Soangen Kapwopwoud Me Pwung Mwohn Koht Oh Aramas
“Kapwopwoud ehu ahpw wiawi nan kahnimw Kena . . . Sises oh sapwellime tohnpadahko ko pil lukohng ni kapwopwoudo.”—SOHN 2:1, 2.
1. Dahme ire me pid duwen Sises nan Kena kin kasalehda?
SISES, ineo, oh ekei sapwellime tohnpadahk ko kin wehwehki duwen kapwopwoud me wiawi ni pwung e kin inenen kaperen ohng sapwellimen Koht aramas akan. Krais pil kahrehda ehu kapwopwoud eh inen sikila ni eh wiahda keieu en manaman me kileldi nan Paipel, me kahrehda rahno eh inenen kaperen mehlel. (Sohn 2:1-11) Ele ke pil iangehr towehda kapwopwoud kan en irail Kristian kan me men papah Siohwa nin duwen aramas peren kei me kapwopwoudla. De mwein pein kowe de pil emen kompoakepahmw en ahneki soangen kapwopwoud me pweida mwahu. Dahme kak wiawi pwehn kak ahneki soangen kapwopwoud wet me pweida mwahu?
2. Soangen ire dah kan me kin dierek nan Paipel me pid duwen kapwopwoud?
2 Kristian kan kin diarada me kaweid kan me kin dierek nan sapwellimen Koht Mahsen sarawi kan kin inenen kihda sawas laud ohng ohl emen oh lih emen me pilahn en pwopwoud. (2 Timoty 3:16, 17) Ehi mehlel, Paipel sohte kin kasalehda ni oaritik duwen iaduwen kapwopwoud ehu en Kristian en kin wiawi. Met wehwe pwehki tiahk oh palien kosonned en ehu ehu wasa oh mwehi kin wekpeseng. Karasepe ehu, ni mwein Israel en mahs, sohte kasarawi en kapwopwoud kin wiawi. Ni rahn en kapwopwoud, ohl pwopwoudo kin wahdo eh pwoud lih ni imwen eh pahpa. (Senesis 24:67; Aiseia 61:10; Madiu 1:24) Kahk wet me kin sansal ohng wehi pokon kin wia kasalepen me meh riemeno kapwopwoudla oh sohte wia kasarawi en kapwopwoud me duwehte dahme kin wiawi nan rahn pwukat.
3. Koasoandi dahieu nan Kena me Sises iang kihda eh sawas?
3 Mehn Israel kin pohnese me kahk wet kin wia kasalepen me kapwopwoud ehu wiawi. Mwuri irail kin iang towehda kamadipw, me duwehte me kileledi nan Sohn 2:1. Tohto kawehwe en Paipel teikan me kawehwehdi ire wet nin duwe met: “Kapwopwoud ehu ahpw wiawi nan kahnimw Kena.” Ahpw tepin kawehwe lokaia me doadoahk iei “kamadipw en kapwopwoud.”a (Madiu 22:2-10; 25:10; Luk 14:8) Ireo kasalehda me Sises iang lukohng oh pil iang sawas nan kamadipw ehu me pidada kapwopwoud ehu en mehn Suhs. Ahpw ire me kesempwal wasaht iei me koasoandi en kapwopwoud en mahs weksang koasoandi en kapwopwoud en nan ahnsouwet.
4. Soangen koasoandi en kapwopwoud dah kan me ekei Kristian kan kin pilada en wia, oh pwekida?
4 Nan sahpw tohto rahnpwukat, Kristian kan me kin men pwopwoud kin anahne lel soangen irair kei me pelien kosonned en arail wasa kin wiahda. Ni arail kin kapwaiada me, irail kakehr kapwopwoudla ni soangen irair soh lipilipil kan me pahrekiong kosonned en ahr wasa. E pil kak wia kisin kapwopwoud tikitik kis, me sounkopwung men, mayor men, de emen me wia weliepen sarawi ehu me wehio kin kamanahla, kin wia kasarawi en kapwopwoudo. Ekei kin pilada en wia soangen kapwopwoud wet oh ele lukehte ekei kisehrail akan de kompoakparail Kristian teikan en iang wia sounkadehde kei de en iang towehda irair kesempwal wet. (Seremaia 33:11; Sohn 3:29) Duwehte met, ekei Kristian kan ele mwein pahn pilada irail en dehr wia kamadipw en kapwopwoud me nohn laud me pahn kahrehda doadoahk laud oh me pweilaud. Irail mwein ele pahn pilada en wiahdahte kisin kamweng tikitik kis me ihte kompoakparail me keren kan me pahn lukodo. Sohte lipilipil soangen koasoandi dah me kitail pilada en wia, kitail anahne pohnese me ekei riatail Kristian mah kan mwein ele pahn ahneki soangen irair en madamadau kan me weksang atail.—Rom 14:3, 4.
