Ni Karakarahk Uhpa Silepen Sihpw Limpoak kan
“Kumwail peikiong amwail sounkaweid akan oh kapwaiada ar kosonned kan.”—IPRU 13:17.
1, 2. Mehnia iren Pwuhk Sarawi me kasalehda Siohwa oh Sises kin wia silepen sihpw limpoak kan?
SIOHWA KOHT oh Sapwellime Ohl Sises Krais kin wia Silepen sihpw limpoak kan. Aiseia wiahda kokohp wet: “KAUN-O, Wasa Lapalahpie, pahn ketido kaunda ni roson lapalahpie, e pahn ketikihdo sapwellime kan me e ketin kapitalahr. E pahn ketin apwalih sapwellime pelin sihpw duwehte silepen sihpw men; e pahn ketikipenen sihmpwul kan, e pahn ketin apwalihekin irail nin lime; oh e pahn ketin kahre inarail kan ni keneinei.”—Aiseia 40:10, 11.
2 Kokohp en onohnda sapahl wet tepin pweida ahnsou me luwen mehn Suhs kan pwurala Suda nan pahr 537 B.C.E. (2 Kronikel 36:22, 23) Met pil pwurehng pweida nan 1919, ahnsou me Sises kapitala luwen me keidi kan sang “Papilon Lapalap” me pil kin duwehte en Sairus kapitala mehn Suhs kan sang Papilon en Mahs. (Kaudiahl 18:2; Aiseia 44:28) E kin wia “limen” Siohwa ong kaunda pwehn ketikihpene sihpw kan oh apwalih irail ni keneinei. Sises pein mahsanih: “Ngehi me silepen sihpw mwahu. Duwen Sahm eh mwahngih ie, oh I ese Sahm, pil duwehte ngehi, I ese nei sihpw kan oh irail pil kin ese ie.”—Sohn 10:14.
3. Iaduwen Siohwa kasalehda e kin nsenohki dahme kin wiawihong sapwellime sihpw kan?
3 Kokohp en Aiseia 40:10, 11 kin kawehwe duwen epwel keneinei me Siohwa kin ketin wiahiong sapwellime aramas akan. (Melkahka 23:1-6) Erein Sises kin papah nin sampah, e kin pil kasalehda soangen epwel keneinei ohte ong sapwellime tohn padahk kan oh pil aramas akan koaros. (Madiu 11:28-30; Mark 6:34) Ira koaros, Siohwa oh Sises kin uhdahn ketin kupwursuwedkihla en sounapwalih de kaun en Israel kan ahr kin soh mahk oh keptakai, irail me sohla namenekki arail epwel suwed oh kaweid sapwungih nehrail sihpw kan. (Esekiel 34:2-10; Madiu 23:3, 4, 15) Siohwa ketin inoukihda: “I pahn doarehla nei pelin sihpwo oh I sohte pahn mweidohng en pwurehng lokolok pahmwail. I pahn wia kopwung ong emenemen nei sihpw. . . . I pahn kihong irail emen nanmwarkien me duwehte ei ladu Depit pwe en wiahla sileparail tehmen, oh en kin apwahpwalih irail.” (Esekiel 34:22, 23) Ni ahnsou wet en imwin rahn akan, Sises Krais me Depit kin mwete iei “silepen sihpw men” me Siohwa ketin idihada pohn Sapwellime ladu kan koaros pohn sampah, iei irail Kristian koaros me keikihdi ngehn sarawi oh pil “sihpw teikan.”—Sohn 10:16, NW.
Kisakis kan en Nanleng ohng Mwomwohdiso
4, 5. (a) Kisakis kesempwal dahieu Siohwa ketikihong sapwellime aramas akan pohn sampah? (b) Kisakis dahieu Sises ketikihong sapwellime mwomwohdiso?
4 Ni Siohwa ah ketin kasapwilada pohn Sapwellime ladu kan nin sampah “silepen sihpw men”—Sises Krais—e kin ketikihda kisakis kesempwal ehu ohng mwomwohdiso en Kristian. Nan Aiseia 55:4 kin kohpada duwen kisakis en Kaun en nanleng menet nin duwen met: “I wiahkihla ih sounkaweid oh kaunen wehi kan, I kasalehda ei manaman ong wehi kan pwehki ih.” Koaros, Kristian keidi kan oh iengen “pokon kalaimwun” kohpenehier sang wehi koaros, sahpw koaros, kadaudok koaros oh lokaia koaros. (Kaudiahl 5:9, 10; 7:9, NW) Irail pwukat me wiahda pwihn en mwomwohdiso en sampah pwon ehu, “pwihn sihpw teieu” me mih pahn kaundahn “soun silepe men,” Sises Krais.
