Ke Kaukaunop ong Katamano?

Rahno Nisan 13 pahr 33. Sises ketin mwahngih me ih kaimwiseklahn pwohng me e pahn ketiket rehn sapwellime werek me e kin keieu karanih kan mwohn eh pahn kamakamla. E pahn kasarawih kaimwiseklahn eh iang irail towehda Pahsohpa oh mwurin mwo e pahn ketin wiahda kasarawi kapw ehu, Saken Soutik en Kauno. Soangen ahnsou kesempwal wet kin anahne kaunopada. Ihme kahrehda, e ketin poaronehla Piter oh Sohn pwehn kaunopada soahng kan. (Luk 22:7-13) Nan pahr koaros sangete ahnsowo, e kin kesempwal ong Kristian kan me kin inengieng iang kasarawi Katamano en kin kaunopada ong mwekid wet. (Luk 22:19) Soahng dah kan me kesempwal kitail anahne kaunopada ong Kataman me pahn wiawi nan April 3?

Kaunopada Sang Elder kan:

Wiahda koasoandi kan en doadoahngki Wasahn Kaudok de pil ehu wasa me konehng. E pahn anahne wasa me mie wasahn mwomwohd me itar, dengki marain, oh wasa me angimwahu oh kak esingek mwahu. Koasoanehdi en kamwakelehda mwahu wasahn kataman mwohn ahnsowo.
Pilada emen me warohng wia padahk, sounpakair, oh brother kan me pahn kapakapki pilawa oh wain.
Ma pahn mie prokram tohto me pahn wiawi nan wasaote, koasoanehdi ahnsoun pokonpene oh pil koasoandi en pedolong oh pedoi sang wasao oh wasahn peidi kan.
Pilada oh koasoanehdi irail brother kan me pahn sewese tohn mihting oh irail kan me pahn iang kihseli pilawa oh wain.
Koasoanehdi en wiahda pilawa oh wain me konehng, oh pil dahl, kep en wain, tehpel me konehng, oh pweinen tehpelo.

Kaunopada Sang Sounkalohk kan:

Koasoanehdi en iang wia uwen omw kak nan doadoahk tohrohr wet en kihseli doaropwehn luhk.
Ntingihdi omw onop en Paipel kan, kisehmw kan, iengomw tohnsukuhl kan, iengomw tohndoadoahk kan, oh meteikan me ke kin ese, oh luke irail.
Wadek oh doudouloale wadawad en Paipel ong Kataman.
Kohdo ni Katamano onopada en kasamwo irail kan me kohdo.