Kihseli Doaropwehn Luhk ong Kataman Pahn Tepida April 2
1. Iahd me kitail pahn kihseli doaropwehn luhk en kataman nan pahr wet? Dahme kahrehda doadoahk wet kesempwal?
1 Sang April 2 lel 17, kitail pahn kihseli doaropwehn luhk ong wiewia me keieu kesempwal nan ehuehu sounpar. Met iei Katamanpen pwoulahn Krais. Me tohto kin mwekidki doadoahk tohrohr wet. Karasepe, ehu rahnen katamano lih emen delepwohnla ni ehu ohpis en Sounkadehdehn Siohwa kan oh nda: “I ahpwtehn pwurodo imweie oh I diarada doaropwehn luhk ehu pahn ei wenihmwe. I men iang towehda ahpw I sehse iahd e pahn wiawi.” Brother me sapengo kawehwehiong ih ia wasa nan doaropweo me e kak diar. Liho imwikihla eh koasoi ni eh nda, “I pahn iang amwail sarawi pwohnget!”
2. Dahme kitail kak nda ni atail pahn kihla doaropwehn luhk wet?
2 Ia Mwomwen Atail Pahn Wia Met: Pwehki ahnsou eh sohte itar pwehn kalohk nan wasahn kalohk koaros, e pahn keieu mwahu en koasoi ni mwotomwot. Kitail kak nda: “Kaselehlie. Se men kihong omw peneinei doaropwehn luhk wet ong ehu kataman kesempwal me pahn wiawi nan sampah pwon ni Rahn Sarawi, April 17. [Kihong tohnihmwo doaropweo.] Rahno iei rahn me Sises ketin pwoula. Padahk ehu sang Paipel pahn wiawi me pahn kawehwehda ia duwen atail kak paiekihda tomw en Krais. Doaropwe wet kasalehda wasa oh iahd me kataman wet pahn wiawi ie.”
3. Ia duwen atail kak luke aramas tohto?
3 Ma wasahn kalohk en omw mwomwohdiso lapala, mwein elder kan pahn padahkihong kumwail en kihdi doaropwehn luhko ni ihmw kan me sohte towe. Kitail kak kihdi wasa me aramas teikan likin tohnihmwo, sohte pahn kilang. Taman ken luke irail me ke kin pwurala rehrail, omw peneinei, iengomw tohndoadoahk kan, iengomw tohnsukuhl kan, oh meteikan me ke ese. Ni omw kin iang kihseli doaropwe wet ni imwin wihk kan, pil kihla Kahn Iroir ma konehng. Ia duwe, ke kak iang wia sawaspen pioneer nan April oh doadoahngki ahnsou laud ong doadoahk kaperen wet?
4. Dahme kahrehda kitail men aramas tohto en iang towehda Katamano?
4 Irail me pahn iang Katamano pahn alehdi padahk kesempwal kan! Re pahn rong duwen sapwellimen Siohwa limpoak laud ni eh ketikihda tomwo. (Sohn 3:16) Re pahn sukuhlki ia duwen Wehin Koht eh pahn kapaiada aramas. (Ais. 65:21-23) Irail pil pahn kak koasoiong brother kan me iang sawas oh peki onop en Paipel pwe ren kalaudehla dahme re sukuhlki. Kitail kin kapakapki me irail me tohto me men sukuhlki duwen Siohwa pahn mwekidki doadoahk wet oh iang kitail towehda Katamano!