Tehk ia duwen Sises ketin kasalehda kesempwalpen mour kapw. E mahsanih: “Mehmen me sohte ipwsapahl, e sohte pahn kak kilang Wehin Koht.” (Sohn 3:3) Lepin lokaiahn Krihk me kadoadoahk wasaht wehwehki, “Ma emen sohte ipwsapahl, e sohte pahn kak kilang Wehin Koht.” Lepin lokaia pwukat “ma emen sohte” oh “sohte pahn kak” kin kasalehda kesempwalpen ipwsapahl. Karasepe: Ma emen nda, “Ma sohte ketipin, sohte pahn mie marain,” met wehwehki ketipin uhdahn anahn ong marain. Duwehte met, Sises mahsanih me emen anahne en ipwsapahl pwe en “kak kilang Wehin Koht.”

Ma kitail pahn wadek kanaiehng sapwellimen Sises mahsen kan, e sansal me Sises sohte ketin padahngki me emenemen kak pein pilada ma e pahn ipwsapahl de soh. Pwekida? Lepin lokaia kan en Krihk me kawehwehdi “ipwsapahl” pil kak kawehwehdi “en ipwidi sang powe.”a Met wehwehki me mour kapw kohsang “powe” me wehwehki “sang nanleng” de “sang rehn Koht.” (Sohn 19:11; Seims 1:17) Ei, Koht me ketin kahrehda mour kapw.—1 Sohn 3:9.