Doadoahk Tohrohr en Pakairki Kataman!
1. Tepida sang March 21, 2009, dahme sounkalohki Wehio kan nan sampah pwon pahn wia? Pwekida?
1 Niepeng, April 9, 2009, tohnkaudok en Siohwa Koht nan sampah pwon pahn pokonpene pwehn tamanda sapwellime limpoak laud ong tohnsampah. (Rom 5:6-8) Kitail kasikasik aramas rar kei me nsenohki padahk mehlel en iang kitail kasarawi katamanpen kamatalahn Sises. Tepida sang March 21, kitail pahn kihseli doaropwe en luhk tohrohr ong Kataman nan sampah pwon.
2. Dahme ke pahn tamataman ni ahmw pahn kihla doaropwe en luhk?
2 Ire kan en Tamataman: Doadoahngki mwahu kilel kan, peidek kan oh iren Paipel kan me mi nan doaropweo. Karasepe, ke kak kasalehda kilel en mwowe oh nda: “I men luke komwi en iang kiht kasarawi katamanpen kamatalahn Sises me pahn wiawi Niepeng, April 9, 2009.” Mwurin mwo, kasalehda oaralap en doaropweo oh peidek kan me kileldi pah. Padahkihong tohnihmwo me e kak luke eh peneinei oh meteikan.
3. Ia duwen ke pahn sewese irail kan me ke luke nan doadoahk tohrohr wet?
3 Ma wasahn kalohk en amwail mwomwohdiso kin laud, elder kan pahn padahkihong kumwail en kihdi doaropweo ni ihmw kan me sohte towe. Ni Rahn Kaunop kan, kitail pahn kihla makasihn kan oh doaropwe en luhk. Akadeiong en luke irail kan me ke kin kaukaule pwurala rehrail oh onop Paipel rehrail, ahmw peneinei, iengomw tohnsukuhl kan oh tohndoadoahk kan, mehn mpomw kan oh aramas teikan me ke ese. Pahr me ahpwtehn neko, emen sister luke eh peneinei 30 oh pwurepwurehng katamankin irail kesempwalpen Katamano. E inenen perenkihda pwe 25 sang rehrail iang towehda Katamano oh mwuhr pahmen tepida onop Paipel!
4. Koasoandi dah kan kitail anahne koasoanehdi ahnsou wet? Pwekida?
4 Kaunopada Met: Sounkalohk tohto pahn kak kalaudehla arail doadoahk en kalohk nan March oh April. Ma noumw seri kan de irail kan me kin onop Paipel rehmw kin kekeirda mwahu, mwein irail pahn kak wiahla sounkalohk kan me saikinte papidais. Met iei ahnsou mwahu en tepida koasoanehdi atail koasoandi kan pwehn wia uwen atail kak en iang doadoahk tohrohr wet me pahn pakairki katamanpen limpoak laud me Siohwa oh Sises ketin kasalehda.—Sohn 3:16; 15:13.