Kitail Pahn Kihseli Doaropwehn Luhk ong Kataman nin Sampah Pwon!
1. Doadoahk tohrohr dahieu me koasoandi en wiawi nin sampah pwon mwohn Kataman?
1 Sises mahsanih: “Kumwail wia met ong ni katamanpei.” (Luk 22:19) Pwehn kapwaiada sapwellimen Sises kehkehlik wet, tohnkaudok kan en Siohwa pahn pokonpene iangahki koaros me men iang towehda ni March 30, 2010 oh wia katamanpen kamatalahn Sises. Kitail pahn kihseli doaropwehn luhk tohrohr ehu ong Katamano nin sampah pwon tepida sang March 13 lel March 30.
2. Ia duwen atail pahn kak kihla doaropwehn luhk?
2 Ia Duwen Atail Pahn Wia Doadoahk Wet: Ke kak kihong tohnihmwo doaropwehn luhko pwe en kak kilang kilelo, kowe eri nda: “Ni soutik en March 30, aramas rar kei nin sampah pwon pahn tuhpene pwehn wia katamanpen kamatalahn Sises. I leledo rehmwail pwehn kihong komwi oh omw peneinei doaropwehn luhk wet pwe kumwail en kak iang towehda kataman wet. Ke pil kak luke kompoakepahmw kan. Menlau tehk ahnsou oh wasa me kataman wet pahn wiawi.” Ma konehng, ke kak wadek Luk 22:19 pwehn kasalehda kehkehlik wet sang nan Paipel. Tamataman me pwehki sohte nohn laud atail ahnsou en kihla doaropwehn luhk wasa koaros, e pahn konehng en koasoi ni mwotomwot.
3. Ihs me kitail kak luke?
3 Ma wasahn kalohk ong amwail mwomwohdiso wia wasa laud ehu, elder kan kak padahkihong kumwail en kihdi doaropwehn luhk wet ni ihmw akan me sohte towe. Ma e konehng, kihla makasihn kan iangahki doaropwehn luhko. Luke irail me ke kin pwurehng pwurala rehrail, irail tohnsukuhl en Paipel kan, iengomw tohndoadoahk oh tohnsukuhl kan, kisehmw kan, mehn mpomw kan oh meteikan me ke ese.
4. Dahme atail wehwehki oh kalahnganki sapwellimen Siohwa limpoak pahn kamwakid kitail en wia?
4 Kaunopada en Iang Doadoahk Wet: Ahnsoun Kataman kin wia ahnsou mwahu ehu pwehn kalaudehla atail iang doadoahk en kalohk. Ke kak wiahda omw koasoandi pwe ken kak iang sawaspen pioneer? Mie noumw seri kan de tohnsukuhl en Paipel kan me kin kekeirda mwahu? Ma ei, ke kak tuhwong elder kan pwehn kilang ma re kakehr iang doadoahk tohrohr wet nin duwen sounkalohk kan me saikinte papidais. Atail kin wehwehki oh kalahnganki sapwellimen Siohwa limpoak ni eh ketikihda meirong tomwo pahn kamwakid kitail en iang towehda Katamano oh pil luke uwen me kitail kak pwe ren iang towehda.—Sohn 3:16.