Wiewia Ehu me Keieu Kesempwal
1 Sises ketido sampah sang ni kaweid en Semeo pwehn kadehdehda me mehlelo me pahn kahluwakitaillahng mour soutuk. (Sohn 18:37) Sapwellime lelepek lau lel eh pwoula wahdo wahu ong Siohwa, kasarawihla mwaren Koht, oh kihda tomw. (Sohn 17:4, 6) Ire pwukat me kahrehda pwoulahn Sises kin wia wiewia ehu me keieu kesempwal nan poadoapoad en aramas.
2 Sangete ni kapikipikdahn Adam, ohl riemente me unsek me mour pohn sampah wet. Adam kak wahdo kapai kaselel kan ong nah kan me saikinte ipwidi. Ahpw, ni roporop, e uhwongada Koht, oh kahrehong kadaudoke kan nan mour ehu me kansensuwed me pahn imwikihla mehla. Ni ahnsou me Sises ketido, e kasansalehda loalopwoat unsek oh peik, oh ritingada ahnsou mwahu ong koaros me kasalehda pwoson mour soutuk.—Sohn 3:16; Rom 5:12.
3 Sohte wiewia ehu me kak kapahrekiong meirong en Sises. Meirong wet wekidala poadoapoad en aramas. E kihda poahsoan en iasadahn aramas lik kan sang mehla. E kihda utupen Wehi poatopoat ehu me pahn kaimwsekla me suwed kan oh wahdohng pohn sampah ehu paradais. Ni unsek e pahn kasaledekla tohnsampah koaros sang soahngen kalokolok oh kailok koaros.—Mel. 37:11; Wiewia 24:15; Rom 8:21, 22.
4 Mehpwukat koaros kin sewese kitail en kalahnganki kahrepen Sises kaweidki sapwellime tohnpadahk kan en katamanda ah pwoula ni ahr pahn kasarawihla nan ehuehu sounpar. (Luk 22:19) Pwehki atail kalahnganki wehwehn wiewia wet, kitail kin kilikilangwohng en iang towehda nan mwomwohdisohn Sounkadehdehn Siohwa kan nan sampah pwon mwurin kihrlahn ketipino Ni Epeng, April 1. Mwohn ahnsouwo, e pahn mwahu nin duwen peneinei ehu en wadekpene nan Paipel duwen kaimwseklahn mouren Sises pohn sampah oh ah eimah loaleniong me mehlelo. (Iren Paipel kan me koasoandi en wadawad kin kileledi pohn neitail Calender 1999, March 27-April 1.) E ketikihdiong kitail mehn kahlemeng ehu en loalopwoat ong atail Sounkapikada. (1 Piter 2:21) Kitail en wia uwen me kitail kakohng koaros en lukehdo kompoakepahtail kan oh atail peneinei, iangahki irail kan me kitail kin onop Paipel rehrail oh mehteikan me kin perenki rong padahk mehlel, ong kapokon kesempwal wet. Kawehwehiong irail mwowe dahme pahn wiawi oh ia wehwehn pilawao oh waino.—1 Korint 11:23-26.
5 Nan pahr samwalahro, kapatapatpenen nempehn aramas koaros me iang towehda nan sampah pwon pwehn katamanda wiewia kesempwal wet mihmi ni uwen aramas 13,896,312. Pwehki e wia rahn ehu me keieu kesempwal nan neitail kalender, kitail koaros anahne en iang towehda.