Doadoahk Tohrohr en Pakairki Rahnen Katamano Pahn Tepida March 17
1. Dahme pahn tepida wiawi nan March 17?
1 Koasoandi en Kataman nan ehuehu pahr kin wiawi pwehn pakairki duwen pwoulahn Sises. (1 Kor. 11:26) Eri, kitail men meteikan en iang kitail towehda oh rong duwen kisakis en meirong en Sises me Siohwa ketikihda ni limpoak. (Sohn 3:16) Nan pahr wet, atail doadoahk tohrohr en luke aramas akan ren iang towehda Katamano pahn tepida Rahn Kaunop, March 17. Ke kasikasik ken iang oh pil wia uwen omw kak nan doadoahk tohrohr wet?
2. Dahme kitail kak nda ni ahnsou me kitail pahn kihla doaropwehn luhk?
2 Dahme Kitail Kak Nda: E pahn keieu mwahu ma kitail koasoi ni mwotomwot. Ele kitail kak nda: “Kaselehlie. Se men kihong omw peneinei doaropwehn luhk wet ong mwekid kesempwal ehu me kin wiawi nan pahr koaros nan sampah pwon oh me pahn wiawi nan April 5. Padahk ehu sang nan Paipel pahn wiawi me pahn kawehwehda dahme pwoulahn Sises wiadahr oh dahme Sises kin ketin wiewia met. Padahk wet sohte isepe. Doaropwehn luhk wet pahn kasalehda wasa oh kuloak me tuhpene wet pahn wiawi.” Ni atail pahn iang kihseli luhk wet ni imwin wihk kan, kitail pil anahne kihla Kahn Iroir ni ahnsou me konehng.
3. Ia duwen atail kak luke aramas tohto ni uwen atail kak?
3 Luke Uwen me Ke Kak: Atail mehn akadei iei en luke aramas tohto ni uwen atail kak. Eri, ke anahne luke irail me ke kin onop Paipel rehrail, irail kan me ke pwurala rehrail, kisehmw kan, iengomw tohndoadoahk kan, iengomw tohnsukuhl kan, mehn mpomw kan oh pil meteikan. Elder kan pahn padahkihong uhk ia duwen omw pahn apwalihala omw wasahn kalohk. Doadoahk tohrohr wet me kitail kin wia nan sounpar koaros pwehn luke aramas akan ong Katamano kin imwila mwahu. Nan pahr me nekiero ni ahnsou me emen lih pedolong nan wasa me Katamano wiawi, emen brother me kin sewese tohn mihting idek reh ma e anahne sawas en rapahkihda sounkalohko me lukehdo ih. Ahpw liho nda me e sohte ese emen wasao oh me e alehdi doaropwehn luhko sang rehn emen me kalohk ihmw lel ihmw nan eh wasao rahno.
4. Ia kahrepen atail kin ngoangki iang doadoahk tohrohr en luke aramas?
4 Mwein mie me pahn iang towehda Katamano pwehki ke kihdi doaropwehn luhk ehu ni imweo. Mehnda ma re mwekidki de soh, omw nanti pwerisekiong met pahn wia mehn kadehde mwahu. Doaropwehn luhk wet me ke pahn kihla pahn pakairki me ahnsou wet Sises ketin wia Nanmwarki lapalap men. Omw ngoangki iang doadoahk tohrohr wet pahn kasalehiong koaros, irail kan nan wasahn kalohk, iengomw sounkalohk kan, oh me keieu kesempwal, Siohwa, me ke kin uhdahn kalahnganki kisakis en meirong en Sises.—Kol. 3:15.