“Kumwail Wia Met ong ni Katamanpei”
Katamanpen en Sises pwoula pahn wiawi ni April 2
1. Dahme kahrehda April 2, 2007 wia rahn kesempwal ehu?
1 Ni April 2, 2007, aramas rar kei nan sampah pahn pokonpene pwehn kawauwih en Sises meirong en tomw. Sises pwoula nin duwen emen me kin utungada kaundahn Seme nanleng, pwehn kihda mehn kadehde me Sehdan me Tepil wiahda karaun likamw me aramas akan kin papah Koht pwehki irail kin roporop ongete pein irail. (Sohp 2:1-5) Sak en Soutik en Kauno pil katamankin kitail me sang ni eh pwoula nin duwen aramas unsek men, soh dipe, Sises ‘tounmeteikihla moure, pwe me ngeder en maiauda.’ (Madiu 20:28) Ihme kahrehda, Sises kehkehlikihong sapwellime tohnpadahko: “Kumwail wia met ong ni katamanpei.” (Luk 22:19) Ahmw kalahnganki sapwellimen Koht kisakis kesempwal wet kin kamwakid komwi en tepida kaunopada pwehn kawauwih wiewiahn limpoak laud wet?—Sohn 3:16.
2. Iaduwen atail kak kaunopada atail mohngiong ong Kataman wet?
2 Kaunopada Omw Mohngiong: Sang atail pahn medemedewe dahme wiawiher nan ehu ehu rahn ni imwilahn mour en Sises nin duwen aramas emen, kitail kak kaunopada atail mohngiong ong kasarawih Kataman wet. (Esra 7:10) Pwehn sewese kitail en wia met, koasoandi tohrohr ehu en wadawad en Paipel kak dierek nan Iren Rahn en 2007 oh nan Kalendar en 2007. Koasoandi en wadawad wet kin pahrekiong dahme wiawi ni rahn akan me pid pwoulahn Sises oh kin pahrekiong Kalendar me kitail kin doadoahngki rahn pwukat. Rahn akan kin kasalehda me dahme ntingdi nan Paipel kin poahsoanda pohn nein mehn Suhs akan kalendar, me kin tepida sang ni kihrlahn ketipin lel kihrlahn ketipin. Petehkpen wekpeseng en rahn akan wiawiher ni keneinei oh koasoandier nan koasoandi en wadawad en Paipel en Katamano. En kousapahlih ire kesempwal kan sang nan wadawad en Paipel oh doudouloale ni kapakap soangen limpoak laud en Koht pahn sewesei kitail en paiekihda mehlel atail kawauwih Kataman wet.
3. Iaduwen atail kak sewese irail me perenki rong oh irail me solahr iang kalohk en paiekihda Katamano?
3 Luhke Meteikan en Iang Towehda: Insert en Atail Doadoahk Ong Wehio en February pakairki ehu doadoahk tohrohr en luhke aramas akan ong ni koasoandi kesempwal wet. Ke wiadahr koasoandi en iang wia doadoahk tohrohr wet? Ke ntingihdier eden irail akan me ke pahn luhke oh tepidahr tuhwong irail? Wiahda koasoandi en kohdo mwadang nan Kingdom Hall ni soutik en rahn en Katamano pwe ken kasamwo irail akan me ke luhke oh pil meteikan. Ke kak mwohndi rehrail, tehk mwahu ma mie neirail Paipel oh pwuhken koul. Kapehse irail ong meteikan nan mwomwohdiso. Mwurin prokramo, wiahda omw ahnsou pwe ken kak sapeng arail peidek kan. Luhke irail en iang towehda kapahrek en wehi pokon tohrohr ehu me pahn wiawi ni April 15. Elder kan pahn nantihong pwe irail akan me kin iang mwomwohdiso mahs ahpw met sohlahr iang kalohk ren alehdi neirail doaropwe en luhk en iang towehda Katamano oh kapahrek tohrohro.
4. Iaduwen atail kak sewese aramas akan en pousehlahte arail kekeirda ni pali ngehn mwurin arail iang towehda katamano?
4 Sewese Irail me Kapw kan oh me Sohlahr Iang Kalohk kan en Kekeirada: Me pahn wia padahk en Katamano pahn ni oaralap kawehwehda koasoandi en onop Paipel oh kangoange irail me kapw kan en pousehlahte sukuhliki duwen Siohwa. Ke kak doadoahngki ah kaweid en pali ngehn kan ken sewesehki irail akan me ke luhke. Ma ni ahnsowo re sohte kin onop Paipel, nantihong pwe ken mwadang pwarek irail mwurin Katamano oh kasalehda ia mwomwen onop Paipel ni soh isepe. Pwe ren kak kekeirada ni pali ngehn, irail pil anahne iang towehda mihding en mwomwohdiso kan. (Ipru 10:24, 25) Kangoange irail en kaukaule iang towehda mihding kan pwehn kak pweida mwahu. Elder kan pahn wiahda koasoandi en pwarek irail akan me solahr iang kalohk me iang towehda katamano oh sewese irail en pil medemedewe ire kan me pwarada. Met mwein kak kangoange irail en pwurehng wia dahme irail kin wia nan mwomwohdiso.
5. Soangen kamwahu dah kan kitail kak ale sang atail iang towehda Katamano?
5 En iang kawauwih Katamano wia ehu ahnsou kesempwal en doudouloale dahme Siohwa oh Sises ketin wia pwehki kitail. Atail doudouloale mepwukat kin kaloalehla atail limpoak ong ira oh kamwahuiala atail wiewia kan. (2 Korint 5:14, 15; 1 Sohn 4:11) Met iei ahnsoun tepida kaunopada pein kitail oh irail kan me perenki rong ong wiewia kesempwal wet me kitail kin ‘kalohki pwoulahn Kauno.’—1 Korint 11:26.