Kitail en Kasalehda Kalahngan Kataman Pahn Wiawi ni April 17
1. Soangen pepehm dah me konehng kitail en ahneki nan erein ahnsoun Katamano?
1 Pwehki sounmelkahkao kalahnganki sapwellimen Siohwa mahk oh eh kin ketin doarehla ih, e peidengki: “Dahme I kak meirongkihong KAUN-O dupuk en sapwellime kalahngan ong ie?” (Mel. 116:12) Rahnwet sapwellimen Koht ladu kan ahneki kahrepe laud sang sounmelkahkao en kasalehda kalahngan. Sounpar epwiki kei mwurin mahsen pwukat ar ntingdi, Siohwa ketikihong tohnsampah kisakis me keieu laud iei tomwo. Ni atail kaunopada ong katamanpen pwoulahn Krais me pahn wiawi ni April 17, kitail ahneki kahrepe mwahu kan en kin kasalehda kalahngan.—Kol. 3:15.
2. Ia ekei kahrepe kan kitail en kasalehda atail kalahnganki tomwo?
2 Kapai kan en Tomwo: Pwehki tomwo kitail kakehr ale lapwepen dipatail kan. (Kol. 1:13, 14) Met kahrehiong kitail en kak kaudokiong Siohwa ni nsenmwakelekel. (Ipru 9:13, 14) Kitail kak ahneki saledek ni atail kin kapakap ong Siohwa. (Ipru 4:14-16) Irail kan me kin pwoson tomwo kin ahneki koapworopwor kaselel en mour soutuk!—Sohn 3:16.
3. Ia duwen atail kak kasalehiong Siohwa atail kalahnganki tomwo?
3 Kasalehda Kalahngan: Ehu ahl me kitail en kasalehda atail kalahnganki tomwo iei en wia wadawad en Paipel en Katamano ehuehu rahn oh doudouloale. Kitail pil kak kasalehiong Siohwa ia uwen atail kin kalahnganki tomwo nan atail kapakap kan. (1 Des. 5:17, 18) Atail kin peikiong sapwellimen Sises kehkehlik en iang towehda Katamano kin kasalehda atail kalahngan. (1 Kor. 11:24, 25) Patehng met, kitail kak kahlemengih sapwellimen Siohwa limpoak laud oh luke koaros me kak iang kitail towehda Katamano.—Ais. 55:1-3.
4. Dahme kitail koasoanehdi kitail en wia?
4 Ma kitail kin kalahnganki dahme Siohwa ketin wia, kitail sohte pahn wiahki Katamano duwehte mihting teikan. Katamano iei mihting me keieu kesempwal! Ni Katamano eh kerendohr, kitail en koasoanehdi kitail en wia dahme sounmelkahkao ntingihedi: “Ngeni, kapinga KAUN-O, oh dehr manokehla sapwellime kalahngan lapalap.”—Mel. 103:2.