Kumwail Kaukaunop ong Katamano?

Kaimwiseklahn Pahsohpa me Sises ketin wiao uhdahn kesempwal. Pwehki e pahn kereniong pwoula, e ketin koasoanehdi en iang sapwellime wahnpoaron ko tungoale sak en Pahsohpao, oh ketin tapiada koasoandi kapw ehu me pahn kin wiawi pahr koaros, me iei Saken Soutik en Kauno. Ih eri poaronehla Piter oh Sohn ira en kaunopada pereo. (Luk 22:7-13; menlau kilang kilel en mwoweo.) Met katamankihong kitail me kitail anahne kaunopada ong Katamano ni March 27. Ele mwomwohdiso wiadahr koasoandi kan ong ihs me pahn kapahrek, wasa, pilawa oh wain, sounsawas kan, oh pil soahng teikan. Ahpw dahme emenemen kitail kak wia pwe kitail en onopadahng Katamano?

Kaunopada omw mohngiong. Wadek oh doudouloale wadawad en Paipel ong Katamano. Mie koasoandien wadawad nan neitail Tetehk Paipel Ehuehu Rahn. Pil mie koasoandien wadawad nan pwuhk Sawas ong Onopki Mahsen en Koht nan irelaud 16, pali 54-56 me kasalehda oaritik kan. (Pil kilang Doaropwehn Kasukuhl ong Mihting en Mour oh Kalohk en April 2020.) Peneinei kan kak diarada ire kan me re pahn doadoahngki nan kaudok en peneinei me pid kesempwalpen pweinen pweipwei sapahlo, ni arail pahn tehk Index en Sawaspen Paipel kan (Watch Tower Publications Index) de Sawas ong Wia Roporop en Sounkadehdehn Siohwa kan.

Luke meteikan ren iang kataman. Kalaudehla omw ahnsou en iang doadoahk tohrohr en luhk. Medemedewe ihs me ke kak luke, duwehte irail me ke kin pwurehng pwurala rehrail, me ke onop Paipel reh mahs, irail me ke tuhwong oh omw peneinei kan. Elder kan anahne luke irail kan me sohla iang kalohk oh mihting. Tamataman me ma emen sohte kin kousoan nan omw wasa, ke kak diarada ahnsou oh wasa me Katamano pahn wiawi wasa e kin mi ie ni omw pahn padik DUWEN KIHT tab, keieu powe nan jw.org/pon home page, kowe eri pilada “Kataman.”

Dahme kitail pil kak wia pwehn kaunopada?