5. Dahme kahrehda Kristian tohto kin men padahk en wiawi ni ahr kapwopwoud, oh met kin wia kilelepen dah?
5 Pali laud en Kristian kan kin pilada padahk me poahsoankihda Paipel en wiawi ni ahr kapwopwoud.b Irail kin pohnese me Siohwa me wiahda koasoandi en kapwopwoud oh e kin ketikihda nan sapwellime Mahsen, soangen kaweid erpit kan me pid iaduwen ara pwopwoud kak pweida oh wahdo peren. (Senesis 2:22-24; Mark 10:6-9; Episos 5:22-33) Oh pali laud en pwopwoud kan kin men kompoakparail me Kristian akan oh ahr peneinei en towehda ahnsou kaperen wet. Ahpw, ia pahn duwen atail madamadau ohng anahn akan en palien kosonned, elen wiepen kapwopwoud kan, oh tiahk akan en atail wasa? Nan artikel wet, kitail pahn tehkpene iaduwen koasoandi pwukat kin wiawi nan wasa soh lipilipil kan. Ekei koasoandi kan me kin wiawi ele pahn inenen weksang dahme ke ese de me kin wiawi nan ahmw wasa. Mendahki met, ke pahn kak kilang me mie soangen mouren koasoandi kan de irair kan me kin kesempwal ohng sapwellimen Koht ladu kan.
Kapwopwoud me Wahu—Kapwopwoud me Pwung ohng Palien Kosonned
6, 7. Dahme kahrehda kitail en nsenohki iren kosonned kan me pid duwen kapwopwoud, oh iaduwen atail pahn kin kasalehda met?
6 Edetehn Siohwa me wiahda koasoandi en kapwopwoud, koperment en aramas kin ahneki manaman pohn koasoandi en irail akan me pahn kapwopwoud. Met konehng. Sises mahsanih: “Kihong Sihsar me uhdahn en Sihsar, a ong Koht me uhdahn sapwellimen Koht.” (Mark 12:17) Me pil duwehte met, wahnpoaron Pohl kaweidki: “Aramas koaros uhdahn pahn peikiong pwungen wehi kan; pwe Koht, iei ih me kin ketikihong wehi kan arail pwung, oh ih me pil ketikihongehr pwungen wehi kan nin sampah.”—Rom 13:1; Taitus 3:1.
7 Nan sahpw tohto Sihsar, de irail akan me wia kaun en wasa kan, kin kosonnehdi ihs me kak kapwopwoud. Kahrehda, ni ahnsou me Kristian riemen me kak pwopwoud pilada ira en kapwopwoud, ira anahne idawehn oh kapwaiada kosonned en ara wasa me pid duwen kapwopwoud. Met ele pahn pidada en alehda laisin en kapwopwoud, doadoahngki emen me palien kosonned en ahmw wasa mweidada en kak wia padahk, oh ele en ntingihdi de kilelehdi koasoandi koaros en kapwopwoudo. Ni ahnsou me Sihsar Akustus wiahda kosonned ehu me tohn eh wasao koaros en “ntingdi,” Mery oh Sosep peikiong oh seiloaklahng nan Pedleem pwe ira “en iang ntingdi.”—Luk 2:1-5.
8. Ia wen manaman en koasoandi en kapwopwoud ehu, oh soangen koasoandi en Sounkadehdehn Siohwa kan dah me kin kasalehda duwen wehwe wet?
