Kapatahiong Ahmw Loalokong Powehdi Ineng Kan
“Kapatahiong . . . omw loalokong powehdi ineng kan.”—2 PITER 1:5-8.
1. Kahpwal tohto en aramas akan kin wiawi pwehki irail sohte kak wia dah?
NI ehu campaign me uhwong doadoahngki wini en kasahliel, aramas pwulopwul akan nan United States kehkehlik kohwong irail: “Nda soh.” Ia uwen ah pahn nohn mwahu ma aramas koaros pahn nda soh kaidehn ongete wini en kasahliel ahpw pil ong kamamsakau, tiahk samin, ong mwersuwed en pisnes, oh pil “ineng en uduk kan”! (Rom 13:14) Ahpw, ihs me kak nda me nda soh wia mehkot mengei en wia?
2. (a) Mehnia karasepe kan nan Pwuhk Sarawi kin kasalehda me sangete mahs e kin apwal ong aramas akan en nda soh? (b) Dahme karasepe pwukat kin kangoange kitail en wia?
2 Pwehki aramas sohunsek koaros ahneki kahpwal en powehdi arail ineng kan, kitail pahn men sukuhliki iaduwen atail en powehdi atail luwet akan me kitail kin lelong. Pwuhk Sarawi ndahiong kitail duwen aramas mahso me kin papah Koht ahpw ekei pak ahneki ahnsou apwal en nda soh. Tamanda Depit oh dipen kamwahl me e wia ong Padsipa. Met imwikihla neira seri me ipwisang dipen kamwahlo oh mehla en ahn Padsipa pwoudo, ira koaros sohte ara sapwung nan irairo. (2 Samuel 11:1-27; 12:15-18) De pil medewehla wahnpoaron Pohl me wehkada ni sansal: “I sohte kin wiahda me mwahu me I kin inengieng wia; ahpw I kin wiahda me suwed me I sohte men wia.” (Rom 7:19) Mie pak ke kin iang ahneki soangen pwunod duwehte met? Pohl pil doula oh mahsanih: “Nan kapehdi kin perenkihda kosonned en soangen koasoandi tohrohr me kin wia eh doadoahk ni paliwereiet ehu soangen koasoandi me kin uhwong kosonnedo me mohngiongi kin pwungki. Koasoandi tohrohr wet kahrehiong ei selidi pahn kosonned en dihp me kin wia doadoahk ni paliwereiet. Uhdahn aramas paisuwed men ngehi! Ihs me pahn kapitiehla sang nan paliwar wet me kin kahluwalahng ie mehla?” (Rom 7:22-24) Karasepe kan nan Pwuhk Sarawi pahn kakehlaka atail koasoandi me kitail sohte pahn uhdihsang atail peiong pwe kitail en kak powehdi atail ineng suwed kan.
Powehdi Ineng, Mehkot me Kitail Pahn Kasukuhliong
3. Kawehwehda dahme kahrehda kitail sohte kak kasik me powehdi ineng pahn mengei.
3 Powehdi ineng, me iangahki kitail en kak nda soh, iei me pwarada nan 2 Piter 1:5-7 met kin iangahki pwoson, wiewia mwakelekel, loaloakong, dadaur pahn kalokolok, lelepek ong Koht, poakepehn pirien, oh limpoak. Sohte ehu nanpwungen mepwukat me kitail kin ipwikihdi. Kitail anahne kaiahnehda mehpwukat. Pwe kitail en kak kasalehda irair pwukat ni sansal mwahu kin anahne koasoandi en nan kapehd kehlail oh nanti. Eri, iaduwen kitail kasik me powehdi ineng pahn weksang oh mengei sang irair pwukat?
4. Dahme kahrehda aramas tohto kin lemeleme me sohte arail kahpwal me pid powehdi ineng, ahpw met kin kileledi dah?
4 Mehlel, aramas rar kan ele pahn nda me sohte arail kahpwal me pid powehdi arail ineng kan. Irail kin wiewiahseli arail elen mour nin duwen me re inengieng, re kak wehwehki de pil ekei pak sohte wehwehki me dahme re kin wia e kin poasoanda sang ineng en uduk soh unsek kan me kin kaweidkin irail, oh sohte kin medemedewe dahme pahn imwila—ong irail de ong mehteikan. (Sud 10) Sohte kak oh sohte men nda soh kin sansal mwahu rehn aramas akan rahnwet sang rehn aramas en mahs oko. Met wia kadehdehpen me kitail uhdahn mihier ni “imwin rahn akan” oh iei me Pohl nda ni ah kohpada: “Ahnsou apwal pahn kohdo. Pwe aramas pahn limpoak pein irail, limpoak ong mwohni, pohn mwahso, kalahwasa, lahlahwe . . .sohte kak powehdi arail ineng kan.”—2 Timoty 3:1-3.