5 Sises eri pil ketikihong kisakis kesempwal ehu ohng sapwellime mwomwohdiso pohn sampah. E ketikihda sounsilepe kei me kin apwahpwalih mwahu sihpw akan ni keneinei, ni ahr kin kahlemengih Siohwa oh Sises. Wahnpoaron Pohl koasoia duwen kisakis limpoak wet nan nah kisinlikou ohng Kristian akan nan Episos. E ntingihdi: “‘Ni eh ketidalahng wasa ile kan, e ketiki kohda me selidi ngedehrie, oh ahpw ketin kamwerehdiong pohn aramas akan sapwellime kisakis kan [“kisakis kan sang rehn ohl akan,” NW].’ . . . Ekei e ketin pilada en wahnpoaron, ekei soukohp, ekei sounkalohki rongamwahu, ekei silepe oh sounpadahk. E ahpw ketin wiahda met pwe en kaunopadahng sapwellimen Koht aramas akan koaros ong doadoahk en papah me [Kristian] kan uhdahn pahn wia, pwe en kakairada paliwar en Krais.”—Episos 4:8, 11, 12.
6. Iaduwen Kaudiahl 1:16, 20 kin kawehwehda duwen soun apwalih keidi kan me kin papah nin duwen pwihn en elder kan, oh dahme kitail kak ndahki elder pilipilda kan me wia kisehn sihpw teikan?
6 “Kisakis kan sang rehn ohl akan” iei soun apwalih kan, de elder kan me pilipilda sang Siohwa oh sapwellime Ohl, ki ngehn sarawi, pwe en apwalih mwahu sihpw kan ni keneinei. (Wiewia 20:28, 29) Soun apwalih pwukat koaros uhdahn ohl Kristian keidi kei. Nan Kaudiahl 1:16, 20, irail oko me kin papah oh wia elder kei nan mwomwohdiso kan kin, ni karasaras, iei “usu kan” de “tohnleng kan” me mihmi ni palimaun en limen Krais, me mih pahn sapwellime kaunda. Ahpw ohng imwin ahnsou wet, pwehki nempehn soun apwalih keidi kan pohn sampah kin wia malaulaula, tohtohn irail Kristian elder kan en nan mwomwohdiso kan wia kisehn sihpw teikan. Pwehki irail pwukat kin pilipilda sang me weliandi Governing Body, pahn kaweid en ngehn sarawi, kitail pil kak ndahki me irail pil mih ni pali maun en limen (de pahn kaweidpen) Silepen Sihpw Mwahu, Sises Krais. (Aiseia 61:5, 6) Pwehki elder kan nan atail mwomwohdiso kin uhpaiong Krais, me wia Tapwin mwomwohdiso, irail kin warohng ale atail sawas oh uhpa koaros.—Kolose 1:18.
Peikiong oh Uhpa
7. Mehnia kaweid me wahnpoaron Pohl kihda me pid atail madamadau ohng soun apwalih Kristian kan?
7 Atail Silepen sihpw kan en nanleng, Siohwa Koht oh Sises Krais kin kasik kitail en kin peikiong oh uhpaiong koasoandi kan en soun apwalih de soun kaweid kan me ira ketikihong arail pwukoa kan nan mwomwohdiso. (1 Piter 5:5) Pahn manaman en ngehn sarawi, wahnpoaron Pohl ntingihdi met: “Kumwail tamanda amwail sounpadahk en mahs ako, me kawehwehiong kumwail mahsen en Koht. Medemedewe duwen ar mour, duwen ar mehla, oh kahlemengih ar pwoson. Kumwail peikiong amwail sounkaweid akan oh kapwaiada ar kosonned kan. Pwe re sohte kin tokedihsang apwahpwalih ngenomwail kan; pwehki ar uhdahn pahn wehkadahng Koht ar kohwa doadoahk wet. Ma kumwail pahn peikiong irail, re pahn perenki kapwaiada ar doadoahk; ma soh, re pahn kin nsensuwedla; eri, met sohte kak sewesei kumwail.”—Ipru 13:7, 17.