8 Ni ahnsou me Kristian riemen kin kapwopwoudla ni ahl ehu me pwungiong palien kosonned oh tohn ahmw wasa kin pohnese met, eri patpene wet kin pwung oh manaman mwohn silangin Koht. Kahrehda, Sounkadehdehn Siohwa kan sohte kin pwurehng wia ahr kapwopwoud sounpar kei mwuri, de pil pwurehng kawiliakapwihala ara inou en kapwopwoud, duwehte dahme ekei pwopwoud kan kin wia ni arail kataman en kapwopwoud kerieisek limau de kelimeisek. (Madiu 5:37) (Ekei sarawi kan sohte kin pohnese kapwopwoud kan me kaidehn padre de sounpadahk me wia mendahkihte kapwopwoudo kin wiawi ni ahl me pahrekiong kosonned en arail wasa.) Nan sahpw tohto, koperment kin mweidada emen sounpapah en Sounkadehdehn Siohwa kan en kasarawihala kapwopwoudo. Ma iei, eri e pahn wia met oh iangahki padahk en kapwopwoudo ni Kingdom Hall. Met iei wasahn kaudok mehlel oh wasa me konehng padahk en koasoandi wet en wiawi, me Siohwa Koht ketin koasoanehdi.
9. (a) Me pid koasoandi en kapwopwoud kan me palien kosonned kosonnehdi, dahme Kristian akan me men pwopwoud ele pahn men kosonnehdi en wiawi? (b) Ni ahl dah me elder kan pil kin iang pidada koasoandi en kapwopwoud kan?
9 Nan ekei sahpw akan, palien kosonned kin anahne meh riemen me pahn pwopwoud en kapwopwoud nan ohpis en koperment, me duwehte imwen wehi de mwoalen kopwung, de mwohn emen me wehio pilada en pwukoahki kosonndi en kapwopwoud. Pali laud en ahnsou, Kristian kan kin pilada irail en kapwaiada kahk kan me kileledi nan palien kosonned en ahr wehi oh pil iangahkihte padahk en kapwopwoud nan Kingdom Hall ni rahnohte de pil rahn mwuri. (Irail sohte mwahuki wiahda mehkoaros me palien kosonned kosonnehdi irail en wia oh awiawih rahn tohto kei mwuri ah irail uhd wia padahk en kapwopwoudo me poasoanda sang Paipel, pwe irail anahne kapwopwoudla mwohn Koht oh aramas, iangahki mwomwohdiso en Kristian.) Ma meh riemen men wia koasoandi koaros en ara kapwopwoud ni Kingdom Hall ehu me iangahki koasoandi en palien kosonned oh padahk en kapwopwoud, ira anahne tuhkihong elder kan me kin pwukoahki palien Service Committee en Mwomwohdiso mwowe pwehn ale mweimwei. Sounapwalih pwukat anahne kilang me ma meh riemenet kin wia mehn kahlemeng mwahu nan mwomwohdiso oh pil tehkada mwahu kuloak me kapwopwoud pahn wiawi pwe en dehr kerempwa ahnsou en mihding kan oh pil koasoandi teikan me kin wiawi nan Kingdom Hall. (1 Korint 14:33, 40) Re pahn pil tehk koasoandi kan me meh riemen me pahn kapwopwoudo koasoanehdi en wiawi oh pahn kilang ma mie anahnepen wia pakair kan me pid koasoandi pwuko.
10. Ma palien kosonned kosonnehdi me kapwopwoud mwoalen kapwung anahne wiawi mahs mwowe, iaduwen met kin pidada koasoandi me pid duwen padahk en kapwopwoudo?
10 Elder me wia padahk en kapwopwoudo pahn kin nantihong wia padahko ni elen kadek, kangoang, oh wahu. Ma kapwopwoud en meh riemeno alehier kamanaman sang palien kosonned mwohn ara wia ara kapwopwoud nan Kingdom Hall, eldero anahne kasalehda ni sansal me ohng palien kosonned en Sihsar, ira wialahr ehu pwopwoud. Ma ira saikinte wia inou nanpwungara me pid duwen ara kapwopwoud ni ahnsou me ira wia ara kapwopwoud ni mwoalen kapwung, ira kak wia met ni ahnsou me padahk en ara kapwopwoud wiawi nan Kingdom Hall.c Ma ira wiahier ara inou ko ni ahnsou me ira kapwopwoud nan mwoalen kapwung ahpw ira men pil ehu wia inou pwukat mwohn Siohwa oh mwomwohdiso, ira pahn wia met ni ngoaren koasoi me kasalehda me ara inou wiawiher mwowe, pwehn kasalehda me Koht ketin “kapatapenehr” ira mwowe.—Madiu 19:6; 22:21.