5. Dahme kahrehda Sounkadehdehn Siohwa kan kin men ese duwen oaralap en powehdi ineng, oh kaweid dahieu kin mwahu pil ong atail ahnsou?
5 Sounkadehdehn Siohwa kan kin wehwehki duwen apwal me pid anahnepen powehdi atail ineng kan. Me duwehte Pohl, irail kin wehwehki pei me kin wiewiawi nanpwungen ineng en kapereniada Koht sang ni atail en mouriki sapwellime kaweid akan oh ahl me arail irair en soh unsek kan kin kangoangehkin irail en wia. Pwehki kahrepe wet ahnsou reirei irail kin men diar iaduwen arail pahn kak kana nan pei wet. Nan pahr 1916, Kahn Iroir makasihn ieu me ke wie wadwadek ahnsouwet koasoia duwen, “ahl pwung me kitail en weid loale pwe kitail en kak kolokol atail ineng atail madamadau kan, atail koasoi kan oh atail wiewia kan.” E kaweidkin kitail en tamataman audepen Pilipai 4:8. Mehn kataman sarawi wet pil mwahu ong kitail rahnwet, edetehn e wia kohda pahr 2000 samwalahr oko, oh ele ahnsou wet e apwalasang mahso aramas en kapwaiada de pil nan pahr 1916. Mendahki met, Kristian akan kin songosong kehlail irail en nda soh ong ineng en sampah, oh irair wehwehki me ni arail pahn wia met irail kin nda ei ong arail Sounkapikada.
6. Dahme kahrehda kitail sohte kin ahneki kahrepe mwahu ieu en mworosala ni atail kin kakairada powehdi ineng kan?
6 Powehdi ineng me pwarada nan Kalesia 5:22, 23 iei kisehn “wahn ngehn sarawi.” Ma kitail pahn kasalehda irair wet iangahki “limpoak, peren, popohl, kanengamah, kadek, kamwahu, pwoson, oh opampap,” kitail pahn inenen ale kapai laud. Met pahn pere kitail nin duwen me Piter kawehwehda, sang kitail en “sohte nanti de sohte kasalehda wah” nan atail papah Koht. (2 Piter 1:8) Ahpw, kitail en dehpa mworusala de kapwukoaheki pein kitail ma kitail sohte kak mwadangete kapwarehda soangen irair pwukat nin duwen atail kasik. Ele ke kin kilang nan sukuhl me ekei seri kin mwadang koledi sang ekei. De pil nan doadoahk ekei kin mwadang sukuhliki doadoahk kapw mwadangasang ekei. Pil duwehte ekei kin mwadang kasalehda irair en Kristian mwadangasang ekei. Dahme kesempwal iei kitail en wia kolokol irair en Koht akan ni uwen atail kak. Met kitail kak wia sang ni atail pahn isaniki ahnsou mwahu en alehdi sawas me Siohwa kin ketkihda ki sapwellime Mahsen oh sapwellime mwomwohdiso. Mwadang lel atail mehn akadei sohte kesempwal sang atail en kolokol atail wie kekeirada.
7. Dahme kin kasalehda me irair en powehdi ineng kin wia mehkot kesempwal?
7 Mendahki powehdi ineng a keirekidi keieu mwuhr nan irair en wahn ngehn akan, met sohte wehwehki me e sohte nohn kesempwal duwehte irair en ngehn teikan. E kesempwal duwehte mehteikan. Kitail en tamataman me “doadoahk en uduk” koaros pahn kak irairidi ma mie atail mehn powehdi ineng de kanengamah. Ahpw pwehki aramas ar soh unsek ihme re kihkihieng lohdi pahn “doadoahk kan en uduk me duwehte . . . nenek, kasaut, wiewia samin, kaudokiong dikedik en eni mwahl, wunahni, kailok, akatat, peirin, mwakar, kahngohdi, liak tohrohr, katohrohr.” (Kalesia 5:19, 20) Kitail en ahnsou koaros pei ong ineng suwed pwukat pwe kitail en weirasang loal suwed nan mongiongitail oh nan atail lamalam.