8. Dahme Pohl luhke kitail en kin “medemedewe,” oh iaduwen kitail anahne en kin “peikiong”?
8 Tehk duwen ahn Pohl luhke kitail en kilang oh “medemedewe,” mwahu imwilahn doadoahk lelepek en elder kan oh alasang soangen mehn kahlemeng lelepek pwukat. E pil doula panawih kitail en kin peikiong oh kapwaiada kaweid kan en ohl pilipilda kan. Emen me samanih iren Paipel, R. T. France kawehwehda me nan uhdahn lokaiahn Krihk lepin lokaia me kawehwehda “en kin peikiong” sohte doadoahngki “wehwehn lokaia wet me kin kalapw kadoadoahk ahpw wasaht kin wehwehki ‘en kin kapwaiada pwehki kangoang kan’ kahrehiong emen en ahneki pepehm en men pwungki oh kapwaiada arail kaunda.” Kitail kin peikiong elder kan kaidehn pwehki kaweid kan me kitail alehdi sang nan Mahsan en Koht ahpw kitail kin pil ale kangoang kan en men kapwaiada pwehki sang arail kin kesempwaliki soahng koaros me pid Wehin Koht oh nsenohki dahme pahn keieu mwahu ohng atail paliwar oh pali ngehn. Kitail pahn peren mehlel ma kitail pahn men mih pahn arail kaunda.
9. Dahme kahrehda e kesempwal ohng kitail en kin “uhpah” oh en pil kin peikiong?
9 Ahpw iaduwen ma kitail sohte kamehlele me kaweid me elder kan doadoahngki ohng irair ehu me kohda uhdahn pwung ohng ireo? Ih soangen ahnsou me uhpah kin anahnepen doadoahk. E kin mengei en peik ahnsou me soahng koaros kin wehwe oh kitail kin pwungki kaweid kan de koasoandi kan me kohda, ahpw kitail pahn uhdahn kasalehda uhpa ma kitail pahn nennenla mehnda ma kitail sohte nohn wehwehki duwen kaweid me kohda. Piter me mwuri wiahla wahnpoaron men, kasalehda soangen uhpah wet.—Luk 5:4, 5.
Kahrepe Pahieu en Kin Men Miniminiong Sounapwalih kan
10, 11. Ni ahl dah me sounapwalih kan kin “kawehwehiong mahsen en Koht” ohng iengerail Kristian kan en keieun senturi oh pil ohng rahnwet?
10 Nan Ipru 13:7, 17, me kileldi mwowe, wahnpoaron Pohl kihda kahrepe pahieu kitail anahne en peikiong oh uhpaiong koasoandi kan en sounapwalih en Kristian kan. Keieu pwehki irail me kin “kawehwehiong [kitail] mahsen en Koht.” Tamanda me “kisakis kan sang rehn ohl akan” me Sises ketikihong mwomwohdiso iei pwehn “kaunopadahng sapwellimen Koht aramas akan koaros ong doadoahk en papah.” (Episos 4:11, 12) E kaunopada madamadau oh wiewia kan en Kristian en keieun senturi ko ki ladu lelepek kan, ekei irail kan me ngehn sarawi tih pohrail oh kahrehda irail en ntingihada kisinlikou kan ohng mwomwohdiso kan. E kin doadoahngki sounapwalih keidi kan pwehn kaweid oh kakehlaka irail Kristian en mahs akan.—1 Korint 16:15-18; 2 Timoty 2:2; Taitus 1:5.
11 Rahnwet, Sises kin kaweidih kitail sang ni ah kin doadoahngki “ladu lelepek oh loalokong kan” me Governing Body oh pil irail elder kan me pilipilda kan wia weliapahr. (Madiu 24:45, NW) Pwehki atail wauneki “Silepe Lapalapo,” Sises Krais, kitail kin kapwaiada kaweid en Pohl wet: “Kumwail en kin wauneki mehlel irail kan me wie doadoahk rehmwail, irail kan me Kaun-o ketin piladahr pwe re en kin kaweid oh panawih kumwail.”—1 Piter 5:4; 1 Deselonika 5:12; 1 Timoty 5:17.