11. Nan ekei wasa, iaduwen ohl emen oh lih emen kin kapwopwoudla, oh iaduwen met pidada padahk en kapwopwoudo?
11 Nan ekei wasa, palien kosonned sohte kin anahne ira me pahn kapwopwoud en wia kasarawi en kapwopwoud, pil sohte anahne wia mwohn emen me palien koperment kamanahla en kak wia kapwopwoud. Kapwopwoudo kin wiawiher ni ahnsou me ira pahn kihlongehr neira doaropwehn kapwopwoud me ira sainialahr ohng aramas me kin kamanahla doaropwehn kapwopwoud. Ni ahnsowo, neira doaropwe en kapwopwoud kin kamanamanlahr. Eri aramas kin kilangwohng rahn me kileledi ni neira doaropwe nin duwen rahn me ira wialahr ohl pwopwoud oh lih pwopwoud. Eri nin duwen me kitail koasoiahier mwowe, meh riemen me wia soangen kapwopwoud wet ele pahn men padahk en kapwopwoud en wiawi nan Kingdom Hall mwurinte met. Brother mah ni pali ngehn me pilipildahr en wia padahk en ara kapwopwoud pahn pakairkiong pokon me iang towehda kapwopwoudo me ira wialahr pwopwoud ehu sang ni ara kapidelongehr neira doaropwehn kapwopwoud. Inou nanpwungen ohl oh lih me pahn kapwopwoudo pahn wiawi nin duwen me kileldi nan parakrap 10 oh footnote. Irail akan me iang towehda kapwopwoudo pahn iang meh riemeno pereperenki dahme wiawi oh pil paiekihda iren kaweid me kohda sang Mahsen en Koht.—Melkahkahn Melkahka kan en Solomon 3:11.
Kapwopwoud kan me Pahrekiong Tiahk oh Palien Kosonned
12. Dahkot kapwopwoud en tiahk, oh kangoang dah me kohwohng irail akan me kin wia soangen kapwopwoud wet?
12 Nan ekei wasa, ohl oh lih kin wia kapwopwoud en tiahk. Met sohte wehwehkiong meh riemen en mihmihpenete, oh e pil sohte wehwehki me meh riemen me ohng wehi pokon, ira wiahlahr ehu pwopwoud mendahkihte ohng palien kosonned ira sohte wia ehu pwopwoud.d Kitail koaskoasoia kapwopwoud ehu me wiawi nin duwen tiahk en ara keinek de wasa. Met pidada ohl emen en kihda wen pweipwei ehu mwohn eh pahn pwoudikihda lih emen, oh ni ahl me ara pwopwoud pwungiong palien kosonned oh kosonndi en Paipel. Ohng palien koperment, kapwopwoud wet wiawi ni ahl me pwung, pahrek ong palien kosonned, oh manaman. Mwuri, palien kosonned kakehr kilelehdi me ira kapwopwoudlahr oh ira kakehr ale neira kisinlikou en kamanaman. Kileldi wet kak wia perepe ehu ohng pwopwoudo de ohng lih pwopwoudo ma ohlo mehla mwuhr oh e pil wia perepe ehu ohng neira seri. Mwomwohdiso pahn kangoange irail akan me wia soangen kapwopwoud wet en kin mwadang wiahda neirail kisinlikou en kapwopwoud. E kesempwal en ese me ohng palien Kosonned en Moses, e wia anahn ehu kapwopwoud kan oh ipwidi en seri kan en kin kileldi.—Madiu 1:1-16.
13. Mwurin kapwopwoud en tiahk kin wiawi, ni ahl dah me padahk en kapwopwoudo konehng en wiawi?
13 Ohl oh lih me ni pwung wiahier kapwopwoud en tiahk kin wiahlahr ohl pwopwoud oh lih pwopwoud ni ahnsou me kapwopwoudo kin wiawi. Nin duwen me kitail kasalehdahier powe, Kristian akan me kin wia soangen kapwopwoud wet ele pahn men padahk en kapwopwoud oh ara inou en wiawi nan Kingdom Hall. Ma met me wiawi, eri me wia padahko anahne pakairkiong irail me pwaredo ni kapwopwoudo me ira wiahier pwopwoud ehu nin duwen me pahrekiong kosonned en Sihsar. Padahk ehute me pahn wiawi. Kapwopwoud ehute, ni ahl wet kapwopwoud en tiahk, oh padahk en Paipel ehute. En wiahla soangen koasoandi riau wet nan erein ahnsou mwotomwot kis de rahn ehute, kin wahdo wahu ohng kapwopwoud en Kristian me kin wiawi nan arail wasa.