Ekei Mie Arail Kahpwal en Kasalehda Kanengamah
8. Dahme kahrehda ong ekei aramas e kin apwal ong irail en kasalehda kanengamah?
8 Ekei Kristian akan kin apwaliki kasalehda kanengamah sang ekei. Pwekida? Kaiahn sang rehn pahpa oh nohno kak kahrehda met. Ma kakairada oh kasalehda kanengamah sohte wia mehkot kahpwal rehtail, me pahn wia kahrepen kitail en ahneki peren. Ahpw, kitail en uhdahn kasalehda limpoak oh wehwehki aramas teikan ni atail pahn ehuiong irail me kin apwaliki kanengamah, mendahte ma arail sohte kin kanengamah kin kasong suwediong kitail. Ni atail wehwehki me pein kitail kin ahneki soh unsek, ihs nanpwungatail ahneki kahrepe me kitail ahneki madamadau me kitail mwahu sang meteikan?—Rom 3:23; Episos 4:2.
9. Ekei aramas kin ahneki soangen luwet dah kei, oh iahd soahngen luwet pwukat pahn kohsang rehtail douluhl?
9 Karasepe ieu: Kitail kak ese me ekei iangetail Kristian akan me kin kesehlahr sika de wini en kasahliel kan oh ele arail inengih soahng pwukat wie kehkehlailete. De ekei kin apwalikihte uwen mwenge de sakaun wai me re kin ale. Pil ekei kin apwaliki koledi lowarail, kahrehda irail kin kalap wiahda lokaia kadipekelekel. Pwehn kapwungala sapwung pwukat e anahne mehlel kakairada powehdi ineng de kanengamah. Pwekihda? Seims 3:2 wehkada ni mehlel: “Kitail koaros kin kalap sapwungala. Me sohte kin sapwungala ni eh lokaia, iei ih me unsek, oh ih me kin kak kaunda paliwere unsek.” Ekei aramas kin inengihete wia pilein mwohni. De pil ekei apwaliki kolokol arail lingeringer. Ele anahne ahnsou reirei iei ren sukuhliki ren kak powehdi soangen luwet pwukat. Mendahki atail kak kamwahuwihala laud atail wiewia kan ahnsouwet, ineng sapwung kan ahpw pahn kohsang douluhl ni ahnsou me kitail pahn alehdi irair en mour unseko. Ahpw ni ahsouwet, nannanti kasalehda kanengamah pahn sewese kitail irehwei sang kitail en pwurehng pwupwudiong nan dihp. Ni atail pahn nannanti kohwei, kitail en sawaspene pwe kitail en dehr pwangada.—Wiewia 14:21, 22.
10. (a) Dahme kahrehda ong ekei aramas, en kasalehda kanengamah me kin pid wendipene kin wia mehkot apwal ong irail? (b) Soangen wekidek laud dahieu me emen brother wia? (Kilang koakon nan pali 22.)
10 Ehu wasa me kasalehda kanengamah kin apwal pahn ekei aramas iei me pid nenek. Pwe patpenehn paliwar, wia ineng ehu me Siohwa Koht me ketikihong kitail ni a ketin kapik kitailada. Ahpw, ekei ahneki kahpwal tohrohr en kolohng ineng wet nan dewe me pwung, pwe en konehng de pahrekiong koasondi kan en Koht. Arail kahpwal kin suwed mehlel, pwehki arail ineng dauliala. Kitail koukousoan nan sampah ieu me kesempwaliki tuhpenehn paliwar oh kin kakehlaka ineng wet ni ahl tohto. Met kak wiahda kahpwal laud ong Kristian akan me kin songosong en kolokol arail irair en kiripw pwe irail en saledekiong papah Koht, oh sohte kedirepwiki irair akan en pwopwoud. (1 Korint 7:32, 33, 37, 38) Ahpw, pwe en pahrekiong kaweid en Pwuhk Sarawi me “e mwahu en pwopwoud sang wie dender,” irail mweinele pilada irail en pwopwoudla, pwe iei me wahupe mie. Ni ansouwohte, irail en kosoanehdi kehlail en pwopwoud “ihte rehn Kauno,” duwen me Pwuhk Sarawi kaweidiki. (1 Korint 7:9, 39) Kitail en ese me Siohwa kin kupwurki arail kin men kolokol sapwellime kaweid pwung kan. Iengarail kan kin perenki werekiong sounkaudok mehlel me kin kolokol tiahk mwakelekel oh kasalehda lelepek.
