“Kumwail Keido Mpen Koht, Oh E Pahn Ketin Keiong Mpamwail”
Eh Mour Mahs Oh Met Eh Mour Wekila
MOUR ong Matsepang kin inenen kansensuwed oh solahr katepe! Ih serepein pwulopwul men me kin kousoan nan Lesotho, wehi ehu me mih nanpwungen wehin South Africa. Matsepang tikida wia Kadolik men. Ahpw met sohte kahrehda ih en karanihala Koht, pwe sounpar tohto, lih kadek (nuns) kan kin pwainki ih mwohni pwe irail en wiapene tiahk suwed.
Met imwikihla Matsepang en sohla kamehlele palien sarawi oh pil solahr kamehlele me mie Sounkapikada limpoak men me kin ketin nsenohki mehlel aramas akan. Pwehki kahpwal kan me e kin lelohng, Mastepang kin mworusala oh pehm me ih aramas mwahl men. E laudla oh wiahla aramas men me kin lemei men pei. Met kahrehiong ih en kin kauwehla kosonned kan.
Kedekedeo Matsepang iangala pwihn ehu me kin pirapa aramas pohn train kan. Ih eri selidi oh lekidekiong nan kalapwuhs me mihmi South Africa. Mwuri, e kapwurpwurala Lesotho, uhdakeo wasa me e pil usehlahte mourki mour en tiahk en mwersuwed, sakau, lemei oh nenek.
E lel ahnsou ehu me Matsepang inenen nsensuwedkihla eh mour, ih eri kapakap ong Koht pwehn peki sawas. E inoukihda met, “Maing Koht, ma I powehdi met, I pahn wia uwen ei kak en papah komwi.”
Mwurinte mwo, misineri kei en Sounkadehdehn Siohwa kan lella reh, oh idek ma re kak onop Paipel reh. Sang eh wia onop wet, e esehda me Koht kin nsenohki oh katapanki aramas. Ni mehlel, e wehwehkihda me Sehdan, me iei “semen soangen likamw koaros,” kin doadoahngki widing kan en kahrehda ekei en pehm me re sohte katepe, oh pil kahrehiong ren kamehlele me Siohwa sohte kak poakohng irail.—Sohn 8:44; Episos 6:11.
Weksang met, e uhd wahdo kamweit ong Matsepang ni ahnsou e sukuhliki me kitail kak wahula ma kitail pahn koluhkihla atail dihp en mahs, peki sapwellimen Koht mahk kalahngan oh nantihong kaperenda ih! E alehdi sawas en wehwehkihda me “Koht lapalapasang kadeikpen loalatail” oh kin kilangwohng kitail weksang dahme kitail medemedewehki pein kitail.—1 Sohn 3:19, 20.
Matsepang inenen perenkihda wadek mahsen pwukat en sounmelkahka Depit: “KAUN-O kin ketiket mpen irail me nan kapehd tikitiklahr; oh kin ketin doarehla irail kan me kin sohla ar koapworopwor.” (Melkahka 34:18) Pwehki e kin iang ‘sohla eh koapworopwor,’ e diarada me Siohwa sohte kin ketin likidmeliehla sapwellime sounpapah kan, mendahki ma re pehm me irail aramas mwahl kei oh sohte kesempwal. E kin perenkihda en esehda me Koht kin ketin nsenohki oh apwahpwalih sapwellime sihpw kan ni ahnsou re lelohng nan kahpwal kan. (Melkahka 55:22; 1 Piter 5:6, 7) E keieu perenkihda mahsen pwukat: “Kumwail keido mpen Koht, oh e pahn ketin keiong mpamwail.”—Seims 4:8.
Wekidekla kan me wiawi nan en Matsepang mour kasalehda manaman en sapwellimen Koht Mahsen. E tepida iang kaukaule mihding kan oh sohla wia tiahk kan me uhwong padahk en Paipel. Dahme met imwikihla? E solahr pehm me e sohte warohng sapwellimen Koht limpoak oh kupwuramwahu. Sangete ahnsou e papidaisla oh wiahla emen Sounkadehdehn Siohwa men, e doadoahngkihla awa kid kei nan doadoahk en kalohki rongamwahu en Wehio. Mendahki e kin nsensuwedki eh mour en mahs, met Matsepang kin nsenamwahu oh kin mourki mour me inenen katepe. Met kin kadehdehda me Paipel ahneki manaman en kamwahuiala en aramas mour!—Ipru 4:12.
[Kawehwehpen kilel kan nan ehu ehu pali 11]
“Maing Koht, ma I powehdi met, I pahn wia uwen ei kak en papah komwi”
[Kawehwehpen kilel kan nan ehu ehu pali 11]
Padahk en Paipel kan Kin Sawas Mwahu
Padahk en Paipel kan kin wahdo kamweit ong irail me aramas kin tiahk suwed ih:
“Ni ahnsou me I kin pwunodada oh pahtoula, komw kin ketin kansenamwahwihiehla oh kapereniehda.” (Melkahka 94:19) Sapwellimen Koht mahsen kin wia utupen ‘kansenamwahu oh kamweit’ mehlel. En kin medemedewe oh doudouloale oh kapakap kak kameleilei pwunod oh pahtou kan oh kak kalaudehla atail likih Koht me e kin wia kompoakepah mwahu men.
“E [Siohwa] ketin kamwahwihalahr me nan kapehd ohlahr akan oh ketin kidimpenehr ar ohla kan.” (Melkahka 147:3) Ma kitail kin kalahnganki sapwellimen Siohwa mahk kalahngan oh eh koasoandi en pwaindi atail dihp ki sapwellimen Sises tomw, kitail kak ahneki nsen mwakelekel en kak keiong mpe. Met kak kansenamwahwihala oh kameleileidi madamadau kan.
“Sohte emen me pahn kak kohdo rehi [Sises Krais], ma Semei me ketin kadariehdo sohte kainangihedo rehi; oh I pahn komourada ni imwilahn rahn.” (Sohn 6:44) Ki sapwellime manaman oh doadoahk en kalohk, Siohwa ketin kahrehiong kitail en karanihala sapwellime Ohlo oh kihong kitail koapworopwor en mour soutuk.