Irelaud 11

Met Iei Imwin Rahn Akan!

1. Dahme kahrehda me tohto solahr ahneki koapworopwor nin doken arail kin kilang mehkan me wiwiawi nan sampah, ahpw iawasa me kawehwe mehlel en irair akan me wiwiawi nan sampah kak dierek ie?

IADUWEN sapwatail sampah liseliping wet ah lelohng dahme wiawi ahnsou wet? Dahme pahn wiawi ni ahnsou kohkohdo? Mie pak me ke kin idek peidek pwukat? Aramas tohto solahr ahneki koapworopwor ni arail kin kilang irair en sampah. Soahng kan me duwehte mahwen, soumwahu, oh tiahk lemei kin kahrehong me tohto en medemedewe dahme rahn kohkohdo kan pahn wahdo. Kaunen wehi kan sohte kin kihong kitail mehkot me kitail en koapworopworki. Ahpw, kawehwe mehlel me kitail kak koapworopworki me pid rahn kapwunod pwukat kak dierek nan Mahsen en Koht. Paipel kin sewese kitail en kilangada iawasa kitail lelehr nan irair en ahnsou. E kasalehda me kitail mihier nan “imwin rahn akan” en koasoandi suwed wet.—2 Timoty 3:1.

2. Peidek dah me sapwellimen Sises tohnpadahk kan idek reh, oh ia mwomwen e pasapeng met?

² Tehk mahs duwen pasapeng me Sises wia pwehn sapengla ekei peidek kan me sapwellime tohnpadahk kan wiahiong ih. Rahn siluh mwohn Sises ah matala, irail idek reh: “Ia pahn kilelepen omwi pahn ketiketier nan mwoalomwi nanleng oh pil kilel en imwin koasoandi wet?”a (Madiu 24:3, NW) Sises eri sapeng irail oh padahkihong irail en tehk kanahieng duwen irair ekei en mwekimwekid en sampah, ma soahng pwukat pahn wiawi a ren esehki me koasoandi en sampah suwed wet tepidahr mihla nan imwin rahn akan.

3. Dahme kahrehda irair akan nan sampah suwedala ni ahnsou me Sises tepida kaunda?

³ Duwen ah sansalehr nan irelaud en mwowe, irekidi en pahr akan nan Paipel kin kasalehda me Wehin Koht tepiadahr kaunda. Ahpw, iaduwen met kak wiawi? Irair akan en sampah inenen suwedlahr, oh sohte wie mwamwahula. Ni mehlel, met wia kadehde kehlail ieu me Wehin Koht tepidahr kakaun. Dahme kitail ndahki met? Eri, Melkahka 110:2 padahkihong kitail me ahnsou ehu Sises pahn ‘kaunda nanpwungen sapwellime imwintihti kan.’ Ni mehlel, tepin sapwellime mwekid nin duwen Nanmwarki en lahng iei ni ah pahn kesehsang Sehdan oh ienge kan sang nanleng ong sampah. (Kaudiahl 12:9) Dahme met pahn kahrehdo? E pahn wiawi nin duwen me Kaudiahl 12:12 kohpadahro: “Ahpw meid suwediong sampah oh madau! Pwe Tepilo leledohr rehmwa, oh e inenen lingeringer kowahlap pwehki eh ese me eh ahnsou mwotomwotalahr.” Kitail mihmihier nan “ahnsou mwotomwoto.”

4. Ia ekei irair akan me kin wia kasalepen imwin rahn akan, oh dahme irair pwukat kin kasalehda? (Kilang koakon.)

⁴ E sohte kapwuriamwei me ni ahnsou me irail idek rehn Sises ia kilel en ah pahn ketiketier nan mwoale nanleng oh irair akan me wia kasalepen imwin koasoandi wet, e ketikihda pasapeng sansal me kamwekidada laud arail madamadau. Ekei kisehn kilel ko kin mih nan koakon me mih nan pali 102. Ke kak kilang me Kristian wahnpoaron Pohl, Piter, oh Sohn pil kihda ekei kadehde oaritik kan me pid duwen imwin rahn akan. Mehlel, pali tohto en irair akan me wia kasalepen imwin rahn akan kin pid wiewia kapwunod kei. Ahpw, pweidahn kokohp pwukat kin kamehleleong kitail me kitail mihier ni imwin koasoandi suwed wet. Kitail pahn kasawih kanahieng ekei irair kesempwal akan me wia kasalepen imwin rahn akan.