11. Iaduwen kitail kak sewese emen brother de sister me men pwopwoud ahpw saikinte diarada ahr pwoud?
11 Iaduwen ma sohte aramas pwung me kak dierek pwe en wia ahmw pwoud? Medewehla soangen kapwunod me kak pwarada rehn aramas emen me men pwopwoud a sohte kak pwopwoudida ahnsou wet! Ele e kin kilang kompoakepah kan wie pwopwoudla oh kin peren, ah ih e wie raparapahkihte emen me pahn wia a werek konehng. Ong ekei me mih nan irair wet, wiewia samin duwehte mwadonge pein irail kak wia kahpwal ehu ong irail. Ni irair wet, Kristian men sohte pahn kihsang koapworopwor en meteikan me kin nannantihong kolokol ah mwakelekel. Kitail kak kihsang peren en aramas emen ni atail kin wia soangen lokaia duwehte “Iahd me ke pahn pwopwoudda?” Ke mwein nda met oh sohte leme me e suwed ahpw ia uwen a nohn mwahu ma kitail kasalehda kanengamah soh koledi lowetail akan! (Melkahka 39:1) Irail oko nanpwungatail me kin kolokol arail mwakelekel ni arail kiripw kin konehng kitail en kapinga irail. Kitail dehr nda mehkan me pahn kamworusalaiong irail, ahpw kitail kak nantiong kihong irail kangoang. Karasepe, kitail kak luhke me kiripw akan ni atail kin wia kisin pwihn oh wia mwenge de pil tuhkihpene mehkot me ngenin.
Powehdi Ineng Nan Pwopwoud
12. Dahme kahrehda irail me pwopwoud kan pil anahne powehdi arail ineng kan?
12 Pwopwoudla sohte kin kihsang anahnepen aramas emen en kolokol irair en powehdi ineng en wia dipen kamwahl. Karasepe, ineng en wendipene nanpwungen ohl oh lih pwopwoud kak wekpeseng laud. De pil irair en paliwar kak kahrehda kahpwal en wendipene en mie rehn emen ira. Mwein ele sang ni wiewia kan me pwarohng emen ira nan ah mour en mahso, kahrehda aramaso kin diar me e apwal ong ih en kapwaiada kaweid me nda: “E konehng ohl akan en kapwaiada ar pwukoa kan ong ar werek kan, oh lih akan en pil kapwaiada ar pwukoa ong ar pwoud kan.” Nan soangen irair wet, meteio anahne kanengamah. Ahpw, ohl pwopwoud oh lih pwopwoud anahne tamanda kaweid limpoak me kohsang Pohl ong irail pwopwoud Kristian akan: “Ohl emen oh lih emen me pwopwoudidahr, emen dehpa irehdi paliwere ong ni nsenen pwopwoud, ira lao pwungkipene kommoaldihsang pwe ira en wia ara kapakap ekis ahnsou; ahpw mwuhr, ira uhdahn pahn pwurehng ni pwungen kapwaiada nsenen pwopwoud pwe ira dehr luwetala oh lohdiong nan songosong en Sehdan.”—1 Korint 7:3, 5.
13. Dahme kitail kak wia ong irail akan me kin pepeiongete arail kahpwal en powehdi ineng?
13 Ia uwen peren pwopwoud ieu kin ahneki ma ira koaros kak sukuhliki kasalehda kanengamah me konehng ong mehkan me pid ara pwopwoud duwehte likilik oh ehupene nanpwungara. Ni ahnsowohte e pahn mwahu ma ira kasalehda wehwehki iengerail tohnkaudok kan me kin wie pepeiongete arail kahpwal nan irair wet. Kitail dehr manokehla en kapakapkihong Siohwa en ketikihong riatail ni pali ngehn akan loloakong, eimah, oh koasondi teng me irail pahn nantihweite nan arail pei oh kasalehda kanengamah oh powehdi arail ineng sapwung kan.—Pilipai 4:6, 7.
Nantihongete Sawaspene
14. Dahme kahrehda kitail anahne ni kadek oh wehwehkin iengitail Kristian akan?
14 Ekei pak, kitail ele kak apwaliki wehwehki iengetail Kristian akan me kin wie pepeiong arail luwet kan pwe ren kak kasalehda kanengamah nan irair ehu me kitail kin mengeiki powehdi. Ahpw, kitail anahne tamataman me aramas kin wekpeseng. Ekei kin mwadang mwekidki arail pepehm kan; a ekei soh. Ekei kin mengei ren powehdi arail ineng kan, kahrehda kanengamah sohte wia mehkot apwal. Ah ong ekei, met inenen apwal ong irail. Ahpw, tamataman, aramas emen me nannanti en powehdi kahpwal ehu sohte wiaiong aramas en wia aramas suwed emen. Iengetail Kristian akan anahne atail wehwehkin irail oh atail limpoak. Pein atail peren kin pil pidada met, ni ahnsou me kitail kin nannantihong kasalehda mahk ong irail oko me songosong en kalaudehla arail kanengamah. Kitail kak diar met sang nan mahsen en Sises akan nan Madiu 5:7.
