“Wehiomwi en Ketido”

Siohwa ketin inoukihda: ‘E pahn sohla mie sengiseng, medek, soumwahu, de mehla. I pahn limwihasang pilen masarail koaros. Soahng suwed koaros me kin wiawi mahso pahn manokonokla.’

Siohwa ketikihdiong Adam oh Ihp nan mwetuwel en Ihden pwehn momour ni meleilei oh nsenamwahu. Ira pahn kaudokiong Samarao nanleng oh kadirehkihla sampah neira seri kan. Adam oh Ihp sapeikiong Siohwa, ahpw kupwureo sohte wekila. Nan pwuhk wet kitail kilangehr me soahng koaros me Siohwa ketin inoukihda kin pweida. Sapwellime Wehio pahn wahdo kapai kaselel tohto nin sampah, duwehte me e ketin inoukihong Eipraam.

Ni ahnsou keren Sehdan, nah ngehn suwed kan, oh aramas suwed koaros pahn sohrala. Koaros me momour pahn kaudokiong Siohwa. Kitail sohte pahn soumwahuda de mehla. Ahpw, kitail pahn pirida rahn koaros kehlail oh nsenamwahu. Sampah wet pahn wiahla paradais ehu. E pahn mie mwenge mwahu ong koaros oh sohte mehkot keper mi ni imwarail kan. Aramas akan pahn kadek oh sohte kin wia tiahk lemei kan. Mahn lawalo kan sohla pahn masak kitail, oh kitail sohla pahn masak irail.

E pahn uhdahn kaperen ni ahnsou me Siohwa pahn ketin kaiasada aramas akan. Kitail pahn kasamwo aramas en mahs ako, me duwehte Eipel, Noha, Eipraam, Sara, Moses, Rud, Ester, oh Depit. Irail pahn iang kitail kaparadaisihala sampah. Ahnsou koaros e pahn mie doadoahk kaperen kan me kitail pahn wia.

Siohwa kupwurki ken iang mi mwo. Ke pahn sukuhlki duwen ih ni soangen ahl akan me ke sohte pahn medewehla ni ahnsou wet. Eri kitail en karanihala Siohwa rahn koaros, met oh kohkohlahte!