Sewese Meteikan en Paiekihda Meirong Tomw en
Sises Katamanpen Kamatalahn Krais Pahn Wiawi April 12
1. Ia ehu ahl me sapwellimen Koht aramas akan kin kasalehda arail kalahnganki meirong tomw en Sises?
1 “Kitail kapingkalahngankihong Koht sapwellime kisakis kesempwal wet!” (2 Korint 9:15) Mahsen pwukat kin kasalehda mwahu atail pepehm nin duwen limpoak-kadek me Koht ketin kasalehiong sapwellime aramas ni ah koasoanehdi sapwellime Ohl, Sises Krais, ong meirong tomw ehu. Atail kalahnganki dahme Siohwa Koht oh Sises Krais ketin wia pahn sansal ni atail pahn kohpene ni April 12 pwehn kasarawi Katamanpen Kamatalahn Krais.
2. Ihs kin patehng sapwellimen Siohwa ladu kan oh iang kasarawi Kataman, oh dahme irail anahne wia pwehn paiekihda meirong tomw en Sises?
2 Aramas million pak 10 pahn patehng sapwellimen Siohwa ladu kan pwehn kasarawi Kataman wet nan pahr koaros. Ni ahl wet, irail kin kasalehda arail kalahnganki meirong tomw en Krais. Ahpw, pwehn paiekihda meirong tomwo, irail anahne pwoson meirong tomw wet. (Sohn 3:16, 36) Iaduwen kitail kak sewese irail en kak kakairada soangen pwoson wet? Nan sounpwong wet oh sounpwong kohkohdo kan, kitail kak kangoange irail en onop Paipel rehn Sounkadehde kan oh pil iang towehda mihding kan koaros. Tehk iren sawas kan me pid duwen met.
3. Iaduwen kitail kak tepida onop en Paipel rehn irail me kitail kin luhke ong Kataman?
3 Onop Paipel: Ni ahnsou me ke luhke aramas akan pwehn iang towehda Katamano, dahme ke soh nantihong tepida onop en Paipel rehrail oh doadoahngki pwuhken Loalokong? Ke kak kawehwe ong ih duwen Katamano ni ahmw pahn wadek pali 127, parakrap 18. Ke kak koasoia duwen ire wet ni ahnsou me ke tuhwong ih pak ehu de pak riau, mwein ahnsou me kumwa kesikesihnen oh koasoia Pwuhk Sarawi limwahn ah wenihmwo. Ni ahnsou me kumwa kanekehla, ke kak koasoia ire kan nan irelaud 7 me oaralap koasoia: “Dahme Koht Ketin Wiadahr Pwehn Doarehla Aramas.” Ni ahnsou me ke kin kaukaule onop Paipel reh, ke kak onop reh tepin irelaud kan nan pwuhko.
4. Ihs me kitail kak tepida onop Paipel reh nan sounpwong wet oh pil sounpwong kohkohdo kan?
4 Ihs me kitail kak tepida onop Paipel reh ni atail doadoahngki irelaud 7 nan pwuhken Loalokong? Ke kak tepida onop Paipel rehn iengomw tohndoadoahk kan, iengomw tohnsukuhl akan, oh mehn mpomw kan me kin perenki rong. Brother kan kak tuhwong ahn sister kan arail pwoud kan me sohte iang padahk mehlel pwehn tepida onop Paipel rehrail. Oh pil, ke dehr manokehla tepida onop Paipel rehn tohn ahmw peneinei me saikinte wiahla Sounkadehde kan. Kitail pil pahn nantihong luhke aramas koaros me kin kalap iang towehda mihding kan en pil iang towehda Katamano. (Luk 15:3-7) Kitail en nantihong sewese aramas pwukat en paiekihda meirong tomw en Sises.
5. Iaduwen kitail kak kangoange irail me kin onop Paipel oh pil aramas teikan me perenki rong en iang towehda mihding kan en mwomwohdiso?
5 Mihding kan en Mwomwohdiso: Mihding me aramas kin tepin iang iei Kataman. Ahpw, iaduwen atail pahn kak kangoange irail en iang towehda oh pil paiekihda mihding en mwomwohdiso teikan? Atail Doadoahk Ong Wehio en April 2005, pali 8, kasalehda duwen iren sawas pwukat: “Kasalehiong ih oaralap en Kapahrek ong Wehi Pokon me pahn wiawi Rahn Sarawi en wihket. Oh pil, kasalehiong ih mehnia artikel en Kahn Iroir kitail pahn onopki oh pil mehnia pwuhk oh iawasa nan pwuhko me kitail kin onop ong Pwuhk Study en Mwomwohdiso. Kawehwe dahme kin wiawi nan Theocratic Ministry Sukuhl oh Service Mihding. Ni ahnsou me ke pahn wia ahmw padahk nan Theocratic Ministry Sukuhl, ke kak praktis ahmw padahk rehn ahmw Paipel Study. Ehukihong ih ire kesempwal kan me ke sukuhliki ni mihding kan. Doadoahngki kilel kan nan pwuhk kan pwehn sewese ih en medemedewe dahme kin wiawi nan mihding kan. Sangete ni ahnsou me ke tepida onop rehn aramas akan, luhke irail en iang towehda mihding kan.”
6. Ia ahl riau me kitail kak sewesehki aramas me mohngiong mehlel en kak iang paiekihda meirong tomw en Sises?
6 Ni ahnsou me aramas me mohngiong mehlel kin onop Paipel kaukaule oh pil kaukaule iang towehda mihding kan koaros en mwomwohdiso, irail pahn kak kekeirada ni pali ngehn. Kahrehda, e pahn mwahu en kangoange meteikan en paiekihda koasoandi pwukat me kin sewese kitail koaros en kekeirada ni pali ngehn oh pil paiekihda sapwellimen Koht kisakis laud me iei meirong tomw en Sises Krais.