Paipel Kin Wekid Mouren Aramas
Dahme kahrehda lih emen e sohla kamehlele pelien lamalam, ahpw met e uhd kin doadoahngki eh ahnsou laud en sewese meteikan en sukuhlki duwen Koht? Dahme kamwakid ohl emen me kin perenki mwadong me kin kasalehda tiahk lemei en wiahla aramas meleilei men? Ia duwen ohl emen me kin doadoahngki wini en kasahliel, kang sakau oh perenki pei eh wekidala eh mour? Ke kak wadek dahme irail nda.
EDEI: PENELOPE TOPLICESCU
SOUNPAR: 40
WASA I KOHSANG IE: AUSTRALIA
EI MOUR MAHSO, I SOHTE KIN KAMEHLELE PELIEN LAMALAM.
DUWEN NGEHI: I ipwidi Sydney, Australia ahpw ni ei sounpar 2, ei peneinei keseula New Guinea. Se koukousoan Rabaul sounpar 2 oh mwuri se keseula Bougainville oh mihmihki mwo sounpar waluh. Ahnsowo, sohte TV New Guinea kahrehda ngehi oh riei pwutako kin kalapw mwadong likin ihmw oh pampap nansed.
Ni ei sounpar 10, I tepida perenki iang sarawi. Ei nohno iang Kadolik oh e kin kangoange ie en iang sukuhl en Paipel rehn emen likadek. I iangala Kadolik oh ngehi eri papidaisla ni ei sounpar eisek.
Ahpw mwurin at pwurala Australia, I lelehr sounpar 13 oh I kin tepiadahr peikasalki duwen ei pelien lamalam. Ni ei iang high sukuhl, I kin sukuhlki duwen poadopoad kan en mahs, eri ngehi oh ei pahpao kin koasokoasoia duwen tepidahn pelien lamalam oh pil soahng kan me se kin medewe me soai kei nan Paipel. Ekisekis I sohla kin kamehlele Kadolik.
Ei pahpa oh nohno mweipeseng ni ei sounpar 16. Met wia kahpwal ehu ong ei nohno oh mwurin mwo, I kohla mihla rehn ei pahpao oh lih me e pahn pwoudikio. Riei pwutako kin mihmihte rehn ei nohno oh ira keseula ehu wasa tohrohr. Ahnsowo I uhdahn kin loaleid. Mwurin sounpar 2, ngehi oh nohno nanpwung mwahula. I tepida kin kang sakau, doadoahngki wini en kasahliel oh iang mwemweitseli. I lekidek sang sukuhl, mwuhr I diar ei doadoahk oh I kin kauwehkihla ei mour tiahk suwed.
Ni ei sounpar 25, I kin pwurehng medemedewe duwen Paipel. I tepidahr doadoahk, ngehi eri tuhwong serepein kaselel men me adaneki Liene. Liene kin kadek ong eh kauno mendahte ma eh kauno kin lamaih. I idek reh ma dahme kahrehda e sohte kin pelianki eh kauno, ah e nda me e kin onop Paipel rehn Sounkadehdehn Siohwa kan oh e kin songosong en kapwaiada kaweid en Paipel akan nan eh mour. Liene men onop Paipel rehi. Eri pwehki ei sohte wehwehki mwahu dahme e ndaiong ie, kahrehda I lemeleme me e pahn padahkihong ie soahng koaros me e ese sang Paipel nan erein awa ehute. Liene kin sapsapeng ei peidek ko erein awa siluh pwongo. I pwuriamwei pwehki pasapeng koaros me e kihong ie, e kin utungki ehu iren Paipel.
Ahnsou me I pwurupwurala ni imweio pwongo, I tamanda ei kaulimki Koht eh sohte mwadang kasalehiong ie padahk mehlel. I ese me Sounkadehdehn Siohwa kan kin mourki tiahk mwakelekel oh I kin medewe me I sohte pahn kak wekidala ei tiahk suwed kan. I pil kin medewe me I sohte kak iang kalohk ihmw lel ihmw duwehte me Sounkadehdehn Siohwa kan kin wia. I usehlahte ei onop en Paipel rehn Sounkadehdehn Siohwa kan. I wia met pwe I en kak diar wasa me sapwung nan arail padahk kan pwe kadeikpen loalei en dehr kerempwa ei lamalam ni ei pahn uhdihsang ei onop rehrail. Eri ahpw, I diaradahr me I sohte pahn diar sapwung nan arail padahk kan.
