lapalahn kamadipw en kapwopwoud. Ma ira men wiahda kamadipw ehu, ira anahne kapata wen pweinen kamadipwo oh pid medewe duwen soangen kamadipw dah me ira pahn wia. (Luk 14:28) Ni ara pahn mihpene ni mour en Kristian, ohl pwopwoudo anahne wia ah pwukoahn kaun ni irair me pahrekiong iren Paipel. (1 Korint 11:3; Episos 5:22, 23) Eri ohlo me pwukoahki koasoandi en kamadipw en kapwopwoudo. Ehi, e anahne ni elen limpoak tuhkihong lih me pahn wiahla ah pwoudo duwen ihs me ira men de kak lukehdo ni kamadipw en ara kapwopwoudo. Ele e pahn apwal en luke kompoakepahra kan koaros oh ara peneinei koaros; kahrehda, ira anahne wiahda koasoandi me pahn konehng. Ira anahne likih me riera Kristian akan me ira sohte pahn kak luke pahn wehwehki duwen met oh sohte pahn nsensuwedkihla ma luhk sohte kowohng irail.—Eklesiasdes 7:9.

“Kaunen Kamadipwo”

11. Soangen pwukoa dah me “kaunen kamadipwo” kin pwukoahki nan kapwopwoud ehu?

¹¹ Ma meh riemen pilada ira en kawauwih ara kapwopwoudo, dahme ira kak wia pwe koasoandio en wiawi ni elen wahu? Nan erein sounpar tohto, Sounkadehdehn Siohwa kan kin pohnese duwen eh wia elen loalokong en wia soangen koasoandi me wiawi nan Kana me Sises iang towehda. Mie “kaunen kamadipwo,” me ni sansal wia emen me koahiek ni pwoson. (Sohn 2:9, 10) Pil duwehte, ohl me pahn pwopwoud loalokong men pahn pilada emen brother Kristian me mah ni pali ngehn en wia pwukoah kesempwal wet. Ni eh pahn diarada soangen koasoandi kan me ohl me pahn pwopwoudo mwahuki en wiawi nan eh kapwopwoudo, kaunen kamadipwo anahne kapwaiada mengihtik koaros en arail doadoahk me pahn wiawi mwowe oh mwurin kamadipwo.

12. Dahme ohl me pahn kapwopwoudo anahne tehkada mwahu me pid duwen kohdahn sakau?

¹² Me pahrekiong dahme kohda nan parakrap 5, ekei kin pilada irail en dehr kihda sakau en wai ni arail kamadipw en kapwopwoud pwe ekei de nim daulihala oh kihsang kaperen oh pweidahn kamadipwo. (Rom 13:13; 1 Korint 5:11) Ahpw ma sakau pahn kohda, eri ohl me pahn kapwopwoudo anahne tehkada pwe wen me kohda en mih ni we me konehng. Mie wain me kohda ni kapwopwoud me Sises iang towehda nan Kana, oh e ketikihda wain me kaselel. Kaun en kamadipw koasoia: “Aramas koaros kin kihda mahs wain mwahu; a mwuhr, ni tohn kamadipwo ar kin sakaulahr, re ahpw kin kihda wain sohte nohn mwahu. A komwi nekinekidte wain mwahu lao lel ahnsou wet.” (Sohn 2:10) Sises sohte kin kangoange tiahk en kamamsakau, pwe e kin kilangwohng soahng wet nin duwen tiahk me sapwung. (Luk 12:45, 46) Ni kaunen kamadipwo eh kasalehda ah pwuriamweikihla duwen kaselel en wain me kohda, e kasalehda ni sansal me e kin kilang ekei aramas ahr kin sakaula ni kamadipw en kapwopwoud kan me re towehda. (Wiewia 2:15; 1 Deselonika 5:7) Kahrehda, Ohl me pahn kapwopwoudo oh kaun en kamadipwo anahne tehkada mwahu pwe koaros me lukodo ko en idawehn kaweid sansal wet: “Kumwail dehr kin sakaukihla douluhl wain, pwe e pahn kaweikumwailla.”—Episos 5:18; Lepin Padahk 20:1; Oseia 4:11.