14. Dahme Kristian men kak wia ma kapwopwoud en kosonned oh pil kapwopwoud en tiahk kak wiawi nan eh wasa?
14 Nan ekei sahpw akan me kapwopwoud en tiahk kin wiawi, kapwopwoud en palien kosonned pil kin wiawi. Kapwopwoud en palien kosonned kin wiawi mwohn emen me palien koperment pilada en wia kapwopwoud, oh nan soangen kapwopwoud wet, meh riemeno kak wiahla ara inou en kapwopwoud oh iangahki kileldi en adara nin duwen pwopwoud ehu. Ekei ohl oh lih Kristian kan kin pwungki wia soangen kapwopwoud en palien kosonned sang wia kapwopwoud en tiahk. Sohte anahnepen kapatapene oh wia soangen kapwopwoud riau wet ahnsou kis, en pilada oh wiahte ehu koasoandi en kapwopwoud pwukat itar oh pwungiong palien kosonned. Dahme parakrap 9 oh 10 kasalehda me pid duwen padahk en kapwopwoud pil doadoahk nan soangen irair wet. Ih me keieu kesempwal iei me ira en kapwopwoudla ni ahl ehu me pwung oh wahu mwohn Koht oh aramas.—Luk 20:25; 1 Piter 2:13, 14.
Kolokol Wahu en Kapwopwoud
15, 16. Iaduwen wahu eh wia irair kesempwal ehu ni ahnsou en kapwopwoud?
15 Ni ahnsou me kahpwal pwarada nan en nanmwarki en Persia eh pwopwoud, sounpapah men me adaneki Memukan kihda kaweid mwahu—‘lih koaros pahn waunekihla ar pwoud kan.’ (Ester 1:20) Nan pwopwoud en Kristian kan, e sohte anahne nanmwarki kan en koasoanehdi soangen koasoandi wet; lih pwopwoud kan kin men wauneki ahr pwoud kan. Pil duwehte, ohl pwopwoud Kristian kan kin wauneki oh kin kapinga ahr pwoud kan. (Lepin Padahk 31:11, 30; 1 Piter 3:7) Kitail sohte anahne awih lao mwurin sounpar tohto kei a kitail nek kasalehda wahu nan atail pwopwoud. Kitail anahne kasalehda wahu tepisang rahn me kitail kapwopwoudla.
16 Ohlo oh liho—ohl pwopwoudo oh lih pwopwoudo— kaidehn ihte ira me anahne kasalehda wahu ni rahn en kapwopwoud. Ma Kristian elder men pahn wia padahk en kapwopwoud, padahko anahne pil wiawi ni wahu. Padahko anahne wiawi ohng meh riemen me kapwopwoudo. Pwehn kasalehda wahu ohng ira, me padahko sohte pahn wia padahk kemenkouruhr de ni mwomwen soai. E sohte pahn koasoiahda soahng kan me pid ira me pahn kanamenekihala ira iangahki irail akan me rongorong padahk. Ni pali teio, e anahne wia padahk ni kadek oh wia kangoang, oh wia padahk me pid Sounkapikadahn pwopwoud oh Sapwellime kaweid mwahu kan. Ehi, ahn eldero padahk me kin wiawi ni wahu pahn wahdo kaping oh wahu ohng Siohwa Koht.
17. Dahme kahrehda mie iren palien kosonned kan me pid kapwopwoud kan en Kristian?
17 Ke mwein ele kilang me artikel wet kin kasalehda duwen oaritik tohto me pid duwen kapwopwoud me pwungiong palien kosonned. Ekei irair de koasoandi kan ele sohte kin dokedoke nan ahmw wasa. Ahpw kitail koaros anahne pohnese duwen kesempwalpen en Sounkadehdehn Siohwa kan koasoandi en kapwopwoud en kin kasalehda wauneki kosonned en atail wasa, anahn akan en Sihsar. (Luk 20:25) Pohl kangoange kitail: “Eri, kumwail kihong irail amwail daksis kan; kumwail pwainohng irail amwail daksis en moahng oh daksis en amwail dipwisou kan; oh kumwail wauneki irail koaros.” (Rom 13:7) Ehi, tepisang ni rahn en kapwopwoud, e konehng Kristian kan en kasalehda wahu ohng sapwellimen Koht kosonndi kan ohng kitail nan ahnsou pwukat.