PAIPEL WEKIDALA EI MOUR: Ni ei wehwehkihla Paipel kin wie lalaudla, ei nsenmwakelekel kin kerempwa ie. I sohla doadoahngki wini en kasahliel kan pwe I en kak ahneki nsenmwakelekel mwahu. Ahpw pwehki ei seiloaklahng nan ehu wasa tohrohr, met kahrehda ien pwurehng saledek en mwemweitseli oh kang sakau. Likamwete I kin pwuralahng ei mouren en mahs ehuehu ahnsou me I kin songosong kapwaiada kaweid kan en Paipel. I kin ahnekihte pepehm suwed mwurin ei kapakap ong Siohwa.
Mwurin ei wehwehkihda duwen Nanmwarki Depit oh Padsipa oh duwen Siohwa ketin mahkohng ira, met uhdahn sewese ie. Depit kin eimah ni eh wehkada dipe kan ahnsou me kaweid kohwong ih oh e sohte song en akupwungki dipe kan. Oh ni karakarahk e kin alehda kaweid me kohwohng ih. (2 Samuel 12:1-13) Ahnsou koaros me I kin pwupwudi I kin tamanda mouren Depit oh met kin kahrehda ei kak peki Siohwa en ketin mahkohng ie. I kin kapakap mwohn ei kin lelohng kasongosong oh met kin wia sawas laud ehu ong ie.
MET WIA KAMWAHU EHU ONG IE: I kin kalapw lingeringer oh mwakar. Ahpw, kaweid en Episos 4:29-31 kin sewese ie en kak liksang “soangen mwakar koaros, . . . soangen lingeringer koaros.” Ei esehla en powehdi ei lingeringer kin kahrehda ei pil kak koledi loweiet. Patehng met, sapwellimen Sises kaweid ong kitail me iei en kin mehlel ong atail kin nda “‘Ei’ de ‘Soh,’” kin sewese ie en kak kapwaiada ei pilipil kan.—Madiu 5:37.
Nin tepio ei nohnou sohte kin pwungki ei kin werekiong Sounkadehdehn Siohwa kan, ahpw mwuhr e ndaiong ie me e kin kalahkin ie. E pil nda, “I ese me omw wiahla lih mwahu men sohte kohsang ei kakairuhkada ahpw e kohsang dahme ke sukuhlki duwen Siohwa.” I uhdahn perenda ni ei rong met.
Met I pehm me ei mour mie katepe oh kahrepe. Erein sounpar 9, ngehi oh ei pwoud kin doadoahngki pali laud en at ahnsou en padahkihong meteikan duwen Paipel. Met I kakehr kalohk sang ihme lel ihmw, oh I pehm me doadoahk wet me keieu katapan.
PROFILE
EDEI: DENIS BUSIGIN
SOUNPAR: 30
WASA I KOHSANG IE: RUSSIA
EI MOUR MAHSO, I KIN PERENKI KARATE.
DUWEN NGEHI: I ipwidi nan kahnimw en Perm’ ahpw keirada nan kahnimw en Furmanov, kahnimw ehu me towe meh 40,000 nan Ivanovo, Russia. Furmanov iei kahnimw ehu me diren tuhke lingan kan me teh kan kin oangoahngla oh weitahtala nan pahr koaros. Nan pahr 1980 lel 1990, tiahk en mwersuwed kin lalaudla nan kahnimw wet. Ei peneinei me semwehmwe. I kin iang kousoan rehn ei pahpa oh nohno oh riei pwutak tikitik nan ihmw ehu me perehn meir ehute oh e inenen koit.