13. Dahme meh riemen me pahn kapwopwoud anahne medemedewe ma ira pahn koasoanehdi keseng en wiawi ni kamadipw en ara kapwopwoud, oh pwekida?

¹³ Met pil pahrekiong kamadipw de patpene teikan, ma keseng pahn wiawi, eri petehkpe anahne en pil wiawi pwe wen ngilen keseng en wiawi ni we ehu me e pahn mengeiong aramas akan en kak koasokoasoipene ni sohte mehn kerempwa. Emen elder Kristian koasoia: “Ni eh kin soutikpeneier, oh aramas akan tepidahr koasoakoasoi oh kahkahlek, ekei pak ngilen kesengo kin ngihl laudla. Ngilen keseng ngihl tikitik kin ngihl laudla oh kerempwahla en aramas akan ahr koasoakoasoi. Kamadipw en kapwopwoud kin wia ahnsou mwahu ehu ohng aramas akan en kin patpene ni meleilei. Ia wen eh pahn kansensuwed ma ngilen keseng kin nohn laud oh kihsang kaperen en ahnsou mwahu wet!” Nan soangen ahnsou wet, ohl me pahn kapwopwoudo oh kaun en kamadipwo anahne pwukoahki koasoanehdi soangen koul oh wen ngilen keseng me pahn kohda oh dehr kihong sounwia keseng kan de ekei tohrohr en pwukoahki koasoanehdi met. Pohl ntingihdi: “Eri, soahng koaros me kumwail pahn kin wia de nda, en wiawi ni mwaren Kaun Sises.” (Kolose 3:17) Ni ahnsou me aramas lukodo kan kin pwurasang ni kamadipw en kapwopwoud ehu, iaduwen, irail pahn kak tamataman me ngilen keseng me kohda kin wiawi ni ahl me kasalehda me ira me kapwopwoud kin wia mehkoaros ni mwaren Sises? Iei met me konehng.

14. Dahme Kristian kan anahne tamataman me pid duwen kapwopwoud ehu?

¹⁴ Ehi, aramas akan kin tamataman kapwopwoud me kin soandi mwahu. Adam oh Edyta me pwopwoudkier erein sounpar 30 koasoia met duwen ehu kapwopwoud: “Ke kak uhdahn pehm me met wia kapwopwoud en Kristian ehu. Mie koul en kapinga Siohwa kan me kohda oh pil mie kamweit kaselel teikan me pil kohda. Ahpw kaidehn kahlek oh koul me keieu kesempwal. Kapwopwoudo inenen kaperen oh wia mehn kangoang, oh soahng koaros wiawi ni ahl me pahrekiong kosonned en Paipel.” E sansal me ni soangen ahl tohto, ohl oh lih me kapwopwoud kak kasalehda ara pwoson ki ara wiewia mwahu kan.

Kisakis kan en Kapwopwoud

15. Soangen kaweid en Paipel dah me kak kadoadoahk ni irair me pid duwen kisakis kan en kapwopwoud?

¹⁵ Nan sahpw tohto, e kin wia tiahk ehu peneinei men oh kompoakepah men en kin wahdo ehu kisakis ohng me kapwopwoud. Ma ke men wia met, dahme ke anahne en medemedewe? Eri, tamanda dahme wahnpoaron Sohn koasoiahki duwen “mehkoaros me mi nin sampah me aramas kin pohnmwahsohkihda.” E sohte koasoakoasoia duwen Kristian akan me kin kasalehda ahr pwoson ki ahr wiewia kan, ahpw e koasoakoasoia duwen ‘sampah wet oh mehkoaros nin sampah me aramas kin inengieng [me] kin sosohrala.’ (1 Sohn 2:16, 17) Me pid duwen en Sohn mahsen sarawi wasaht, iaduwen, ira me kapwopwoudo anahne kasalehiong koaros eden irail akan me kihda kisakis? Kristian akan sang Masedonia oh Akaia kihda ahr sawas ohng riarail kan nan Serusalem, ahpw sohte wasakis kasalehda me ederail kan pakairda. (Rom 15:26) Kristian tohto me kin kihda kisakis en kapwopwoud kin men ederail en dehr sansalda pwe irail sohte kin men suwei. Sises kihda kaweid me pid duwen met nan Madiu 6:1-4.

