Luke Irail en Kohdo
1 Luhk ehu me kalohkadahr sounpar epwiki kei samwalahro kin ahnsouwet lohkseliehr nan sahpw 233: “Kitail kohdalahng pohn dohlen Kauno [“Siohwa,” New World Translation], . . . E ahpw pahn ketin kasalehiong kitail kupwure, pwe kitail en keid nan sapwellime ahl akan.” (Aiseia 2:3) Kahluwa aramas akan ong sapwellimen Siohwa pwihn kin wia ehu ahl me keieu mwahu me kitail kak sewesehki aramas pwe re en kekeirada ni pali ngehn me pahn kahluwalahng mour soutuk.
2 Ekei sounkalohk kan kin pweiek en luke aramas akan ong Kingdom Hall lau mwurin aramas ko kasalehda arail kekeirada nan arail onop en Paipel. Ahpw, ekei pak aramas akan pahn tepiada towehda mihding en mwomwohdiso kan mwohn re tepida onop Paipel. Kitail en dehr pwand en luke irail ni limpoak oh kangoange aramas akan en kohdohng mihding kan.
3 Dahme Kitail en Wia: Doadoahngki mwahu doarepwehn luhk [handbill] kan pwehn kehsehki aramas akan duwen atail mihding kan en sahpwet. Kasalehda me sohte isepen mihding kan oh sohte meirong kin wiawi. Kawehwehiong iaduwen mihding kan kin wiawi. Kasalehiong me mihding pwukat kin uhdahn wia ahnsoun onop en Paipel oh me mie pwuhk en onop en ire pwukat me kin kohda pwe koaros en kak idawehn onop. Kasalehiong soangsoangen wasa kan oh mour en irail kan me kin iang mihding. Padahkihong me irail ko me kin iang towehda mihdingo kin kohsang wasao oh me kitail kin pil kasamwo seri koaros en iang mihding. Kitail en lukehdo irail ko me kitail kin onop Paipel rehrail, oh sewese irail ni ahl koaros pwe ren iang towehda mihding.
4 Ehu kaimwseklahn mehkan me kileledi nan Paipel iei luhk limpoak ehu en ale sapwellimen Siohwa koasoandi en mour: “Ngehn sarawi oh lih kamwohdo mahsanih, “Kohdo!” . . . Mehmen me men nimpildahr en kohdo; en ale pilen komour nin duwen kisakis ehu, mehmen me men ale, en ale.” (Kaudiahl 22:17) Sohte mehkot me pahn wiliandi atail lukehdo meteikan en iang towehda atail mihding kan.
5 Kokohp en Aiseia 60:8 kin kasalehda duwen sounkaping kapw kid pak epwiki kei me ahnsouwet kin kohkohdo nan mwomwohdisohn sapwellimen Koht aramas akan me rasehng mwuroi kei me “likamwete depwek kei, likamwete mwuroi kei me pipihr pwurpwurodohng nan pasarail kan.” Kitail koaros kak lukehdo me kapw kan ong atail mihding kan oh kasamwo irail pwe ren nsenamwahu. Ni ahl wet, kitail pahn miniminiong Siohwa nindoken eh kamwadangehla doadoahk en kihkihpene aramas.—Aiseia 60:22.