I tepida sukuhlki karate ni ei sounpar 7. Pwehki ei perenki met, soahng koaros me I kin wia kin pid karate. Pwehki ei kin doadoahngki luhwen ei ahnsou pwon nan gym, kompoakepahi kan koaros wia sounmwadong kei. Ni ei sounpar 15 I alehdi ehu kisakis, oh nan pahr en mwurio I pil alehdi ehu kisakis oh met wia kilelepen ei pweida nan karate. I iang ehu pwihn me kin siaiki sampion nan Russia, Europe oh Eisia. E mwomwen me ei mour ahnsou kohkohdo pahn wia ahnsou mwahu ehu ong ie, ahpw ni ei sounpar 17 ei mour pwon wekidekla.
Ngehi oh iengei ko dipada oh selidi. I selidi ong sounpar 2. Mour nan imweteng me apwal. Ahpw ih wasao me I tepin kilangada Paipel. I wadekala Senesis, Melkahka oh Kadehde Kapw. I pil wadlikihala kapakap en Samat oh kin kapakapki pwohng koaros mwohn ei meir oh kin medewehiong me met pahn kak sewese ie.
Nan pahr 2000 I sapwadeksang nan imweteng, ahpw sohte kaweidpen ei mour. I tepida doadoahngki wini en kasahliel kan. Ahnsowo ei nohnou mehla. Met wia apwal laud ehu ong ie pwehki ei poakepoake laud ei nohno. Mendahki apwal pwukat, I sohla kin doadoahngki wini en kasahliel oh I pwurehngehr pwurala nan gym. Eri, I pil keseula nan kahnimw en Ivanovo. I diar doadoahk nan ehu sidohwa. Kaun en sidohwao iei emen Sounkadehdehn Siohwa. E kin kawehwehiong ie ekei ire sang nan Paipel oh pil koasoanehdi emen ohl en onop Paipel rehi kaukaule.
PAIPEL WEKIDALA EI MOUR: Ei kin onop Paipel oh esehla sapwellimen Koht koasoandi kan ong sampah en wiahla ehu paradais kin kamwakid laud ei mour. Met kahrehiong ei men iang wia kisehn koasoandi wet ahnsou kohkohdo. I pil wehwehkidahr me mie sapwellimen Siohwa Koht koasoandi kan me e kupwurki aramas akan en kapwaiada. Mahs, I kin ahneki mour en roporop ong pein ngehi. Ahpw I sukuhlkier me Siohwa kupwurki ien pil kin medewe meteikan, oh I en kakairada irair mwahu kan me I sohte kin ahneki mahs, me duwehte kadek oh meleilei.
Ni ei tepida medemedewe laud duwen soahng koaros me Siohwa ketin wiahiongie, me duwehte eh ketikihdo sapwellime Iehros nin duwen meirong ehu pwehki dipei kan, oh pwehki ei kalahnganki sapwellime limpoak, met kamwakid ie en wekidekla ei mour. Karasepe, I sukuhlki sang Melkahka 11:5 me Siohwa kin kalahdeki tiahk en lemei. Met kahrehda, ei uhdihsang kilang soangen kasdo kan nan TV me kin kasalehda tiahk lemei oh kailok. I pil sohla wia mwadong kan me kasalehda tiahk lemei. Kaweid en 1 Korint 15:33 kin sewese ie en kak kilangada me irail kan me I kin werekiong kak kamwakid laud ei mour. Ei selidi nan imweteng kasalehda mwahu duwen met. Eri met kahrehda I solahr kin werekiong irail akan me kin perenki mwadong kan me kin kasalehda tiahk lemei.
MET WIA KAMWAHU EHU ONG IE: Patehng Sounkadehdehn Siohwa kan oh pil onop Paipel kin sewese ie en kak wiahla aramas lelepek men. Karasepe, I sukuhlki sang Ipru 13:5 duwen en kin itarki dahme mie oh en kin liksang limpoak ong mwohni. Ei doadoahngki iren kaweid wet sewese ie en uhdihsang likamw oh pirap.
En mie kompoakepahi kan kin wia mehkot kesempwal rehi. Mahso, nanpwungen ngehi oh kompoakepahi kan ohla pwehki noahrok de pil masak aramas. Sounkadehdehn Siohwa kan sohte unsek, ahpw I ese me irail kin wauneki oh nannanti en kin kapwaiada sapwellimen Siohwa kaweid akan ni arail kin ehuiong meteikan. Ekei irail pil wiahla kompoakepahi mehlel kan.
