Tamataman Tomwo ni Kalahngan
1, 2. Dahme kahrehda kitail anahne tamanda tomwo ni kalahngan?
1 Pwehn peikiong Sapwellimen Sises kehkehlik, Kristian kan nan sampah pwon pahn tuhpene mwurin kihrlahn ketipin ni Rahn Kaunop, March 22, 2008, pwe irail en kataman kamatalahn Sises Krais. (Luk 22:19; 1 Kor. 11:23-26) Kitail kin mwekidki en wia met pwehki atail kin kalahnganki soahng koaros me pweidahr rahno me wia sounpar 1975 samwalahro. Sang ni eh kolokolete eh lelepek mendahki eh lelohng lokolok laud oh mehla, Sises kasarawihla mwaren Seme, oh ketikidahier pasapeng unsek ong iren karaun likamw me Sehdan wiahda.—Sohp 1:11; Lep. Pad. 27:11.
2 Ntahn Sises me kerediher kamanalahr inou kapwo, oh kahrehiongehr aramas soh unsek kan ar kakehr wia sapwellimen Koht seri en pwekpwek kei me ahneki koapworopwor en iang Krais nan sapwellime Wehin nanleng. (Ser. 31:31-34; Mark 14:24) Patehng met, uwen laud en sapwellimen Koht limpoak ong tohnsampah kan sansalda sang ni eh ketin meirongkihla sapwellime Ohl kompoake, nin duwen me pein Sises kawehwehiong Nikodihmus.—Sohn 3:16.
3. Iaduwen irail kan me pahn iang towehda Kataman kak paiekihda?
3 Luke Meteikan: Atail Doadoahk Ong Wehio en January kangoange kitail en ntingihdi eden emenemen aramas me kitail pahn luke. Iaduwen, ke tepidahr luke irail kan me adarail kan mi nan doaropwe me ke ntingihdi? Ke koasoanehdi en uhdahn iang doadoahk tohrohr me pahn tepida sang March 1 pwehn luke aramas akan ong Kataman wet? Irail kan me pahn iang towehda kataman wet pahn rong padahk me poahsoankihda iren Paipel kan me kak kakehlailih arail pwoson tomwo, oh met pahn kahluwairaillahng mour soutuk.—Rom 10:17.
4. Dahme kahrehda kitail anahne mwadang kohdo wasahn Kataman?
4 Koaros me kak anahne pilahn en mwadang kohdo pwehn kasamwo irail kan me ale doaropwe en luhk. Pwehki aramas tohto pahn iang towehda Kataman, e kesempwal kitail en sewese me kapw kan oh pil irail kan me pak kei kin kohdo iang towehda mihding.
5. Iaduwen ke kak kaunopada mohngiongomw ong rahn kesempwal wet?
5 Kaunopada Mohngiongomw: Examining the Scriptures Daily (Iren Rahn)—2008 oh Kalendar en 2008 kasalehda koasoandi tohrohr en wadawad en Paipel ong Kataman me pahn tepida sang March 17. Medemedewe irair kesempwal kan me pwarada erein rahn akan en kaimwiseklahn mouren Sises nin sampah pahn sewese iuk pwehn kaunopada mohngiongomw ong iang towehda Kataman. Kapakap oh doudouloale irair en Paipel pwukat pahn kalaudehla ahmw kalahnganki sapwellimen Siohwa oh Sises limpoak sang ni ara ketikihda meirong en tomw.—Mel. 143:5.
6. Iaduwen atail kin kalaudehla atail kalahnganki tomw wet pahn kamwakid kitail?
6 Pwehki rahnen Katamano kerendohr, kitail anahne nsenohki kaunopada pein kitail oh sewese meteikan en kaunopada ong rahn kesempwal wet. Ni atail pahn kin tamataman tomwo ni kalahngan pahn kakehlail atail nanpwungmwahu rehn Siohwa oh sapwellime Ohl. (2 Kor. 5:14, 15) E pil kamwakid kitail en alasang ira sang ni atail kin kasalehda limpoak soh roporop ong meteikan.—1 Sohn 4:11.