IRAIR AKAN ME WIA KASALEPEN IMWIN RAHN AKAN

5, 6. Ia mwomwen kokohp akan me pid mahwen oh lehk lapalap kin pweida?

⁵ “Ehu sahpw pahn uhwong ehu sahpw, ehu wehi pahn mahweniong ehu wehi.” (Madiu 24:7; Kaudiahl 6:4) Soun nting men Ernest Hemingway kahdaneki Mahwen Keieu en Sampah “iei mahwen me keieu lap, oh kamaramas ni loallap mwersuwed, oh kamaramas ni wiepe sapwung me ehdin ah wiawi nan sampah.” Nin duwen pwuhk me oaralap koasoia The World in the Crucible—1914-1919, met wia “irair en mahwen kapw ehu, iei tepin mahwen me pidada mour en aramas koaros nan sampah ni ahnsou tehkis. Werein mahweno, uk en mahweno oh lap en mahweno daulihala dahme aramas kin kilangehr mahs oh pil daulihala dahme aramas kasik.” Mwurin mwo, Mahwen Keriau en Sampah wiawi, oh e suwed sang Mahwen Keieu en Sampah. Nin duwen sounpadahk en poadoapoad me ede Hugh Thomas koasoia, “Senturi kerieisek direkihla kesik pirerrer (machine gun), dangku, sompihr B-52, kensi pakudang, oh missile kan. E pil kin ndandki ah dirkihla mahwen akan me kakerehdi nta laud oh pil kauwehla sahpw laud sang ahnsou teikan. Mehlel, koasoi tohto kin pid duwen ahr sohla pahn wiahda kepwehn mahwen mwurin Cold War ah imwisekla. Pil ehu ripoht kasalehda me ma ketikilahn dipwisou en mahwen pahn wiawi, miehte kinsi pakudang 10,000 lel 20,000 me pahn luhluhwe—kehlail sang pahn pak 900 me kadoadoahk erein Mahwen Keriau en Sampah.

⁶ “Pahn mie lehk lapalap.” (Madiu 24:7; Kaudiahl 6:5, 6, 8, NW) Sangehr nan pahr 1914 kohdo, mie lehk lapalap tohtohsang 20 me wiawihier. Wasa kan me lelohng kahpwal wet iei Bangladesh, Burundi, Cambodia, China, Ethiopia, Greece, India, Nigeria, Russia, Rwanda, Somalia, oh Sudan. Ahpw, duhpek sohte kin kohsangete sohte itar en mwenge. “Wasa kan nahkpenehn mwenge ohng sampah nan atail ahnsou kin laudla mwadangasang tohtohlahn aramas,” oh iei met dahme pwihn en saintis en wahn sahpw akan oh pwihn en tetehk keirdahn pai en wehi kan koasoia. Irail pil doula oh koasoia me: “Pwehki tohtohsang aramas rar pak 800 kin mihmihte nan irair en paisuwed, . . . irail sohte kak pwainda uwen me itar ohng kihsang irail sang nan irair en soh itar en pilen mwenge nan paliwararail.” Nan ekei ahnsou, palien politiks me kin liderehda oh kahrehda aramas arail lelohng irair wet. Dr. Abdelgalil Elmekki me kin sounpadahk nan University en Toronto, kihda mehn karasepe ohng wehi riau, wasa me aramas kid kei kin duduhpek ahpw wehi pwukat kin netikihieilahng maslikin wehi pwukat diren mwenge. Kaunen wehi pwukat likamwete re nsenohki koledi mwohni mehn sewese arail dipwisou en mahwen laudsang arail nsenohki kamwenge tohn sapwerail me duhpeklahr akan. Dahme Dr. Elmekki diarada? Duhpek kin kalap sang ni “nehne sapahrek en mwenge oh koasoandi en wehi kan me kin kaweid iren kihpeseng mwenge.”