I kin medemedewe ma ia pahn mwomwen ei mour ma I sohte kin kapwaiada kaweid akan en Paipel. Mwehin met I pahn mihmi nan imweteng de pil kin kahpwale mouren meteikan. Eri, ahpw ahnsouwet, mie ei pwoud lih mwahu emen oh nei pwutak riemen. Nin duwen peneinei ehu se kin diar peren ni at kin sewese meteikan en esehla padahk mehlel duwen Koht.
PROFILE
EDEI: JOSÉ CARLOS PEREIRA DA SILVA
SOUNPAR: 31
WASA I KOHSANG IE: BRAZIL
EI MOUR MAHSO, I KIN IANG PEPEISELI NANIAL.
DUWEN NGEHI: I tikida nan Americana, São Paulo nan wasahn kousoan ehu me sohte mwahu. Pilen nimpil sohte mwahu oh wasao me inenen samin. Wasao kin ndandki tiahk lemei oh diren aramas mwersuwed.
I tikida wia aramas lemei oh kommwad men. I kin kalapw iang pepeiseli nanial kan, ihme kahrehda tohn ei wasao kin masak ie. Mwomwen ei kapwat, likou oh soarei kin kasalehda me ngehi aramas keper men. I kalapw kang sakau lao I sohla kehn wasa. I kin pil doadoahngki wini en kasahliel duwehte riei pwutak laud ko. Emen riei pwutak me laud mehkihla eh doadoahngki wini en kasahliel.
PAIPEL WEKIDALA EI MOUR: Ahnsou me I tuhwong Sounkadehdehn Siohwa kan, irail kasalehiong ie sang nan Paipel me Koht pahn ketin wiahiong sampah en wiahla paradais ehu. (Luk 23:42, 43; Kaudiahl 21:3, 4) I pil esehdahr me me melahr akan sohte ese mehkot, kahrehda Koht sohte kin ketin kaloke aramas suwed akan nan kisiniei. (Eklesiasdes 9:5, 6) Lapalahn ei saladekla nan ei madamadau. Soahng kan me I sukuhlkidier duwen Koht kamwakid ie laud en men wekidala ei mour. E sohte mengei en uhdihsang doadoahngki wini en kasahliel kan, kang sakau, men pei oh lokaia suwed.
I kin ale kangoang laud sang mahsen en wahnpoaron Pohl me kileldi nan 1 Korint 6:9-11. Iren Pwuhk Sarawi wet kin kasalehda me ekei tepin Kristian akan mahso pil kin iang wia soahngen tiahk suwed akan me I kin wia mahs. Pil nan iren Pwuhk Sarawiohte mahsanih: “Eri, ekei kumwail iang mihmi ni soangen aramas pwukat mahso, ahpw met kumwail mwakelekelsangehr dihp, oh kasarawihongehr Koht, oh pwunglahr rehn Koht ni mwaren atail Kaun Sises Krais oh ni ngenen atail Koht.” Mahsen pwukat kin kihong ie koapworopwor me I pil kak wekidala ei mour pwe I en kak kaperenda Koht.
Ahnsou me I tepida patehng Sounkadehdehn Siohwa kan, I kamehlele me irail kin mourki mouren Kristian mehlel. Irail wehwehki me ngehi aramas lemei men, ahpw re kin kasamwo ie ni limpoak.
MET WIA KAMWAHU EHU ONG IE: Mwein I melahr met ma I sohte onop Paipel oh wekidala ei mour. Ahpw met I sewesehdahr emen riei pwutak en sukuhlki Paipel oh uhdihsang doadoahngki wini en kasahliel. Oh I pil kin kangoange ei peneinei teikan en tepida onop Paipel. I inenen kalahnganki ei kak inoukihong Koht ei mour en papah ih, pwe e ketin poakohng kitail!
[Kawehwehpen kilel kan nan ehu ehu pali 24]
“I kin kapakap mwohn ei kin lelohng kasongosong oh met kin wia sawas laud ehu ong ie”