Eh Kanengamah Pweida

Aramas mohngiong mehlel tohto kin men kompoakparail kan en sukuhlki sapwellimen Koht koasoandi kan pwehn kak ahneki mour peren. Wiewia mwahu en me mah de pwulopwul kan kin kak sewese emen en wiahda pilipil mwahu en inoukihong Koht eh mour. Met duwehte dahme wiawihong Jearim, serepein men nan Mexico, me kihong kisinlikou ehu rehn brother kan nan ehu kapokon en Sounkadehdehn Siohwa kan. Kisinlikouo ketihtihki:

“I men ehukihong kumwail kahrepen ei peren. Sounpar 18 samwalahro, mwohn ei ipwidi, ei pahpa oh nohno esehla padahk mehlel. Ei nohno kekeirda mwahu, oh mwuhr, ngehi oh riei pwutako pil kekeirda at nanpwungmwahu rehn Siohwa. Se kin kapakapohng Siohwa pwe at pahpao en pil kak iang kiht keid nan elen mour soutuk. Mwurin sounpar 18, rahnwet wia rahn me inenen kesempwal ong kiht pwehki at pahpao pahn papidaisla. I kalahngan ong Koht pwehki e saikinte ketikihdo imwin koasoandi en sampah wet kahrehda rahnet pil kak leledo. Kalahngan en komwi Siohwa!”

Erein sounpar pwuko, peneinei en serepein menet kin ideidawehn kaweid me ntingdi nan 1 Piter 3:1, 2 me mahsanih: “Kumwail lih pwopwoud kan, kumwail peikiong amwail pwoud kan, pwe ma ekei irail sohte pwoson mahsen en Koht, re en alehkihla pwoson amwail mouren wiewia mwahu. Kumwail sohte anahne kapahrekiong irail, pwe re pahn pein kilang amwail mour mwakelekel oh duwen amwail wauneki Koht.” Jearim pil kin kapwaiada kaweid en Deuderonomi 5:16 me mahsanih: “Kumwail wauneki samamwail oh inamwail, nin duwen ngehi, KAUN-O, amwail Koht, koasoanediong kumwail.” Arail kin kapwaiada kaweid pwukat oh likih Siohwa ni kanengamah kin wahdo kapai kan ong Jearim oh eh peneinei.