7. Ia irair mehlel akan me pid soumwahu lusulus kan nan rahn pwukat?

⁷ “Soumwahu lusulus kan.” (Luk 21:11; Kaudiahl 6:8, NW) Spanish influenza (Spanish flu) me wiawi nan pahr 1918-1919 kemehla aramas rar pak 21. A. A. Hoehling ntingihdi nan pwuhk me oaralap koasoia The Great Epidemic: “Mahs, sampah nin duwen poadoapoad sohte kin lelohng soangen mehn kamaramas duwehte met, me kin mwadangete kemehla aramas tohto.” Rahnwet, soumwahu lusulus akan kin paraparala. Ehuehu pahr, kanser kin kemehla mpen aramas rar (million) pak isuh, oh mehn tang kin kihsang mour en seri pwelel oh seri laud mpen rar (million) pak 1.5, oh limengimeng pil kin kemehla aramas rar (million) pak 1.5 samwa. Soumwahu en ngolungol, ahpw mehlel, ngolungol wisekesek, kin kemehla aramas pwulopwul me mih pahnangin sounpar limau, meh rar (million) pak riau nan ehu ehu pahr. Ahpw, dahme kin inenen kapwuriamwei iei aramas lik (billion) pak 2.5—kereniong elep en tohnsampah—kin ahneki soumwahu kan me kin kohsang sohte itar de saminlahn pihl en nimpil akan oh samin en wasahn kousoan. Paralahn soumwahu AIDS wiahiong kitail mehn kataman me mendahki aramas ah deila nan palien wini, e sohte kak kihweisang tohnsampah soumwahu lusulus akan.

8. Ia mwomwen mehn kadehde mwahu kan a kasalehda me aramas akan kin “limpoak ong mwohni”?

⁸ “Aramas tohto pahn . . . limpoak ong mwohni.” (2 Timoty 3:2) Wasa koaros nan sampah, aramas akan kin noahroke kepwehn sampah. Nan madamadau en aramas, “kepwehpwe” kin poahsoankihda ia uwen laud en noumw paycheck, “pweida” kin poahsoankihda ia uwen dipwisou kan me ke ahneki. Emen vice president en palien koasoakoasoia kamwahupen dipwisou kan koasoia: “Noahrok en dipwisou me pahn kaukaule wia mehn kamwekid aramas akan en Amerika . . . oh pahn wia mehn kamwekid wiewiahn pisnes laud akan.” Met kin wiewiawi nan wasa me ke koukousoan ie ahnsou wet?

9. Dahme kitail kak ndahki kokohp me pid sapeik ong pahpa oh nohno?

⁹ “Sapeik ong pahpa oh nohno.” (2 Timoty 3:2) Pahpa oh nohno kan en rahnpwukat, oh sounpadahk kan en sukuhl, oh meteikan pein kilang duwen loaumwohmw oh sapeik en seri kan. Ekei me pwulopwul pwukat kin mwekidki de pil alasang wiewia suwed akan me arail pahpa oh nohno kin wia. E wie tohtohla irail seri kan me solahr kamehlele oh pil kin uhwong koasoandi en sukuhl akan, palien kosonned, pelien sarawi oh pil iangahki pein arail pahpa oh nohno. Emen ohl me wia sounpadahk en sukuhl wereila koasoia: “E wiahlahr tiahk ieu rehrail me likamwete solahr mehkot me re kin wauneki.” Ahpw, e kaperen en ese me seri tohto me kin lahn Koht nan rahnwet kin kasalehda mehn kahlemeng mwahu kan.

10, 11. Mehn kadehde dah me mie me kasalehda me aramas akan kin lemei oh sohte ahneki limpoak mehlel?