12. Iaduwen soun apwalih kan “kin apwahpwalih [atail] mour kan”?
12 Kahrepe keriau ohng atail en miniminiong Kristian sounapwalih kan iei pwehki irail kin “apwahpwalih ngen[atail] kan [“atail mour kan,” NW].” Ma re kin diarada mehkot ni mwomwatail de ni atail wiewia kan me kak keper ohng atail pali ngehn, irail kin mwadang kihong kitail kaweid anahn kan me konehng ni madamadau ohngete pwehn kapwungala sapwungo. (Kalesia 6:1) Lepin mahsen en Krihk me kin mahsanih “apwahpwalih” kin uhdahn wehwehki “en kin pepehd oh dehr meirla.” Nin duwen emen me samanih iren Paipel koasoia me met kin “dokedoke silepen sihpw kan me kin sohte uhdihsang mwasamwasahn pein irail.” Me kin patehng arail kin mwasamwasahn arail pali ngehn, elder kan kin pil kakete sohte meir ni pwong kan pwehki arail kin pwunodikihda epwelpen pali ngenatail. Kitail sou kin men miniminiong kapwaiada kaweid oh koasoandi en sounapwalih kan, me kin wia wen arail kak koaros en alasang epwel keneinei me Sises Krais kin ketikihdo nin duwen “Silepe Lapalap en sihpw”?—Ipru 13:20.
13. Ohng ihs oh ahl dah kei me sounapwalih oh Kristian koaros kin pwukoahki wehkada pein ih?
13 Kahrepe kesiluh ohng atail en kin men miniminiong soun apwalih kan iei pwehki irail kin mwasamwasahn oh apwahpwalih kitail nin duwen “ar uhdahn pahn wehkadahng Koht.” Sounapwalih kan kin tamataman me irail kin uhpah kaunda en Silepen sihpw kan en nanleng, Siohwa Koht oh Sises Krais. (Esekiel 34:22-24) Siohwa me Sapwellimaniki sihpw, irail kan me “e ketin sapwellimankilahr pwehki ntahn sapwellime Iehros,” oh E kin kapwukoahkiong sounapwalih pilipilda kan ohng duwen arail pahn kin apwalih sapwellime pelin sihpw kan, me iei en kin apwalih “ni keneinei.” (Wiewia 20:28, 29, NW) Kahrehda, kitail koaros pwukoahki en wehkohng Siohwa duwen atail kin mwekidki kapwaiada sapwellime kaweid. (Rom 14:10-12) Atail kin peikiong irail elder idihda kan kin pil kasalehda mehlelpen atail kin uhpahiong Krais me wia “Tapwin mwomwohdiso.”—Kolose 2:19.
14. Dahme kin kahrehda sounapwalih Kristian kan en “nsensuwedla” ni arail doadoahk en papah oh dahme met kin imwikihla?
14 Pohl kihda kahrepe kapahieu kitail anahne en ni aktikitik uhpaiong sounapwalih Kristian kan. E ntingihdi: “Ma kumwail pahn peikiong irail, re pahn perenki kapwaiada ar doadoahk; ma soh, re pahn kin nsensuwedla; eri, met sohte kak sewesei kumwail.” (Ipru 13:17) Ki arail pwukoa toutou kan en padahk, apwahpwalih pali ngehn en tohn mwomwohdiso, tiengla mwowe ohng doadoahk en kalohk, kekeirada arail peneinei kan oh pwukoahki apwalih kahpwal kan en mwomwohdiso, Kristian elder kan kin weuwa wisik toutou ehu. (2 Korint 11:28, 29) Ma kitail sohte kin sewese miniminiong irail, kitail pahn ihte pil katoutoula arail wisik toutou kan. Met pahn kahrehda irail pahn “nsensuwedla.” Atail kin kasalehda ngenen sohte men sewese miniminiong irail kin kansensuwedih Siohwa oh kak imwila suwed ohng kitail. Ahpw ma kitail kin kasalehda wahu me konehng oh kin sewese miniminiong irail, elder kan pahn perenki kapwaiada arail pwukoa kan, oh met pahn kalaudehla miniminpene oh peren en men towehda iang doadoahk en kalohki wehio.—Rom 15:5, 6.
