Kaunopada ong Katamano ni Mohngiong Peren
1. Ahnsoun Katamano kin wia ahnsou tohrohr ehu en wia dah?
1 Kataman en Niare, March 26, kin wia ahnsou kaselel ehu en perenki sapwellimen Koht elen komour. (Ais. 61:10) Pil ahnsou kan mwohn katamano anahne wia ahnsou kaperen ong kitail. Eri ia duwen atail kak wiahki ahnsoun kaunopada wet ahnsou kaperen ehu ahpw kaidehn ihte pwukoa ehu?
2. Dahme kin kamwakid kitail en kaunopada ong Katamano?
2 Kaunopada ong Katamano: Saken Soutik en Kauno iei mehkot me inenen kesempwal ahpw mengei en wia. Ahpw anahne kaunopada mwowe pwe ire kesempwal kan de manokonokla. (Lep. Pad. 21:5) Ahnsou oh wasa me konehng wiawi ie anahne koasoandi. Anahne kaunopada pilawa oh wain. Wasa me Katamano pahn wiawi ie anahne kamwakelda oh kaunopada. Me pahn wia padahk anahne kaunopada mwahu. Brother kan me kin wahseli pilawa oh wain oh pil brother kan me kin sewese tohn mihtingo anahne ese dahme re pahn wia. Pali laud en koasoandi pwukat wiawihdahr. Atail kalahnganki sapwellimen Sises meirong kin kamwakid kitail en kaunopada mwahu ong koasoandi sarawi wet.—1 Pit. 1:8, 9.
3. Ia duwen atail kak kaunopada atail mohngiong ong Saken Soutik en Kauno?
3 Kaunopada Mohngiong: E pil kesempwal en ‘kaunopada atail mohngiong’ pwehki kitail anahne wehwehki kesempwalpen Katamano. (Esra 7:10, NW) Pwehn wia met, kitail anahne koasoanehdi ahnsou pwehn wadek wasahn wadawad en Paipel ong Katamano oh doudouloale kaimwiseklahn rahn akan en sapwellimen Sises mour nin sampah. Atail doudouloale sapwellimen Sises madamadau en tounmetei pahn kin kamwakid kitail en alasang ih.—Kal. 2:20.
4. Mehnia kamwahupen sapwellimen Sises meirong me kin kihong uhk peren me keieu laud?
4 Pwoulahn Krais kin kadehdehda sapwellimen Siohwa pwuhng en kaunda. E kin kasaledek kitail sang dihp oh mehla. (1 Sohn 2:2) E ritingada elen ahneki nanpwungmwahu rehn Koht oh pil elen mour soutuk. (Kol. 1:21, 22) E pil kin kakehlakahda atail koasoanehdi teng en kapwaiada atail inou ong Siohwa oh wiewiahte sapwellimen Sises tohnpadahk. (Mad. 16:24) Ni omw kin kaunopada oh iang towehda Kataman me pahn wiawi, omw peren pahn lalaudla!