¹⁰ “Lemei.” (2 Timoty 3:3) Lokaiahn Krihk me kawehwe lepin lokaia wet “lemei” kin wehwehki ‘lawalo de tiahk en emen me sohte ahneki pepehm en limpoak.’ Ia uwen met a nohn kawehwehda mwahu duwen lamalam en aramas akan me kin kauwehla onepek en aramas teikan nan rahnwet! Emen soun ntingihada nuhs koasoia: “Mour kin nohn diren kahpwal oh kamedek, inenen direki kamaramas kamasepwehk kan me kahrehda e anahne aramas me kapederail kan wiawihkihda mete en kak wadek nuhs en nan rahn akan.” Emen police sergeant me kin wia sounsile wasahn kousoan kin tetehk me irail me pwulopwul kan sohte kin men kilang imwila suwed akan me kin kohsang arail wiewia kan. E koasoia: “Mie soangen pepehm me dene ‘I sehse dahkot lakapw. I pahn ale dahme I anahne rahnwet.’”

¹¹ “Sohte ahneki limpoak mehlel.” (2 Timoty 3:3) Lepin lokaia pwukat kin kawehwe sang ni lokaiahn Krihk me wehwehki “sohte limpoak nan kapehd” oh pil kin wehwehki “sohte limpoak nanpwungen tohn peneinei.” (The New International Dictionary of New Testament Theology) Ei, limpoak kin kalap sohte mih nan wasa ieu me e konehng en keirda ie—nan pein imwomw. Ripoht en wie kauwe arail pwoud, neirail seri kan, oh pil pahpa oh nohno me likeilapalahr akan wia mehkot me inenen rek. Ehu pwihn en roporop koasoia: “Pei nanpwungen aramas—sohte lipilipil ma popohr ehu de pisiken, de doakoahki naip de kesik—kin kalap wiawi nan peneinei laud sang wasa teikan.”

12. Dahme kahrehda kitail kak ndahki me aramas akan kin ihte mwomwehda me irail lelepek ong Koht?

¹² “Re pahn kin liksansalamwahuki mwomwen arail pelien lamalam, ahpw re kin kahmahmki katepe.” (2 Timoty 3:5) Paipel sapwellimaniki kehl en wekidala mour suwed en aramas kan. (Episos 4:22-24) Ahpw, me tohto nan rahnwet me kin doadoahngki arail pelien lamalam pwehn kin karukihala arail wiewia kan me Koht kin ketin kalahdeki. Kaunen lamalam tohto kin mweidong likamw, pirap oh nenek en kin wiawi. Palien sarawi tohto me kin padahki limpoak ahpw pil kin utungada mahwen. Emen soun nting en nuhs me ede India Today kin tetehk me “ni mwaren Sounkapikada Ileile, aramas wiahkihda wiewiahn kasaut oh lemei tohto ohng aramas teikan.” Ni mehlel, mahwen riau me keieu kakerehdi nta laud nan ahnsou kerendo kan—Mahwen Keieu oh Mahwen Keriau en Sampah—tepida sang nan Kristendom.

13. Mehn kadehde dah me mie me aramas kin kauwehla sampah?

¹³ “Kauwehla sampah.” (Kaudiahl 11:18) Saintis pohnangin 1,600 me pil iangahki irail me alehdi Nobel Prize 104, me kohsang wasa koaros nan sampah, pwungki mehn kaweid me kohdahsang rehn Union of Concerned Scientists (UCS), oh koasoia: “Aramas kin uhwong war en sampah. . . . Erein pahr malaulau kei me luhluhwe me kahpwal wet pahn wahdo lapalahn luhs ohng kitail.” Ripohto koasoia me wiewiahn aramas akan me wia keper ohng mour “pahn kakete wekidala irair en sampah en sohla kak kolokol ong kitail mour nin duwen ahnepatail.” Tikitikilahn ahng en nan wehwe me ede “ozone,” saminlahn pihl akan, ohlahn wahl akan, sohralahn audepen pwehl akan, oh mwomwlahn soangsoangen mahn oh tuhke kan: kahpwal pwukat kin wia kahpwal akan me pasapengparail anahne en mwadang dierekda. Pwihn en UCS pil koasoia: “Atail mwamwahleki soahng kan me kin kolokol toupahrek en mour pahn kakete wahdo kahpwal me pahn keper wasa koaros, iangahki ohlahn utupen ehupenehn mour akan me kitail sohte wehwehkihla ni unsek.”