Kasalehda Atail Kin Uhpah
15. Iaduwen kitail kak kasalehda atail peikiong oh uhpaiong?
15 Mie ahl mwahu tohto kan me kitail kak sewese atail miniminiong sounapwalih idihdda kan. Pwe kitail en kakohng kapwaiada wekidekla en irair kapw kan nan wasahn kalohk, elder kan kin koasoanehdi en wia mihding en kalohk ni rahn oh ahnsou kan me anahne kitail en wekidala atail koasoandi? Kitail anahne nantiong utungada koasoandi kapw kan. Mwein ele kitail pahn alehdi kapai kan me kitail sohte kin kasik. Sounapwalih en kalohk pahn mwemweitdo nan atail Pwuhk Study en Mwomwohdiso? Kitail anahne towehda ni wen atail kak koaros nan doadoahk en kalohk nan erein wihko. Kitail kin alehdi pwukoa en wia padahk nan Theocratic Ministry Sukuhl? Kitail anahne en koasoanehdi en towehda oh kapwaiada atail pwukoa en wia padahk. Sounapwalih en Pwuhk Study en Mwomwohdiso pakairki me iei ahnsou me atail pwihn en kamwakel pahn kamwakele Kingdom Hall? Kitail en kihong wen utuht koaros me paliwaratail oh atail kehl kakohng. Ni soangen ahl pwukat oh pil ahl tohto teikan, kitail kin kasalehda atail uhpaiong ohl akan me Siohwa oh sapwellime Ohl-o idihada en apwahpwalih pelin sihpw kan.
16. Ma elder men sohte kin wia soahng kan nin duwen e kin alehdi kaweid, dahme kahrehda met sohte kihong kitail pwung en uhwongada?
16 Ekei ahnsou, elder men ele sohte kin wia soahng kan nin duwen kaweid me kohsang rehn ladu lelepek oh loalokong oh wiliepen Governing Body. Ma e kin pwurepwurehng wia soahng wet, e pahn anahne pwukoahki wehkohng Siohwa,“Silepa[tail] oh Sounepwelpen ngen[atail] kan [“atail mour kan,” NW].” (1 Piter 2:25) Ahpw en elder ah sohte kapwaiada de ah sapwung kan sohte pahn kahrehong kitail en ahneki lamalam en sohla men wia atail pwukoa. Siohwa sohte kin kapaiada oh sewese irail me kin sapeik oh uhwongada.—Nempe 12:1, 2, 9-11.
Siohwa Kin Ketin Kapaiada Ngenen Minimin
17. Iaduwen atail madamadau ohng atail sounapwalih kan?
17 Siohwa dehdehki me ohl akan me e idihada en wia sounapwalih kan sohte unsek. Ahpw e ketin doadoahngki irail ki sapwellime ngehn sarawi pwe ren kin apwalih ki sapwellime aramas kan pohn sampah. Kin mehlel me pid elder kan—oh pil kitail—me “manaman lapalap eh uhdahn sapwellimen Koht, a kaidehk aht.” (2 Korint 4:7) Kitail anahne en uhd kalahngankihong Siohwa ohng mehkan me e kin ketin kapwaiada ki atail sounapwalih lelepek kan oh kitail anahne en kasalehiong irail me kitail men miniminiong irail.
18. Sang ni atail kin uhpahiong atail sounapwalih kan, dahme kitail kin wia, ni mehlel?
18 Sounapwalih kan kin wia wen arail kak en wia duwehte sounapwalih men me Siohwa kawehwehda me idihda en kin apwalih sapwellime pelin sihpw, me dierek nan Seremaia 3:15: “I pahn ketikihong kumwail kaun akan me kin peikiong ie, oh re pahn kaunkumwailda ni kupwurokong oh dehdehki.” Ni mehlel elder kan nanpwungatail kin wia doadoahk kan me kitail pahn kapinga ki irail, pwe irail kin padahki oh pere sapwellimen Siohwa sihpw. Kitail en doulahte kasalehiong irail atail kin kalahnganki arail doadoahk laud, ni atail kin men miniminiong irail, atail kin peikiong irail oh pil uhpahiong irail. Ni atail kin wia met, kitail pahn kasalehda atail kalahngan ohng atail Silepen sihpw kan en nanleng, Siohwa Koht oh Sises Krais.
Kousapahl
• Iaduwen Siohwa oh Sises Krais ara kin ketin kasalehda me ira wia Silepen sihpw limpoak kan?
• Patehng peik, dahme kahrehda uhpah pil anahnki?
• Mehnia ahl mwahu kan me kitail kak wia pwe kitail en kasalehda me kitail kin uhpah?
[Kawehwehpen kilel kan nan ehu ehu pali 15]
Kristian elder kan kin uhpahiong sapwellimen Krais Kaunda
[Kawehwehpen kilel kan nan ehu ehu pali 17]
Mie ahl tohto kan me kitail kak wia pwehn kasalehda atail uhpahiong sapwellimen Siohwa sounapwalih idihdda kan