16. Dahme ira me kapwopwoud kak wia pwe ira en dehr kamedekihala pepehm en meteikan me pid kisakis en kapwopwoud?

¹⁶ En kasalehda duwen irail akan me kin kihda kisakis kan kak “kamwakara” irail ni arail pahn medemedewe duwen ahn ihs kisakis me mwahusang oh pweilaud sang ahn meteikan. Ihme kahrehda irail Kristian loalokong kan sohte kin pakairki eden irail akan me kihda kisakis kan. En pakairki eden irail akan me kihda kisakis kan pahn kanamenekihala irail akan me sohte kak wahdo kisakis. (Kalesia 5:26; 6:10) E sohte sapwung ohl oh lih me kapwopwoudo en ese eden irail akan me kihda kisakis. Ira kak ese eden irail akan me kihda kisakis sang ni card me kin iangodo kisakis kan ahpw kaidehn ni eden aramas kan ahr kin pakairda. Ni atail kin pwainda, kihla, oh alehdi kisakis en kapwopwoud kan, ahnsou pwukat kin wia ahnsou mwahu en kasalehda atail pwoson ki atail wiewia kan.

17. Soangen mehn akadei dah me Kristian akan anahne ahneki me pid duwen ahr pwoson oh wiewia kan?

¹⁷ En kasalehda atail pwoson pidada laudsang en kin mour mwakelekel, iang towehda mihding en Kristian akan, oh iang kisehn doadoahk en kalohk. Kitail koaros en ahneki pwoson mour ehu me kin kamwakid mehkoaros me kitail kin wia. Ehi kitail kak kasalehda pwoson me “dei mehlel,” nan pil soangen irair en mour me kitail koasoia powe.—Kaudiahl 3:2.

18. Iaduwen atail kak kapwaiada lepin mahsen kan en Sohn 13:17 ni ahnsou me kapwopwoud de kamadipw teikan en Kristian kin wiawi?

¹⁸ Mwurin Sises kasalehda mehn kahlemeng mwahu ohng sapwellime wahnpoaron ko ni eh wia mwekid en aktikitik oh widen nehrail kan, e mahsanih: “Met kumwail eseier padahk mehlel wet; eri, ia uwen amwail peren ma kumwail pahn kapwaiada.” (Sohn 13:4-17) Nan atail wasa, ele kitail sohte anahne de e sohte wia tiahk ehu kitail en widen nehn emen, me duwehte emen me mwemweitdo ni imwatail. Ahpw nin duwen me kitail koasoia nan artikel wet, mie soangen ahl akan nan mour me kitail kak kasalehda atail pwoson ki wiewia en limpoak oh nsenoh, me iangahki ahnsou kan me kitail kin patpene oh ni kapwopwoud kan en Kristian. Kitail kak kasalehda met edetehn kitail me kapwopwoud, de wia me lukodo kei ohng kapwopwoud ehu de ohng kamadipw kaperen en Kristian ehu, kitail men kasalehda atail pwoson ki atail wiewia kan.

Iaduwen Ke Pahn Sapeng?

Iaduwen ke kak kasalehda ahmw pwoson

• ni ahnsou me ke kin koasoanehdi ehu patpene de kamadipw?

• ni ahnsou me ke kin koasoanehdi kamadipw en kapwopwoud ehu?

• ni ahnsou me ke kin kihda de alehdi kisakis en kapwopwoud kan?

[Kawehwehpen kilel kan nan ehu ehu pali 29]

Mehnda ma ke lukehdote me malaulau kei, ke en kin mwekidki “erpit sang powe”