14. Iaduwen ahmw pahn kadehde me Madiu 24:14 pweidahr nan atail ahnsou?

¹⁴ “Rongamwahu en Wehin Koht pahn lohkseli wasa koaros nin sampah.” (Madiu 24:14) Sises kohpada me Rongamwahu en Wehio pahn kalohkseli wasa koaros nan sampah pwehn wia kadehde ohng sahpw akan koaros. Ki sawas oh kapai en ngehn sarawi, Sounkadehdehn Siohwa rar rar kei (millions) kin lelepek oh kihong awa lik kei (billions) nan doadoahk en kalohk oh katohnpadahkihala aramas akan. (Madiu 28:19, 20) Ei, Sounkadehde kan wehwehki me irail pahn pwukoahki ntahn aramas akan ma re sohte lohkihong irail Rongamwahu en Wehin Koht. (Esekiel 3:18, 19) Ahpw, irail kin peren pwehki nan ehuehu pahr aramas kid kei kin diar peren oh mwekidkihda nan kapehderail padahk en Wehin Koht oh irail kin wiahda arail pilipil en wiahla Kristian mehlel, oh wiahla Sounkadehdehn Siohwa kan. Sohte lokaia kak pahrekiong me pahn kawehwehda kapai tohrohr wet en iang papah Siohwa oh iang wahseli loalokong me pid duwen Koht. Mwurin Rongamwahu wet ah pahn lohkseli wasa koaros nan sampah, koasoandi suwed wet pahn kasohrala.

MWEKIDKI MEHN KADEHDE PWUKAT

15. Iaduwen koasoandi suwed wet a pahn imwisekla?

¹⁵ Ia mwomwen koasoandi wet ah pahn imwisekla? Pwuhk Sarawi kohpadahr me “Kahn Kamakam Kowahlap” pahn tepikihda palien politik en sampah pahn kauwehla “Papilon Lapalap,” me iei minimin en kaudok likamw akan en sampah koaros. (Madiu 24:21; Kaudiahl 17:5, 16) Sises mahsanih me ni ahnsowo ‘ketipin pahn rotala, oh maram solahr pahn kihda ah marain, oh usu kan pahn pwupwudihsang nanleng, oh kehlen nanleng kan pahn mwerada.’ (Madiu 24:29, NW) Met kakete wehwehki uhdahn mwekimwekid en audepen lahng kan. Ahpw, e sansal me irail akan me wia kamarainpen palien sarawi kan arail sapwung kan pahn sansalada oh irail pahn kasohreweisang. Mwuri, Sehdan, me ede “Kok en sapwen Makok,” pahn doadoahngki aramas mwersuwed akan en wahdo lokolok pohn sapwellimen Siohwa aramas akan. Ahpw, Sehdan sohte pahn pweida, pwe Koht pahn sewese irail. (Esekiel 38:1, 2, 14-23) “Kahn Kamakam Kowahlap” pahn lelohng ah irair en uk koaros nan Armakedon me iei “mahwen me pahn wiawi ni Rahn Lapalap en Koht, Wasa Lapalahpie.” E pahn kin kamwomwala luwen nein Sehdan pwihn en sampah, oh ritingada ahl ohng kapai mwuledek soh imwi en kin pwilipwildohng tohn sampah me momour akan.—Kaudiahl 7:9, 14; 11:15; 16:14, 16; 21:3, 4.

16. Dahme kitail esehki me irair akan me mih nan kokohp akan me pid imwin rahn akan kin dokedoke atail ahnsou?

¹⁶ Ni ehuehu kokohp akan me pid imwin rahn akan a pahn kin pwarada kelehpw, likamwete e kin dokedoke ekei ahnsou tohrohr. Ahpw, ni arail kin pwarada ni ahnsou tehieu, e kin dehde me e dokedoke atail ahnsou. Pwehn karasahda met: Koasoandi en lain akan nan sendin pehn aramas emen sohte kak duwehte lain en nan sendin pehn aramas teikan. Pil duwehte met, koasoandi en imwin rahn akan pil mie pein ah kilel akan, de mwekid kan, me weksang ahnsou teikan. Mehpwukat kin wiahda “lain en nan sendin peh” me sohte pwarada nan ahnsou teikan. Ni atail pahn tehkpene kawehwe kan en Paipel me kasalehda me Wehin nanleng kakaunehr nan ahnsou wet, met wia poahsoan en kadehde kehlail me kitail kak ndahki me kitail mihier nan imwin rahn akan. Oh pil, mie mehn kadehde sansal sang nan Pwuhk Sarawi me koasoandi suwed wet pahn mwadang ohla.