15. Dahme kahrehda mahsen kan en nan pwuhken Melkahka 130:3 kansenamwahu ong kitail me pid kanengamah?
15 Kitail sohte pahn men kasawih de kalikamwehla iangetail Kristian emen me ekei ahnsou sohte kin kasalehda mouren Kristian. Siohwa kin ketin mwahngih pil pak tohto kan kitail sohte kin wiahda me suwed, kaidehnte ahnsou malaulau me kitail sohte kin wia mwahu, mendahte ma ahnsou pwukat koaros iangetail akan sohte kin tehk. E inenen kansenamwahu ni atail kin tamataman mahsen akan en Melkahka 130:3: “Ma sapwung me komwi Siohwa kin ketin tetehk, Maing Siohwa, ihs me pahn kak ohng?”
16, 17. (a) Iaduwen kitail kak kapwaiada Kalesia 6:2, 5 me pid kanengamah? (b) Dahme kitail pahn sukuhliki duwen kanengamah nan artikel en mwuhr?
16 Pwe Siohwa en kupwure kitail, emen emen kitail en kakairada kanengamah, ahpw kitail en wehwehki ni mehlel me riatail Kristian akan pahn sewese kitail. E mehlel me emen emen kitail pahn pein wahda ah katoutou oh pwukoa kan, kangoang kohwong kitail en sewese emen emen en kak powehdi luwet akan. (Kalesia 6:2, 5) Kitail en kesempwaliki pahpa oh nohno, oh atail pwoud, oh kompoakepatail akan me kin irehdi kitail sang kohlahng wasa kan me kitail sohte anahne kohla ie, de irehdi kitail sang kilang mehkan me kitail sohte anahne kilang, de irehdi kitail sang wia mehkan me kitail sohte anahne wia. E ketin sewese kitail en kak kasalehda kanengamah, en kak nda soh ni mehlel!
17 Kristian tohto ele kin kapwaiada dahme kitail koasoiapenehr lel wasaht me pid kanengamah, ahpw irail ele pepehm pil mihmihete wasa me irail kak kamwahuwihala arail kanengamah en laud sang ahnsouwet. Irail pahn men kasalehda kanengamah me laudsang met, wehiou me re kamehlele me aramas soh unsek emen pahn kak kasalehda. Iei met pil duwehte ahmw pepehm? Eri, dahme ke kak wia pwe en kakairada wahn ngenen Koht? Oh iaduwen omw pahn kak wia met pwehn sewese ahmw mehn akedei nin duwen ahmw wia Kristian emen? Kitail tehkpene nan artikel en mwurin met.
Ke Tamanda?
Dahme kahrehda Kanengamah . . .
• kesempwal ong Kristian akan en kakairada?
• inenen apwal ong ekei?
• kesempwal nan pwopwoud?
• irair ehu me kitail kak sawaspene en kakairada?
[Box on Page 22]
E Esehla Nda Soh
Emen Sounkadehdehn Siohwa kan nan Germany kin doadoahk oh wia clerk emen ong technical communication. Ah doadoahko e pil kin apwalih oh tetehk television oh radio prokram akan—mpen 30 soangen prokram pwukat. Ahnsou me kilel oh ngilen television de radio kin sakanakan, e pahn kin tehk kanahieng prokramo pwe en diarada kahpwal. E koasoia: “Lingsuwed kin kalap pwarada ni ahnsou me sohte konehng en wiawi, ni ahnsou me kilelen wia tiahk lemei de tiahk samin kin wiawi. Kilel suwed akan kin tengeteng nan mohngiongiet ki rahn ekei pil kak wihk kei, likamwete re kin ntingiediong nan mwalieliet.” E wehkada me met wiahda mehkot suwed ong ah pali ngehn: “I kin wia aramas me kin mwadang en lingeringer, kahrehda kilelen wia tiahk lemei oh loallap kin kahrehda apwaliong ie en kasalehda kanengamah. Kilel en nenek kan kin kahrehda nanpwungsuwed nanpwungen ngehi oh ai pwoud. Rahn koaros I kin nantihong kesehsang ien dehr men alasang mepwukat. Pwe ien dehr luhs nan pei wet, I medewehda ien rapahki ehu doadoahk tohrohr mehnda ma e pweitikitiksang doadoahk me I wiewia met. I ahpwtehn diarada ehu doadoahk tohrohr. Dahme I mwahuki pweida.”
[Kilel nan Pali 21]
Loalokong sang onop en Pwuhk Sarawi kin sewese kitail en kanengamah