Kapwungala Nanpwung Suwed me Pid Pesines

Nan 1 Korint 6:1-8, wahnpoaron Pohl kin koasoia duwen kahpwal kan me pwarada nanpwungen Kristian akan. E kin kasalehda eh nsensuwed pwehki ekei Kristian akan nan Korint kin “lelki mwoalen kopwung en me rotorot akan.” (Iretikitik 1) Pohl kihda kahrepe kehlail kan ong Kristian akan en dehr lelki mwoalen kopwung ahpw kapwungala arail kahpwal kan nan mwomwohdiso. Kitail pahn tehkpene ekei kahrepe kan me kahrehda kaweid wet eh kohda oh ekei irair kan me kaweid wet ele sohte pahn kadoadoahk.

Ma kitail lelohng kahpwal ehu me pid pesines rehn iangatail Kristian men, keieu kitail pahn apwalih kahpwalo ni ahl ehu me Siohwa kupwurki ah kaidehn ni ahl me kitail lemeleme me pwung. (Lepin Padahk 14:12) Nin duwen Sises eh ketin kasalehda, e pahn keieu mwahu en mwadang kapwungala kahpwal ehu mwohn e pahn laudla. (Madiu 5:23-26) Ahpw, ekei Kristian akan kin akupwungki ihs me pwung oh lelki mwoalen kopwung. Pohl koasoia: “Amwail kin wia amwail repenpwung nanpwungamwail kasalehda me mie mehkot sapwung rehmwail.” Dahme kahrehda? Pwehki met pahn kak kauwehla eden mwomwohdiso oh mwaren Koht me kitail kin kaudokiong. Ihme kahrehda kitail kin men tamataman ahn Pohl peidek wet: “E soh pahn mwahu ong kumwail ma kumwail mweidalahte amwail repenpwung kan oh tounmeteikihla?”​—Iretikitik 7.

Pohl pil kin koasoia me Koht kin ketikihda koasoandi mwahu nan mwomwohdiso pwehn kapwungala kahpwal tohto. Elder kan iei ohl Kristian kei me kin ahneki erpit pwehki arail loalokongkihla padahk mehlel en Paipel, oh Pohl kin koasoia me irail “kak kapwungala repenpwung” nanpwungen Kristian akan me pid duwen arail “tiahk kan en mour wet.” (Iretikitik 3-5) Sises ketin kasalehda me kitail anahne kapwungala kahpwal kan me pid dihp laud kan me duwehte karaun likamw oh pitihdi aramas me pid mwohni ni atail kin idawehn kahk siluh pwukat: keieu, nantihong en kapwungala kahpwalo nanpwungen irail kante me pidada ireo; keriau, ma keieun kahko sohte pweida, sounkadehde emen de riemen pahn iang; oh kesiluh, ma kahk wet pil sohte pweida, tuhwong elder kan me kin wiliandi mwomwohdiso.​—Madiu 18:15-17.

Ahpw, elder kan kaidehn sounsawaspen repen pwung kan de soun pesines kan, oh irail sohte anahne kihda soangen sawas pwukat. Irail sohte kin wiahda koasoandi kan pwehn apwalih akamai kan me pid pesines me kin wiawi nanpwungen brother kan. Ahpw re kin song en sewese irail kan me ahneki nanpwung suwed ren doadoahngki Paipel oh kapwungala ni meleilei. Ma kahpwalo uhdahn apwal en kapwungala, ele elder kan pahn men ale sawas sang sounapwalih me kin seiloak de ohpis en Sounkadehdehn Siohwa kan. Ahpw mie irair teikan me ahn Pohl kaweido sohte pahn kadoadoahk. Ia ekei irair pwukat?

Ekei pak, kopwung ehu kin wiahte koasoandi ehu de anahn ehu nin duwen kosonned pwehn apwalih kahpwal ehu ni meleilei. Karasepe, mwein ihte ahl me kak sewese emen en ale doaropwe en mweipeseng en pwopwoud, ale manaman ong seri men, ale mwohni mwurin mweipeseng, ale mwohni sang insurance, de me pid duwen pweipwand laud kan de sohso. Pil mie soangen kopwung kan me brother men pahn wia pwehn perehsang ih ehu kopwung me aramas wiahda pwehn uhwong ih.a

Ma soangen kopwung pwukat pahn wiawi kaidehn ni elen akamai, met sohte pahn kauwehla ahn Pohl kaweido.b Ahpw Kristian emen anahne keieu nsenohki kasarawihala mwaren Siohwa oh meleilei oh minimin en mwomwohdiso. Sapwellimen Krais tohnpadahk kan kin keieu sansalkihda arail limpoak, oh “limpoak sohte kin . . . mehwo.”​—1 Korint 13:4, 5; Sohn 13:34, 35.