17. Ma kitail wehwehkiher me kitail mihier nan imwin rahn akan, dahme met pahn kamwekid kitail en wia?

¹⁷ Iaduwen ahmw pahn mwekidki mehn kadehde kan me kasalehda me kitail miher ni imwin rahn akan? Tehk kanahieng ire wet: Ma melimel kehlail ieu pahn lelodo, kitail kin mwadang kaunopada mwahu mwowe. Eri, dahme Paipel kohpadahr me pid duwen koasoandi wet me kitail mihmi loale uhdahn pahn pil kamwekid kitail en kaukaunop. (Madiu 16:1-3) Kitail kakehr kilang me kitail mihmihier nan imwin rahn akan en koasoandi wet. Met uhdahn pahn kamwekid kitail en wiahda wekidekila kan me anahn pwehn kahrehong Koht en ketin kupwurkin kitail. (2 Piter 3:3, 10-12) Ni Sises ah ketin kasalehda me iei ih me pahn ketikihdo komour, e ketikihda mahsen karuwaru mahsanih: “Kumwail pein mwasamwasahn kumwail. Kumwail dehr kedirepwehkin kumwail mwenge laud oh sakau kehlail oh pwunod kan en sampah wet; pwe Rahno kakete leledohng kumwail ni ahnsou mwadang. E pahn kohdo rasehng nsar ehu ong aramas koaros pohn sampah. Kumwail eri mwasamwasahn oh kapakap ahnsou koaros pwe kumwail en kehlail oh itarohng pitsang mepwukat koaros me pahn wiawi, oh pil warohng uh mwohn silangin Nein-Aramas.”—Luk 21:34-36.

[Nting tikitik me kileldi pah]

SONG UWEN ME KE KOLEDI

Dahme Paipel kohpada duwen mehkan me pahn pwarada nin sampah ni ahnsou me Krais pahn tepidahr sapwellime kaunda?

Ia ekei mehn kadehde kan en imwin rahn akan?

Dahme kahrehda ke kamehlelehki me rahn pwukat iei imwin rahn akan?

[Koakon nan pali 102]

EKEI MEHN KADEHDE KAN ME WIA KISEHN KILEL EN IMWIN RAHN AKAN

• Mahwen me sohte me pahrekiong.​—Madiu 24:7; Kaudiahl 6:4.

• Lehk lapalap akan.​—Madiu 24:7; Kaudiahl 6:5, 6, 8.

• Soumwahu lusulus kan.​—Luk 21:11; Kaudiahl 6:8.

• Tohtohlahn kauwehla kosonned.​—Madiu 24:12.

• Kauwehla sampah.​—Kaudiahl 11:18.

• Rerrer en sahpw akan.​—Madiu 24:7.

• Ahnsou apwal me sohte me pahn kakohng.​—2 Timoty 3:1.

• Noahrok en mwohni.​—2 Timoty 3:2.

• Sapeik ong pahpa oh nohno.​—2 Timoty 3:2.

• Sohte ahneki limpoak mehlel.​—2 Timoty 3:3.

• Poakohng pein arail ineng laudsang kupwuren Koht.​—2 Timoty 3:4.

• Sohte kak kanengamah.​—2 Timoty 3:3.

• Sohte poakohng me mwahu.​—2 Timoty 3:3.

• Sohte tehk kanahieng keper kan me kohkohdo mwowe.​—Madiu 24:39.

• Irail me lahlahwe kan kin kelikemwe mehn kadehde kan en imwin rahn akan.​—2 Piter 3:3, 4.

• Kalohkpen Wehin Koht kipe sampah pwon.​—Madiu 24:14.

[Kilel kan nan pali 100, 101]