“Kumwail Wia Met”
Kataman Pahn Wiawi April 5
1. Dahme kahrehda rahn en Katamano kin wia rahn me keieu kesempwal?
1 “Kumwail wia met ong ni katamanpei.” (Luk 22:19) Sises mahsanih met ni eh ketin kehkehlikihong sapwellime tohnpadahk ako ren kin wia katamanpen sapwellime pwoula. Pwehki dahme sapwellimen Sises meirongo wiadahr, rahn me keieu kesempwal rehn Kristian kan iei rahn en Katamano me kin wiawi nan pahr koaros. Ni rahn en Katamano, April 5, eh pahn kereniong lel, ia duwen atail kak kasalehda atail kalahngan ong Siohwa?—Kol. 3:15.
2. Ia duwen atail kak kasalehda atail kalahnganki Katamano sang atail onop oh doudouloale?
2 Kaunopada: Kitail kin kalapw kaunopada ong ahnsou kan me kitail kin medewe e kesempwal. Kitail kak kaunopada mohngiongitail ong Katamano sang ni atail kin onopki oh doudouloale nin duwen peneinei ehu dahme wiawi erein kaimwiseklahn rahn akan me Sises ketiket sampah. Ke kak kilang koasoandi en Wadawad en Paipel ong Katamano nan pali 3 en Atail Doadoahk ong Wehio en November 2011.
3. Ia duwen atail kak kasalehda atail kalahnganki Katamano sang atail kalaudehla atail ahnsou en kalohk?
3 Kalohk: Kitail pil kak kasalehda atail kalahngan sang ni atail kin kihong ahnsou ni uwen me kitail kak nan doadoahk en kalohk. (Luk 6:45) Doadoahk tohrohr me pahn wiawi sampah pwon en luke meteikan ong Katamano pahn tepida Rahn Kaunop, March 17. Ke kak wekidala omw koasoandi kan pwe ken kihong ahnsou laud ong kalohk, ele iang wia sawaspen pioneer? Kumwail sou koasoiapene met nin duwen peneinei ehu ni ahnsou me kumwail pahn pwurehng wia amwail Kaudok en Peneinei?
4. Dahme kitail kak paiekihda sang ni atail iang towehda Katamano?
4 Ia uwen atail kin paiekihda atail iang towehda Katamano ehuehu sounpar! Atail peren oh pil atail limpoak ong Koht kin laudla ni atail kin medemedewe duwen sapwellimen Siohwa kadek sapan ni eh ketikihda sapwellime Iehros nin duwen meirong ehu. (Sohn 3:16; 1 Sohn 4:9, 10) Met kin kamwakid kitail en dehr kin mourki pein kitail. (2 Kor. 5:14, 15) E pil kamwakid kitail en men kapinga Siohwa mwohn aramas akan. (Mel. 102:19-21) Mehlel, sapwellimen Siohwa ladu kan kin uhdahn kasikasik arail pahn wia Katamano ni April 5 pwehn “kalohki pwoulahn Kaun-o.”—1 Kor. 11:26.