18. Ia ehu koasoandi me pid duwen kapwopwoud me kitail anahne tehkada, oh iawasa kitail kak diar sawas kan de ire kan me pid duwen koasoandi wet?
18 Nan kapwopwoud tohto en Kristian kan, kin mie kamadipw kan—kamadipw en kapwopwoud de kamweng. Taman me Sises pilada en iang towehda ehu soangen kamadipw wet. Ma soangen kamadipw wet kin wiawi, iaduwen kaweid en Paipel kin kihda sawas ohng kitail pwe kamadipwo en kak kasalehda wahu ohng Siohwa oh adamwahu ohng meh riemen me kapwopwoudo iangahki mwomwohdiso en Kristian? Artikel en mwuhr pahn pid ire wet.
[Nting tikitik me mi pahs]
a Lepin lokaia wet pil kak kadoadoahk ohng soangen kamadipw teikan me sohte wia kamadipw en kapwopwoud.—Ester 9:22, Septuagint.
b Sounkadehdehn Siohwa kan kin doadoahngki padahk en kapwopwoud ehu me reireiki minit 30 me oaralap koasoia “Kapwopwoud me Wahu Mwohn Silangin Koht.” Padahk wet kin kihda iren Paipel kan me dierek nan pwuhko The Secret of Family Happiness oh nein Sounkadehdehn Siohwa kan pwuhk teikan. Padahko kin wia sawas ehu ohng meh riemeno me pahn kapwopwoud oh pil ohng koaros me iang towehda kapwopwoudo.
c Ma kosonned en sahpwo sohte anahne ehu koasoandi tohrohr, eri, inou pwukat me pahn kawauwih Koht pahn kadoadoahk. Ong ohl me pahn pwopwoudo: “Ngehi [eden ohl me pahn kapwopwoudo] ale kowe [eden lih me pahn kapwopwoudo] en wia ahi pwoud lih me I pwoudikihda, pwehn limpoak ohng oh kesempwaliki nin duwen me pahrekiong kosonned en iren Paipel ohng ohl pwopwoud Kristian kan, erein kita koaros pahn momour pohn sampah ni mour me pahrekiong kosonndi en Koht ohng pwopwoud.” Ohng lih me pahn pwopwoud: “Ngehi [eden lih me pahn kapwopwoudo] ale kowe [eden ohl me pahn kapwopwoudo] en wia ahi pwoud ohl me I pwoudikihda, pwehn limpoak ohng oh kesempwaliki oh wauneki mehlel nin duwen me pahrekiong kosonned en iren Paipel ohng lih pwopwoud Kristian kan, erein kita koaros pahn momour pohn sampah ni mour me pahrekiong kosonndi en Koht ohng pwopwoud.”
d Kahn Iroir en May 1, 1962 ni lokaiahn wai, pali 287, kin kihda kaweid kan me pid duwen meh riemen me, ohng aramas kan, ira wia pwopwoud ehu mendahkihte eh sohte neira kisinlikou en kapwopwoud.
Ke Tamataman?
• Dahme kahrehda kitail anahne nsenohki irair akan en palien kosonned oh pali ngehn me pid duwen kapwopwoud kan?
• Ma Kristian riemen pilada ira en kapwopwoud ni mwoalen kapwung, dahme ira ele pahn pilada en wia mwurin mwo?
• Dahme kahrehda padahk en kapwpwoud kan kin wiawi nan Kingdom Hall?
[Kawehwehpen kilel kan nan ehu ehu pali 24]
Ni kapwopwoud en mehn Israel en mahs, ohl pwopwoudo kin wahdo lih pwopwoudo ni pein imweo de imwen semeo
[Kawehwehpen kilel kan nan ehu ehu pali 25]
Mwurin kapwopwoud en tiahk, Kristian kan ele pahn men padahk en kapwopwoud en wiawi nan Kingdom Hall